Mga Pakiana Tikang ha mga Magbarasa

Ano nga leksyon an igintututdo han Proberbios 24:27?

Ha pagsagdon ha usa nga olitawo, an nagsurat han Proberbios nagsiring: “Andama an imo buruhaton ha gawas, nga himoa ini nga andam para ha imo dida ha uma; ngan ha kataliwan pagtukod han imo balay.” Ano an ginpapabug-atan hinin giniyahan nga proberbio? An lalaki kinahanglan mangandam hin maopay antes mag-asawa ngan magpamilya, ginpapamurubuot an mga responsabilidad nga nahiuupod hito.

Hadto, ini nga teksto usahay ginsasabot nga an bana ngan amay diri la kay magtatrabaho kondi mangangalimbasog liwat pagparig-on o pagdasig han iya pamilya, sugad pananglitan han pagtutdo ha ira mahitungod ha Dios. Bisan kon husto ngan Kasuratanhon ito, baga hin diri ito an iginpapasabot hini nga teksto. Kay ano? Tagda an duha nga hinungdan.

Siyahan, diri ini naghihisgot hin pagtukod nga nagpapasabot hin pagdasig o pagparig-on han naeksister na nga pamilya. Lugod, nagpapasabot ito hin literal nga pagtukod hin balay. An pulong nga “pagtukod” mahimo liwat magin simboliko, nga nangangahulogan hin pagtikang o pag-establisar hin pamilya pinaagi han pag-asawa ngan pagkaada mga anak.

Ikaduha, ginpapabug-atan hini nga teksto nga buhaton an mga butang ha husto nga pagkasunod-sunod, sugad hin nasiring, “Siyahan buhata ini, sunod ito.” Kon sugad, iginpapasabot ba hini nga proberbio nga kinahanglan unahon an sekular nga mga trabaho antes an espirituwal nga mga buruhaton? Syempre diri.

Ha panahon han Biblia, kon an usa nga lalaki naruruyag “pagtukod han [iya] balay” o pag-asawa ngan pagpamilya, sadang niya pakianhan an iya kalugaringon, ‘Andam na ba ako pag-ataman ngan pagsuporta hin asawa ngan mga anak?’ Antes magpamilya, may-ada hiya sadang buhaton—atamanon an iya uma o mga tanom. Salit an Maopay nga Sumat nga hubad han Biblia prangka nga nasiring: “Ayaw anay pagbalay ngan pagtukod hin panimalay ngada han kaandam han imo kaumhan, ngan sigurado ka na nga may nimo kabubuhian.” Aplikado ba ito nga prinsipyo yana?

Oo. An lalaki nga naruruyag pag-asawa kinahanglan mangandam hin maopay para hito nga responsabilidad. Kon maaakos han iya panlawas, kinahanglan hiya magtrabaho. Syempre, diri la materyal an sadang niya itagana ha iya pamilya. An Pulong han Dios nasiring nga an diri mag-ataman ha pisikal, emosyonal, ngan espirituwal nga panginahanglan han iya pamilya mas maraot pa kay han waray pagtoo! (1 Tim. 5:8) Salit kon nangangandam pag-asawa ngan pagpamilya, sadang pakianhan han usa nga olitawo an iya kalugaringon: ‘Makakagtagana na gud ba ako han materyal nga panginahanglan han pamilya? Andam na ba ako nga manguna ha espirituwal nga mga buruhaton han pamilya? Matutuman ko ba an responsabilidad han pagdumara hin regular nga pag-aram ha Biblia ha akon asawa ngan mga anak?’ Ginpapabug-atan han Pulong han Dios nga importante ito nga mga responsabilidad.—Deut. 6:6-8; Efe. 6:4.

Salit an olitawo nga namimiling hin maarasawa sadang maghunahuna hin maopay han prinsipyo ha Proberbios 24:27. Ha pariho nga paagi, sadang pakianhan han usa nga daraga an iya kalugaringon kon andam na ba hiya ha mga responsabilidad han pagin asawa ngan nanay. Mahimo liwat pamurubuuton han mga karaslon o bag-o nga mag-asawa ini nga mga pakiana kon nagpaplano hira pag-anak. (Luk. 14:28) An pagsunod hini nga giniyahan nga sagdon makakabulig ha katawohan han Dios nga malikyan an duro nga kasubo, ngan magkaada malipayon nga pamilya.

[Blurb ha pahina 12]

Antes mag-asawa, ano an sadang igpakiana han usa nga olitawo ha iya kalugaringon?