Nakagamot Ka ba Ngan Marig-on ha Pundasyon?

NAKAKITA ka na ba hin daku nga kahoy nga ginhahampak hin makusog hinduro nga hangin? Bisan kon nababay-og gud ito, diri ito natutumba. Kay ano? Tungod kay nakagamot ito hin hilarom ha tuna. Mahimo kita magin sugad hito nga kahoy. Kon nakakaeksperyensya hin sugad-bagyo nga mga problema, mahimo liwat kita makailob kon magpabilin kita nga ‘nakagamot ngan marig-on’ ha pundasyon. (Efe. 3:14-17) Ano ito nga pundasyon?

An Pulong han Dios nasiring nga hi Kristo Jesus an pundasyon han Kristiano nga kongregasyon. (Efe. 2:20; 1 Kor. 3:11) Sugad nga mga Kristiano, gin-aaghat kita nga ‘sumunod ha iya, nga nakagamot ngan natukdaw ha iya ngan marig-on ha pagtoo.’ Kon buhaton naton ito, malalamposan naton an ngatanan nga pagsari ha aton pagtoo, pati na an mga “pulong nga makalulumay” nga iginbasar ha ‘waray pulos nga panlimbong’ han mga tawo.—Kol. 2:4-8.

“An Kahaluag, Ngan Kahilaba, Ngan Kahitaas, Ngan Kahilarom”

Kondi, paonan-o kita ‘makakagamot’ ngan ‘magririg-on ha pagtoo’? Usa nga paagi amo an maduruto nga pag-aram han Pulong han Dios. Karuyag ni Jehova nga “magkusog [kita] ha pagsabot upod ha ngatanan nga mga baraan, kon ano an kahaluag, ngan kahilaba, ngan kahitaas, ngan kahilarom.” (Efe. 3:18) Salit, waray Kristiano nga sadang makontento ha hamabaw la nga pagsabot o matagbaw ha paghibaro la han “siyahan nga pag-aradman” nga aada ha Pulong han Dios. (Heb. 5:12; 6:1) Ha kabaliktaran, an tagsa ha aton sadang magin disidido nga pahilarumon an pagsabot ha kamatuoran han Biblia.—Prob. 2:1-5.

Syempre, diri ini nangangahulogan nga damu nga kahibaro la an ginkikinahanglan basi ‘man-gamot ngan manrig-on’ ha kamatuoran, kay bisan hi Satanas maaram kon ano an aada ha Biblia. Labaw pa an ginkikinahanglan. Importante nga aton ‘kilalahon an gugma ni Kristo nga labaw ha ngatanan nga kinaadman.’ (Efe. 3:19) Bisan pa hito, kon nag-aaram kita tungod kay hinigugma naton hi Jehova ngan an kamatuoran, maghihilarom an aton pagsabot ha Pulong han Dios ngan magririg-on an aton pagtoo.—Kol. 2:2.

 Proybahi an Imo Pagsabot

Yana, kay ano nga diri proybahan an imo pagsabot ha pipira han importante nga mga kamatuoran ha Biblia? Kon bubuhaton mo ito, maaaghat ka nga magin mas maduruto ha personal nga pag-aram han Biblia. Pananglitan, basaha an siyahan nga mga bersikulo han surat ni Pablo ha mga taga-Efeso. (Kitaa an kahon nga  “Ha mga Taga-Efeso.”) Katapos basahon ito, pakianhi an imo kalugaringon: ‘Nasasabtan ko ba an kahulogan han mga pulong hito nga teksto nga italiko an kasurat?’ Aton hisgotan an tagsa hito.

Ginpili nga Daan “ha Waray Pa Paghimoa an Kalibotan”

Hi Pablo nagsurat ha iya mga igkasi-tumuroo: “Ginpili kita . . . nga daan [han Dios] nga mga inangkon nga mga anak tungod kan Jesu-Kristo ha iya kalugaringon.” Oo, katuyoan ni Jehova nga mag-ampon hin pipira nga tawo basi magin kaapi han iya hingpit nga pamilya ha langit. Hira magmamando sugad nga hadi ngan saserdote upod ni Kristo. (Roma 8:19-23; Pah. 5:9, 10) Han siyahan nga gin-ayat ni Satanas an pagkasoberano ni Jehova, sugad hin nagsiring hiya nga may-ada depekto an mga tawo nga ginlarang han Dios. Salit angayan la nga mga tawo liwat an ginpili ni Jehova nga magkaada bahin ha pagwara han ngatanan nga karaotan ha uniberso, pati na an gintikangan han karaotan, hi Satanas nga Yawa! Kondi, waray pilia nga daan ni Jehova kon hin-o an iya aampunon. Lugod, katuyoan niya nga magkaada grupo han mga tawo nga magmamando upod ni Kristo ha langit.—Pah. 14:3, 4.

Ano an “kalibotan” nga ginhihisgotan ni Pablo han hiya magsurat ha iya mga igkasi-Kristiano nga sugad nga grupo, hira ginpili “ha waray pa paghihimoa an kalibotan”? Diri ito  an panahon antes larangon han Dios an tuna o an katawohan. Mababasol ba hira Adan ngan Eva kon antes pa hira larangon, igintanda na nga daan han Dios nga makakasala hira? Matatalapas hito an prinsipyo han hustisya. Kon sugad, kakan-o nagdesisyon an Dios kon paonan-o susulbaron an kahimtang nga resulta han pagdapig nira Adan ngan Eva ha pagrebelde ni Satanas ha Iya pagkasoberano? Ginbuhat ito ni Jehova katapos na magrebelde an aton siyahan nga mga kag-anak kondi antes pa umiksister an kalibotan han diri-hingpit kondi malulukat nga katawohan.

“Uyon ha Kamanggaran han Iya Grasya”

Kay ano nga nagsiring hi Pablo nga an kahikayan nga ginhisgotan ha siyahan nga mga bersikulo han Efeso nahimo ‘uyon ha kamanggaran han grasya’ o diri-takos nga pagkabuotan han Dios? Nagsiring hiya hito basi pabug-atan nga hi Jehova diri obligado nga lukaton an makasasala nga katawohan.

Ha pagkamatuod, waray bisan hin-o ha aton an takos lukaton. Kondi tungod han hilarom nga gugma ni Jehova ha katawohan, iya iginhatag an iya bugtong nga Anak basi lukaton kita. Kon huhunahunaon an aton pagkadiri-hingpit ngan pagkamakasasala, an paglukat ha aton usa nga kapahayagan han diri-takos nga pagkabuotan han Dios, sugad han ginsiring ni Pablo.

An Sagrado nga Sekreto han Katuyoan han Dios

Ha tinikangan, waray igsumat han Dios kon paonan-o niya susulbaron an karaotan nga ginhimo ni Satanas. Usa ito nga “tinago,” o sagrado nga sekreto. (Efe. 3:4, 5) Ha urhi, han naestablisar an Kristiano nga kongregasyon, iginsumat ni Jehova an mga detalye kon paonan-o niya tutumanon an iya orihinal nga katuyoan para ha katawohan ngan ha tuna. Hi Pablo nagsaysay nga ha “kabug-osan han panahon,” nag-establisar an Dios hin “pagkatinugyanan” o administrasyon, usa nga sistema han pagdumara nga magriresulta ha pagkaurosa han ngatanan niya nga intelihente nga linarang.

An siyahan nga bahin hito nagtikang han Pentekostes 33 K.P. han gintikangan ni Jehova pagtirok an makakaupod ni Kristo ha pagmando ha langit. (Buh. 1:13-15; 2:1-4) An ikaduha nga bahin amo an pagtirok hadton maukoy ha paraiso nga tuna sugad nga sakop han Mesianiko nga Ginhadian ni Kristo. (Pah. 7:14-17; 21:1-5) An termino nga administrasyon diri nagtutudlok ha Mesianiko nga Ginhadian, tungod kay an Ginhadian naestablisar la han 1914. Lugod, nagtutudlok ito ha pagdumara han Dios ha pagtuman han iya katuyoan nga ipahiuli an pagkaurosa ha bug-os nga uniberso.

“Magpakatigurang ha Hunahuna”

Waray ruhaduha nga an regular ngan maopay nga personal nga pag-aram mabulig ha imo nga bug-os nga masabtan “an kahaluag, ngan kahilaba, ngan kahitaas, ngan kahilarom” han kamatuoran. Kondi tungod han aton pagin sagipo, bangin madali liwat kita masulay ni Satanas nga diri na magin regular o umundang pa ngani ha pag-aram. Ayaw gud pagpasulay. Gamita an “kinaadman” nga iginhatag ha imo han Dios basi magin hamtong o “magpakatigurang ha hunahuna.” (1 Juan 5:20; 1 Kor. 14:20) Siguroha nga nasasabtan mo kon kay ano nga natoo ka ha imo gintotoohan ngan pirme ka makakapangatadongan mahitungod han “paglaom nga aada ha [imo].”—1 Ped. 3:15.

Handurawa nga nakadto ka ha Efeso han siyahan nga ginbasa an surat ni Pablo. Sigurado nga mapapagios ka nga maghingyap nga mas ‘makilala an Anak han Dios.’ (Efe. 4:13, 14) Salit, hinaot mapagios ka liwat han giniyahan nga mga pulong ni Pablo. An pagkaada hilarom nga gugma kan Jehova ngan husto nga kahibaro ha iya Pulong mabulig ha imo nga magpabilin nga ‘nakagamot ngan marig-on’ ha pundasyon nga amo hi Kristo. Hito nga paagi, malalamposan mo an bisan ano nga sugad-bagyo nga pagsari tikang kan Satanas antes umabot an kataposan hinin maraot nga kalibotan.—Sal. 1:1-3; Jer. 17:7, 8.

[Kahon/Retrato ha pahina 27]

 “Ha mga Taga-Efeso”

“Darayegon an Dios ngan an Amay han aton Ginoo Jesu-Kristo, nga nagbendisyon ha aton hin tagsa nga espirituhanon nga bendisyon ha mga langitnon nga lugar kan Kristo, sugad nga iya kita ginpili nga iya, ha waray pa paghihimoa an kalibotan, basi nga kita magputli ngan mawaray buring ha atubangan niya ha gugma: nga ginpili kita niya nga daan nga mga inangkon nga mga anak tungod kan Jesu-Kristo ha iya kalugaringon, sugad ha iya maopay nga kaburut-on, ha pagdayeg han himaya han iya grasya, nga ha waray bayad iginhatag niya ha aton ha Hinigugma: nga ha iya aada an aton paglukat tungod ha iya dugo, an pagpasaylo han aton mga pagtalapas, uyon ha kamanggaran han iya grasya, nga iya ginpahura dinhi ha aton ha bug-os nga kinaadman ngan salabotan, nga iginpakilala niya kita an tinago han iya kaburut-on, sugad ha iya maopay nga hunahuna nga gintuyo niya ha iya kalugaringon. Ngadto ha pagkatinugyanan han kabug-osan han panahon, ha pagtirok ha ngatanan nga mga bagay kan Kristo, an mga bagay nga aadto ha langit ngan hahani ha tuna.”—Efe. 1:3-10.