Pagsingba han Pamilya—Importante Basi Maluwas!

HANDURAWA kon ano kamakaharadlok an “daku nga adlaw han Dios, nga Makagagahum”! (Pah. 16:14) Iginhulagway ito hin matin-aw ni propeta Mika. Hiya nagsiring: “An kabukiran magkakatutunaw . . . , ngan an mga walog man-guguak, sugad hin taro ha atubangan hin kalayo, sugad hin mga tubig nga iginhuhuwad han umpas nga lugar.” (Mika 1:4) Ano an magigin resulta hito ha mga diri nag-aalagad kan Jehova? An Pulong han Dios nasiring: “An mga pamamatayon ni Jehova makikita hadto nga adlaw tikang ha usa nga kataposan han tuna bisan ngadto ha luyo nga kataposan han tuna.”—Jer. 25:33.

Tungod hito nga mga mahitatabo, an mga ulo han pamilya—damu ha ira an solo nga kag-anak—sadang magpakiana ha ira kalugaringon mahitungod han ira mga anak nga maaram na magdesisyon, ‘Maluluwas ba an akon mga anak ha Armagedon?’ An Biblia nagpapasarig nga maluluwas hira kon aktibo hira ngan marig-on ha espirituwal uyon ha ira maaakos ha ira pangidaron.—Mat. 24:21.

An Pagkaimportante han Pag-eskedyol hin Pagsingba han Pamilya

Sugad nga kag-anak, siguroha nga ginbubuhat mo an ngatanan basi padakuon an imo mga anak “ha pagturon-an ngan paglaygay han Ginoo.” (Efe. 6:4) Importante hinduro an pag-aram han Biblia upod han imo mga anak. Karuyag naton nga magin pariho hira han mga Kristiano ha Filipos, nga ginkumendasyonan ni Pablo ha ira kinaburut-on nga pagsugot kan Jehova. Hiya nagsurat: “Mga hinigugma ko, sugad nga nagmasinurundon kamo gihapon, diri la ha akon atubangan, kondi labi pa gud niyan nga waray ako didto, talinguhaon niyo pagbuhat ha iyo kalugaringon nga kaluwasan nga may kahadlok ngan pagkakurog.”—Fil. 2:12.

Ginsusunod ba han imo mga anak an mga balaud ni Jehova bisan kon diri mo hira nakikita? Kumusta man kon aadto hira ha eskwelahan? Paonan-o mo makukombinse an imo mga anak nga maaramon gud an mga balaud ni Jehova basi ito an maggiya ha ira bisan kon diri ka nira kaupod?

May kalabotan hini, daku an maibubulig han pagsingba han pamilya ha pagparig-on han pagtoo han imo anak. Salit aton hisgotan an tulo nga importante nga paagi basi magin malampuson an pag-aram han Biblia han iyo pamilya.

Himoa Ito nga Regular

Ha orihinal nga yinaknan han Biblia, an mga pulong nga iginhubad nga “ha adlaw” ha Job 1:6 nagpapakita nga iginpapatawag ni Jehova an iya mga anghel ha itinanda nga mga panahon. Buhata liwat ito ha imo mga anak. Pag-eskedyol hin espisipiko nga adlaw ngan oras para ha iyo Pagsingba han Pamilya, ngan sunda gud ito. Pag-eskedyol liwat hin lain nga adlaw nga magagamit ha pag-aram kon may mahitabo nga diri ginlalaoman.

Ha paglabay han panahon, likayi an pagin diri regular ha iyo pag-aram han pamilya. Hinumdumi nga an imo mga anak an imo pinakaimportante nga mga estudyante han Biblia. Kondi karuyag ni Satanas nga biktimahon hira. (1 Ped. 5:8) Kon ha iyo nakaeskedyol nga gab-i para ha Pagsingba han Pamilya magkikita kamo hin TV o magbubuhat hin iba nga diri importante nga buruhaton, magdadaog hi Satanas.—Efe. 5:15, 16; 6:12; Fil. 1:10.

 Himoa Ito nga Praktikal

An gab-i para ha Pagsingba han Pamilya diri sadang buhaton basi la magtirok hin kahibaro. Pangalimbasugi nga himoon ito nga praktikal. Paonan-o? Ha panapanahon, pagpili hin mga topiko nga may kalabotan ha mga sitwasyon nga bangin atubangon han imo anak. Pananglitan, kay ano nga diri iapi ha iyo pag-aram an pagpraktis para ha pagsangyaw? Nalilipay an kabataan ha pagbuhat han mga butang nga maaram gud hira. An pagpraktis hin mga presentasyon ngan paghunahuna hin mga paagi ha pagbaton ha mga pagriwa mabulig ha ira nga magkaada kompyansa ha pakigbahin ha iba-iba nga paagi han pagsangyaw.—2 Tim. 2:15.

Mahimo liwat kamo magpraktis kon paonan-o aatubangon han imo mga anak an mga pagsulay han ira igkasi-batan-on. Bangin ginsusulay hira nga magsigarilyo, makig-uyab, gumamit hin droga ngan magrebelde ha mga magturutdo. Mahimo niyo hisgotan ngan praktison an mga punto ha artikulo nga “An Pag-ipit han mga Kaupod Ngan an Imo Pribilehiyo ha Pagwali” ha pahina 8 han Disyembre 2000 nga An Aton Ministeryo ha Ginhadian. May-ada liwat dugang nga impormasyon mahitungod hini ha pahina 13 han Mayo 15, 1994 nga An Barantayan. Ha panapanahon, kay ano nga diri iupod ha iyo Pagsingba han Pamilya an pagpraktis hito?

An pagsingba han pamilya naghahatag hin higayon ha mga kag-anak nga pabug-atan an kapulsanan han pagkaada espirituwal nga mga tumong. May kalabotan hini, may-ada maopay hinduro nga impormasyon ha tract nga Mga Batan-on—Ano an Iyo Bubuhaton ha Iyo Kinabuhi? Samtang ginhihisgotan ini, buligi an imo anak nga masabtan nga an pagsentro han kinabuhi ha pag-alagad kan Jehova amo an gimaopayi nga buhaton. Buligi an imo anak nga maghingyap nga magpayunir, magin Bethelite, mag-eskwela ha Ministerial Training School, o sumulod ha iba pa nga bahin han bug-os-panahon nga pag-alagad.

Karuyag han mga kag-anak an gimaopayi para ha ira mga anak. Kondi an iba duro nga nakasentro ha ira karuyag nga makab-ot han ira mga anak salit diri nira naaapresyar an ginbubuhat han ira mga anak yana. Syempre, maopay nga dasigon an imo mga anak nga magkaada mag-opay nga tumong sugad han pag-alagad ha Bethel ngan pagmisyonero. Kondi, ayaw ipirit an imo tumong para ha ira nga tungod hito bangin maaringit hira o masubo. (Kol. 3:21) Hinumdumi pirme nga kinahanglan higugmaon han imo anak hi Jehova tungod kay karuyag niya, diri tungod kay karuyag mo. (Mat. 22:37) Salit pamiling hin mga paagi ha paghatag hin kumendasyon ha imo anak ha iya maopay nga ginbubuhat, ngan likayi an pagsentro hin atensyon ha diri niya ginbubuhat. Buligi hiya nga pabilhan an ngatanan nga ginbubuhat ni Jehova basi hiya mismo an gumios ha pagpakita han iya apresasyon.

Himoa Ito nga Makalilipay

An ikatulo nga paagi basi magin malampuson an gab-i para ha Pagsingba han Pamilya amo an paghimo hito nga makalilipay.  Paonan-o hihimoon ito? Ha panapanahon puydi kamo mamati hin audio drama o magkita hin video han mga Saksi ni Jehova. O mahimo niyo basahon an Biblia nga magkaurupod ngan itoka ha tagsa nga membro han pamilya an ginyayakan han mga tawohan dida hito.

May-ada mga artikulo ha panpubliko nga edisyon han An Barantayan nga maopay gud hisgotan han pamilya. Pananglitan, may-ada ito artikulo nga “Para ha mga Batan-on.” May-ada liwat ito serye han mga artikulo para ha kabataan nga may ulohan nga “Tutdui an Imo mga Anak.”

Kondi, likayi nga magin sugad hin imbistigasyon an pag-aram. Pananglitan, iginsusuhestyon ha mga kag-anak nga aghaton an ira mga anak nga isurat an ira panhunahuna ngan pagbati mahitungod han ginhisgotan ha pag-aram han pamilya ngan kon paonan-o nira ito maiaaplikar. Pero ayaw pirita an imo anak nga basahon ha iyo an iya iginsurat, kay kon bubuhaton mo ito, bangin diri na niya isurat an iya inaabat. Ayaw paglabti an iya mga sekreto.

Kon hihimoon mo nga regular, praktikal, ngan makalilipay an iyo pagsingba han pamilya, hura nga bibendisyonan ni Jehova an imo mga pangalimbasog. Inin espesyal nga panahon para ha pamilya mabulig ha iyo nga magpabilin nga aktibo ngan marig-on ha espirituwal.

[Kahon ha pahina 31]

Paghunahuna hin Iba-iba nga Paagi

“Ha amon pag-aram upod han amon kabataan, ginhihisgotan namon an pag-aadman ha mga katirok ngan katapos iginpapadrowing ha ira an sumaryo hito. Usahay iginpapasundayag namon an mga asoy ha Biblia o ginpapraktis an mga presentasyon ha pagsangyaw. Nangalimbasog kami nga himoon ito nga angayan ha ira edad, makapainteres, makaparig-on, ngan makalilipay.”—J.M., Estados Unidos.

“Basi buligan an anak han akon estudyante ha Biblia nga masabtan kon gin-aano paggamit an linukot nga basahon ha panahon han Biblia, gin-imprinta namon an libro han Isaias katapos namon paraon an mga numero han kapitulo ngan bersikulo. Gindurugtong namon an mga pahina ngan an tagsa nga durho ginlikid ha tubo. Katapos, ginsarihan han bata an ginbuhat ni Jesus ha sinagoga ha Nasaret. An asoy ha Lukas 4:16-21 nasiring nga ‘ha pagbuklara niya han basahon [han Isaias], iya hin-agian’ an bahin nga iya ginbibiling. (Isa. 61:1, 2) Kondi, han ginsarihan han bata nga buhaton ito, nakurian hiya pagbiling han Isaias 61 dida hiton hilaba nga linukot nga basahon nga waray kapitulo ngan bersikulo. Gindayaw gud niya an kaabtik ni Jesus ha paggamit hin linukot nga mga basahon. Hiya nagsiring: ‘Makarit gud hi Jesus!’”—Y.T., Japan.

[Retrato ha pahina 30]

An pagpraktis kon ano an bubuhaton makakabulig ha imo mga anak ha pag-atubang han mga pagsulay han ira igkasi-batan-on

[Retrato ha pahina 31]

Himoa nga makalilipay an gab-i para ha Pagsingba han Pamilya