Pagtipig hin Pakigsangkay Dinhi Hinin Waray-gugma nga Kalibotan
Pagtipig hin Pakigsangkay Dinhi Hinin Waray-gugma nga Kalibotan
“Ini nga mga bagay iginsusugo ko ha iyo, basi kamo magsihigugmaay han usa kag usa.”—JUAN 15:17.
1. Kay ano nga an mga Kristiano ha siyahan nga siglo kinahanglan magpabilin nga duok nga magsarangkay?
HA ULTIMO nga gab-i ni Jesus dinhi ha tuna, gindasig niya an iya maunungon nga mga disipulo nga magpabilin nga magsarangkay. Temprano hito nga gab-i, hiya nagsiring nga an ira gugma ha usa kag usa an magigin pangirilal-an nga hira iya mga sumurunod. (Juan 13:35) An mga apostol kinahanglan magpabilin nga duok nga magsarangkay basi mailob nira an tiarabot nga mga pagsari ngan matuman an buruhaton nga itutoka ha ira ni Jesus. Ha pagkamatuod, an mga Kristiano ha siyahan nga siglo nagin kilala ha ira marig-on nga debosyon ha Dios ngan pagkamaunungon ha usa kag usa.
2. (a) Determinado kita nga buhaton an ano, ngan kay ano? (b) Ano nga mga pakiana an aton hihisgotan?
2 Yana, makalilipay gud nga magin bahin han bug-os-kalibotan nga organisasyon nga an mga membro hito nasunod ha susbaranan han mga Kristiano ha siyahan nga siglo. Determinado kita nga sumugot ha sugo ni Jesus nga magpakita hin tinuod nga gugma ha usa kag usa. Kondi, hinin kataposan nga mga adlaw, an kadam-an diri maunungon ngan diri mahigugmaon. (2 Tim. 3:1-3) Agsob nga pakita la an ira pakigsangkay ngan ira la ginhuhunahuna an kaopayan nga ira makukuha. Basi matipigan an aton pangirilal-an sugad nga tinuod nga mga Kristiano, kinahanglan diri naton subaron ito nga disposisyon. Salit aton hisgotan an masunod nga mga pakiana: Ha ano iginbasar an tinuod nga pakigsangkay? Paonan-o kita magkakaada tinuod nga mga sangkay? San-o kinahanglan tapuson an pakigsangkay? Ngan paonan-o naton matitipigan an makaparig-on nga pakigsangkay?
Ha Ano Iginbasar an Tinuod nga Pakigsangkay?
3, 4. Ha ano iginbasar an marig-on gud nga pagkasarangkay, ngan ano an resulta hito?
3 An marig-on gud nga pagkasarangkay iginbasar ha gugma kan Jehova. Hi Hadi Salomon nagsurat: “An duha ka tawo makakaato hin pagsulong nga makakapirde hin usa la ka tawo. An pisi nga tinulotulo makuri mautod.” (Ekles. 4:12, Maopay nga Sumat) Kon hi Jehova an ikatulo nga pisi ha pagkasangkay, diri gud ito mabubungkag.
4 Oo, adton diri nahigugma kan Jehova mahimo liwat magkaada makalilipay nga pagkasarangkay. Kondi kon an pagkasangkay iginbasar ha gugma ha Dios, magigin marig-on gud ito. Kon nagkakaada diri-pagsinabtanay, tatrataron han tinuod nga magsangkay an usa kag usa ha paagi nga nakakalipay kan Jehova. Kon an mga kaaway han Dios manalinguha nga bungkagon an pagkaurosa han iya katawohan, makikita nira nga marig-on gud an pagkasarangkay han tinuod nga mga Kristiano. Ha bug-os nga kasaysayan, ginpamatud-an han mga alagad ni Jehova nga andam hira mamatay imbes nga magtraydor ha ira kabugtoan.—Basaha an 1 Juan 3:16.
5. Kay ano nga marig-on gud an pagkasangkay nira Rut ngan Noemi?
5 Waray ruhaduha nga an pinakamakalilipay nga pakigsangkay amo an pakigsangkay ha mga nahigugma kan Jehova. Tagda an ehemplo nira Rut ngan Noemi. An ira pagkasangkay usa han pinakamaopay nga susbaranan nga nakarekord ha Biblia. Kay ano nga marig-on gud ito? Iginsumat ni Rut an hinungdan han hiya nagsiring kan Noemi: “An imo katawohan maaakon katawohan, ngan an imo Dios akon Dios. . . . Buhaton ni Jehova ini ha akon, ngan kapin pa, kon in bisan ano gawas han kamatayon magbulag ha imo ngan ha akon.” (Rut 1:16, 17) Matin-aw nga may-ada hira hilarom nga gugma ha Dios, ngan ito an naggiya ha ira ha pagtratar ha usa kag usa. Sugad nga resulta, ginbendisyonan hira ni Jehova.
Kon Paonan-o Magkakaada Tinuod nga mga Sangkay
6-8. (a) Ano an kinahanglan buhaton basi magin marig-on an pagkasangkay? (b) Paonan-o ka mag-uuna ha pakigsangkay?
6 An ehemplo nira Rut ngan Noemi nagpapakita nga an tinuod nga pagkasangkay diri basta la nahitatabo. Iginbasar ito ha gugma kan Jehova. Kondi an nagpapadayon nga pagkasangkay resulta han duro nga pangalimbasog ngan pagsakripisyo. Bisan an magburugto ha Kristiano nga pamilya nga nag-aalagad kan Jehova kinahanglan mangalimbasog nga magin duok nga magsarangkay. Kon sugad, paonan-o ka magkakaada tinuod nga mga sangkay?
7 Pag-una ha pakigsangkay. Hi apostol Pablo nagdasig ha iya kasangkayan ha kongregasyon ha Roma nga ‘paangbiton han ira mga butang an kabugtoan nga nagkikinahanglan ngan karawaton adton nadangop ha ira.’ (Roma 12:13, Maopay nga Sumat) An pagpaangbit o pag-abiabi ha iba nag-uupod hin gudti ngan regular nga mga buhat. Pariho ito hin paglakat nga nagkikinahanglan hin sunod-sunod nga pagpitad. An pagkamaabiabihon diri puydi buhaton han iba para ha imo. (Basaha an Proberbios 3:27.) Usa nga paagi ha pagpakita hin pagkamaabiabihon amo an pag-imbitar hin iba-iba nga kakongregasyon basi mangaon ha iyo balay. Mahimo mo ba batasanon an pag-abiabi ha imo mga kakongregasyon?
8 An lain pa nga paagi ha pag-una ha pakigsangkay amo an pakig-upod ha iba-iba nga kabugtoan ha pagsangyaw. Kon aadto ka ha purtahan han balay han iyo ginsasangyawan ngan nababatian mo an imo kaupod nga sinsero nga nagpapahayag han iya gugma kan Jehova, natural la nga magigin duok ka ha iya.
9, 10. Ano nga susbaranan an iginpakita ni Pablo, ngan paonan-o naton hiya masusubad?
9 Pahaluaga an imo gugma. Hi apostol Pablo nagsurat: “Labis an amon paghigugma ha iyo; kamo in kulang hin pagbati para ha amon. Nagyayakan ako yana nga daw sugad hin mga anak ko kamo. Ipakita ha amon in sugad man nga pagbati. Buksi niyo hin maopay an iyo mga kasingkasing!” (2 Kor. 6:12, 13, Maopay nga Sumat) Nahunahuna mo na ba nga baga hin waray ka gud magigin sangkay ha iyo kongregasyon? Kon amo, diri ba bangin tungod kay mapili ka hinduro hin sangkay? Hi apostol Pablo nagpakita hin susbaranan ha pagpahaluag han iya gugma. Hadto, bangin waray gud hiya maghunahuna nga magkakaada hiya duok nga kasangkayan nga diri-Judio. Kondi, hiya nagin “apostol ha mga Hentil.”—Roma 11:13.
10 Dugang pa, nakigsangkay hi Pablo diri la ha iya mga kaedad. Pananglitan, nagin duok nga magsangkay hira ni Timoteo bisan kon diri hira magkaedad ngan magkaiba an ira gintikangan. Yana, ginpapabilhan han damu nga batan-on an ira pakigsangkay ha mga edaran na ha kongregasyon. “May-ada ako duok gud nga sangkay nga sobra 50 anyos na,” siring ni Vanessa nga sobra 20 anyos pa la. “Naisusumat ko ha iya an bisan ano nga akon naisusumat ha akon mga kaedad. Ngan hinigugma gud niya ako.” Paonan-o hira nagin magsangkay? Hi Vanessa nagsiring: “Kinahanglan ako an mag-una ha pakigsangkay ngan diri maghulat la nga hiya an mag-una.” Andam ka ba makigsangkay ha kabugtoan nga diri mo kaedad? Bibendisyonan gud ni Jehova an imo pangalimbasog.
11. Ano an aton hibabaroan ha pagkasangkay nira Jonatan ngan David?
11 Magin maunungon. “An sangkay nahigugma ha ngatanan nga panahon; ngan an usa nga bugto natawo para ha kakurian,” nagsurat hi Salomon. (Prob. 17:17) Han iginsurat niya ito, bangin ginhuhunahuna niya an pakigsangkay han iya amay nga hi David kan Jonatan. (1 Sam. 18:1) Karuyag ni Hadi Saul nga an iya anak nga hi Jonatan an magin sunod nga hadi ha Israel. Kondi ginkarawat ni Jonatan an kamatuoran nga hi David an ginpili ni Jehova. Diri pariho kan Saul, hi Jonatan waray mangabugho kan David. Waray hiya maawa nga gindadayaw hi David, ngan waray liwat hiya tumoo ha pakaraot ni Saul kan David. (1 Sam. 20:24-34) Pariho ba kita kan Jonatan? Kon nagkakapribilehiyo an aton mga sangkay, nalilipay ba kita para ha ira? Kon nagkukuri hira, ginliliaw ngan ginbubuligan ba naton hira? Kon may naglilibak ha ira, natuod ba kita dayon, o maunungon nga gindidepensahan hira sugad han ginbuhat ni Jonatan?
San-o Kinahanglan Tapuson an Pakigsangkay?
12-14. Ano an nagigin problema han iba nga estudyante han Biblia, ngan paonan-o naton hira mabubuligan?
12 Kon an usa nga estudyante han Biblia nagbabag-o na han iya pagkinabuhi, bangin magkaproblema hiya ha iya mga sangkay. Bangin may mga barkada hiya nga karuyag gud niya igkaupod kondi diri nasunod ha mga prinsipyo han Biblia. Hadto pirme hira nag-uurupod, kondi yana nakikita niya nga an ira ginbubuhat mahimo magin maraot nga impluwensya ha iya, ngan nasasantop niya nga kinahanglan limitahan an pakig-upod ha ira. (1 Kor. 15:33) Bisan pa hito, bangin mahunahuna niya nga diri hiya magigin maunungon nga sangkay kon diri na hiya makikig-upod ha ira.
13 Kon usa ka nga estudyante han Biblia ngan sugad hito an imo kahimtang, hinumdumi nga an tinuod nga sangkay malilipay nga nangangalimbasog ka nga pauswagon an imo pagkinabuhi. Bangin maruyag pa ngani hiya nga mag-aram liwat mahitungod kan Jehova. Ha luyo nga bahin, an diri tinuod nga mga sangkay ‘magyayakan hin magraot mahitungod ha imo’ tungod kay diri ka naupod ha ira ha “kasamokan.” (1 Ped. 4:3, 4) Ha pagkamatuod, hira an diri maunungon, diri ikaw.
14 Kon an mga estudyante han Biblia ginbayaan han ira kasangkayan hadto nga diri nahigugma ha Dios, an mga membro han kongregasyon an magigin bag-o nira nga kasangkayan. (Gal. 6:10) Kilala mo ba an mga nag-aaram han Biblia nga natambong ha iyo mga katirok? Mahimo ka ba maggahin hin panahon ha pagparig-on ha ira?
15, 16. (a) Ano an sadang naton buhaton kon may-ada kita sangkay nga diri na mag-alagad kan Jehova? (b) Paonan-o naton mapapamatud-an nga hinigugma naton an Dios?
15 Kondi, ano man kon may sangkay ka ha kongregasyon nga nagdesisyon pagbaya kan Jehova ngan bangin kinahanglan paiwason ha kongregasyon? Makasurubo gud ito. Iginsaysay han usa nga bugto nga babaye an iya gin-abat han waray na mag-alagad kan Jehova an iya duok nga sangkay. Hiya nagsiring: “Baga ako hin namatyan. Kahuna ko nga marig-on an iya espirituwalidad, pero diri ngay-an. Naghunahuna ako nga bangin nag-alagad la hiya kan Jehova basi malipay an iya pamilya. Salit gin-usisa ko utro kon husto ba an akon motibo ha pag-alagad kan Jehova.” Ano an iya ginbuhat basi malamposan an iya kasubo? “Iginsumat ko kan Jehova an ngatanan ko nga inaabat,” siring niya. “Determinado ako nga ipakita kan Jehova nga hinigugma ko gud hiya tungod kay hiya an akon Dios ngan diri la tungod kay gintatagan niya ako hin kasangkayan ha sulod han iya organisasyon.”
16 Diri kita magpapabilin nga sangkay han Dios kon dumapig kita hadton nakikisangkay ha kalibotan. Hi Jakobo nagsurat: “Waray ba niyo hibaroi nga an pakigsangkay han kalibotan amo an kaaway kontra ha Dios? Busa bisan hin-o an makigsangkay ha kalibotan naghihimo ha iya ngahaw nga kaaway kontra ha Dios.” (Jak. 4:4) Mapapamatud-an naton nga hinigugma naton an Dios pinaagi ha pagsarig nga bubuligan kita Niya nga malamposan an kawad-i hin sangkay kon maunungon kita ha Iya. (Basaha an Hebreo 13:5b.) An bugto nga gin-unabi kanina nagsiring: “Hinbaroan ko nga diri naton mapipirit an usa nga higugmaon hi Jehova o higugmaon kita; hiya an magbubuot hito.” Kondi, ano an aton bubuhaton basi matipigan an makaparig-on nga pakigsangkay ha mga nagpapabilin ha sulod han kongregasyon?
Pagtipig hin Tinuod nga Pakigsangkay
17. Paonan-o nag-iistorya an tinuod nga magsangkay?
17 Importante ha magsangkay an maopay nga komunikasyon. Samtang imo ginbabasa an asoy han Biblia mahitungod kanda Rut ngan Noemi, David ngan Jonatan, ngan Pablo ngan Timoteo, imo hibabaroan nga an tinuod nga magsangkay diri nag-aalang pagyakan ha usa kag usa kondi ha matinalahuron nga paagi. Mahitungod ha husto nga paagi han pakiistorya, hi Pablo nagsurat: “An iyo pulong kinahanglan nga may maada grasya, nga ginparasa hin asin.” Espisipiko nga ginhihisgotan niya kon paonan-o kita sadang makiistorya ha mga “aadto ha gawas,” adton diri naton igkasi-tumuroo. (Kol. 4:5, 6) Kon kinahanglan magin matinalahuron ha pakiistorya ha mga diri-tumuroo, labi na gud ha aton kasangkayan ha sulod han kongregasyon!
18, 19. Paonan-o naton sadang tagdon an bisan ano nga sagdon tikang ha Kristiano nga sangkay, ngan ano nga susbaranan an iginpakita han mga tigurang ha Efeso?
18 Ginpapabilhan han tinuod nga magsangkay an opinyon han kada usa, salit kinahanglan matinalahuron ngan prangka an ira pag-istorya. An maaramon nga hi Hadi Salomon nagsurat: “An lana ngan an talamhot nakakalipay han kasingkasing; amo man an katam-isan han kanan tawo sangkay nga nakada ha kinasingkasing nga pagsagdon.” (Prob. 27:9) Sugad ba hito an imo panhunahuna ha bisan ano nga sagdon tikang ha usa nga sangkay? (Basaha an Salmo 141:5.) Gintatagad mo ba an iya ginsisiring sugad nga pagpakita hin mahigugmaon nga pagkabuotan, o nasisina ka?
19 Hi apostol Pablo duok ha mga tigurang ha Efeso. Posible nga nakilala niya an iba ha ira han nagin mga tumuroo hira. Kondi, ha ultimo niya nga pakigkita ha ira, may-ada hiya prangka nga iginsagdon ha ira. Ano an ira reaksyon? Waray hira masina. Lugod, gin-apresyar nira an iya pagtagad ha ira kaopayan, ngan nagtangis pa ngani han ira hinbaroan nga diri na nira hiya makikita utro.—Buh. 20:17, 29, 30, 36-38.
20. Ano an bubuhaton han mahigugmaon nga sangkay?
20 An tinuod nga sangkay diri la nakarawat hin sagdon kondi nagsasagdon liwat. Syempre, kinahanglan naton hibaroan kon san-o ‘bubuhaton an aton kalugaringon nga buruhaton’ ngan diri manginlabot ha iba. (1 Tes. 4:11) Kinahanglan liwat naton hinumdoman nga an tagsa ha aton “mahatag hin kasayoran ngadto ha Dios han iya kalugaringon.” (Roma 14:12, Maopay nga Sumat) Kondi kon kinahanglanon, an mahigugmaon nga sangkay magpapahinumdom han mga prinsipyo ni Jehova. (1 Kor. 7:39) Pananglitan, ano an imo bubuhaton kon may sangkay ka nga daraga o olitawo nga may naruruyagan nga diri Saksi? Mag-aalang ka ba pagsagdon tungod kay nahahadlok ka nga bangin mag-away kamo? O kon diri hiya mamati han imo sagdon, ano an imo bubuhaton? An tinuod nga sangkay madaop ha mahigugmaon nga mga paramangno basi mabuligan an iya sangkay nga nakahimo hin sayop. Nagkikinahanglan ito hin kaisog. Kondi an pagkasangkay nga iginbasar ha gugma kan Jehova diri mabubungkag.
21. Ano an usahay nabubuhat naton ngatanan, kondi kay ano nga importante nga tipigan naton nga marig-on an pakigsangkay ha mga igkasi-tumuroo?
21 Basaha an Kolosas 3:13, 14. Usahay an aton mga sangkay ‘may maisusumbong’ kontra ha aton, ngan hira liwat may mabubuhat o mayayakan nga makakapaaringit ha aton. “Ha damu nga mga butang kita ngatanan nanhipakdol,” nagsurat hi Jakobo. (Jak. 3:2) Kondi bisan kon an tinuod nga magsangkay nagsasayop, bug-os nga ginpapasaylo nira an usa kag usa. Importante gud nga magkaada kita marig-on nga pakigsangkay pinaagi han maopay nga komunikasyon ngan pagpasaylo hin bug-os! Kon ipakita naton an sugad nga gugma, magigin hingpit ito nga bugkos han pagkaurosa.
Ano an Imo Baton?
• Paonan-o kita magkakaada tinuod nga mga sangkay?
• San-o kinahanglan tapuson an pakigsangkay?
• Ano an sadang naton buhaton basi matipigan nga marig-on an pagkasangkay?
[Mga Pakiana]
[Retrato ha pahina 18]
Ha ano iginbasar an marig-on nga pagkasangkay nira Rut ngan Noemi?
[Retrato ha pahina 19]
Batasan mo ba an pag-abiabi ha iba?