Higugmaa an Iyo Bungol-Ngula nga Kabugtoan!

AN KATAWOHAN han Dios yana usa nga daku nga pamilya han espirituwal nga magburugto nga nagtikang pa ha kalalakin-an ngan kababayin-an ha kadaan nga panahon. An iba hini amo hira Samuel, David, Samson, Rahab, Moises, Abraham, Sara, Noe, ngan Abel. Upod ha maunungon nga mga surugoon ni Jehova an damu nga bungol. Pananglitan, an siyahan nga nagin mga Saksi ni Jehova ha Mongolia amo an bungol nga mag-asawa. Ngan ha Russia, sugad nga resulta han pagtipig han integridad han aton bungol nga mga igkasi-tumuroo, nagdaog kita ha usa nga kaso ha European Court of Human Rights.

Yana, an “matinumanon ngan maaramon nga uripon” nagtatagana hin mga publikasyon para ha sign language ngan nag-oorganisa hin mga kongregasyon, asembleya ngan kombensyon ha sign language. (Mat. 24:45, NW) Nakabulig gud ini ha mga bungol. a Kondi, nahunahuna mo na ba kon ano an ira inabat han nahibaro hira mahitungod han matuod nga Dios ngan nag-uswag ha kahibaro ha kamatuoran han waray pa ini nga mga tagana? Ginhunahuna mo na ba kon ano an imo maibubulig ha mga bungol ha iyo lugar?

Mga Tagana Antes han Moderno nga Panahon

Ano daw la an isusumat ha imo han edaran na nga mga bungol kon pakianhan mo hira han ira eksperyensya kon paonan-o nira nakilala an Dios? Bangin isumat nira an ira inabat han hinbaroan nira nga may-ada ngaran an Dios—kon paonan-o hira nabag-o hito nga kamatuoran ngan naparig-on ha sulod hin katuigan antes magkaada hin mga video ngan DVD ha sign language nga nabulig ha ira nga masabtan an hilarom nga mga kamatuoran ha Kasuratan. Bangin isaysay nira an ira inabat han diri pa gindudumara o gin-iinterpretar ha sign language an mga katirok. May-ada la nasapit ha ira ngan nagnunota basi masabtan nira an ginhihisgotan. Ha sugad hini nga paagi hinbaroan han usa nga bungol nga bugto an mga kamatuoran ha Biblia ha sulod hin pito ka tuig antes magkaada hin nag-iinterpretar.

Nahinunumdoman pa han edaran nga bungol nga mga Saksi kon paonan-o hira nagsasangyaw upod han ira kakongregasyon ha mga tawo nga nagyayakan. Kinakaptan nira ha usa nga kamot an index card nga may-ada simple nga presentasyon ha pagsangyaw ha balay-balay. Ngan ha usa nga kamot, an pinakabag-o nga Barantayan ngan Awake! Makuri an pagdumara hin pag-aram ha Biblia ha igkasi-bungol nga ginagamit an inimprinta nga publikasyon nga diri nira pariho nasasabtan hin maopay. Bangin nahinunumdoman liwat nira an kasubo nga ira naeksperyensyahan kon diri hira nasasabtan, salit diri na la hira nagpapadayon ha paghisgot han espirituwal nga mga butang. Maaram liwat hira kon ano an inaabat han pagkaada hilarom nga gugma kan Jehova kondi diri nabubuhat ito nga may kompyansa. Kay ano? Tungod kay diri hira sigurado kon husto an ira pagsabot hito.

Bisan pa hini nga mga ulang, gintipigan han aton bungol nga kabugtoan an ira integridad. (Job 2:3) Mapailubon nga naghulat hira kan Jehova. (Sal. 37:7) Ngan ginbibendisyonan niya hira yana sobra pa han ginlaoman han damu ha ira.

Tagda an pangalimbasog han bungol nga bugto nga may-ada pamilya. Antes magkaada  hin mga video ha sign language, regular nga nagdudumara hiya hin pag-aram han pamilya. Nagsiring an iya anak nga lalaki: “Kinukurian pirme hi tatay ha pagdumara han pag-aram han pamilya tungod kay puro nakaimprinta nga publikasyon an iya nagagamit. Agsob nga diri niya bug-os nga nasasabtan an nakasurat hito. Katapos, kami nga mga anak nakadugang pa ha kakuri kay ginsusumatan dayon namon hiya kon sayop an iya pag-isplikar. Bisan pa hini, pirme hiya nagdudumara hain pag-aram han pamilya. Ginbabalewaray niya an kaawod tungod han iya limitado nga pagsabot han Ingles, kay para ha iya mas importante nga may-ada kami mahibaroan mahitungod kan Jehova.”

Tagda liwat an bungol ngan buta nga hi Richard nga sobra 70 na an edad nga naukoy ha Brooklyn, New York, E.U.A. Kilala gud hiya ha pagin regular ha mga katirok. Basi makatambong, nag-uusahan hiya nga nasakay ha tren ngan gin-iihap an paghunong hito basi hibaroan kon mahaw-as na hiya. Han nagkaada makusog nga bagyo han niebe durante han katugnaw, ginkansela an katirok. Nasumatan an ngatanan ha kongregasyon, kondi waray masumati hi Richard. Han nasantop han kabugtoan nga waray hiya kasumati, ira ginbiling hiya. Nakita nira hi Richard nga natukdaw ha gawas han Kingdom Hall, ngan mapailubon nga naghuhulat tubtob nga abrihan an purtahan. Han ginpakianhan kon kay ano nga kinadto hiya bisan kon bagyo, binaton hiya, “Hinigugma ko hi Jehova.”

Ano an Imo Mahihimo?

May-ada ba mga bungol ha iyo lugar? Mahimo ka ba mag-aram hin pipira nga sinyas basi makagkomunikar ha ira? An mga bungol kasagaran nga makonsiderasyon ngan mapailubon kon nagtututdo han ira linggwahe. Bangin igkita ka hin bungol ha ministeryo o ha diri pormal nga paagi. Ano an imo mahihimo? Pakigkomunikar. Paggamit hin mga sinyas, nota, drowing, o retrato. Bisan kon diri hiya interesado ha kamatuoran, isumat ha bungol nga Saksi o ha maaram hin sign language an mahitungod han imo iginkita nga bungol. Bangin maruyagan han bungol an mensahe kon isasaysay ito ha sign language.

Bangin nag-aaram ka hin sign language o natambong ha kongregasyon han sign language. Paonan-o ka magigin mas maopay ha pagsinyas ngan pagsabot hito nga linggwahe? Bisan kon may-ada nagyayakan nga mga magwarali ha iyo kongregasyon, pagsinyas bisan kon hira an imo kaistorya. Mabulig ito ha imo nga maghunahuna ha sign language. Usahay, bangin maaghat ka ha pagyakan tungod kay mas masayon ito. Kondi kon nag-aaram hin iba nga yinaknan, kinahanglan magpailob ka basi magin maopay hito nga yinaknan.

An pangalimbasog ha pagsinyas nagpapakita hin gugma ngan pagtahod ha aton bungol nga kabugtoan. Hunahunaa an kasubo nga inaabat kada adlaw han mga bungol tungod kay diri nira nasasabtan an mga tawo ha trabaho o ha eskwelahan. Usa nga bungol an nagsiring: “Kada adlaw, nag-iiristorya an mga tawo  ha akon palibot. Agsob nga inaabat ko an kasubo ngan pagin nag-uusahan, ngan nangangalas ako o nasisina pa ngani. Usahay diri ko maisaysay an akon inaabat.” Salit an aton mga katirok sadang magin makarepresko ha aton bungol nga kabugtoan diin nagpapahimulos hira han espirituwal nga pagkaon ngan mahigugmaon nga pakigkomunikar ngan pakig-upod.—Juan 13:34, 35.

Makikita naton ha damu nga kongregasyon an gutiay nga grupo han mga bungol nga nagkakatirok kaupod ha ira. Gin-iinterpretar an katirok para ha ira. Basi bug-os nga masabtan han mga bungol an ginhihisgotan, ginpapalingkod hira ha prente han Kingdom Hall. Hini nga paagi nakikita nira hin klaro an nag-iinterpretar ngan nagpapahayag. Ipinapakita han eksperyensya nga nahiara dayon hini an kongregasyon, imbes nga madisturbo. Ini nga kahikayan ginhihimo liwat ha mga asembleya ngan kombensyon nga may-ada nag-iinterpretar ha sign language. An maduruto nga mga membro han kongregasyon takos kumendasyonan tungod han ira maopay ngan natural nga pagsinyas nga pariho gud han pag-interpretar han bungol.

Bangin membro ka han kongregasyon nga may-ada grupo han sign language o may-ada pipira nga bungol diin gin-iinterpretar para ha ira an mga katirok. Paonan-o mo maipapakita nga gintatagad mo hira? Imbitara hira ha imo balay. Kon posible, pag-aram hin pipira nga sinyas. Ayaw kahadlok nga diri kamo magkaintindihay. Makakahimo ka gihapon hin paagi nga makagkomunikar ha ira, ngan an pagpakita han sugad nga gugma magriresulta hin makalilipay nga mga eksperyensya. (1 Juan 4:8) Damu an aton mahibabaroan ha aton mga igkasi-Saksi nga bungol. Maopay hira nga kaharampang, maaramon, ngan mahilig ha pagpatawa. Usa nga bugto nga bungol an mga kag-anak, nagsiring: “Ha akon bug-os nga kinabuhi, kaupod ko an mga bungol, ngan daku an akon utang nga kaburut-on ha ira. Oo, damu an aton mahibabaroan tikang ha aton bungol nga kabugtoan.”

Hinigugma ni Jehova an iya matinumanon nga mga magsiringba, upod na an mga bungol. An ira pagtoo ngan pagpailob nakakadugang gud han pagin maopay han organisasyon ni Jehova. Hinaot higugmaon naton an aton bungol nga kabugtoan!

[Footnote]

[Retrato ha pahina 31]

An mensahe han Ginhadian bangin maruyagan han bungol kon isasaysay ito ha sign language

[Retrato ha pahina 32]

An aton mga katirok sadang magin makarepresko ha aton bungol nga kabugtoan diin napaparig-on an ira espirituwalidad