Kinasingkasing Ngan Malipayon nga Paghatag

MAY kalabotan ha paghatag, hi apostol Pablo nagsurat: “An tagsa-tagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” (2 Kor. 9:7) Diri ginpipirit ni Jehova an bisan hin-o nga sumuporta ha putli nga pagsingba. Karuyag niya nga ipakita han iya mga surugoon an ira debosyon pinaagi han ira kinaburut-on ngan malipayon nga paghatag. Tikang pa hadto, kinasingkasing nga nagdudonar an iya katawohan. Tagdon naton an tulo nga ehemplo.

Katapos pagawson ni Jehova an mga Israelita ha Ehipto, ginsugo niya hira nga magtukod hin tabernakulo. Tungod kay nanginahanglan hin materyales, gin-aghat an mga Israelita nga magdonar. Salit ‘an tagsa-tagsa nga naaghat an kasingkasing’ nagdara hin bulawan, salapi, alahas, ngan iba pa nga materyales. Mahinatagon gud an mga tawo salit nagkaada pahibaro nga iundang na an pagdonar.—Eks. 35:5, 21; 36:6, 7.

 Paglabay hin mga siglo han tutukuron an templo, an katawohan han Dios nagkaada na liwat higayon nga ipakita an ira suporta ha putli nga pagsingba. Daku an igindonar ni Hadi David para hito nga proyekto ngan gin-aghat an iba nga magdonar liwat. Malipayon nga ginbuhat nira ito. Aw, an donasyon nga bulawan ngan salapi inabot hin sobra 100 bilyon dolyares ha kantidad yana! Nalipay gud an mga tawo ha ira kinaburut-on nga mga donasyon kan Jehova.—1 Kron. 29:3-9; 2 Kron. 5:1.

An malipayon nga paghatag iginpakita liwat han mga sumurunod ni Jesu-Kristo ha siyahan nga siglo. Han Pentekostes 33 K.P., mga 3,000 an nabawtismohan, ngan damu hito an diri taga-Jerusalem. Basi makapabilin ha syudad an mga pobre ngan dugang nga mahibaro han ira bag-o nga pagtoo, nagkaada temporaryo nga pagkolekta hin mga donasyon. An kabugtoan nagbaligya hin mga panag-iya ngan igindonar an kwarta ha mga apostol basi mabuligan adton nanginginahanglan. Nalipay gud hi Jehova han nakita niya an sugad nga kapahayagan han pagtoo ngan gugma!—Buh. 2:41-47.

Yana, an mga Kristiano padayon nga nasuporta ha putli nga pagsingba pinaagi han kinasingkasing ngan malipayon nga paghatag han ira panahon, kusog, ngan kwarta. Makikita ha kahon an mga paagi kon paonan-o niyo mabubuhat ini.

[Kahon ha pahina 18, 19]

MGA PAAGI HAN PAGHATAG NGA GINPIPILI HAN IBA

MGA AMOT PARA HA BUG-OS-KALIBOTAN NGA BURUHATON

Damu an nagtitirok hin kwarta nga ira iginbubutang ha mga kahon para han donasyon nga minarkahan hin “Worldwide Work.”

Kada bulan, ini nga kwarta iginpapadara han mga kongregasyon ha opisina han mga Saksi ni Jehova ha ira nasud. An mga donasyon nga kwarta mahimo liwat direkta nga ipadara ha Watchtower Bible and Tract Society of the Philippines, Inc., P.O. Box 2044, 1060 Manila, o ha sanga nga opisina ha iyo nasud. (An boluntaryo nga mga donasyon nga gin-uunabi ha ubos mahimo liwat ipadara ha sanga nga opisina han mga Saksi ni Jehova ha iyo nasud.) An mga tseke nga iginpapadara ha adres ha igbaw sadang igngaran ha “Watch Tower Society.” Mahimo liwat magdonar hin alahas o iba pa nga birilhon nga mga butang. Sadang ilakip hito nga mga donasyon an halipot nga surat nga nagsusumat nga regalo ito.

KAHIKAYAN HAN IGINTAPOD NGAN MAY KONDISYON NGA DONASYON

An kwarta mahimo itapod ha Watch Tower Society basi magamit ha bug-os-kalibotan nga buruhaton. Kondi, kon hahangyoon ito han nagpahuram, ibabalik ito ha iya. Para ha dugang nga impormasyon, alayon pagsurat ha Treasurer’s Office ha adres nga gin-unabi na.

GINPLANO NGA PAGHATAG

Dugang pa ha mga regalo nga kwarta, may-ada iba pa nga paagi han paghatag basi magamit ha buruhaton han Ginhadian ha bug-os nga kalibotan. Nag-uupod ini han:

Insurance: An Watch Tower Society puydi himoon nga beneficiary han palisiya han life insurance o han plano para ha pagretiro/pensyon.

Mga Deposito ha Bangko: An mga deposito ha bangko, sertipiko han deposito, o mga deposito nga nakaandam para ha pagretiro han usa mahimo igngaran o ihatag ha Watch Tower Society kon mamatay an nagdonar, uyon ha lokal nga mga kahikayan han bangko.

Stocks Ngan Bonds: An mga stock ngan bond mahimo igdonar ha Watch Tower Society sugad nga regalo.

Tuna Ngan Balay: An maibabaligya nga tuna ngan balay mahimo igdonar pinaagi han pagregalo hito, o kon residensya ito, mahimo magpadayon ha pag-ukoy an nagdonar samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Gift Annuity: An gift annuity usa nga kahikayan ha pagbalhin hin kwarta o mga deposito han usa ngadto ha ginpili nga korporasyon nga ginagamit han mga Saksi ni Jehova. Sugad nga kabalyo, an naghatag, o an usa nga ginpili han naghatag, makarawat hin espisipiko nga kwarta kada tuig samtang buhi hiya. Iibanan an kabaraydan nga buhis han naghatag ha tuig nga gintikangan an gift annuity.

Mga Testamento Ngan Trust: An mga panag-iya o kwarta mahimo ihatag ha Watch Tower Society pinaagi han testamento nga legal nga ginhimo, o mahimo magin beneficiary an Watch Tower Society han usa nga trust agreement. Mahimo maibanan an kabaraydan ha buhis kon an trust napapahimulosan han usa nga relihiyoso nga organisasyon.

Sugad han iginpapasabot han termino nga “ginplano nga paghatag,” ini nga mga klase hin donasyon kasagaran nga nagkikinahanglan hin pagplano. Basi mabuligan an mga naghihingyap ha pagsuporta ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur naghahatag hin impormasyon mahitungod han magkalain-lain nga paagi han paghatag hin mga donasyon yana o paghatag sugad nga panurundon kon mamatay an nagdonar. Katapos mabasa an brosyur ngan magpakiana ha ira mga magsaragdon ha balaud o ha buhis, damu an nakabulig ha pagsuporta ha mga Saksi ni Jehova ha bug-os nga kalibotan para ha ira relihiyoso nga mga buruhaton ngan pagbulig ha iba, ngan samtang ginbubuhat nira ito, daku an naiiban ha ira baraydan ha buhis. Mahimo ka maghangyo hin kopya hini nga brosyur ha Charitable Planning Office.

Para ha dugang nga impormasyon, mahimo ka tumawag o magsurat ha Charitable Planning Office, ha adres nga nakalista ha ubos, o makigkomunikar ha opisina han mga Saksi ni Jehova ha iyo nasud.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco del Monte

1105 Quezon City

Telepono: (02) 411-6090