Padayon nga Pauswaga an Iyo Gugma ha Kabugtoan

“Manggawi kamo ha gugma, sugad nga hi Kristo nahigugma man ha iyo.”—EFE. 5:2.

1. Sumala kan Jesus, ano an importante nga pangirilal-an han iya mga sumurunod?

 AN PAGSANGYAW han maopay nga sumat han Ginhadian han Dios ha balay-balay usa nga pangirilal-an han mga Saksi ni Jehova. Kondi, nagpili hi Kristo Jesus hin iba nga pangirilal-an han Kristianidad nga nagpapakilala han iya tinuod nga mga disipulo. Hiya nagsiring: “Ako nahatag ha iyo hin usa nga bag-o nga sugo, nga kamo maghigugmaay an usa kag usa; sugad gud han akon paghigugma ha iyo, kamo man maghigugmaay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.”—Juan 13:34, 35.

2, 3. Ano an epekto han aton gugma ha mga natambong ha aton Kristiano nga mga katirok?

² Waray makakatupong han paghigugmaay han tinuod nga mga Kristiano. Sugad la nga an puthaw nadukot ha magnet, an gugma nakakadurugkot o nakakapaurosa han katawohan han Dios ngan nakakadani han sinsero nga mga tawo ha tinuod nga pagsingba. Pananglitan, tagda hi Marcelino nga taga-Cameroon nga nabuta ha iya trabaho. Katapos niya maaksidente, nagkaada uruistorya nga nabuta hiya tungod kay aswang kuno hiya. Imbes nga liawon han ira pastor ngan mga karelihiyon, ginpaiwas hiya ha ira relihiyon. Han gin-imbitar hi Marcelino han usa nga Saksi ni Jehova ha katirok, nag-alang hiya. Diri niya karuyag nga isalikway utro.

³ Nahipausa hi Marcelino ha nahitabo ha Kingdom Hall. Malipayon nga gin-abiabi hiya, ngan naliaw han mga katutdoan han Biblia nga iya hinbatian. Nagtikang hiya tumambong ha ngatanan nga katirok, nag-uswag ha iya pag-aram ha Biblia, ngan nabawtismohan han 2006. Yana nagsasangyaw na hiya han kamatuoran ha iya pamilya ngan mga amyaw ngan may-ada na gindudumara nga mga pag-aram ha Biblia. Karuyag ni Marcelino nga abaton han iya mga gindudumarahan an gugma nga iya naieksperyensyahan ha katawohan han Dios.

4. Kay ano nga sadang sundon naton an sagdon ni Pablo nga padayon nga “manggawi ha gugma”?

⁴ Makaruruyag an aton gugma ngan sadang mangalimbasog kita ngatanan ha pagtipig hito. Hunahunaa an tap-ong nga naglalaga ha mahagkot nga gab-i ngan gindadaop han mga tawo. Kon diri ito butangan hin sungo han mga nagpapahimulos hito, mapaparong ito. Sugad man, kon diri parig-unon han tagsa nga Kristiano an gugma nga bugkos han kongregasyon, magluluya ito. Paonan-o naton bubuhaton ito? Hi apostol Pablo binaton: “Manggawi kamo ha gugma, sugad nga hi Kristo nahigugma man ha iyo, ngan nagtubyan ha iya ngahaw tungod ha aton, nga amo an hatag ngan halad ha Dios nga alimyon han katam-is han hamot.” (Efe. 5:2) An pakiana nga karuyag naton paghisgotan amo an, Ha ano nga mga paagi makakapadayon ako ha paggawi ha gugma?

“Magpahaluag” Man Kamo

5, 6. Kay ano nga ginsagda ni Pablo an mga Kristiano ha Korinto nga “magpahaluag”?

⁵ Ha mga Kristiano ha kadaan nga Korinto, hi apostol Pablo nagsurat: “Iton amon baba nagkakabubuka nganhi ha iyo O, mga taga-Korinto, iton amon kasingkasing nadagku. Waray niyo mga kakulangan ha amon, kondi kamo in kulang hin paghigugma ha iyo ngahaw. Basi nga makabalos kamo hin sugad nga paagi (nagyayakan ako sugad hin ngadto ha akon mga anak), managku [“magpahaluag,” NW] man kamo.” (2 Kor. 6:11-13) Kay ano nga ginsagda ni Pablo an mga taga-Korinto nga magpahaluag han ira gugma?

 ⁶ Tagda kon paonan-o naestablisar an kongregasyon ha kadaan nga Korinto. Inabot hi Pablo ha Korinto han katrakdag han 50 K.P. Bisan kon ha siyahan makuri an iya pagsangyaw didto, waray hiya umundang. Waray pag-iha, damu hito nga syudad an tinoo ha maopay nga sumat. Ha sulod hin “usa ka tuig, ngan unom ka bulan,” gintutdoan ngan ginparig-on ni Pablo an bag-o nga kongregasyon. Matin-aw nga hinigugma gud niya an mga Kristiano ha Korinto. (Buh. 18:5, 6, 9-11) Salit may-ada hira marig-on nga hinungdan nga higugmaon ngan tahuron liwat hiya. Kondi, an iba ha kongregasyon nagpahirayo ha iya. Bangin nadiri an iba ha iya prangka nga pagsagdon. (1 Kor. 5:1-5; 6:1-10) An iba bangin namati ha pakaraot han “bantogan kaopay nga mga apostol.” (2 Kor. 11:5, 6) Karuyag ni Pablo nga higugmaon gud hiya han ngatanan nga kabugtoan. Salit nanginyupo hiya ha ira nga magpahaluag pinaagi han pagin duok ha iya ngan ha mga igkasi-tumuroo.

7. Paonan-o naton ‘mapapahaluag’ an aton gugma ha kabugtoan?

⁷ Kumusta man kita? Paonan-o naton ‘mapapahaluag’ an aton gugma ha kabugtoan? Bangin masayon magpakita hin gugma ha mga kaedad o karehiyon. Ngan adton pariho an hilig ha kaliawan agsob nga nagkakaurupod. Kondi kon pirme na la naton kaupod an kabugtoan nga kapariho han aton hilig nga tungod hito diri na naton nakakaupod an iba, kinahanglan “magpahaluag” kita. Maopay nga pakianhan an aton kalugaringon: ‘Talagsa la ba ako umupod ha ministeryo o ha kaliawan ha kabugtoan nga diri duok ha akon? Ha Kingdom Hall, talagsa la ba ako makiistorya ha mga bag-ohan tungod kay naghuhunahuna ako nga kinahanglan pa hin panahon antes nira ako magin sangkay? Nangungumusta ba ako ha mga lagas ngan mga batan-on ha kongregasyon?’

8, 9. Paonan-o an sagdon ni Pablo ha Roma 15:7 nga kumustahon an usa kag usa nabulig ha aton nga mapauswag an aton gugma ha kabugtoan?

⁸ May kalabotan ha pangumusta ha usa kag usa, an ginsiring ni Pablo ha mga taga-Roma makakabulig ha aton nga magkaada husto nga panhunahuna ha aton mga igkasi-magsiringba. (Basaha an Roma 15:7.) An Griego nga pulong nga iginhubad nga “pagkarawat” nangangahulogan hin “buotan nga pag-abiabi, pagpaupod han usa ha grupo ngan pakigsangkay.” Ha panahon han Biblia, kon an usa nag-aabiabi han iya mga sangkay ha iya balay, iya iginsusumat ha ira nga malipayon gud hiya nga makita hira. Simboliko nga ginkarawat kita ni Kristo hito nga paagi, ngan ginsasagda kita nga subaron hiya ha pagkarawat ha mga igkasi-magsiringba.

⁹ Samtang ginkukumusta naton an aton kabugtoan ha Kingdom Hall ngan ha iba nga lugar, mahimo naton kaistoryahon adton maiha-iha na nga waray naton makita o makaistorya ha naglabay. Kay ano nga diri kaistoryahon hira ha pipira ka minuto? Ha sunod nga katirok, mahimo nga kaistoryahon liwat naton an iba. Diri mag-iiha, makakaistorya naton haros an ngatanan nga kabugtoan. Diri kita sadang mabaraka kon diri naton makaistorya an ngatanan hito nga adlaw. Waray sadang masubo kon diri naton hira makaistorya ha kada katirok.

10. Ano an gimaopayi nga higayon nga mahihimo han ngatanan ha kongregasyon, ngan paonan-o naton mapapahimulosan ito?

 ¹⁰ An pangumusta ha iba amo an siyahan nga paagi han pag-abiabi ha ira. Mahimo ito magresulta hin makaruruyag nga pag-iristorya ngan pagkasarangkay. Pananglitan, kon an mga natambong ha mga kombensyon ngan asembleya nakikigkilala ha iba ngan nakikiistorya, naglalaom hira nga magkikirita utro. An mga boluntaryo ha pagtukod han mga Kingdom Hall ngan paghatag hin ayuda agsob nga nagigin mag-opay nga magsarangkay tungod kay hinbabaroan nira an mag-opay nga kalidad han usa kag usa pinaagi han ira mga eksperyensya. Ha organisasyon ni Jehova damu an higayon nga magkaada hin mga sangkay. Kon kita ‘nagpapahaluag,’ magdadamu an aton sangkay ngan mapapauswag an kalidad han gugma nga naghihiusa ha aton ha tinuod nga pagsingba.

Magin Masayon Madaraon

11. Sumala ha Markos 10:13-16, ano nga susbaranan an ipinakita ni Jesus?

¹¹ An ngatanan nga Kristiano sadang mangalimbasog nga magin masayon madaraon, sugad kan Jesus. Tagda an iya ginbuhat han ginpugngan han iya mga disipulo an mga kag-anak ha pagdara han ira mga anak ngadto ha iya. Hiya nagsiring: “Tuguti an mga kabataan pagkadi ha akon, ngan ayaw hira pagdid-i, kay an ginhadian han Dios ira han mga sugad ha ira.” Katapos, ‘iya pinangugos hira, pinanbendisyonan hira, ngan ipinanduon an iya mga kamot ha ira.’ (Mar. 10:13-16) Hunahunaa la an duro nga kalipay han kabataan han mahigugmaon nga gintagad hira han Bantogan nga Magturutdo!

12. Ano an makakaulang ha aton ha pakiistorya ha iba?

¹² Sadang pakianhan han tagsa nga Kristiano an iya kalugaringon, ‘Andam ba ako paghatag hin panahon ha iba o agsob nga baga hin ipinapakita ko nga okupado ako?’ An aton ginbubuhat nga diri man sayop, usahay bangin makapugong ha iba ha pakiistorya ha aton. Pananglitan, kon agsob nga nagti-text kita o naka-earphone o nagkikinita ha aton pocket-size nga kompyuter samtang kaatubang an iba, bangin maghunahuna hira nga diri kita interesado makiistorya ha ira. Syempre, “may panahon ha paghilom.” Kondi, kon kaupod naton an mga tawo, agsob nga ito an “panahon ha pagyakan.” (Ekles. 3:7) An iba bangin sumiring, “Karuyag ko la maghilom” o “Diri ko la karuyag magyakan kon aga.” Kondi, an makisangkayon nga pakiistorya bisan ha panahon nga diri naton karuyag magyakan, nagpapakita han gugma nga “diri nagbibiling han iya kalugaringon” nga kaopayan.—1 Kor. 13:5.

13. Ano nga pagtagad an igin-aghat ni Pablo nga buhaton ni Timoteo ha iya Kristiano nga kabugtoan?

¹³ Gin-aghat ni Pablo an batan-on nga hi Timoteo nga tahuron an ngatanan nga membro han kongregasyon. (Basaha an 1 Timoteo 5:1, 2.) Sadang tagdon liwat naton an edaran nga mga Kristiano sugad nga aton mga iroy ngan mga amay ngan an mga batan-on sugad nga aton kalugaringon nga kabugtoan. Kon sugad hito an aton pagtagad ha kabugtoan, diri hira maabat nga estranghero hira.

14. Ano an pipira nga kapulsanan han makaparig-on nga pakiistorya ha iba?

¹⁴ Kon makapadasig an aton pakiistorya ha iba, napaparig-on naton an ira espirituwalidad ngan emosyon. Malipayon nga nahinunumdoman han usa nga Bethelite nga lalaki nga pirme hiya ginkakaistorya han mga edaran na ha Bethel han bag-o pa la hiya didto. Tungod han ira pagparig-on, inabat niya nga membro gud hiya han pamilya han Bethel. Yana ginsusubad niya hira pinaagi ha pakiistorya ha iya mga igkasi-Bethelite.

An Pagpaubos Nabulig ha Aton ha Pakigmurayaw

15. Ano an nagpapakita nga usahay nahitatabo an diri pagsinabtanay?

¹⁵ An duha nga Kristiano ha kadaan nga Filipos nga hira Euodia ngan Sintike, nakurian ha pagsulbad han ira diri pagsinabtanay. (Fil. 4:2, 3) Damu an nahibaro han paglantugi nira Pablo ngan Bernabe ngan nagbulag hira hin pipira ka panahon. (Buh. 15:37-39) Ipinapakita hini nga mga asoy nga usahay diri nagkakasinabot an tinuod nga mga magsiringba. Hi Jehova nabulig ha aton nga masulbad an diri pagsinabtanay  ngan maipahiuli an pagkasarangkay. Kondi may-ada hiya ginkikinahanglan nga sadang naton buhaton.

16, 17. (a) Kay ano nga importante gud an pagpaubos ha pagsulbad han diri pagsinabtanay? (b) Ha asoy mahitungod han pagdaraon ni Jakob kan Esaw, paonan-o ipinapakita an pagkaimportante han pagpaubos?

¹⁶ Hunahunaa nga ikaw ngan an imo sangkay magbibyahe pinaagi hin awto. Antes kamo magbyahe, kinahanglan yawihan mo an awto basi umandar ito. An pagsulbad han diri pagsinabtanay nagamit liwat hin yawi. Ito nga yawi amo an pagpaubos. (Basaha an Jakobo 4:10.) Sugad han ipapakita ha masunod nga ehemplo ha Kasuratan, ito nga yawi nabulig ha mga diri nagkakasinabot nga iaplikar an mga prinsipyo han Biblia.

¹⁷ Bainte ka tuig na an naglabay tikang nga nasina gud hi Esaw tungod kay an iya katungod ha pagin suhag nahingadto ha iya karuha nga hi Jakob, salit karuyag ni Esaw nga patayon hi Jakob. Magkikita na utro an magkaruha katapos hiton maiha nga panahon, ngan “hi Jakob nahadlok hinduro ngan nasubo.” Inabat hiya nga posible gud nga patayon hiya ni Esaw. Kondi hito nga ira pagkita, may-ada ginbuhat hi Jakob nga diri ginlalaoman ni Esaw. “Yinukbo” hi Jakob ngada ha tuna samtang tikahirani hiya ha iya bugto. Ano an sunod nga nahitabo? ‘Hi Esaw dinalagan pagtapo ha iya, ngan gin-gakos hiya ngan tinakgos hiya ha liog ngan hinadkan hiya: ngan hira nanuok.’ Napugngan an pagkaada hin away. Tungod han pagpaubos ni Jakob, nawara an kapungot ni Esaw nga bangin iya gintipigan.—Gen. 27:41; 32:3-8; 33:3, 4.

18, 19. (a) Kon nagkakaada diri pagsinabtanay, kay ano nga importante nga mag-una ha pag-aplikar han sagdon han Kasuratan? (b) Kay ano nga diri kita sadang mawad-an hin paglaom kon waray dayon maopay nga resulta an aton pangalimbasog?

¹⁸ An Biblia may-ada mapulsanon gud nga sagdon ha pagsulbad han diri pagsinabtanay. (Mat. 5:23, 24; 18:15-17; Efe. 4:26, 27) a Kondi, kon diri naton mapainubsanon nga sundon ito nga sagdon, makuri an pakigmurayaw. Diri solusyon nga hulaton naton an iba nga magpaubos, kinahanglan magpaubos liwat kita.

¹⁹ Kon an aton siyahan nga pangalimbasog ha pakigmurayaw ha usa waray maopay nga resulta, diri kita mawad-an hin paglaom. Bangin nagkikinahanglan pa hiya hin panahon ha pag-inoino han iya pagbati. Sugad han nahitabo kan Jose, gintratar hiya hin maraot han iya kabugtoan. Linabay anay an maiha nga panahon antes makita nira hi Jose sugad nga primero nga ministro han Ehipto. Kondi, hito nga panahon nagbag-o na an ira kasingkasing ngan nakimalooy nga pasayloon. Ginpasaylo hira ni Jose, ngan an mga anak ni  Jakob nagin nasud nga may-ada pribilehiyo ha pagdara han ngaran ni Jehova. (Gen. 50:15-21) Pinaagi han padayon nga pakigmurayaw ha aton kabugtoan, nakakabulig kita nga magkaurosa ngan magin malipayon an kongregasyon.—Basaha an Kolosas 3:12-14.

Aton Ipakita an Gugma Pinaagi “ha Buhat Ngan ha Kamatuoran”

20, 21. Ano an hibabaroan naton ha paghimsaw ni Jesus ha iya mga apostol?

²⁰ Han hirani na mamatay hi Jesus, nagsiring hiya ha iya mga apostol: ‘Akon kamo tinagan hin susbaranan nga sugad han akon ginbuhat, iyo man buhaton.’ (Juan 13:15) Ginhimsawan pa la ni Jesus an iya 12 nga apostol. An ginbuhat niya diri la tradisyon o pagpakita hin pagkabuotan. Antes isaysay ni Juan an mahitungod han paghimsaw, hiya nagsurat: “Ginhigugma niya [Jesus] an mga iya kalugaringon dinhi ha kalibotan, ginhigugma niya hira tubtob ha kataposan.” (Juan 13:1) Tungod han gugma ni Jesus ha iya mga disipulo, ginbuhat niya an buruhaton nga kasagaran ginhihimo han usa nga uripon. Salit, ipinapakita hito nga kinahanglan mapainubsanon nga mangnoan nira an usa kag usa. Oo, an tinuod nga gugma ha kabugtoan sadang magpagios ha aton nga mangnoan ngan tagdon an ngatanan nga Kristiano nga kabugtoan.

²¹ An kahulogan han ginbuhat ni Jesus nasabtan ni apostol Pedro, nga usa han ginhimsawan han Anak han Dios. Hiya nagsurat: “Gin-uray na niyo an iyo mga kalag ha iyo pagkamasinugtanon ha kamatuoran ngan ha putli nga paghigugma ha mga kabugtoan, maghigugmaanay gud kamo tikang ha kasingkasing an usa kag usa.” (1 Ped. 1:22) Hi apostol Juan, nga ginhimsawan liwat han Ginoo, nagsurat: “Mga idoy ko, diri kita maghigugma ha pulong, bisan ha dila; kondi ha buhat ngan ha kamatuoran.” (1 Juan 3:18) Hinaot nga ipakita naton an aton gugma ha kabugtoan pinaagi han aton buhat.

Nahinunumdoman Mo Ba?

• Ha ano nga paagi ‘mapapahaluag’ naton an aton gugma ha usa kag usa?

• Ano an mabulig ha aton nga magin masayon madaraon?

• Ano an naibubulig han pagpaubos ha pakigmurayaw?

• Ano an sadang magpagios ha aton nga mangnoan an mga igkasi-tumuroo?

[Footnote]

[Mga Pakiana]

[Retrato ha pahina 21]

Sinsero nga karawata an mga igkasi-tumuroo

[Retrato ha pahina 23]

Salingabota an mga higayon nga makaistorya an iba