Pagpakita hin Maopay nga Pamatasan Sugad nga Ministro han Dios

“Magsubad kamo ha Dios.”—EFE. 5:1.

1, 2. (a) Kay ano nga importante an maopay nga pamatasan? (b) Ano an paghihisgotan hini nga artikulo?

 MAY kalabotan ha matinalahuron nga paggawi, an awtor nga hi Sue Fox nagsurat: “Kinahanglan magpakita pirme hin maopay nga pamatasan. Ha bisan diin ngan ha ngatanan nga panahon, maopay an resulta han pagin matinalahuron.” Kon nababatasan han mga tawo an pagin matinalahuron, naiibanan an diri pagsinabtanay ngan agsob nga nawawara ito. Kondi kon maraot an pagtratar ha iba, nagriresulta ito hin away, kasina ngan kasubo.

² Ha kabug-osan, nakikita an maopay nga pamatasan ha Kristiano nga kongregasyon. Kondi, kinahanglan mag-ikmat kita nga diri masubad an pamatasan nga kalyap yana ha kalibotan. Aton paghisgotan kon paonan-o an pag-aplikar han mga prinsipyo han Biblia ha pagin matinalahuron makakapanalipod ha aton ngan makakadani ha mga tawo ha tinuod nga pagsingba. Basi mahibaroan naton kon ano an iginpapasabot han pagpakita hin maopay nga pamatasan, tagda an susbaranan ni Jehova nga Dios ngan han iya Anak.

 Hi Jehova Ngan an Iya Anak—Susbaranan han Maopay nga Pamatasan

3. Ano nga susbaranan han pagin matinalahuron an ipinakita ni Jehova nga Dios?

³ Nagpakita hi Jehova hin hingpit nga susbaranan han maopay nga pamatasan. Bisan pa kon hiya an Soberano ha uniberso, buotan ngan matinalahuron hiya ha mga tawo. Han ginsugo ni Jehova hi Abraham ngan hi Moises, gin-gamit Niya ha orihinal nga yinaknan an pulong nga nangangahulogan hin “alayon.” (Gen. 13:14; Eks. 4:6) Kon nakakasala an mga surugoon ni Jehova, hiya “malolooyon ngan puno hin grasya, mahinay ha kasina, ngan hura hin mahigugmaon nga kalooy ngan kamatuoran.” (Sal. 86:15) Naiiba gud hiya ha mga tawo nga diri napupugngan an kasina kon diri natutuman han iba an ira ginlalaoman.

4. Paonan-o naton masusubad hi Jehova kon may-ada nakikiistorya ha aton?

⁴ Makikita liwat an maopay nga pamatasan han Dios ha paagi han iya pagpamati ha mga tawo. Han nagpinakiana hi Abraham mahitungod han mga tawo ha Sodoma, mapailubon nga ginbaton ni Jehova an tagsa nga pakiana. (Gen. 18:23-32) Waray Niya hunahunaa nga tungod han paghangyo ni Abraham makakarag an Iya panahon. Namamati hi Jehova ha mga pag-ampo han iya mga surugoon ngan ha mga panginyupo han mabinasulon nga nagpakasala. (Basaha an Salmo 51:11, 17.) Diri ba sadang subaron naton hi Jehova pinaagi ha pagpamati kon may-ada nakikiistorya ha aton?

5. Paonan-o napapauswag an aton relasyon ha iba pinaagi han aton pagsubad ha pagin makonsiderasyon ni Jesus?

⁵ Usa han damu nga hinbaroan ni Jesu-Kristo ha iya Amay amo an pagin makonsiderasyon. Bisan kon daku nga panahon an ginagamit ni Jesus ha ministeryo ngan usahay kinakapoy hiya, pirme hiya mapailubon ngan buotan. Naobserbahan han mga sanlahon, mga buta nga makililimos, ngan iba pa nga nanginginahanglan hin bulig nga hi Jesus andam ngan disidido ha pagbulig ha ira. Waray niya igbalewaray hira bisan kon waray hira magsiring hin abanse nga makikigkita hira ha iya. Agsob nga naundang hi Jesus ha iya ginbubuhat basi buligan an naguguol. Makonsiderasyon gud hiya ha mga natoo ha iya. (Mar. 5:30-34; Luk. 18:35-41) Sugad nga mga Kristiano, ginsusubad naton hi Jesus pinaagi ha pagin buotan ngan pagin mabinuligon. Ito nga paggawi naoobserbahan han aton mga paryente, amyaw, ngan han iba. Dugang pa, tungod hito nadadayaw hi Jehova ngan nalilipay kita.

6. Ano nga susbaranan an ipinakita ni Jesus ha pagin matinalahuron ngan makisangkayon?

⁶ Ipinakita liwat ni Jesus an pagtahod ha mga tawo pinaagi ha paggamit han ira ngaran. Ipinakita ba ito han Judio nga mga lider han relihiyon? Waray. Gintagad nira an mga waray kahibaro han Balaud sugad nga mga ‘ginhimaraot’ ngan sugad hito an pagtratar ha ira. (Juan 7:49) Diri sugad hito an pagtratar han Anak han Dios. Gintawag ni Jesus ha ngaran hira Marta, Maria, Sakeo, ngan an damu pa. (Luk. 10:41, 42; 19:5) Bisan kon iba-iba an aton pagtawag ha mga tawo yana tungod han kultura ngan kahimtang, an mga surugoon ni Jehova nangangalimbasog nga magin matinalahuron ngan makisangkayon. a An iba-iba nga kahimtang ha kinabuhi diri nakakaapekto ha ira matinalahuron nga pagtagad ha igkasi-tumuroo ngan ha iba.—Basaha an Jakobo 2:1-4.

7. Ha ano nga paagi nabulig ha aton an mga prinsipyo ha Biblia nga magin matinalahuron ha igkasi-tawo ha bisan diin?

⁷ An matinalahuron nga pagtagad han Dios ngan han iya Anak ha mga tawo ha ngatanan nga nasud ngan tribo nagpapasidungog ha sugad nga mga tawo ngan nakakadani hadton naruruyag mahibaro han kamatuoran. Syempre, iba-iba an gintatagad nga maopay nga pamatasan ha tagsa nga lugar. Salit, waray kita istrikto nga surundon may kalabotan hito. Lugod, aton ginsusunod an mga prinsipyo ha Biblia nga magin mapauyon-uyon ha pagpasidungog ha igkasi-tawo ha bisan diin. Aton paghisgotan kon paonan-o an pagin matinalahuron makakabulig nga magin mas mabungahon kita ha ministeryo.

 Pangumusta Ngan Pakiistorya ha mga Tawo

8, 9. (a) Ano nga batasan an bangin hunahunaon nga maraot? (b) Kay ano nga sadang makaapekto ha paagi han aton pagtratar ha mga tawo an ginsiring ni Jesus ha Mateo 5:47?

⁸ Tungod han okupado nga pagkinabuhi ha damu nga lugar yana, an nagkakatapo nga mga tawo kasagaran na nga diri man la nasiring nga “hello” o “kumusta ka na?” Syempre, diri ginlalaoman nga kakaistoryahon han usa an ngatanan nga nalabay ha ligid han kalye nga damu an tawo. Kondi, ha damu nga kahimtang, angayan ngan maopay an pangumusta ha iba. Batasan mo ba nga mangumusta ha mga tawo? O kasagaran nga diri ka nahiyom o nangungumusta kon nalabay ka? Bisan kon diri tinuyo, nakukultibar han usa an maraot nga batasan.

⁹ Nagpapahinumdom ha aton hi Jesus: “Kon kamo mangumusta ha iyo kabugtoan la, ano an iyo bubuhaton nga labi ha iba? Waray ba magbuhat hin sugad hini an mga Hentil man?” (Mat. 5:47) May kalabotan hini, an magsaragdon nga hi Donald Weiss nagsurat: “Nasusubo an mga tawo kon diri hira gin-aasi o kon ginlalabyan la. Waray ka gud mairarason nga makakapakalma hadton imo ginbalewaray. Simple la an solusyon: Kumustaha o kaistoryaha hira.” Kon diri naton tugotan an aton pagin awdanon nga magpugong ha aton ha pakiistorya ha iba, maopay an magigin resulta hito.

10. Paonan-o an maopay nga pamatasan nabulig ha aton nga magkaada mabungahon nga ministeryo? (Kitaa an kahon nga “Tikangi Pinaagi han Hiyom.”)

¹⁰ Tagda an ginbuhat han Saksi nga mag-asawa nga hira Tom ngan Carol nga naukoy ha usa nga daku nga syudad ha Amerika del Norte. Gintatagad nira an makisangkayon nga pakiistorya ha ira mga amyaw sugad nga bahin han ira ministeryo. Paonan-o nira ginhimo ito? Uyon ha Jakobo 3:18, hi Tom nagsiring: “Nakikiistorya ngan nakikisangkay kami ha mga tawo. Ginkukumusta namon adton aada ha gawas han ira balay ngan nagtatrabaho ha ira lugar. Nahiyom kami ngan nangungumusta ha ira. Nakikiistorya kami mahitungod han ira mga interes—mga anak, ayam, balay, ngan trabaho. Diri nag-iiha, ira kami gintatagad nga sangkay.” Hi Carol nagdugang: “Ha sunod nga mga pakiistorya, nagsusumat kami han amon ngaran ngan napakiana liwat kami han ira ngaran. Iginsusumat namon ha ira kon ano an amon ginbubuhat ha komunidad pero madaliay la an amon pakiistorya. Katapos, nasasangyawan namon hira.” Damu han amyaw nira Tom ngan Carol an natapod na ha  ira. Damu an nagkarawat han basado ha Biblia nga publikasyon ngan may-ada nagpakita hin interes ha pag-aram han kamatuoran.

Pagin Matinalahuron Bisan ha Makuri nga Kahimtang

11, 12. Kay ano nga makakalaom kita hin maraot nga pagtratar kon nagsasangyaw, ngan ano an sadang naton buhaton?

¹¹ Usahay, maraot an pagtratar ha aton kon nagsasangyaw kita. Ginlalaoman naton ini tungod kay nagpahamangno hi Kristo Jesus ha iya mga disipulo: “Kon ako ginbiling nira hin pagtimaraot amo man kamo pagbibilngon hin pagtimaraot.” (Juan 15:20) Kon bumulos kita ha maraot nga ginyakan, diri maopay an magigin resulta. Ano an angay naton buhaton? Hi apostol Pedro nagsurat: “Pagbaraanon niyo ha iyo mga kasingkasing hi Kristo nga Ginoo: ngan mag-andam kamo gihapon ha pagbaton, nga may kaaghop ngan pagtahod, ha ngatanan nga mga tawo nga mapakiana ha iyo, kon ano an katungdanan han pagtoo nga aada ha iyo.” (1 Ped. 3:15) An aton pagin matinalahuron—mapainubsanon ngan malumo nga pagbaton—mahimo makabag-o han disposisyon hadton nag-insulto ha aton.—Tito 2:7, 8.

¹² Makakaandam ba kita ha pagbaton ha magraot nga komento ha paagi nga inuuyonan han Dios? Oo. Hi Pablo nagsagdon: “An iyo pulong kinahanglan nga may maada [pirme] grasya, nga ginparasa hin asin, basi nga iyo hibaroan an pagbatonay han usa kag usa.” (Kol. 4:6) Kon batasanon naton nga magin matinalahuron ha mga kapamilya, kaeskwela, katrabaho, kakongregasyon, ngan mga amyaw, mas andam kita ha pag-atubang ha mga pakaraot ngan insulto ha paagi nga angayan ha Kristiano.—Basaha an Roma 12:17-21.

13. Paghatag hin ehemplo nga nagpapakita nga an pagin matinalahuron nakakabag-o han disposisyon han mga nakontra.

¹³ May-ada maopay nga resulta an pagpakita hin maopay nga pamatasan bisan ha makuri nga kahimtang. Pananglitan, usa nga Saksi ha Japan an ginpakaraot han tagbalay ngan han iya bisita. Bisan pa hito, matinalahuron nga binaya an bugto. Han nagpadayon hiya ha pagsangyaw hito nga teritoryo, naobserbahan niya nga nagkikinita ha iya ito nga bisita. Han dinaop ha iya an bugto, an bisita nagsiring: “Pasensya ka na han nahitabo. Bisan kon maraot an amon ginsiring ha imo, naobserbahan ko nga nahiyom ka la gihapon. Ano an akon hihimoon basi magin pariho  ha imo?” Ito nga tawo nawad-an ngay-an hin trabaho ngan namatay pa la an iya nanay salit nawad-an na hiya hin paglaom ngan kalipay. Gintanyagan hiya hini nga Saksi hin pag-aram ha Biblia ngan ginkarawat ito. Waray pag-iha, nag-aaram hiya hin duha ka beses kada semana.

An Gimaopayi nga Paagi han Pagkultibar han Maopay nga Pamatasan

14, 15. Paonan-o ginbansay han mga surugoon ni Jehova ha kadaan nga panahon an ira mga anak?

¹⁴ Ha kadaan nga panahon, ginsiguro han diosnon nga mga kag-anak nga ha balay pa la mahibaro na an ira mga anak han pagin matinalahuron. Tagda an matinalahuron nga pagtawagay nira Abraham ngan Isaak nga nakarekord ha Genesis 22:7. Maoobserbahan liwat kan Jose an maopay nga pagbansay han iya mga kag-anak. Han napriso hiya, matinalahuron hiya bisan ha iya igkasi-priso. (Gen. 40:8, 14) Makikita ha iya ginsiring kan Paraon nga maaram hiya han husto nga paagi ha pakiistorya ha usa nga hitaas an katungdanan.—Gen. 41:16, 33, 34.

¹⁵ An Napulo nga Sugo nga iginhatag ha mga Israelita may-ada hini nga balaud: “Tahuron mo an imo amay ngan an imo iroy, basi an imo mga adlaw mahilawig dinhi ha tuna nga kan Jehova nga imo Dios iginhatag ha imo.” (Eks. 20:12) Usa nga paagi nga maipapakita han mga anak an pagtahod ha ira mga kag-anak amo an maopay nga pamatasan ha balay. Ipinakita han anak nga babaye ni Jepte nga gintatahod gud niya an iya tatay pinaagi ha pagtuman han saad han iya tatay bisan kon makuri ito.—Huk. 11:35-40.

16-18. (a) Paonan-o matututdoan an mga anak hin maopay nga pamatasan? (b) Ano an pipira nga kapulsanan han pagtutdo ha mga anak hin maopay nga pamatasan?

¹⁶ Importante gud an pagbansay ha aton mga anak basi magin maopay an ira pamatasan. Basi magin maopay nga adulto an mga batan-on, kinahanglan mahibaro hira han husto nga paagi han pag-abiabi ha mga bisita, pagbaton ha telepono, ngan pagkaon upod han iba. Sadang liwat hira tutdoan kon kay ano nga kinahanglan abrihan nira an purtahan para ha iba, magin matinagaron ha mga lagas ngan magsakit, ngan buligan adton may-ada dara nga mabug-at. Kinahanglan mahibaroan nira nga importante an sinsero nga pagsiring “alayon,” “salamat,” “waray sapayan,” “ano an akon maibubulig ha imo?,” ngan “pasayloa ako.”

¹⁷ Diri makuri an pagbansay ha mga anak nga magin matinalahuron. An gimaopayi nga paagi amo an pagpakita hin susbaranan. Iginsaysay han bainte-singko anyos nga hi Kurt kon paonan-o nagin matinalahuron hiya ngan an iya tulo nga bugto: “Nakikita ngan nababatian namon an matinagaron nga pag-istoryahay nira Nanay ngan Tatay ngan an mapailubon ngan makonsiderasyon nga pagtratar nira ha iba. Ha Kingdom Hall, igin-uupod ako ni Tatay antes ngan katapos han katirok  ha pakiistorya ha lagas nga kabugtoan. Nababatian ko an iya pangumusta ngan nakikita ko an iya pagtahod ha ira.” Hi Kurt nagdugang: “Paglabay han panahon, nasubad ko an iya pamatasan. Nagin natural na ha akon an matinalahuron nga pagtratar ha mga tawo. Diri ito tungod kay kinahanglan mo ito buhaton, kondi tungod ito kay karuyag mo ito buhaton.”

¹⁸ Ano an posible mahitabo kon tutdoan han mga kag-anak an ira mga anak hin maopay nga pamatasan? An mga anak magkakaada hin kasangkayan ngan malilikyan an pakiaway ha iba. Maiaandam hira nga magkaada maopay nga relasyon ha ira mga amo ngan katrabaho. Dugang pa, an mga anak nga maopay an pamatasan, matinalahuron, ngan matadong makakapalipay ha ira mga kag-anak.—Basaha an Proberbios 23:24, 25.

Naiiba Tungod ha Maopay nga Pamatasan

19, 20. Kay ano nga sadang kita magin determinado nga sundon an maopay nga pamatasan han aton Dios ngan han iya Anak?

¹⁹ “Magsubad kamo ha Dios, sugad ha mga hinigugma nga anak,” nagsurat hi Pablo. (Efe. 5:1) An pagsubad kan Jehova nga Dios ngan ha iya Anak nag-uupod han pag-aplikar han mga prinsipyo ha Biblia, sugad hadton ginhisgotan hini nga artikulo. Kon buhaton naton ito, malilikyan naton an salingkapaw nga pagpakita hin maopay nga pamatasan basi la paboran han usa nga hitaas an posisyon o magkaada materyal nga bentaha.—Jud. 16.

²⁰ Ha kataposan nga mga adlaw han maraot nga pagmando ni Satanas, determinado hiya nga wad-on an iginhatag ni Jehova nga mga prinsipyo ha pagin matinalahuron. Kondi mapapakyas an Yawa ha pagdaot han maopay nga pamatasan han tinuod nga mga Kristiano. Hinaot magin determinado an tagsa ha aton ha pagsunod han maopay nga pamatasan han aton Dios ngan han iya Anak. Tungod hito, an aton pagyakan ngan paggawi pirme magigin iba ha paggawi hadton nagpili nga magin maraot an pamatasan. Madadayaw naton an ngaran han aton Dios, hi Jehova, nga nagpakita hin hingpit nga susbaranan han maopay nga pamatasan, ngan madadani naton ha tinuod nga pagsingba an sinsero nga mga tawo.

[Footnote]

Nahinunumdoman Mo Ba?

• May kalabotan ha pagpakita hin maopay nga pamatasan, ano an hibabaroan naton tikang kan Jehova ngan ha iya Anak?

• Kay ano nga an sinsero nga pangumusta naghahatag hin maopay nga impresyon ha aton sugad nga mga Kristiano?

• Paonan-o an pagin matinalahuron nakakabulig nga magin mabungahon an pagsangyaw?

• Ano an mahihimo han mga kag-anak basi matutdoan an ira mga anak hin maopay nga pamatasan?

[Mga Pakiana]

[Kahon ha pahina 27]

Tikangi Pinaagi han Hiyom

Damu an nag-aalang ha pag-una ha pakiistorya ha diri nira kilala. Kondi, tungod han gugma ha Dios ngan ha igkasi-tawo, nangangalimbasog gud an mga Saksi ni Jehova nga mahibaro ha pakiistorya basi isumat ha iba an kamatuoran han Biblia. Ano an makakabulig ha imo basi mag-uswag hini nga bahin?

Usa nga prinsipyo an mababasa ha Filipos 2:4: “Diri magmangno an tagsa-tagsa ha iyo ha iya mga kalugaringon nga butang, kondi sugad man ha mga butang han iba.” Tagda kon paonan-o naton ini maiaaplikar hini nga kahimtang: Kon may-ada usa nga tawo nga iginkikita mo pa la, tatagdon ka niya nga estranghero. Ano an imo bubuhaton basi magin komportable hiya ha imo? Makakabulig an imo paghiyom ngan pangumusta ha iya. Kondi, may-ada ka pa angay tagdon.

Kon makiistorya ka ha tawo nga may-ada ginhuhunahuna, bangin madisturbo mo hiya. Kon makikiistorya ka ha iya mahitungod han imo la ginhuhunahuna, bangin diri hiya magin interesado. Salit, kon masasabtan mo an posible nga iya ginhuhunahuna, kay ano nga diri ito gamiton ha pakiistorya ha iya? Ito an ginbuhat ni Jesus han ginkaistorya niya an babaye ha atabay ha Samaria. (Juan 4:7-26) An ginhunahuna han babaye amo an pag-alog. Salit, ito an nagin basihan han pakiistorya ni Jesus, ngan nagin makaruruyag ito nga paghisgot han espirituwal nga mga butang.

[Retrato ha pahina 26]

An pagin makisangkayon nagriresulta hin maopay nga pagpamatuod

[Retrato ha pahina 28]

Angayan pirme an maopay nga pamatasan