Ipakita an Imo Pag-uswag
Ipakita an Imo Pag-uswag
“Magmaabtik ka hini nga mga bagay; buhata gud ini nga mga bagay; basi nga an imo kauswagan mahipahayag ha ngatanan.”—1 TIM. 4:15.
1, 2. Ano an aton hinbaroan mahitungod han kinabuhi ni Timoteo han bata pa hiya, ngan ano nga pagbag-o an nahitabo han mga 20 anyos hiya?
HAN bata pa hi Timoteo naukoy hiya ha Galasia (Turkey na yana), usa nga probinsya han Roma. Damu nga Kristiano nga kongregasyon an naestablisar didto mga dekada katapos mamatay hi Jesus. Ha usa hito nga mga kongregasyon nagin aktibo nga Kristiano hira Timoteo, an iya nanay, ngan an iya lola. (2 Tim. 1:5; 3:14, 15) Sigurado nga malipayon hi Timoteo sugad nga batan-on nga Kristiano ha iya nahiaraan nga lugar. Kondi, tigda nga nagkaada pagbag-o.
2 Nagtikang ito han ikaduha nga pagbisita ni apostol Pablo. Hito nga panahon, hi Timoteo bangin mga 20 anyos na. Durante han pagbisita ni Pablo, bangin ha Listra, nabatian niya nga “maopay an bantog” ni Timoteo ha kabugtoan didto. (Buh.16:2) Sigurado nga nakita kan Timoteo an pagkahamtong bisan kon batan-on pa hiya. Salit pinaagi han giya han baraan nga espiritu, ginpili hiya ni Pablo ngan han mga tigurang para ha espesyal nga buruhaton ha kongregasyon.—1 Tim. 4:14; 2 Tim. 1:6.
3. Ano an talagsahon nga pribilehiyo ni Timoteo?
3 Nagkaada hi Timoteo hin talagsahon nga pribilehiyo—magin kaupod ni apostol Pablo ha pagbyahe sugad nga misyonero! (Buh.16:3) Handurawa an kahipausa ngan kalipay ni Timoteo! Ha tiarabot nga mga tuig, makakaupod niya hi Pablo ngan an iba pa ha pagtuman han magkalain-lain nga buruhaton nga igintoka ha iya han mga apostol ngan mga tigurang. An ira pagbisita ha mga kongregasyon nakaparig-on gud han espirituwalidad han kabugtoan. (Basaha an Buhat 16:4, 5.) Salit nakilala hi Timoteo han damu nga Kristiano tungod han iya pag-uswag ha espirituwal. Katapos hin mga 10 ka tuig nga pakig-upod kan Timoteo, hi apostol Pablo nagsurat ha mga taga-Filipos: ‘Waray iba nga tawo nga sugad [kan Timoteo] an hunahuna nga nagmamangno gud hin totoo ha iyo kahimtang. Hinbaroan niyo an proyba ha iya nga sugad ha usa nga bata nga nag-aalagad ha amay, sugad man hiya nag-aalagad upod ha akon ha pagpasarang han maopay nga sumat.’—Fil. 2:20-22.
4. (a) Ano nga daku nga responsabilidad an igintapod kan Timoteo? (b) Ano an mahimo igpakiana mahitungod ha ginsiring ni Pablo ha 1 Timoteo 4:15?
4 Han nagsurat hi Pablo ha mga taga-Filipos, iya igintapod kan Timoteo an daku nga responsabilidad ha pagpili hin mga tigurang ngan ministeryal. (1 Tim. 3:1; 5:22) Matin-aw nga hi Timoteo nagin responsable ngan matataporan nga paramangno. Kondi hito gihapon nga surat, gin-aghat hiya ni Pablo nga ‘ipahayag ha ngatanan an iya kauswagan.’ (1 Tim. 4:15) Diri ba daku na hinduro an pag-uswag nga iginpakita ni Timoteo? Kon sugad, ano an iginpapasabot ni Pablo, ngan paonan-o kita mabubuligan hini nga iya sagdon?
Kon Paonan-o Ipapakita an Pag-uswag
5, 6. Kay ano nga nameligro an espirituwal nga kaputli han kongregasyon ha Efeso, ngan paonan-o mapapanalipdan ni Timoteo an kongregasyon?
5 Aton usisahon an konteksto han 1 Timoteo 4:15. (Basaha an 1 Timoteo 4:11-16.) Antes ini isurat ni Pablo, nagbyahe hiya ha Masedonia kondi iya ginhangyo hi Timoteo nga magpabilin ha Efeso. Kay ano? Tungod kay an pipira didto nagtututdo hin kabuwaan nga nakakagbahin-bahin han kongregasyon. Kinahanglan panalipdan ni Timoteo an espirituwal nga kaputli han kongregasyon. Paonan-o? An usa nga paagi amo an pagpakita hin susbaranan ha iba.
6 Hi Pablo nagsurat kan Timoteo: “Magin susbaranan ka hadton mga nagtutoo, ha pulong, ha batasan, ha gugma, ha pagtoo, ha kaputli.” Hiya nagsiring liwat: “Magmaabtik ka hini nga mga bagay; buhata gud ini nga mga bagay; basi nga an imo kauswagan mahipahayag ha ngatanan.” (1 Tim. 4:12, 15) Pag-uswag ini ha espirituwal nga mga kalidad ni Timoteo, diri ha pagkaada hitaas nga posisyon. Ini nga pag-uswag sadang pangalimbasogan han tagsa nga Kristiano.
7. Ano an ginlalaoman ha ngatanan nga Kristiano?
7 Pariho ha panahon ni Timoteo, magkalain-lain an pribilehiyo ha kongregasyon yana. An pipira mga tigurang o ministeryal. An iba mga payunir. Ngan an iba pa mga nagbibyahe nga paramangno, Bethelite, o misyonero. Nakikigbahin an mga tigurang ha magkalain-lain nga programa han pagtutdo sugad han mga asembleya ngan kombensyon. Kondi, an ngatanan nga Kristiano—lalaki, babaye, ngan mga batan-on—may-ada potensyal nga mag-uswag ha espirituwal. (Mat. 5:16) Ha pagkamatuod, pariho kan Timoteo, bisan an mga Kristiano nga may espesyal nga mga pribilehiyo ginlalaoman nga ipakita ha ngatanan an ira espirituwal nga mga kalidad.
Magin Susbaranan ha Pagyakan
8. Ano an epekto han aton pagyakan ha aton pagsingba?
8 Usa nga bahin diin sadang magin susbaranan hi Timoteo amo an iya paagi han pagyakan. Paonan-o naton maipapakita nga nag-uuswag kita hini nga bahin? Nahibabaroan ha aton pagyakan kon ano kita nga klase hin tawo. Husto gud an ginsiring ni Jesus: “Tikang ha kahuraan han kasingkasing iginyayakan han baba.” (Mat. 12:34) Nasabtan liwat han bugto ha iroy ni Jesus nga hi Jakobo an mahimo magin epekto han aton pagyakan ha aton pagsingba. Hiya nagsurat: “Kon may tawo nga maghunahuna nga hiya relihiyoso, nga waray [niya] pagpugngi an iya dila kondi nga ginlimbongan niya an iya kasingkasing, an relihiyon niya waray pulos.”—Jak. 1:26.
9. Paonan-o kita sadang magin susbaranan ha aton paagi han pagyakan?
9 Makikita ha aton pagyakan an aton pag-uswag ha espirituwal. Salit imbes nga magyakan hin malaw-ay, negatibo, nagpapakaraot, o nakakasakit, an hamtong nga mga Kristiano nangangalimbasog ha pagparig-on, pagliaw, pagdasig, ngan pag-aghat. (Prob. 12:18; Efe. 4:29; 1 Tim. 6:3-5, 20) An aton pagkadisidido nga isumat an aton gintotoohan ngan depensahan an higtaas nga prinsipyo han Dios nagpapakita han aton debosyon ha iya. (Roma 1:15, 16) Sigurado nga maoobserbahan han magtadong kon paonan-o naton ginagamit an aton abilidad ha pagyakan ngan bangin subaron kita nira.—Fil. 4:8, 9.
Susbaranan ha Paggawi Ngan Kaputli
10. Kay ano nga importante ha aton pag-uswag ha espirituwal an kinasingkasing nga pagtoo?
10 Basi magin susbaranan, labaw pa an ginkikinahanglan kay han makaparig-on nga pulong. An Kristiano nga nagyayakan hin husto kondi diri nagbubuhat hito nagigin salingkapaw. Maaram gud hi Pablo han pagkasalingkapaw han mga Pariseo ngan han nakakadaot nga resulta hito. Pipira ka beses nga nagpahamangno hiya kan Timoteo nga likyan an sugad nga pagkadiri-sinsero ngan pagkasalingkapaw. (1 Tim. 1:5; 4:1, 2) Kondi diri salingkapaw hi Timoteo. Ha ikaduha nga surat ni Pablo kan Timoteo, hiya nagsiring: “Nahinunumdom ako han imo kinasingkasing nga pagtoo.” (2 Tim. 1:5, Maopay nga Sumat) Bisan pa hito, kinahanglan ipakita ni Timoteo ha iba nga tinuod hiya nga Kristiano. Sadang hiya magin susbaranan ha paggawi.
11. Ano an iginsagdon ni Pablo kan Timoteo mahitungod ha hingyap nga magriko?
11 Ha duha nga surat ni Pablo kan Timoteo, nagsagdon hiya mahitungod ha pipira nga paggawi. Pananglitan, kinahanglan likyan ni Timoteo an hingyap nga magriko. Hi Pablo nagsiring: “An gugma ha salapi amo an usa nga gamot han ngatanan nga karaotan: ngan an tinguha han iba ha salapi amo an nagsimang ha ira pagtoo, ngan nagtugob ha ira hin damu nga kasakitan.” (1 Tim. 6:10) An gugma ha karikohan tigaman han maluya nga espirituwalidad. Ha luyo nga bahin, an pagin kontento ha simple nga pagkinabuhi—‘pagkaada kinakaon ngan igintatabon’—tigaman han pag-uswag ha espirituwal.—1 Tim. 6:6-8; Fil. 4:11-13.
12. Paonan-o naton maipapakita an aton pag-uswag ha personal nga pagkinabuhi?
12 Hi Pablo nagsiring kan Timoteo nga importante gud nga an Kristiano nga kababayin-an “magpakaopay ha ira ha mga kaangayan nga panapton, . . . ngan maligdong.” (1 Tim. 2:9) Maopay nga susbaranan an kababayin-an nga kasadangan ngan desente mamado ngan mag-ayos, ngan ha iba pa nga bahin han personal nga pagkinabuhi. (1 Tim. 3:11) Aplikado liwat ini ha Kristiano nga kalalakin-an. Hi Pablo nagsiring nga an mga paramangno kinahanglan “maaram hin kasadangan, buotan, maligdong.” (1 Tim. 3:2) Kon ipakita naton ini nga mga kalidad ha adlaw-adlaw nga buruhaton, makikita han ngatanan an aton pag-uswag.
13. Paonan-o kita magigin susbaranan ha kaputli pariho kan Timoteo?
13 Hi Timoteo kinahanglan magin susbaranan liwat ha kaputli. Han gin-unabi ni Pablo ini nga pulong, ginhihisgotan niya an espisipiko nga paggawi—an kaputli ha moral. An paggawi ni Timoteo labi na ha pakig-upod ha kababayin-an kinahanglan waray-ikasaway. Sadang niya trataron “an mga tigurang nga babaye sugad ha mga iroy; an mga daraga sugad ha mga kabugtoan nga kababayin-an, ha bug-os nga kaputli.” (1 Tim. 4:12; 5:2) Nakikita han Dios bisan an imoral nga mga buhat nga baga hin naitatago, ngan sigurado nga maabot an panahon nga hibabaroan ito han iba. Ha luyo nga bahin, an mag-opay nga buhat diri liwat maitatago. (1 Tim. 5:24, 25) An ngatanan nga Kristiano may-ada higayon nga ipakita an ira pag-uswag ha paggawi ngan kaputli.
Importante an Gugma Ngan Pagtoo
14. Paonan-o ginpapabug-atan han Kasuratan nga kinahanglan maghigugmaay kita?
14 Gugma an nangunguna nga kalidad han tinuod nga Kristiano. Hi Jesus nagsiring ha iya mga disipulo: “Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.” (Juan 13:35) Paonan-o naton maipapakita ito nga gugma? An Pulong han Dios naghahangyo ha aton nga “mag-inantosay an usa kag usa ha gugma,” ‘magmalolooyon an usa kag usa, magmahumok an kasingkasing, magpinasayloay,’ ngan magin maabiabihon. (Efe. 4:2, 32; Heb. 13:1, 2) “Pagsighigugmaay gud kamo hin minagburugto,” nagsurat hi apostol Pablo.—Roma 12:10.
15. Kay ano nga importante nga an ngatanan magpakita hin gugma, labi na an Kristiano nga mga paramangno?
15 Kon hi Timoteo mapintas ngan diri buotan ha iya mga igkasi-Kristiano, mawawaray-pulos an kaopayan nga iya nahimo sugad nga magturutdo ngan paramangno. (Basaha an 1 Korinto 13:1-3.) Ha luyo nga bahin, an iya sinsero nga gugma ha kabugtoan upod an pagkamaabiabihon ngan mag-opay nga buhat sigurado nga nagpakita han iya pag-uswag ha espirituwal. Salit maopay gud nga ha surat ni apostol Pablo kan Timoteo espisipiko nga gin-unabi niya nga kinahanglan magin susbaranan hi Timoteo ha pagpakita hin gugma.
16. Kay ano nga kinahanglan ipakita ni Timoteo an marig-on nga pagtoo?
16 Han nakadto hi Timoteo ha Efeso, nasarihan an iya pagtoo. May-ada didto nagtututdo hin mga doktrina nga diri uyon ha Kristiano nga kamatuoran. An iba nagpapasarang hin buwa nga mga istorya o nagsasaliksik hin mga impormasyon nga waray man naibubulig ha espirituwalidad han kongregasyon. (Basaha an 1 Timoteo 1:3, 4.) Iginhulagway ni Pablo nga hira “palabilabihon . . . nga waray hinbaroan nga bisan ano, kondi makilalantugion, ngan makimasamok ha mga pulong.” (1 Tim. 6:3, 4) Puydi ba sarihan ni Timoteo bisan an paghunahuna la han nakakadaot nga mga ideya nga nakakaimpluwensya ha iba nga kabugtoan? Diri, tungod kay hi Pablo nagsagda ha iya nga ‘makig-away hin maopay nga pakig-away ha pagtoo’ ngan likyan an “mga yakan nga diri mga espirituhanon, ngan ha mga pagkontra han mga buwa nga gintawag nga kaaram.” (1 Tim. 6:12, 20, 21) Sigurado nga ginsunod ni Timoteo iton maaramon nga sagdon ni Pablo.—1 Kor. 10:12.
17. Ha ano nga paagi mahimo masarihan an aton pagtoo yana?
17 Makapainteres nga ginsumatan hi Timoteo nga ha “urhi nga panahon an iba magkakahulog tikang ha pagtoo, manmamati ha mga maglimbong nga mga espiritu, ngan ha mga pagturon-an han mga yawa.” (1 Tim. 4:1) An ngatanan ha kongregasyon, pati na adton may mga pribilehiyo, kinahanglan magpakita hin marig-on nga pagtoo pariho kan Timoteo. Pinaagi ha pagin determinado nga likyan an apostasya, maipapakita naton an aton pag-uswag ngan magigin susbaranan kita ha pagtoo.
Pangalimbasugi nga Ipakita an Imo Pag-uswag
18, 19. (a) Paonan-o mo maipapakita ha ngatanan an imo pag-uswag? (b) Ano an hihisgotan han sunod nga artikulo?
18 Matin-aw nga an pag-uswag ha espirituwal han tinuod nga Kristiano waray kalabotan ha iya hitsura, abilidad, o pagkaprominente. Ngan bangin diri liwat ito tungod han kahilawig han iya pag-alagad. Lugod, an tinuod nga pag-uswag ha espirituwal makikita ha aton pagkamasinugtanon kan Jehova ha aton panhunahuna, pagyakan, ngan paggawi. (Roma 16:19) Sadang naton sundon an sugo nga higugmaon an usa kag usa ngan kultibaron an marig-on nga pagtoo. Oo, aton pamalandungon an mga sagdon ni Pablo kan Timoteo ngan buhaton ito basi makita han ngatanan an aton pag-uswag.
19 Usa pa nga kalidad nga makikita ha aton pag-uswag ha espirituwal ngan pagkahamtong sugad nga Kristiano amo an kalipay, nga bahin han bunga han baraan nga espiritu han Dios. (Gal. 5:22, 23) Hihisgotan han sunod nga artikulo kon paonan-o naton makukultibar ngan matitipigan an kalipay ha panahon han kakurian.
Ano an Imo Baton?
• Ano an hibabaroan han iba mahitungod han aton paagi ha pagyakan?
• Paonan-o makikita an aton pag-uswag ha paggawi ngan kaputli?
• Kay ano nga an mga Kristiano sadang magin susbaranan ha gugma ngan pagtoo?
[Mga Pakiana]
[Retrato ha pahina 11]
Hamtong hi Timoteo bisan kon batan-on pa
[Retrato ha pahina 13]
Nakikita ba han iba an imo pag-uswag?