Magpabilin nga Malipayon ha Panahon han Kakurian
Magpabilin nga Malipayon ha Panahon han Kakurian
“Hira ngatanan maglilipay nga naayop [kan Jehova] ha gihapon, magguliat hin kalipay.”—SAL. 5:11.
1, 2. (a) Ano an pipira nga hinungdan han duro nga kasubo yana? (b) Labot han mga kakurian nga naieksperyensyahan han ngatanan, ano an kinahanglan ilubon han tinuod nga mga Kristiano?
NAKAKAEKSPERYENSYA an mga Saksi ni Jehova han kakurian nga gin-aantos han katawohan. Damu nga alagad han Dios an nagigin biktima han krimen, girra, ngan iba pa nga kawaray-hustisya. An natural nga mga kalamidad, kapobrehan, sakit, ngan kamatayon nagriresulta hin duro nga kasubo. Angayan la nga hi apostol Pablo nagsurat: “Aton hinbaroan nga an bug-os nga binuhat naghaharoy ngan nasasakit . . . ngada niyan.” (Roma 8:22) Nakakaeksperyensya liwat kita han mga resulta han pagkadiri-hingpit. Pariho kan Hadi David, bangin sumiring kita: “An akon mga karat-an inagi ha bawbaw han akon ulo: sugad hin mabug-at nga dinara namumug-at ha bawbaw nakon.”—Sal. 38:4.
2 Labot han kakurian nga gin-aantos han ngatanan, ginpapas-an liwat han tinuod nga mga Kristiano an simboliko nga pasakitan nga kahoy. (Luk. 14:27) Oo, pariho kan Jesus, an iya mga disipulo gindudumtan ngan gintitimaraot. (Mat. 10:22, 23; Juan 15:20; 16:2) Salit, ha pagsunod kan Kristo kinahanglan mangalimbasog ngan magpailob gud kita samtang aton ginhuhulat an mga bendisyon ha bag-o nga kalibotan.—Mat. 7:13, 14; Luk. 13:24.
3. Kay ano nga an pagpalipay ha Dios diri nangangahulogan nga mag-iinantos na la kita?
3 Nangangahulogan ba ini nga an tinuod nga mga Kristiano waray na kalipay? Magigin masurub-on ngan mabidoon na la ba kita tubtob ha kataposan? Matin-aw nga diri, kay karuyag ni Jehova nga magmalipayon kita samtang naghuhulat han katumanan han iya mga saad. Pauroutro nga iginsasaysay han Biblia nga malipayon an katawohan han Dios. (Basaha an Isaias 65:13, 14.) “Hira ngatanan maglilipay nga naayop [kan Jehova] ha gihapon, magguliat hin kalipay,” siring han Salmo 5:11. Oo, mahimo kita magin malipayon, murayaw an hunahuna, ngan kontento bisan kon nakakaeksperyensya hin kakurian. Aton hisgotan kon paonan-o an Biblia makakabulig ha aton nga magpabilin nga malipayon bisan pa han mga pagsari.
Hi Jehova—An “Malipayon nga Dios”
4. Ano an inaabat han Dios kon iginsasalikway an iya pagmando?
4 Tagda an susbaranan ni Jehova. Sugad nga Dios nga Makagarahum-ha-ngatanan, hiya an nagmamando ha bug-os nga uniberso. Waray kulang ha iya ngan diri hiya nadepende ha iba. Kondi bisan kon diri matupngan an iya gahum, sigurado nga nasubo hiya han an usa han iya espirituhanon nga anak nagrebelde ngan nagin Satanas. Sigurado nga nasubo liwat an Dios han an iba nga mga anghel inupod ha pagrebelde. Hunahunaa liwat an kabido ni Jehova han iginsalikway hiya nira Adan ngan Eva, an iya gimaopayi nga linarang dinhi ha tuna. Tikang hadto, binilyon nga katawohan an nagsasalikway han iya pagmando.—Roma 3:23.
5. Ano an nakakapasubo gud kan Jehova?
5 An pagrebelde ni Satanas nagpapadayon pa gihapon. Mga 6,000 ka tuig na nga nakikita ni Jehova an pagsingba ha mga dios-dios, kamadarahog, pagpatay, ngan kalaw-ayan. (Gen. 6:5, 6, 11, 12) Dugang pa, iya nababatian an duro nga pagbuwa ngan pagpasipara. Bisan an iya mismo mga magsiringba usahay nakakapasubo ha iya. Iginsaysay han Biblia an usa nga ehemplo: “Agsob hira umato kontra ha iya didto ha kamingawan, ngan pinapagmasubo hiya nira . . . Ngan binalik liwat hira ngan pagsulayon an Dios, ngan ginpasina an Baraan ha Israel.” (Sal. 78:40, 41) Sigurado nga duro an kasakit ni Jehova kon iginsasalikway hiya han iya katawohan. (Jer. 3:1-10) Matin-aw nga nasusubo gud hiya kon may maraot nga nahitatabo.—Basaha an Isaias 63:9, 10.
6. Paonan-o nagios an Dios ha makasurubo nga mga kahimtang?
6 Kondi an kasakit ngan kasubo diri nakakapaundang kan Jehova ha iya mga buruhaton. Kon nagtitikaduro an problema, hi Jehova nagios dayon basi maibanan an maraot nga resulta hito. Naghihimo liwat hiya hin mga paagi basi ha kataposan matuman an iya katuyoan. Tungod hini, malipayon nga ginpapamulat ni Jehova an pagbindikar han iya pagkasoberano ngan an mga bendisyon nga magigin resulta hito ha iya maunungon nga mga magsiringba. (Sal. 104:31) Oo, bisan pa han duro nga pagpasipara ha iya, pirme hiya “malipayon nga Dios.”—1 Tim. 1:11, NW; Sal. 16:11.
7, 8. Kon nagkakaproblema, paonan-o naton masusubad hi Jehova?
7 Syempre, diri gud naton matutupngan an abilidad ni Jehova ha pagsulbad hin mga problema. Bisan pa hito, mahimo naton hiya subaron kon naatubang kita hin mga kakurian. Natural la nga masubo kon nagkakaproblema, kondi diri kita sadang magpabilin nga masurub-on. Tungod kay ginlarang kita ha dagway ni Jehova, may-ada kita abilidad ha paghunahuna ngan praktikal nga kinaadman nga makakabulig ha aton ha pagturotimbang han mga problema ngan paghimo hin paagi basi masulbad ito kon posible.
8 Makakabulig gud ha aton an pagkarawat nga may mga kahimtang nga diri naton kontrolado. An duro nga pagkinabaraka bangin makadugang la han aton pag-abat hin kapakyasan ngan makawara han aton kalipay ha pag-alagad kan Jehova. Kon nahimo na naton an ngatanan nga sadang buhaton ha pagsulbad han problema, mas maopay nga diri na ito paghinunahunaon ngan magsentro lugod ha mas mapulsanon nga mga buruhaton. Ginpapabug-atan ini han masunod nga mga asoy ha Biblia.
Importante an Pagin Makatadunganon
9. Paonan-o nagin makatadunganon hi Hana?
9 Tagda an kahimtang ni Hana, nga nanay ni propeta Samuel. Masurub-on hiya hadto kay diri hiya nagkakaanak. Ginyaangyaangan hiya ngan gintamay tungod kay baog hiya. May panahon nga duro gud an iya kasubo salit nagtinangis hiya ngan diri na nakaon. (1 Sam. 1:2-7) Makausa han nakadto hiya ha santuaryo ni Jehova, “hiya nakada ha kapaitan han iya kalag, ngan nag-ampo kan Jehova, ngan nagtuok hinduro.” (1 Sam. 1:10) Katapos niya isumat kan Jehova an ngatanan nga iya inaabat, an hitaas nga saserdote nga hi Eli dinaop ha iya ngan nagsiring: “Lakat ha kalinaw; ngan an Dios han Israel matugot han imo hangyo nga imo pinangaro ha iya.” (1 Sam. 1:17) Hito nga panahon, sigurado nga nasantop ni Hana nga ginbuhat na niya an ngatanan. Waray hiya mahihimo han iya pagin baog. Nagin makatadunganon hiya. Katapos, hiya “linakat ha iya dalan, ngan kinaon; ngan an iya pangahimo diri na mabidoon.”—1 Sam. 1:18.
10. Paonan-o nagin makatadunganon hi Pablo han nagkaada hiya problema nga diri nasusulbad?
10 Nagin makatadunganon liwat hi apostol Pablo han nakaeksperyensya hiya hin kakurian. May-ada hiya problema nga nakahatag ha iya hin duro nga kasakit. Gintawag niya ito nga “tunok ha unod.” (2 Kor. 12:7) Anoman an problema ni Pablo, ginbuhat niya an iya mahihimo ngan nag-ampo kan Jehova nga mawara ito. Makapira hiya nanginyupo kan Jehova? Tulo ka beses. Katapos hito, an Dios nagsiring ha iya nga an “tunok ha unod” diri mawawara ha milagroso nga paagi. Ginkarawat ni Pablo an iya kahimtang ngan waray gud hiya magpaulang ha pag-alagad kan Jehova.—Basaha an 2 Korinto 12:8-10.
11. Paonan-o an pag-ampo ngan panginyupo makakabulig ha pag-atubang han mga problema?
11 Diri iginpapasabot hini nga maundang na kita ha pag-ampo kan Jehova mahitungod han aton mga problema. (Sal. 86:7) Lugod, an Pulong han Dios nag-aaghat ha aton: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro.” Paonan-o babatunon ni Jehova ito nga mga panginyupo ngan paghangyo? An Biblia dugang nga nasiring: “Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Fil. 4:6, 7) Oo, bangin diri wad-on ni Jehova an aton problema, pero mahimo niya batunon an aton mga pag-ampo pinaagi ha pagpanalipod han aton hunahuna. Katapos ito ig-ampo, bangin masantop naton nga peligroso an pagkinabaraka.
Magmalipayon ha Pagbuhat han Kaburut-on han Dios
12. Kay ano nga nakakadaot an maiha nga kasubo?
12 An Proberbios 24:10 nasiring: ‘Kon ikaw mahiraptay ha adlaw ha kakurian, an imo kusog gutiay.’ Usa pa nga proberbio an nasiring: “Pinaagi han kamabidoon han kasingkasing an espiritu nabubungkag.” (Prob. 15:13) May mga Kristiano nga nagin masurub-on hinduro tubtob nga inundang ha pagbasa ngan pamalandong han Pulong han Dios. Diri na kinasingkasing an ira pag-ampo, ngan bangin mag-inusahan na la imbes nga makig-upod ha kabugtoan. Matin-aw nga nakakadaot an maiha nga kasubo.—Prob. 18:1, 14.
13. Ano nga mga buruhaton an mahimo makawara han aton kasubo ngan makakalipay ha aton?
13 Ha luyo nga bahin, an pagin positibo mabulig ha aton nga maisentro an atensyon ha mga buruhaton nga makakalipay ha aton. Hi David nagsurat: “Nalilipay ako hin pagsugot han imo kaburut-on, Oh Dios nakon.” (Sal. 40:8) Kon nagkakaproblema, diri gud kita umundang ha aton pag-alagad. Ha pagkamatuod, usa nga tambal ha kasubo an pagbuhat han makakalipay ha aton. Hi Jehova nagsiring nga magmamalipayon kita kon regular nga babasahon ngan pamamalandungon naton an Biblia. (Sal. 1:1, 2; Jak. 1:25) Ha Baraan nga Kasuratan ngan ha mga katirok, makakapahimulos kita hin “makalilipay nga mga pulong” nga makakadasig ngan makakalipay ha aton.—Prob. 12:25; 16:24.
14. Ano nga saad ni Jehova an nakakalipay ha aton yana?
14 An Dios naghahatag ha aton hin damu nga hinungdan nga magin malipayon. Usa nga daku gud nga hinungdan han kalipay an iya saad nga kaluwasan. (Sal. 13:5) Maaram kita nga anoman an nahitatabo ha aton yana, ha kataposan bibendisyonan han Dios adton nagbubuhat han iya kaburut-on. (Basaha an Eklesiastes 8:12.) Maopay gud an pagkasaysay ni propeta Habakuk hito nga paglaom. Hiya nagsurat: “Bisan kon an kahoy nga igera diri rumampag, diri man an mga balagon han ubas mamunga; an kabudlay han olibo makakawang; ngan an mga uma diri mahatag hin karaunon; an kapangon nga kakarnerohan kukuhaon tikang ha toril, ngan mawawaray kapangon nga kabakahan dida ha mga toril: kondi ako magmamalipay dida kan Jehova, ako magmamahimongayaon dida han Dios han akon kaluwasan.”—Hab. 3:17, 18.
“Malipayon an Katawohan nga hi Jehova Amo an Ira Dios”
15, 16. Ano an pipira nga regalo han Dios nga mahimo makalipay ha aton samtang ginpapamulat naton an mga bendisyon ha tidaraon?
15 Samtang ginpapamulat naton an makalilipay nga tidaraon nga iginsaad ni Jehova, kaburut-on niya nga magmalipayon kita ha mag-opay nga butang nga iya iginhahatag. An Biblia nagsiring: “Maaram ako nga waray maoroopay para ha [katawohan], kay ha pagkalipay, ngan ha pagbuhat hin maopay samtang nga buhi pa hira. Ngan liwat nga an tagsa nga tawo makaon ngan mainom, ngan magpahimulos han kaopayan dida han ngatanan niya nga buruhaton, amo an hiyas han Dios.” (Ekles. 3:12, 13) Nahiuupod ha “pagbuhat hin maopay” an pagbulig ha iba. Hi Jesus nagsiring nga mas daku an kalipay ha paghatag kay ha pagkarawat. An pagbuhat hin maopay ha aton padis, anak, kag-anak, ngan iba pa nga paryente nagriresulta hin duro nga katagbaw. (Prob. 3:27) An pagin malumo, maabiabihon, ngan mapinasayloon ha aton mga igkasi-tumuroo nagriresulta liwat hin duro nga kalipay, ngan nalilipay hito hi Jehova. (Gal. 6:10; Kol. 3:12-14; 1 Ped. 4:8, 9) Ngan an pagsakripisyo basi matuman an aton ministeryo makapatagbaw gud.
16 An ginkotar nga mga pulong ha Eklesiastes nag-unabi hin simple nga mga buruhaton nga nakakapalipay, sugad han pagkaon ngan pag-inom. Oo, bisan kon nagkukuri, mahimo kita magmalipayon ha materyal nga mga regalo ni Jehova. Dugang pa, an maopay hinduro kitaon nga katunod han adlaw, makaruruyag nga kabukiran, pataraw-an nga gios han gudti pa nga hayop, ngan iba pa nga linarang ni Jehova waray bayad, pero nakakalipay gud ha aton. Samtang ginhuhunahuna naton ito, naghihilarom an aton gugma ha iya, tungod kay hiya an Humaratag han ngatanan nga mag-opay nga butang.
17. Ano gud an makakatalwas ha aton ha mga kakurian, ngan ano an nakakaliaw ha aton yana?
17 Diri na mag-iiha, an aton gugma ha Dios, pagsugot ha iya mga sugo, ngan pagtoo ha halad lukat magriresulta ha aton waray kataposan nga kalipay ngan bug-os nga katalwasan ha mga kakurian tungod han pagkadiri-hingpit. (1 Juan 5:3) Yana, naliliaw kita nga maaram gud hi Jehova han ngatanan nga aton gin-aantos. Hi David nagsurat: “Malilipay ako ngan maandak dida hiton imo ginkaloy-an; kay ikaw nakakakita han akon kagol-anan . . . nakilala mo an kakurian han akon kalag.” (Sal. 31:7) Tungod kay hinigugma kita ni Jehova, luluwason kita tikang ha mga kakurian.—Sal. 34:19.
18. Kay ano nga sadang magin malipayon an katawohan han Dios?
18 Samtang naghuhulat kita han katumanan han mga saad ni Jehova, an malipayon nga Dios, hinaot subaron naton hiya. Hinaot diri kita umundang ha pag-alagad ha iya bisan pa han negatibo nga mga pagbati. Kon may mga problema, an abilidad ha paghunahuna ngan praktikal nga kinaadman maggiya unta ha aton. Bubuligan kita ni Jehova nga makontrol an aton emosyon ngan buhaton an aton mahihimo basi maibanan an magraot nga resulta han mga kakurian. Salit malipay kita ha mag-opay nga iginhahatag niya ha aton, pisikal man o espirituwal. Pinaagi ha pagpabilin nga duok ha Dios, magigin malipayon kita tungod kay “malipayon an katawohan nga hi Jehova amo an ira Dios.”—Sal. 144:15.
Ano an Imo Hinbaroan?
• Kon nakakaeksperyensya hin mga kakurian, paonan-o naton masusubad hi Jehova?
• Paonan-o an pagin makatadunganon makakabulig ha aton nga mailob an mga kakurian?
• Ha panahon han kakurian, paonan-o kita magmamalipayon ha pagbuhat han kaburut-on han Dios?
[Mga Pakiana]
[Retrato ha pahina 16]
Nasusubo gud hi Jehova ha magraot nga nahitatabo
[Ginkuhaan han Retrato]
© G.M.B. Akash/Panos Pictures
[Retrato ha pahina 18]
Hi Jehova naghahatag ha aton hin mga hinungdan basi magpabilin nga malipayon