Mahimo Ka ba Kumadto ha Masedonia?

HA DURUONGAN nga syudad han Troas ha Asia Minor, hi apostol Pablo nakakarawat hin bisyon. Usa nga lalaki nga taga-Masedonia an naghangyo ha iya: “Kadi ha Masedonia, ngan buligi kami.” Katapos gud niya makita an bisyon, hiya ngan an iya mga kaupod ‘nakasabot nga gintawag hira han Dios, basi igsumat an maopay nga sumat’ ha mga taga-Masedonia. Ano an resulta? Ha Filipos, an nangunguna nga syudad ha probinsya han Masedonia ha Roma, nagin tumuroo hi Lydia ngan an iya panimalay. May-ada liwat iba pa nga nagin mga tumuroo dida hito nga probinsya.—Buh. 16:9-15.

An sugad nga kadasig nakikita liwat ha mga Saksi ni Jehova yana. Damu an kinaburut-on nga nabalhin ha mga lugar nga mas daku an panginahanglan hin magwarali, ha ira kalugaringon nga gasto. Pananglitan, tungod kay karuyag ni Lisa nga taga-Canada nga unahon an ministeryo, binalhin hiya ha Kenya. Hira Trevor ngan Emily nga taga-Canada liwat, kinadto ha Malawi basi pauswagon an ira ministeryo. Nasantop nira Paul ngan Maggie nga taga-England nga an ira pagretiro maopay nga higayon ha pagbuhat hin dugang pa ha pag-alagad kan Jehova salit binalhin hira ha Este nga Aprika. Andam ka ba liwat magsakripisyo? Mahimo ka ba bumalhin? Kon amo, ano nga mga prinsipyo ha Biblia ngan praktikal nga mga suhestyon an makakabulig ha imo nga magmalampuson?

Usisaha an Imo Kalugaringon

Usa han kinahanglan mo usisahon amo an imo motibo. Hi Jesus nagsiring nga an pinakaimportante nga sugo amo ini: “Higugmaon mo an Ginoo nga imo Dios ha bug-os mo nga kasingkasing  ngan ha bug-os mo nga kalag, ngan ha bug-os mo nga hunahuna.” Gugma ha Dios ngan hingyap ha pagtuman han sugo nga manhimo hin disipulo an sadang magin hinungdan ha pag-alagad ha iba nga nasud. Hi Jesus padayon nga nagsiring: “An ikaduha, sugad hini: Higugmaon mo an imo igkasi-tawo sugad ha imo ngahaw.” An gugma ha igkasi-tawo maipapakita ha sinsero nga hingyap ha pagbulig. (Mat. 22:36-39; 28:19, 20) An pag-alagad ha iba nga nasud kasagaran nga nag-uupod hin pangalimbasog ngan pagsakripisyo. Diri ito sugad hin pagbakasyon la. Gugma an sadang magpagios ha imo nga buhaton ito. Ini an ginsiring nira Remco ngan Suzanne nga taga-Netherlands nga nag-aalagad yana ha Namibia, “Aanhi kami tungod han gugma.”

Hi Willie nga paramangno han sirkito ha Namibia nagsiring: “An mga binalhin tikang ha iba nga nasud diri naglalaom nga mamangnoan han kabugtoan dinhi. Kinanhi hira basi mag-alagad upod han kabugtoan ngan bumulig ha pagsangyaw.”

Katapos usisahon an imo motibo, pakianhi an imo kalugaringon: ‘May-ada ba ako abilidad nga makakabulig ha pag-alagad ha iba nga nasud? Epektibo ba ako ha ministeryo? Ano nga mga yinaknan an akon hinbabaroan? Andam ba ako mag-aram hin iba nga yinaknan?’ Hisguti niyo ito hin maopay sugad nga pamilya. Pamakiana ha mga tigurang ha iyo kongregasyon ngan ig-ampo gud ito kan Jehova. An tangkod nga pag-usisa ha kalugaringon makakabulig ha imo nga hibaroan kon may-ada ka gud ba abilidad ngan determinasyon nga mag-alagad ha iba nga nasud.—Kitaa an kahon nga “Usisaha an Imo Kalugaringon.”

 Kon Diin Mabalhin

Hi Pablo ginpakadto ha Masedonia pinaagi hin bisyon. Yana, diri na hi Jehova nagamit hin milagroso nga mga paagi ha paggiya ha aton. Kondi pinaagi hini nga magasin ngan han iba pa nga publikasyon, hinbabaroan naton an damu nga teritoryo nga may daku nga panginahanglan. Salit ilista ito nga mga lugar. Kon diri ka andam nga mag-aram hin iba nga yinaknan o temporaryo la an imo pag-ukoy ha iba nga nasud, mahimo ka magplano hin pagbalhin ha nasud nga maaram ka han yinaknan. Katapos, pamakiana may kalabotan ha visa, transportasyon, seguridad, adlaw-adlaw nga kagarastohan, klima, ngan iba pa. Bangin makabulig an pakiistorya ha kabugtoan nga binalhin liwat. Pag-ampo mahitungod hito. Hinumdumi nga hi Pablo ngan an iya mga kaupod “gindid-an han espiritu . . . pagyakan han pulong didto ha Asia.” Bisan kon nagsari hira pagkadto ha Bitinia, “an espiritu ni Jesus waray tugot ha ira.” Ha pariho nga paagi, bangin diri ka dayon makagdesisyon kon diin ka gud mabalhin basi makabulig.—Buh. 16:6-10.

Yana, bangin may nahuhunahuna ka na nga mga lugar nga mapipilian. Kon nagpaplano ka pag-alagad ha iba nga nasud, pagsurat ha sanga nga opisina han mga Saksi ni Jehova ha mga lugar nga karuyag mo balhinan. Isaysay an imo kahimtang ha espirituwal, pati na an imo mga pribilehiyo hadto ngan yana. Pagpakiana liwat mahitungod han adlaw-adlaw nga kagarastohan, urukyan, mga hospital o klinika, ngan matatrabahoan. Katapos, ihatag an imo surat ha komite ha pag-alagad ha iyo kongregasyon. Ilalakip nira an surat han rekomendasyon ngan ipapadara ito ha mga sanga nga opisina nga imo gin-unabi. An balos hito makakabulig ha imo ha pagdesisyon kon diin ka gud mabalhin.

Hi Willie nga gin-unabi kanina nagsiring: “An kadam-an nga nagmalampuson ha ira pagbalhin amo adton binisita anay ha nasud nga karuyag nira balhinan ngan namiling hin mga lugar diin magigin malipayon hira. Nasantop han usa nga mag-asawa nga makukurian hira pagbalhin ha lugar nga hirayo ha bungto o syudad. Salit inukoy hira ha gutiay nga bungto nga may panginahanglan hin mga magwarali kondi diri makuri an panginabuhi ngan magigin malipayon hira.”

Paglampos ha mga Problema han Pagbalhin

An pagbalhin ha lugar nga diri mo nahiaraan sigurado nga diri masayon para ha imo. “Bangin makuri gud ilubon an kamingaw,” siring ni Lisa nga gin-unabi kanina. Ano an nakabulig ha iya? An pagin duok pirme ha kongregasyon nga iya ginbalhinan. Nagin tumong niya nga hibaroan an ngaran han tagsa niya nga kakongregasyon. Basi mahimo ini, naabot hiya hin temprano ha katirok, ngan katapos hito diri hiya nauli dayon basi makiistorya ha kabugtoan. Nakig-upod hiya ha iba ha ministeryo, nangimbitar ha iya balay, ngan nakigsangkay.  Hiya nagsiring: “Waray ako magbasol ha akon pagsakripisyo. Ginbendisyonan gud ako ni Jehova.”

Han dagku na an mga anak nira Paul ngan Maggie, ginbayaan nira an ira balay nga 30 ka tuig nira gin-ukyan. Hi Paul nagsiring: “Waray kami makurii pagdispatsar han amon mga gamit. Nakurian kami pagbaya ha amon pamilya; mas makuri gud ito kay han amon ginhunahuna. Nagtinangis kami ha eruplano. Masayon la maghunahuna nga diri kami mailob hini. Pero sinarig kami kan Jehova. Han nagkaada kami bag-o nga mga sangkay mas nagin determinado kami nga magpadayon.”

Hira Greg ngan Crystal nagdesisyon nga bumalhin tikang ha Canada ngadto ha Namibia tungod kay maaram hira mag-Ingles, an opisyal nga yinaknan didto. Kondi ha urhi nahunahuna nira nga mas maopay kon mahibaro hira han yinaknan ha ira teritoryo. “May mga panahon nga nanluluya kami. Pero han nahibaro kami han ira yinaknan, dida la namon nasabtan an ira kultura. An pagin duok ha kabugtoan nakabulig ha amon nga magpahiuyon ha bag-o nga teritoryo.”

An pagin mapainubsanon ngan andam ha pagbulig mahimo liwat makadasig ha kabugtoan. Nalilipay hi Jenny paghinumdom han mga pamilya nga binalhin ha Ireland, diin hiya nagdaku. “Maabiabihon hira,” siring niya. “Binalhin hira basi bumulig, diri basi hira an buligan. Madasigon ngan malipayon hira hinduro salit napagios ako nga subaron hira.” Yana, hi Jenny ngan an iya bana mga misyonero ha Gambia.

An Bendisyon ni Jehova “Nakakahimo nga Bahandianon”

Makalilipay gud an eksperyensya ni Pablo ha Masedonia! Paglabay hin mga napulo ka tuig, nagsurat hiya ha kabugtoan ha Filipos: “Nagpapasalamat ako ha akon Dios ha ngatanan nga paghinumdom ko ha iyo.”—Fil. 1:3.

Ito liwat an inabat nira Trevor ngan Emily, nga nag-alagad ha Malawi antes umiskwela ha Watchtower Bible School of Gilead. “Usahay naghunahuna kami kon husto ba an amon ginbubuhat, pero malipayon kami. Mas nagin duok kami nga mag-asawa ngan ginbendisyonan kami ni Jehova.” Hira Greg ngan Crystal nga gin-unabi na, nagsiring: “Waray na mas makalilipay pa hini nga buruhaton.”

Syempre, diri ngatanan makakahimo pagbalhin ha iba nga nasud. An iba bangin mas makakabulig kon bumalhin ha lugar nga mas daku an panginahanglan ha ira la nasud. Puydi liwat himoon nga tumong han iba an pagbulig ha lain nga kongregasyon nga hirani ha ira lugar. An importante, mabuhat mo an ngatanan nga imo mahihimo ha pag-alagad kan Jehova. (Kol. 3:23) Hito nga paagi matutuman ha imo inin giniyahan nga mga pulong: “An bendisyon ni Jehova, ini nakakahimo nga bahandianon; ngan waray niya makakadugang hin kasubo hini.”—Prob. 10:22.

[Kahon/Retrato ha pahina 5]

Usisaha an Imo Kalugaringon

Ha pag-usisa han imo kalugaringon basi hibaroan kon mahimo ka mag-alagad ha iba nga nasud, tagda an masunod nga mga pakiana. Pag-ampo ngan tangkod nga turotimbanga kon praktikal ba ha imo an pagbalhin. An naglabay nga mga gowa hini nga magasin makakabulig ha imo ha pagbuhat hito.

• Mahunahunaon ba ako ha espirituwal?—“Mga Pitad Ngadto ha Kalipayan” (Oktubre 15, 1997, pahina 6)

• Epektibo ba ako ha ministeryo?—“How to Succeed in the Pioneer Ministry” (Mayo 15, 1989, pahina 21)

• Maiilob ko ba an kamingaw ha akon pamilya ngan kasangkayan?—“Paglampos han Kahidlaw ha Pag-alagad ha Dios” (Mayo 15, 1994, pahina 28)

• Makakag-aram ba ako hin iba nga yinaknan?—“Pag-alagad ha Kongregasyon nga Iba an Yinaknan” (Marso 15, 2006, pahina 17)

• Maaakos ko ba an gasto han pagbalhin?—“Makakag-alagad Ka ba ha Langyaw nga Kanataran?” (Oktubre 15, 1999, pahina 23)

[Retrato ha pahina 6]

An pagin mapainubsanon ngan andam ha pagbulig mahimo makadasig ha kabugtoan

[Retrato ha pahina 7]

An mga nabalhin basi bumulig nagigin malampuson