Sagipo Ngan Malipayon ha Pag-alagad ha Dios

KARUYAG ni Jehova nga magin malipayon ka. (Sal. 100:2) Sugad nga iya alagad, posible nga sagipo ka liwat. Bangin diri ka sugad hini kasagipo han igindedikar mo an imo kinabuhi ha Dios, kondi yana bangin nabubug-atan ka han imo mga responsabilidad ha trabaho ngan ha pag-alagad. Bangin nakukonsensya ka pa ngani kon diri mo nahihimo an ngatanan nga karuyag mo buhaton. Paonan-o ka magigin timbang ngan pirme ‘makakalipay kan Jehova’?—Neh. 8:10.

Nagkikinabuhi ka ha makuri nga panahon ngan apektado han damu nga problema, salit kinahanglan ka magin organisado. May kalabotan hini, angayan gud an giniyahan nga sagdon ni apostol Pablo: “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram; pagpahimulosan an oras, kay an mga adlaw magraot.”—Efe. 5:15, 16.

Ha pag-aplikar hinin maaramon nga sagdon, paonan-o ka maghihimo hin makakab-ot nga mga tumong ngan magigin timbang ha personal nga pag-aram, pagmangno han pamilya, pagministeryo, sekular nga trabaho, ngan iba pa nga importante nga buruhaton?

Nahinunumdoman mo ba an imo kalipay han nagdedikar ka ha Dios ngan nagpabawtismo? An imo kalipay resulta han kahibaro mahitungod kan Jehova ngan han iya mga katuyoan. Bangin damu ka bulan nga nag-aram ka hin maduruto basi magkaada hito nga kahibaro ngan kalipay. Kondi sigurado nga bawi an imo pangalimbasog ha pag-aram, tungod kay nabag-o hito an imo kinabuhi.

Basi magpabilin nga malipayon, kinahanglan padayon nga kumaon ka hin espirituwal nga pagkaon. Kon nakukurian ka nga magkaada panahon ha pagbasa ngan pag-aram ha Biblia, usisaha an imo eskedyol. Bisan an pipira la ka minuto nga pag-aram ngan pamalandong kada adlaw makakabulig ha imo nga magin mas duok kan Jehova, ngan sigurado nga magigin mas malipayon ka.

Mahimo gamiton ha importante nga mga buruhaton an panahon nga nagagamit ha diri importante nga mga butang. Pakianhi an imo kalugaringon, ‘Pira ka oras an akon nagagamit ha pagbasa hin sekular nga mga barasahon, pagkita  hin TV, pamati hin musika, o ha mga hilangkagan?’ Makalilipay ito kon balanse ka. (1 Tim. 4:8) Kon imo maobserbahan nga diri ka balanse ha paggamit han imo panahon, bag-oha an imo eskedyol.

Hi Adam, usa nga tigurang nga may tulo nga anak, nagsaysay kon ano an nakakabulig ha iya: “Nangangalimbasog ako nga magkinabuhi hin simple. Ginlilikyan ko an mga hilangkagan ngan mga gamit nga nakakaubos hin panahon. Diri man karuyag sidngon nga ginpapakurian ko an akon kalugaringon—nalilipay ako ha simple la nga mga pahalibway.”

An pamalandong ha mag-opay nga resulta han imo mga desisyon makakabulig ha imo nga magin malipayon ngan pirme positibo. Pananglitan, hi Mariusz, usa liwat nga tigurang nga may tulo nga anak, nagsiring: “Han nag-aram ako han Biblia nagin positibo an akon disposisyon. Ha panapanahon nakakaeksperyensya pa gihapon ako hin mga kakurian nga kadam-an hito hi Jehova la an maaram. Kondi, tungod han iya bulig malipayon nga ginpapamulat ko an tidaraon.”

Pariho ha kahimtang ni Mariusz, an pagin positibo diri makakawara han ngatanan nga kabaraka. Kondi makakabulig ito ha imo nga magin murayaw an hunahuna ngan magin mas malampuson ha pag-atubang han mga problema. An Biblia nasiring: “An ngatanan nga adlaw han mga sinakit maraot; kondi hiya nga malipayon an kasingkasing may-ada dayoday nga pyesta.” (Prob. 15:15) Pamalandonga liwat an gugma nga iginpapakita han Dios ha imo. Makakabulig ito ha imo nga mapahilarom an imo gugma ha iya ngan magin mas malipayon.—Mat. 22:37.

An pag-una han pag-alagad kan Jehova makakabulig ha pamilya nga magin mas malipayon. Kon iginpapakita an Kristiano nga mga kalidad, maiibanan an diri pagsinabtanay ngan magigin mas duok ngan makalilipay an iyo pagkaurupod. Hito nga paagi magigin mamurayawon ngan nagkakaurosa an bug-os nga pamilya.—Sal. 133:1.

An pakigbahin han bug-os nga pamilya ha espirituwal nga mga buruhaton makakadugang han tinuod nga kalipay. Hi Mariusz nagsiring: “Importante ha akon an panahon nga nagkakaurupod kami han akon pamilya. Pirme ako ginsusuportahan han akon asawa. Kon posible, naupod hiya ha akon ha pagsangyaw, paglimpyo ha estadyum antes han kombensyon, ngan kon nagpapahayag ako ha iba nga kongregasyon. Nadadasig ako hito.”

Uyon ha Kasuratan, an mga Kristiano ginsusugo nga magtagana hin materyal nga panginahanglan han ira pamilya. (1 Tim. 5:8) Kondi kon an sekular nga trabaho nakakaubos hin panahon ngan kusog, bangin mawara an imo kalipay ha pag-alagad ha Dios. Ig-ampo ito kan Jehova. (Sal. 55:22) Nasantop han iba nga an pag-una han Ginhadian han Dios nagkikinahanglan hin pamiling hin iba nga trabaho. An Kristiano diri sadang magpaulang ha trabaho nga daku an sweldo nga nakakaubos han panahon ngan kusog para ha mas importante nga buruhaton.—Prob. 22:3.

Makakabulig ha imo an pagsurat han ngatanan nga bentaha ngan disbentaha han imo ginpaplanohan nga trabaho o han imo trabaho yana. Syempre, makaruruyag an maopay nga trabaho ngan daku nga sweldo. Kondi, ha imo ba trabaho yana nakakabulig ka pa ha pagparig-on han espirituwalidad han imo pamilya? Hunahunaa hin maopay an ngatanan nga nahiuupod hito, ngan ha imo mga desisyon unaha pirme an imo relasyon kan Jehova.

Kon an imo trabaho yana nakakaulang han imo pag-uswag ha espirituwal, kinahanglan maghimo ka hin pagbag-o. Damu nga Kristiano an naghimo hin dagku nga pagbag-o basi magkaada panahon ha espirituwal nga mga butang. Usa nga bugto ha Poland an nagsiring: “Napiritan ako pagbaya ha akon gintatrabahoan nga kompanya tungod kay pirme ako nabyahe. Waray na ako panahon ha espirituwal nga mga buruhaton o ha akon pamilya.” Yana an iya trabaho diri na nakakaubos hin daku nga panahon ngan kusog.

Malipay ha Pagbulig ha Iba

Hi Jesus nagsiring nga ‘burobulahan pa an paghatag kay ha pagkarawat.’ (Buh. 20:35) Damu an higayon han mga Kristiano ha paghatag. Usahay an sinsero nga paghiyom, pakiglamano, o pagpasalamat ha pangalimbasog han usa nga bugto ha iya teokratiko nga toka, bangin amo la an ginkikinahanglan basi magin malipayon kamo nga duha.

 Gindasig ni apostol Pablo an iya mga igkasi-Kristiano: “Rig-unon niyo an mga maluya ha kasingkasing, buligan niyo an mga magluya.” (1 Tes. 5:14) Bangin inaabat han iba nga diri nira malalamposan an mga problema kon hira la. Mahimo mo ba hira buligan? Kon naoobserbahan mo nga nagtitikawara an kalipay han usa nga bugto ha pag-alagad kan Jehova, dasiga hiya. Makakadasig liwat ito ha imo. Syempre, may mga problema nga diri masusulbad han tawo. Kondi mahimo mo ipakita an sinsero nga pagpaid ngan dasigon hiya nga sumarig ha diri-napapakyas nga bulig ni Jehova. Adton nagbubuhat hito maglalampos gud.—Sal. 27:10; Isa. 59:1.

Usa pa nga praktikal nga paagi amo an pag-aghat hito nga bugto nga umupod ha imo ha ministeryo. Han gintokahan ni Jesus an 70 nga disipulo nga magsangyaw, ginpadis-padis niya hira. (Luk. 10:1) Sigurado nga mauyon ka nga nakabulig ito ha ira nga magdinasigay. Mahihimo mo ba liwat ito basi buligan an iba nga magin malipayon utro?

Damu gud an problema yana. Bisan pa hito, hi Pablo nag-aaghat ha aton: “Magkalipay kamo gihapon ha Ginoo: liwat masiring ako, Magkalipay kamo.” (Fil. 4:4) Tungod kay nahigugma ka ha Dios, nasugot ha iya, ngan madasigon nga nagpapadayon ha buruhaton nga iya igintoka ha imo, mapulsanon an imo kinabuhi. Nagigin malipayon ka. Dugang pa, ginbubuligan ka ni Jehova nga malamposan an mga pagsari ngan problema nga imo inaatubang.—Roma 2:6, 7.

Bug-os an aton pagtoo nga hirani na gud an iginsaad ni Jehova nga bag-o nga kalibotan. Damu gud nga bendisyon ngan hinungdan nga magmalipayon an aton mapapahimulosan didto! (Sal. 37:34) Salit magmalipayon kita ngan hunahunaon pirme an mga bendisyon ni Jehova ha aton bisan yana. Hito nga paagi ‘makakag-alagad kita kan Jehova upod an kalipay.’—Sal. 100:2.

[Diagram ha pahina 8]

(Para ha aktuwal nga pormat, kitaa an publikasyon)

Bangin kinahanglan mo bag-uhon an imo eskedyol basi magpabilin nga malipayon

PAHALIBWAY ngan KALIAWAN

PAGMANGNO han PAMILYA ngan PANIMALAY

TRABAHO

MGA KATIROK

PERSONAL NGA PAG-ARAM

MINISTERYO

[Retrato ha pahina 10]

Mabubuligan mo ba an iba nga magmalipayon utro?