Diri-takos nga Pagkabuotan ni Jehova an Aton Pagin Panag-iya Niya

“Kanan Ginoo kita.”—ROMA 14:8.

1, 2. (a) May-ada kita ano nga pribilehiyo? (b) Ano nga mga pakiana an aton hihisgotan?

BIRILHON gud nga pribilehiyo an igintanyag ha Israel han hi Jehova nagsiring ha ira: “Maaakon kamo kalugaringon labaw ha ngatanan nga katawohan.” (Eks. 19:5) Yana, kadungganan liwat han mga membro han Kristiano nga kongregasyon an ira pagin panag-iya ni Jehova. (1 Ped. 2:9; Pah. 7:9, 14, 15) Pribilehiyo ito nga mahimo naton mapahimulosan ha waray kataposan.

² An pagin usa nga panag-iya ni Jehova diri la pribilehiyo; responsabilidad liwat ito. An iba bangin magpakiana: ‘Matutuman ko ba an ginlalaoman ni Jehova ha akon? Isasalikway ba ako niya kon makasala ako? Mawawara ba an akon kagawasan kon gintatag-iya ako ni Jehova?’ Angayan la nga paghisgotan naton ini nga mga pakiana. Kondi antes hito, usa pa nga pakiana an sadang hunahunaon hin maopay: Ano an mga kapulsanan han pagin usa nga panag-iya ni Jehova?

An Pagin Usa nga Panag-iya ni Jehova Nagriresulta hin Kalipay

3. Ano an mga napahimulsan ni Rahab han nagdesisyon hiya nga mag-alagad kan Jehova?

³ Nagpapahimulos ba an mga tawo ha ira pagin panag-iya ni Jehova? Tagda hi Rahab, usa nga puta ha kadaan nga Jeriko. Sigurado nga nagdaku hiya nga nagsisingba ha palso nga mga dios han Kanaan. Kondi, han iya hinbaroan an mga kadaogan han Israel ha bulig ni Jehova, nasantop niya nga hi Jehova an  tinuod nga Dios. Salit bisan mameligro an kinabuhi ni Rahab, ginpanalipdan niya an pinili nga katawohan han Dios ngan iginsarig niya ha ira an iya katalwasan. An Biblia nasiring: “Waray ba hi Rahab nga puta, pagpakamatadonga han iya mga buhat, ha iya pagkarawat ha mga surugoon, ngan iya hira ginsugo ha lain nga dalan?” (Jak. 2:25) Handurawa an mga kapulsanan nga iya nakarawat han nagin bahin hiya han putli nga pagsingba han katawohan han Dios nga gintutdoan han Iya Balaud ha pagpakita hin gugma ngan hustisya. Sigurado nga nalipay gud hiya nga iya ginbayaan an iya pagkinabuhi hadto! Nakaasawa hiya hin Israelita ngan ginpadaku an iya anak nga hi Boas, nga nagin matinumanon nga alagad han Dios.—Jos. 6:25; Rut 2:4-12; Mat. 1:5, 6.

4. Paonan-o nagpahimulos hi Rut han iya desisyon nga mag-alagad kan Jehova?

⁴ Hi Rut nga taga-Moab nagdesisyon liwat nga mag-alagad kan Jehova. Han batan-on pa hiya, posible nga ginsingba niya hi Kemos ngan an iba pa nga dios han Moab, kondi nakilala niya an tinuod nga Dios nga hi Jehova, ngan nakaasawa hin Israelita nga binalhin ha ira nasud. (Basaha an Rut 1:1-6.) Ha urhi, han tipauli hi Noemi ha Betlehem upod an iya umagad nga hira Rut ngan Orpa, gin-aghat niya hira nga umuli na la tungod kay makukurian hira pag-ukoy ha Israel. Salit hi Orpa ‘binalik ha iya katawohan ngan ha iya dios-dios,’ kondi hi Rut waray. Nagdesisyon hiya uyon ha iya pagtoo ngan kon hin-o an karuyag niya alagaran. Hiya nagsiring kan Noemi: “Ayaw ako paghangyoa ha pagbaya ha imo, ngan pagtalikod tikang ha pag-upod ha imo; kay kon ngain ka kadto, maupod ako; ngan kon diin ka huron, aadto ako huhuron; an imo katawohan maaakon katawohan, ngan an imo Dios akon Dios.” (Rut 1:15, 16) Tungod kay ginpili ni Rut nga mag-alagad kan Jehova, nagpahimulos hiya han espesyal nga kahikayan han Balaud han Dios para ha mga balo, pobre, ngan waray tuna. Ha pagmangno ni Jehova, nagin malipayon hiya, napanalipdan, ngan nagkaada kasigurohan.

5. Ano an imo masisiring ha magtinumanon nga nag-aalagad kan Jehova?

⁵ Bangin may kilala ka nga kabugtoan nga matinumanon nga nag-aalagad kan Jehova hin damu na ka tuig tikang han ira pagdedikar ha iya. Pakianhi hira kon ano an mga kaopayan han pag-alagad ha iya. Bisan kon an ngatanan may-ada problema, damu hinduro an ebidensya nga tinuod an ginsiring han salmista: “Malipayon an katawohan nga hi Jehova amo an ira Dios.”—Sal. 144:15.

Makatadunganon an Ginlalaoman ni Jehova

6. Kay ano nga diri kita sadang mabaraka kon diri naton nahihimo an ginlalaoman ni Jehova ha aton?

⁶ Bangin nahuhunahuna mo kon matutuman mo ba an ginlalaoman ni Jehova ha imo. Masayon la umabat nga makuri an pag-alagad ha Dios, pagsunod ha iya balaud, ngan pagpasamwak han iya ngaran. Pananglitan, han ginsugo hi Moises nga magin tagapagyakan ni Jehova ha mga Israelita ngan ha hadi han Ehipto, naghunahuna hiya nga waray hiya kapas. Kondi  diri naglalaom an Dios han diri maaakos ni Moises. Iya gintutdoan hi Moises kon ano an sadang buhaton. (Basaha an Eksodo 3:11; 4:1, 10, 13-15.) Tungod kay ginkarawat ni Moises ito nga bulig, nalipay hiya ha pagtuman han kaburut-on han Dios. Diri liwat naglalaom hi Jehova han diri naton maaakos. Nasasabtan niya an aton pagkadiri-hingpit ngan karuyag niya nga buligan kita. (Sal. 103:14) An pag-alagad ha Dios sugad nga sumurunod ni Jesus nakakarepresko ngan diri nakakapabug-at tungod kay nakakabulig ito ha iba ngan nakakalipay kan Jehova. Hi Jesus nagsiring: “Kadi ngatanan kamo ha akon, . . . ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing.”—Mat. 11:28, 29.

7. Kay ano nga makakasarig ka nga bubuligan ka ni Jehova ha pagbuhat han iya ginlalaoman ha imo?

⁷ Pirme ihahatag ni Jehova an pagdasig nga aton ginkikinahanglan kon nasarig kita ha iya. Pananglitan, posible nga diri maopay magyakan hi Jeremias. Salit han gintokahan hiya ni Jehova nga magin propeta, hiya nagsiring: “Ah, Ginoo nga hi Jehova! Kitaa, diri ako maaram kon inoonan-o in pagyakan; kay ako usa nga bata.” Katapos, nagsiring pa ngani hiya: “Diri na ako magyayakan ha iya ngaran.” (Jer. 1:6; 20:9) Kondi, tungod han pagdasig ni Jehova, ha sulod hin 40 ka tuig naisangyaw ni Jeremias an mensahe nga diri naruruyagan han kadam-an. Pauroutro nga ginpasarig hiya ni Jehova: “Ako maupod ha imo ha pagbantay ha imo ngan pagluwas ha imo.”—Jer. 1:8, 19; 15:20.

8. Paonan-o naton iginpapakita nga nasarig kita kan Jehova?

⁸ Sugad la nga ginparig-on ni Jehova hira Moises ngan Jeremias, bubuligan liwat kita niya nga buhaton an iya ginlalaoman ha aton yana. Importante nga sumarig kita ha Dios. An Biblia nasiring: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: ha ngatanan mo nga dalan kilalaha hiya, ngan hiya magtututdo han imo mga agianan.” (Prob. 3:5, 6) Iginpapakita naton nga nasarig kita kan Jehova kon aton ginkakarawat an iya bulig pinaagi han iya Pulong ngan organisasyon. Kon magpapagiya kita kan Jehova ha aton pagkinabuhi, waray makakapugong ha aton pagin matinumanon ha iya.

Hi Jehova Nagmamangno ha Tagsa nga Alagad Niya

9, 10. Ano nga klase hin panalipod an iginsaad ha Salmo 91?

⁹ Samtang nagdidesisyon an iba kon magdidedikar ba kan Jehova, bangin nahuhulop hira nga makasala, magin diri-takos, ngan isalikway niya. Makalilipay nga ginpapanalipdan gud kita ni Jehova basi diri madaot an aton presyoso nga relasyon ha iya. Aton usisahon kon paonan-o ito iginpapahayag ha Salmo 91.

¹⁰ An siyahan nga bersikulo nasiring: “Hiya an naukoy dida ha pinapahuwayan han Gihitaasi maukoy ha ilarom han lambong han Makagarahum. Masiring ako . . . kan Jehova: Hiya amo an akon arayopan ngan akon kuta; Dios nakon nga ha iya ako nagtatapod; kay babawion ka niya tikang ha laang han parapanakop hin mga tamsi.” (Sal. 91:1-3) Tigamni nga an Dios nagsaad nga iya papanalipdan adton nahigugma ngan nasarig ha iya. (Basaha an Salmo 91:9, 14.) Ano nga klase hin panalipod an iya iginsaad? Bueno, literal nga ginpanalipdan ni Jehova an iba han iya mga alagad ha kadaan nga panahon—ha pipira nga kahimtang, basi matipigan an katulinan nga pagtitikangan han iginsaad nga Mesias. Kondi damu nga matinumanon an ginpriso, ginpakurian, ngan ginpatay ha madarahog nga paagi ha pagmaniobra ni Satanas basi isalikway nira an Dios. (Heb. 11:34-39) Maisugon nga nakapailob hira tungod kay ginpanalipdan hira ni Jehova basi makapabilin nga matinumanon. Kon sugad, an iginsaad ha Salmo 91 nagpapasabot hin espirituwal nga panalipod.

11. Ano an tago nga lugar nga “pinapahuwayan han Gihitaasi,” ngan hin-o an ginpapanalipdan didto han Dios?

¹¹ Salit an tago nga lugar nga “pinapahuwayan han Gihitaasi,” nga gin-unabi han salmista, usa nga simboliko nga lugar han espirituwal nga panalipod. Diri madadaot han bisan ano ngan bisan hin-o an pagtoo ngan gugma ha Dios han  mga naukoy dida hito upod Niya. (Sal. 15:1, 2; 121:5) Diri nakakasabot hiton simboliko nga lugar adton diri nag-aalagad kan Jehova. Dida hito iya ginpapanalipdan an katawohan nga nasiring: ‘Ikaw an akon Dios nga ha imo ako natapod.’ Kon magpapabilin kita hito nga lugar, diri kita sadang mabaraka nga bangin mawara an pag-uyon han Dios ha aton kon malit-agan kita ni Satanas, an “parapanakop hin mga tamsi.”

12. Ano nga mga lit-ag an mahimo makadaot han aton relasyon ha Dios?

¹² Ano an mga lit-ag nga mahimo makadaot han aton presyoso nga relasyon ha Dios? Gin-unabi han salmista an pipira hito, sugad han “peste nga naglalakat ha kasisidman, . . . [ngan] han kagubaan nga nakakadaot ha pag-udto.” (Sal. 91:5, 6) Damu na an nalit-agan han “parapanakop hin mga tamsi” tungod han hakugnon nga hingyap nga magbuhat han ira karuyag. (2 Kor. 11:3) Gindadakop niya an iba pinaagi han pag-aghat hin kahakog, pagkamapahitas-on, ngan materyalismo. An iba liwat iya ginlilimbongan pinaagi han mga pilosopiya sugad han nasyonalismo, ebolusyon, ngan buwa nga relihiyon. (Kol. 2:8) Ngan damu an nahilit-ag nga magbuhat hin seksuwal nga imoralidad. Tungod hito nga mga peste nga nakakadaot han espirituwalidad, minilyon an nawad-an hin gugma ha Dios.—Basaha an Salmo 91:7-10; Mat. 24:12.

Panalipdi an Imo Gugma ha Dios

13. Paonan-o kita ginpapanalipdan ni Jehova ha mga lit-ag nga mahimo makadaot han aton espirituwalidad?

¹³ Paonan-o ginpapanalipdan ni Jehova an iya katawohan tikang hini nga mga lit-ag? An salmo nasiring: “Papapagbantayon niya an iya mga manurunda [anghel] ha imo, ha pagbantay ha imo ha ngatanan mo nga mga dalan.” (Sal. 91:11) Ginigiyahan ngan ginpapanalipdan kita han mga anghel basi maisangyaw naton an maopay nga sumat. (Pah. 14:6) Labot pa han mga anghel, nagpapanalipod liwat ha aton an mga tigurang—nga an igintututdo iginbasar gud ha Biblia—basi diri kita malimbongan han sayop nga pangatadongan. Ginbubuligan nira an bisan hin-o nga nangangalimbasog paglampos han kalibotanon nga panggawi. (Tito 1:9; 1 Ped. 5:2) An “matinumanon ngan maaramon nga uripon” nagtatagana liwat hin espirituwal nga pagkaon basi panalipdan kita ha pilosopiya han ebolusyon, pagsulay nga magbuhat hin imoral, pangalimbasog nga magin riko ngan kilala, ngan damu pa nga nakakadaot nga hingyap ngan impluwensya. (Mat. 24:45, NW) Ano an nakakabulig ha imo nga maatohan ito nga mga lit-ag?

14. Paonan-o kita nagpapahimulos han panalipod han Dios?

¹⁴ Ano an sadang naton buhaton basi padayon nga panalipdan han Dios? Sugad la nga kinahanglan pirme kita maghirot basi diri maaksidente, mabiktima hin kriminal, o magkasakit, kinahanglan padayon nga panalipdan naton an aton kalugaringon ha mga makakadaot han aton espirituwalidad. Salit, kinahanglan pirme naton pahimulosan an giya ni Jehova pinaagi han aton mga publikasyon, katirok ngan asembleya. Nangangaro kita hin sagdon ha mga tigurang. Ngan diri ba nagpapahimulos liwat kita  han iba-iba nga kalidad han aton kabugtoan? Oo, an aton pakig-upod ha kongregasyon nakakabulig ha aton nga magin maaramon.—Prob. 13:20; basaha an 1 Pedro 4:10.

15. Kay ano nga makakasiguro ka nga mapapanalipdan ka ni Jehova ha bisan ano nga mahimo makawara han iya pag-uyon?

¹⁵ Makakasiguro gud kita nga mapapanalipdan kita ni Jehova ha bisan ano nga mahimo makawara han iya pag-uyon. (Roma 8:38, 39) Ginpapanalipdan niya an kongregasyon kontra ha maimpluwensya nga mga lider han relihiyon ngan politika nga an kasagaran nga katuyoan diri an pagpatay ha aton, kondi basi ibulag kita ha aton baraan nga Dios. Natutuman gud ini nga saad ni Jehova: “Waray hinganiban nga ginhitsura patok ha imo nga mauswag.”—Isa. 54:17.

Hin-o an Naghahatag ha Aton hin Kagawasan?

16. Kay ano nga an kalibotan diri makakahatag ha aton hin kagawasan?

¹⁶ Mawawara ba an aton kagawasan kon panag-iya kita ni Jehova? Diri. Ha kabaliktaran, mawawara an aton kagawasan kon panag-iya kita han kalibotan. An kalibotan nahibulag kan Jehova ngan ginmamandoan han waray-kalooy nga dios nga nag-uuripon ha katawohan. (Juan 14:30) Pananglitan, ginagamit han sistema ni Satanas an problema ha pinansyal basi mawara an kagawasan han mga tawo. (Itanding an Pahayag 13:16, 17.) An sala liwat may-ada nakakalimbong nga gahum ha pag-uripon ha mga tawo. (Juan 8:34; Heb. 3:13) Salit bisan kon magsaad hin kagawasan an mga diri tumuroo kon ira igin-aaghat an pagkinabuhi nga nakontra ha mga prinsipyo ni Jehova, an namamati ha ira madagmit magin uripon han makasasala ngan imoral nga pagkinabuhi.—Roma 1:24-32.

17. Ano nga kagawasan an iginhahatag ha aton ni Jehova?

¹⁷ Ha luyo nga bahin, kon sumarig kita kan Jehova, maghahatag hiya ha aton hin kagawasan ha ngatanan nga makakadaot ha aton. An aton kahimtang puropariho hin pasyente nga igintatapod an iya kinabuhi ha eksperto mag-opera nga doktor nga makakatalwas ha iya ha makamaratay nga sakit. Kita ngatanan aada ha makamaratay nga kahimtang tungod han napanunod nga sala. Matatalwas la kita ha mga epekto han sala ngan mabubuhi ha waray kataposan kon itapod naton an aton kinabuhi kan Jehova pinaagi han halad ni Kristo. (Juan 3:36) Sugad la nga mas nasarig kita ha doktor kon nahibabaro kita han iya reputasyon, mas nasarig liwat kita kan Jehova samtang nakikilala naton hiya. Salit, padayon nga mag-aram kita hin maopay han Pulong han Dios tungod kay mabulig ito ha aton nga higugmaon hiya ngan diri mabaraka nga magin iya panag-iya.—1 Juan 4:18.

18. Ano an mapapahimulosan hadton panag-iya ni Jehova?

¹⁸ Hi Jehova naghahatag ha ngatanan hin kagawasan ha pagpili. An iya Pulong nasiring: “Pilia an kinabuhi basi ka mabuhi, ikaw ngan an imo tulin; ha paghigugma kan Jehova nga imo Dios.” (Deut. 30:19, 20) Karuyag niya nga aton ipakita an gugma ha iya pinaagi han kinaburut-on nga pag-alagad ha iya. Imbes nga mawad-an kita hin kagawasan, an pagin panag-iya han Dios nga aton hinigugma sigurado nga makakalipay ha aton yana ngan ha kadayonan.

19. Kay ano nga diri-takos nga pagkabuotan ni Jehova an pagin panag-iya niya?

¹⁹ Tungod kay makasasala kita, diri kita takos nga magin panag-iya han hingpit nga Dios. Nagin posible la ito tungod han iya diri-takos nga pagkabuotan. (2 Tim. 1:9) Salit hi Pablo nagsurat: “Kon kita nabuhi, nabuhi kita tungod ha Ginoo; ngan kon mamatay kita, namatay kita tungod ha Ginoo; busa, kon kita nabuhi, o kon kita namatay, kanan Ginoo kita.” (Roma 14:8) Sigurado nga diri gud kita magbabasol nga ginpili naton nga magin panag-iya ni Jehova.

Ano an Imo Baton?

• Ano an mga kapulsanan han pagin panag-iya ni Jehova?

• Kay ano nga nahihimo naton an ginlalaoman ha aton han Dios?

• Paonan-o ginpapanalipdan ni Jehova an iya mga alagad?

[Mga Pakiana]

[Mga Retrato ha pahina 8]

Pakianhi an iba kon paonan-o hira nagpapahimulos ha pagin panag-iya ni Jehova

[Retrato ha pahina 10]

Ano an pipira nga paagi han pagpanalipod ni Jehova ha aton?