Kay Ano nga Sadang Ka Magdedikar kan Jehova?

“Kagab-i kinanhi ha akon in usa nga anghel han Dios nga nagtatag-iya ha akon.”—BUH. 27:23, Maopay nga Sumat.

1. Ano an sadang buhaton antes magpabawtismo? Ano nga mga pakiana an nabangon?

“PINAAGI han halad ni Jesu-Kristo, nagbasol ka na ba han imo mga sala ngan nagdedikar han imo kalugaringon ngadto kan Jehova ha pagbuhat han iya kaburut-on?” Usa ini han duha nga pakiana nga ginbabaton han mga kandidato ha bawtismo ha kataposan han pahayag. Kay ano nga an mga Kristiano kinahanglan magdedikar kan Jehova? Paonan-o kita nagpapahimulos kon dedikado kita ha Dios? Kay ano nga diri kakarawaton han Dios an aton pagsingba kon diri kita magdedikar ha iya? Basi masabtan an mga baton hito, kinahanglan hisgotan anay naton an kahulogan han dedikasyon.

2. Ano an kahulogan han pagdedikar kan Jehova?

² Ano an kahulogan han pagdedikar ha Dios? Tagda an paghulagway ni apostol Pablo han iya relasyon ha Dios. Ha atubangan han damu nga igkasi-pasahero ha barko nga hirani na malunod, nagsiring hiya nga hi Jehova an “Dios nga nagtatag-iya ha akon.” (Buh. 27:22-24; Maopay nga Sumat) An ngatanan nga tinuod nga Kristiano, panag-iya ni Jehova. Ha kabaliktaran, an bug-os nga kalibotan “kanan kayawan-on.” (1 Juan 5:19) An mga Kristiano nagigin panag-iya ni Jehova kon nagdidedikar hira ha paagi nga kinakarawat niya pinaagi ha pag-ampo. Ito nga dedikasyon personal nga saad nga ginsusundan han bawtismo ha tubig.

3. Ano an ginsimbolohan han bawtismo ni Jesus, ngan paonan-o hiya ginsusubad han iya mga sumurunod?

³ Hi Jesus nagpakita hin susbaranan ha aton han ginpili niya nga buhaton an kaburut-on han Dios. Tungod kay natawo hiya ha dedikado nga nasud han Israel, dedikado na hiya ha Dios. Bisan pa hito, ha iya bawtismo ginbuhat niya an labaw pa kay han ginkikinahanglan han Balaud. Iginpapakita han Pulong han Dios nga hiya nagsiring: “Kitaa, iini ako . . . ha pagbuhat han imo kaburut-on, O Dios.” (Heb. 10:7; Luk. 3:21) Salit nagpabawtismo hi Jesus diri sugad nga simbolo han iya dedikasyon kondi ha pagpresenta han iya kalugaringon ha Dios basi buhaton an kaburut-on han iya Amay. Ginsusubad hiya han iya mga sumurunod kon nagpapabawtismo hira.  Kondi, ha ira kahimtang, nagpapabawtismo hira sugad nga dayag nga kapahayagan han ira dedikasyon ha Dios pinaagi ha pag-ampo.

Kon Paonan-o Kita Nagpapahimulos han Dedikasyon

4. Ano an igintututdo ha aton han pagkasangkay nira David ngan Jonatan mahitungod han pakigsaad?

⁴ Seryoso nga butang an dedikasyon han Kristiano. Diri la ito ordinaryo nga pakigsaad. Kondi, paonan-o kita nagpapahimulos han aton dedikasyon? Basi masabtan ito, aton ito itanding ha mga kapulsanan han mga pakigsaad ha igkasi-tawo. Usa nga ehemplo hito, an pakigsangkay. Basi magkaada hin sangkay, kinahanglan karawaton mo an responsabilidad han pagin sangkay. Nag-uupod ito hin pagin maunungon—naghuhunahuna nga kinahanglan mo tagdon an kaopayan han imo sangkay. Usa han pinakamaopay nga magsangkay nga iginsaysay ha Biblia amo hira David ngan Jonatan. Naghimo pa ngani hira hin kauyonan han ira pagin magsangkay. (Basaha an 1 Samuel 17:57; 18:1, 3.) Bisan kon talagsahon la nga magsarangkay an naghihimo hin sugad nga pakigsaad, kasagaran nga nagigin marig-on an pagkamagsangkay kon maunungon hira, o naghuhunahuna han kaopayan han usa kag usa.—Prob. 17:17; 18:24.

5. Ano an sadang buhaton han uripon kon diri niya karuyag bumaya ha iya maopay nga agaron?

⁵ An Balaud nga iginhatag han Dios ha Israel naghihisgot hin usa pa nga ehemplo han pagkamaunungon nga napahimulsan han mga tawo ha paghimo hin pakigsaad. Kon diri karuyag han uripon nga bumaya ha iya maopay nga agaron, puydi hiya maghimo hin permanente nga pakigsaad ha iya. An Balaud nagsiring: “Kon an surugoon sumiring la: Ako nahigugma han akon agaron, han akon asawa, ngan han akon mga anak; diri ako magawas nga waray bayad: dida hito pagdad-on hiya han iya agaron ngadto ha Dios, ngan pagdad-on hiya ha ganghaan, o kon ha mga harigi han ganghaan; ngan pagkikirikotan an iya talinga han iya agaron hin hirihod; ngan mag-aalagad hiya ha iya [ha] waray kataposan.”—Eks. 21:5, 6.

6, 7. (a) Paonan-o nagpapahimulos an mga tawo ha pakigsaad? (b) Ano an iginpapasabot hito mahitungod han aton relasyon kan Jehova?

⁶ An pag-asawa usa nga relasyon nga nagkikinahanglan hin marig-on gud nga pakigsaad. Diri la ito pakigsabot nga tumanon an ginpirmahan nga kontrata kondi saad ito nga magin maunungon ha padis. An lalaki ngan babaye nga naglulungon nga diri kasal diri gud magkakaada tinuod nga kasigurohan, pati na an ira mga anak. Kondi an kinasal nga mag-asawa may-ada marig-on nga Kasuratanhon nga hinungdan ha pangalimbasog nga masulbad an ira mga problema ha mahigugmaon nga paagi.—Mat. 19:5, 6; 1 Kor. 13:7, 8; Heb. 13:4.

⁷ Ha kadaan nga panahon, an mga tawo nagpahimulos ha pagkaada marig-on nga mga kontrata ha negosyo ngan trabaho. (Mat. 20:1, 2, 8) Mapulsanon liwat ito yana. Pananglitan, mapulsanon an pagkaada sinurat nga kasabotan o kontrata antes makigsosyo ha negosyo o magtrabaho ha usa nga kompanya. Salit, kon an pakigsaad o pakigsabot nagpaparig-on han pakigsangkay, pag-asawa, ngan pagtrabaho, labi na gud an imo bug-os-kasingkasing nga pagdedikar kan Jehova nagpaparig-on han imo relasyon ha iya! Hisgotan naton yana kon paonan-o nagpahimulos an mga tawo hadto ha pagin dedikado kan Jehova nga Dios ngan kon kay ano nga labaw pa ini kay ha pakigsaad la.

Kon Paonan-o Nagpahimulos an mga Israelita ha Pagin Dedikado ha Dios

8. Para ha mga Israelita, ano an kahulogan han pagin dedikado ha Dios?

⁸ An bug-os nga nasud han Israel nagin dedikado kan Jehova han nagsaad hira ha iya. Ginsugo hira ni Jehova nga magkatirok hirani ha Bukid Sinai, ngan hiya nagsiring: “Kon masugot kamo ha akon tingog hin ungod, ngan pagbantayan niyo an akon kauyonan, dida hito maaakon kamo kalugaringon labaw ha ngatanan nga katawohan.” An katawohan urosa nga binaton: “An ngatanan nga iginyakan ni Jehova amon bubuhaton.” (Eks. 19:4-8) Para ha mga Israelita, an pagin dedikado labaw pa ha pagsaad la nga bubuhaton an usa nga butang. Nangahulogan ito nga panag-iya hira ni Jehova, salit iya gintratar hira  sugad nga ‘iya kalugaringon,’ o espesyal nga panag-iya.

9. Paonan-o nagpahimulos an Israel ha pagin dedikado ha Dios?

⁹ Nagpahimulos an mga Israelita ha pagin panag-iya ni Jehova. Maunungon hiya ngan nagmangno ha ira sugad hin mahigugmaon nga kag-anak. An Dios nagsiring ha Israel: “Makakalimot ba an usa nga babaye han iya nasuso nga bata, nga hiya mawaray pagbati han anak han iya tagoangkan? Oo, ini bangin hikalimot, kondi ako diri mangangalimot ha imo.” (Isa. 49:15) Hi Jehova naggiya ha ira pinaagi han Balaud, nagdasig pinaagi han mga propeta, ngan nagpanalipod pinaagi han mga anghel. Usa nga salmista an nagsurat: “Ginpapahayag niya an iya pulong ngadto kan Jakob, an iya mga kasugoanan ngan an iya mga sugo ngadto ha Israel. Waray hiya pagbuhat hin sugad ha bisan ano nga nasud.” (Sal. 147:19, 20; basaha an Salmo 34:7, 19; 48:14.) Sugad la nga ginmangnoan ni Jehova an nasud nga panag-iya niya hadto, mamangnoan liwat niya an mga nagdidedikar ha iya yana.

Kon Kay Ano nga Sadang Kita Magdedikar ha Dios

10, 11. Natawo ba kita nga bahin han bug-os uniberso nga pamilya han Dios? Isaysay.

¹⁰ Samtang nagdidesisyon kon magdidedikar ba ngan magpapabawtismo, an iba bangin magpakiana, ‘Puydi ba ako magsingba ha Dios bisan kon diri ako dedikado ha iya?’ Mababaton ito hin matin-aw kon aton pamamalandungon an aton tinuod nga relasyon yana ha Dios. Hinumdumi nga tungod han sala ni Adan, kita ngatanan natawo nga diri bahin han pamilya han Dios. (Roma 3:23; 5:12) Basi magin bahin kita han magtinumanon nga intelihente nga mga linarang han Dios, kinahanglan magdedikar kita ha iya. Aton usisahon kon kay ano.

¹¹ Waray kita tawhanon nga amay nga makakahatag ha aton hin kinabuhi nga waray kataposan, sugad han katuyoan han Dios. (1 Tim. 6:19) Natawo kita diri sugad nga mga anak han Dios tungod kay han nakasala an siyahan nga mag-asawa, nahibulag an bug-os nga katawohan ha ira mahigugmaon nga Amay ngan Maglalarang. (Itanding an Deuteronomio 32:5.) Tikang hito nga panahon, an katawohan diri na bahin han bug-os uniberso nga pamilya ni Jehova.

12. (a) Paonan-o magigin bahin han pamilya han Dios an diri hingpit nga mga tawo? (b) Ano an kinahanglan naton buhaton antes magpabawtismo?

¹² Bisan pa hito, mahimo kita maghangyo ha Dios nga karawaton kita sugad nga bahin han iya pamilya han inuyonan nga mga alagad. * Paonan-o ito magigin posible para ha aton nga mga makasasala? Hi apostol Pablo nagsurat: “Han mga magkaaraway pa kita, nagpahiuli kita hin buot ha Dios tungod ha kamatayon han iya Anak.” (Roma 5:10) Ha aton bawtismo naghahangyo kita ha Dios hin maopay nga konsensya basi kita karawaton niya. (1 Ped. 3:21) Kondi antes magpabawtismo, may-ada kita sadang buhaton. Kinahanglan naton makilala an Dios, mahibaro ha pagsarig ha iya, magbasol, ngan magbag-o han aton pagkinabuhi. (Juan 17:3; Buh. 3:19; Heb. 11:6) Ngan may-ada pa kita kinahanglan buhaton antes karawaton han Dios ha iya pamilya. Ano ito?

13. Kay ano nga kinahanglan magdedikar ha Dios basi magin bahin han pamilya han iya inuyonan nga mga magsiringba?

¹³ Antes magin bahin hito nga pamilya, an usa nga nahibulag kan Jehova nga Dios kinahanglan sinsero nga magsaad anay ha iya. Basi masabtan ito, handurawa an buotan nga amay nga may-ada mahigugmaon nga pagtagad ha ilo nga bata ngan naruruyag pag-ampon ha iya. Kilala ini nga amay nga maopay nga tawo. Bisan pa hito, antes karawaton han amay an bata sugad nga iya anak, karuyag niya nga magsaad anay an bata. Salit hiya nagsiring, “Antes ko ikaw karawaton sugad nga anak, karuyag ko hibaroan kon hihigugmaon ngan tatahuron mo ako sugad nga imo tatay.” Aampunon la an bata kon kinasingkasing nga magsasaad hiya. Makatadunganon ito, diri ba? Ha pariho nga paagi, adton naruruyag la magdedikar kan Jehova an iya kakarawaton ha iya  pamilya. An Biblia nasiring: “Ighalad niyo ngadto [ha] Dios an iyo kalugaringon sugad hin buhi nga halad nga tinubyan ha pag-alagad ha iya, ngan nakakalipay ha iya.”—Roma 12:1, Maopay nga Sumat.

Kapahayagan han Gugma Ngan Pagtoo

14. Kay ano nga an dedikasyon usa nga kapahayagan han gugma?

¹⁴ An pagdedikar kan Jehova nga Dios usa nga kapahayagan han aton kinasingkasing nga gugma ha iya. Ha pipira nga paagi pariho ito ha panumpa ha kasal. Iginpapahayag han karaslon nga Kristiano nga lalaki an iya gugma pinaagi ha pagsaad nga magigin maunungon hiya ha iya asawa anoman an mahitabo. Panumpa ito ha usa ka tawo, diri pagsaad la ha pagtuman han kontrata ha kasal. Hinsasabtan han karaslon nga lalaki nga diri hiya puydi makiglungon ha iya maarasawa kon diri niya ipahayag an panumpa ha kasal. Ha pariho nga paagi, diri naton bug-os nga mapapahimulsan an pagin bahin han pamilya ni Jehova kon diri kita magdedikar ha iya. Salit bisan kon diri kita hingpit, nagdidedikar kita ha Dios tungod kay karuyag naton nga magin iya panag-iya ngan determinado kita nga magmaunungon ha iya anoman an mahitabo.—Mat. 22:37.

15. Kay ano nga an dedikasyon usa nga kapahayagan han pagtoo?

¹⁵ An pagdedikar ha Dios kapahayagan liwat han pagtoo. Kay ano? Tungod kay an aton pagtoo kan Jehova nagpapasarig ha aton nga an pagin duok ha iya para ha aton kaopayan. (Sal. 73:28) Maaram kita nga diri pirme masayon an paglakat upod han Dios samtang nagkikinabuhi kita ha butnga hinin “baliko ngan banyaga nga katulinan,” kondi nasarig kita ha saad han Dios nga bubuligan kita ha aton mga pangalimbasog. (Fil. 2:15; 4:13) Maaram kita nga diri kita hingpit, pero nakakasiguro kita nga hi Jehova malolooy ha aton bisan kon nakakasayop kita. (Basaha an Salmo 103:13, 14; Roma 7:21-25.) Natoo kita nga babalosan ni Jehova an aton determinasyon nga magpadayon nga maunungon ha iya.—Job 27:5.

An Pagdedikar ha Dios Nagriresulta hin Kalipay

16, 17. Kay ano nga an pagdedikar kan Jehova nagriresulta hin kalipay?

¹⁶ An pagin dedikado kan Jehova nagriresulta hin kalipay tungod kay iginhahatag naton ha iya an aton kalugaringon. Iginsaysay ni Jesus an importante nga kamatuoran han hiya nagsiring: “Mas daku an kalipay ha paghatag kay ha pagkarawat.” (Buh. 20:35, NW) Naeksperyensyahan gud ni Jesus an kalipay ha paghatag durante han iya ministeryo dinhi ha tuna. Kon kinahanglanon, iginsasakripisyo niya an pagpahuway, pagkaon, ngan pagpahalibway basi mabuligan an iba nga mahingada ha dalan ngadto ha kinabuhi. (Juan 4:34) Nalipay hi Jesus ha pagpalipay ha iya Amay. Hiya nagsiring: “Ako nagbubuhat gihapon han iya naruruyagan.”—Juan 8:29; Prob. 27:11.

¹⁷ Salit igintutdo ni Jesus ha iya mga sumurunod kon paonan-o magkakaada makapatagbaw nga pagkinabuhi han hiya nagsiring: “Kon may tawo nga buot magsunod ha akon, maglirong ha iya la ngahaw.” (Mat. 16:24) Kon bubuhaton naton  ito mas magigin duok kita kan Jehova. May-ada pa ba malabaw ha mahigugmaon nga pagmangno ni Jehova?

18. Kay ano nga an pagkinabuhi uyon ha aton dedikasyon kan Jehova mas makalilipay kay ha pagin maunungon ha bisan ano o ha bisan hin-o?

¹⁸ An aton pagdedikar kan Jehova ngan an pagkinabuhi uyon hito nga dedikasyon pinaagi ha pagbuhat han iya kaburut-on mas makalilipay kay ha pagin maunungon ha bisan ano o ha bisan hin-o. Pananglitan, gin-uuna han damu an pagpariko pero diri hira tinuod nga malipayon ngan tagbaw. Kondi adton dedikado kan Jehova nakakaeksperyensya hin padayon nga kalipay. (Mat. 6:24) An kadungganan han pagin “mga kabulig han Dios ha pagbuhat” nakakalipay ha ira, kondi dedikado hira ha maapresyaron nga Dios diri ha usa nga buruhaton. (1 Kor. 3:9) Waray gud malabaw ha iya ha pagin maapresyaron ha ira pagsakripisyo. Ibabalik pa ngani niya ha pagkabatan-on an mga maunungon ha iya basi maeksperyensyahan nira an iya pagmangno ha kadayonan.—Job 33:25; basaha an Hebreo 6:10.

19. Ano nga pribilehiyo an napapahimulsan han mga dedikado kan Jehova?

¹⁹ Ha imo pagdedikar han imo kinabuhi kan Jehova, nagigin duok ka ha iya. An Biblia nasiring: “Pahirani kamo ha Dios, ngan mahirani man hiya ha iyo.” (Jak. 4:8; Sal. 25:14) Ha sunod nga artikulo, hihisgotan naton kon kay ano nga makakasiguro kita nga husto an aton desisyon nga magin panag-iya ni Jehova.

[Footnote]

Ano an Imo Baton?

• Ano an kahulogan han pagdedikar ha Dios?

• Paonan-o kita nagpapahimulos ha pagin dedikado ha Dios?

• Kay ano nga an mga Kristiano kinahanglan magin dedikado kan Jehova?

[Mga Pakiana]

[Retrato ha pahina 6]

An pagkinabuhi uyon ha aton dedikasyon nagriresulta hin padayon nga kalipay