Napamatud-an nga Husto an Pagmando ni Jehova!
Napamatud-an nga Husto an Pagmando ni Jehova!
“An Gihihitaasi naghahadi han ginhadian han mga tawo.”—DAN. 4:17.
1, 2. Ano an mga hinungdan nga pakyas gud an pagmando han tawo?
PAKYAS gud an pagmando han tawo! An nangunguna nga hinungdan hito amo an kakulang hin kinaadman han tawo nga magmando hin malampuson. Labi nga nakikita ito yana tungod kay damu hinduro nga magmarando an ‘mahigugmaon ha kalugaringon, mahigugmaon ha salapi, mga hambog, diri sadang malukmay, maglibakon, diri mag-ilubon, magpintas, waray gugma ha kaopayan, maglingo, ngan parayawnon.’—2 Tim. 3:2-4.
2 Hadto pa iginsalikway han aton siyahan nga mga kag-anak an pagmando han Dios. Han ginbuhat nira ito, bangin naghunahuna hira nga puydi nira himoon an ira karuyag. Kondi, ha pagkamatuod nagpapasakop hira ha pagmando ni Satanas. Unom ka yukot ka tuig na yana an sayop nga pagmando han tawo nga kontrolado gud ni Satanas, an ‘punoan hini nga kalibotan.’ Nagresulta ito ha pinakamakasurubo nga kahimtang ha kasaysayan nga aton naieksperyensyahan yana. (Juan 12:31) Mahitungod ha kahimtang han katawohan yana, an The Oxford History of the Twentieth Century nasiring nga kawang la an “paghiningyap hin hingpit nga pagmando.” Ito nagsasaysay: “Diri la kay imposible ito, kondi an pangalimbasog nga makab-ot ito nagriresulta hin duro nga karaotan, diktadorya nga pagmando, ngan an pinakagrabe pa gud, nagkakaada mga girra.” Tangkod gud ito nga pagkarawat nga pakyas an pagmando han tawo!
3. Ano unta an nagin resulta han pagmando han Dios kon nagpadayon nga matinumanon hira Adan ngan Eva?
3 Makasurubo gud nga iginsalikway han aton siyahan nga mga kag-anak an amo la nga malampuson nga pagmando—an pagmando han Dios! Syempre, diri kita bug-os nga maaram kon paonan-o mamandoan ni Jehova an tuna kon nagpadayon nga matinumanon hira Adan ngan Eva. Kondi, makakasiguro kita nga kon ginkarawat han katawohan an pagmando han Dios, makikita naton an gugma ngan kawaray pagpasulabi. (Buh. 10:34; 1 Juan 4:8) Tungod kay diri matupngan an kinaadman ni Jehova, makakasiguro liwat kita nga kon nagpadayon hira ha pagpasakop ha iya pagmando, nalikyan unta an ngatanan nga sayop nga resulta han pagmando han tawo. Naglampos gud unta an teokrasya, an pagmando han Dios, ha pagtagbaw ha “tinguha han tagsa nga buhi.” (Sal. 145:16) Ha laktod, gimaopayi unta adto nga pagmando. (Deut. 32:4) Makasurubo gud nga iginsalikway la ito han katawohan!
4. Tubtob san-o tutugotan nga magmando hi Satanas?
4 Kondi, sadang hinumdoman nga bisan kon gintugotan ni Jehova an mga tawo nga magmando ha ira kalugaringon, waray gud niya isalikway an iya katungod ha pagmando ha iya mga linarang. Bisan an gamhanan nga hadi han Babilonya napiritan ha pagkilala nga “an Gihihitaasi naghahadi han ginhadian han mga tawo.” (Dan. 4:17) Pag-abot han panahon, matutuman an kaburut-on han Dios pinaagi han iya Ginhadian. (Mat. 6:10) Oo, ha sulod hin halipot nga panahon, gintutugotan ni Jehova hi Satanas nga gumios sugad nga “dios hini nga kalibotan” basi mapamatud-an nga buwa an mga isyu nga iginbangon hito nga kaaway. (2 Kor. 4:4; 1 Juan 5:19) Kondi, waray gud mabuhat ni Satanas an labaw pa han igintutugot ni Jehova. (2 Kron. 20:6; itanding an Job 1:11, 12; 2:3-6.) Ngan pirme may-ada nagpapasakop ha Dios, bisan kon naukoy hira ha kalibotan nga ginmamandoan han iya nangunguna nga Kaaway.
An Pagmando han Dios ha Israel
5. Ano an iginsaad han mga Israelita ha Dios?
5 Tikang ha panahon ni Abel tubtob ha kaestablisar han nasud han Israel, damu nga matinumanon an nagsingba kan Jehova ngan nagsugot han iya mga sugo. (Heb. 11:4-22) Ha panahon ni Moises, naghimo hi Jehova hin kauyonan ha katulinan han patriarka nga hi Jakob, ngan ini an nagin nasud han Israel. Han 1513 A.K.P., nagsaad an mga Israelita ngan an ira katulinan nga magpapasakop hira kan Jehova sugad nga Magmarando, hira nagsiring: “An ngatanan nga iginyakan ni Jehova amon bubuhaton.”—Eks. 19:8.
6, 7. Paonan-o ginmandoan han Dios an mga Israelita?
6 Hi Jehova may-ada katuyoan ha pagpili ha mga Israelita nga magin iya katawohan. (Basaha an Deuteronomio 7:7, 8.) Ginpili hira diri la para ha ira kaopayan, kondi tungod liwat han ngaran ngan pagkasoberano han Dios nga amo an mas importante. Hira an magpapamatuod nga hi Jehova la an tinuod nga Dios. (Isa. 43:10; 44:6-8) Salit, hi Jehova nagsiring ha ira: “Ikaw amo an baraan nga katawohan kan Jehova nga imo Dios, ngan hi Jehova nagpili ha imo, ha pagkausa nga katawohan nga iya pagtatag-iyahon, nga labaw han ngatanan nga mga katawohan, nga aada ha bawbaw han tuna.”—Deut. 14:2.
7 Ha pagmando han Dios ha mga Israelita, iya gintagad an ira pagkadiri-hingpit. Pero an iya mga balaud hingpit ngan ipinapakita hito an iya mga kalidad. An mga sugo ni Jehova nga iginhatag pinaagi kan Moises nagpapabug-at gud nga Hiya baraan, may hustisya, mapinasayloon, ngan mapailubon. Ha panahon ni Josue ngan han iya katulinan, sinugot an nasud ha mga sugo ni Jehova ngan nagpahimulos hin kamurayawan ngan espirituwal nga mga bendisyon. (Jos. 24:21, 22, 31) Hito nga panahon ha kasaysayan han Israel, nakita an kalamposan han pagmando ni Jehova.
May-ada Maraot nga Resulta an Pagmando han Tawo
8, 9. Ano an sayop nga hangyo han Israel, ngan ano an mga resulta hito?
8 Kondi, ha paglabay han panahon, an mga Israelita pauroutro nga waray magpasakop ha pagmando han Dios salit nag-antos hira tungod kay waray na hira panalipdi. Usa ka adlaw, naghangyo hira hin tawo nga hadi pinaagi kan propeta Samuel. Ginsidngan ni Jehova hi Samuel nga ihatag an ira hangyo. Kondi, hi Jehova nagsiring: “Waray ka nira isikway, kondi ira ako isinikway, nga ako diri ma ira hadi.” (1 Sam. 8:7) Bisan kon gintugotan ni Jehova an Israel nga magkaada tawo nga hadi, nagpahamangno hiya nga an pagmando han tawo may-ada maraot nga resulta.—Basaha an 1 Samuel 8:9-18.
9 Napamatud-an han kasaysayan nga tinuod ini nga pahamangno. Nagkaada seryoso nga mga problema an Israel tungod ha pagmando han tawo nga hadi, labi na kon diri hiya matinumanon. Salit, diri urusahon nga ha bug-os nga kasaysayan, an gobyerno han mga tawo nga diri nakilala ha Dios waray gud makahatag hin nagpapadayon nga kaopayan. Oo, an iba nga politiko nangangaro hin bulig han Dios nga makab-ot nira an kamurayawan ngan kasigurohan, kondi paonan-o niya bibendisyonan adton diri nagpapasakop ha iya pagmando?—Sal. 2:10-12.
Bag-o nga Nasud nga Ginmamandoan han Dios
10. Kay ano nga ginsaliwnan an Israel sugad nga nasud nga pinili han Dios?
10 Waray gud magmatinumanon ha pag-alagad kan Jehova an nasud han Israel. Ha urhi, ira iginsalikway an ginpili han Dios nga Mesias, salit iginsalikway hira ni Jehova ngan ginsaliwnan hin grupo han mga tawo nga nagin pundasyon han bag-o nga nasud. Sugad nga resulta, han 33 K.P. naestablisar an Kristiano nga kongregasyon han dinihogan nga magsiringba ni Jehova. Salit, ito nga kongregasyon an bag-o nga nasud nga iya ginmamandoan. Gintawag ito ni Pablo nga ‘Israel han Dios.’—Gal. 6:16.
11, 12. Ano an kaparihoan han nasud han Israel ngan han ‘Israel han Dios’?
11 May-ada kaparihoan ngan kaibahan an orihinal nga nasud han Israel ngan an ‘Israel han Dios.’ An Kristiano nga kongregasyon diri pariho ha kadaan nga Israel tungod kay waray ito hadi nga tawo ngan diri na kinahanglan maghalad hin hayop para ha mga sala. Kondi pariho ito may-ada mga tigurang. (Eks. 19:3-8) Ini nga mga tigurang diri nagmamando ha panon, lugod, ira ginmamangnoan an kongregasyon ngan kinaburut-on nga nangunguna ha Kristiano nga mga buruhaton. Mahigugmaon nga ira gintatagad, ginpapasidunggan ngan gintatagan hin dignidad an ngatanan ha kongregasyon.—2 Kor. 1:24; 1 Ped. 5:2, 3.
12 Ha pamalandong han pagtagad ni Jehova ha Israel, hiya ngan an iya pagmando mas naaapresyar han ‘Israel han Dios’ ngan han ira kaupod nga ‘iba nga karnero.’ (Juan 10:16) Pananglitan, iginpapakita han kasaysayan nga an mga magmarando han Israel nakaimpluwensya gud ha ira mga sakop, maopay man ito o maraot. Sadang ini hinumdoman hadton nangunguna ha mga Kristiano nga kinahanglan magpakita pirme hira hin maopay nga susbaranan han pagtoo, bisan kon diri hira mga magmarando sugad han kadaan nga mga hadi.—Heb. 13:7.
Kon Paonan-o hi Jehova Nagmamando Yana
13. Ano an importante nga panhitabo han 1914?
13 Iginpapasamwak han mga Kristiano yana ha bug-os nga kalibotan nga an pagmando han tawo hirani na matapos. Han 1914, gin-establisar ni Jehova an iya Ginhadian ha langit ha pagmando han iya pinili nga Hadi, hi Jesu-Kristo. Hito nga panahon, gintagan niya hi Jesus hin awtoridad nga magpadayon nga “nananaog, ngan ha pagdaog” hin bug-os. (Pah. 6:2) Inin bag-o la nga Hadi ginsidngan: “Maghadi ka ha butnga han imo mga kaaway.” (Sal. 110:2) Makasurubo, an mga nasud padayon nga diri nagpapasakop ha pagmando ni Jehova ngan nagios nga baga hin “waray Dios.”—Sal. 14:1.
14, 15. (a) Paonan-o kita ginmamandoan han Ginhadian han Dios yana, ngan may kalabotan hini, ano an sadang igpakiana naton ha kalugaringon? (b) Paonan-o an pagkamaopay han pagmando han Dios nakikita na bisan yana?
14 May-ada pa nahibibilin nga mga dinihogan nga membro han ‘Israel han Dios,’ ngan sugad nga kabugtoan ni Jesus, nagpapadayon hira ha pagin “surugoon . . . tungod kan Kristo.” (2 Kor. 5:20) Ginpili hira sugad nga matinumanon ngan maaramon nga uripon nga klase ha pagmangno ngan pagtagana hin espirituwal nga pagkaon ha mga dinihogan ngan ha nagtitikadamu nga panon han mga Kristiano, nga minilyon na yana nga naglalaom nga mabuhi ha waray kataposan dinhi ha tuna. (Mat. 24:45-47; Pah. 7:9-15) Nakikita an bendisyon ni Jehova hini nga kahikayan pinaagi han espirituwal nga kauswagan han tinuod nga mga magsiringba yana.
15 Sadang pakianhan naton an aton kalugaringon: ‘Maaram gud ba ako han akon mga responsabilidad ha kongregasyon nga sadang ko tumanon? Aktibo ba ako nga nasuporta ha pagmando ni Jehova? Diri ko ba iginkakaawod an pagin sakop han pagmando ni Jehova ha iya Ginhadian? Determinado ba ako magpadayon ha pagsumat ha iba mahitungod ha Ginhadian han Dios tubtob ha akon mahihimo? Sugad nga grupo, kinaburut-on nga nagpapasakop kita ha giya han Nagmamando nga Lawas ngan nakooperar ha pinili nga mga tigurang ha kongregasyon. Hito nga paagi, iginpapakita naton nga nagpapasakop kita ha pagmando han Dios. (Basaha an Hebreo 13:17.) An kinaburut-on nga pagpasakop nagriresulta hin bug-os kalibotan nga pagkaurosa nga diri gud makikita ha nagkakabahin-bahin nga kalibotan. Nagriresulta liwat ito hin kamurayawan ngan katadongan ngan naghihimaya ito kan Jehova; nagpapamatuod ito nga an iya pagmando amo an gimaopayi.
Malampuson an Pagmando ni Jehova
16. Ano nga desisyonan an kinahanglan himoon yana han mga tawo?
16 Hirani na masulbad an mga isyu nga iginbangon ha Eden. Salit, panahon na yana nga magdesisyon an mga tawo. Kinahanglan magdesisyon an kada tagsa kon magpapasakop hiya ha pagmando ni Jehova o magpapabilin ha pagmando han tawo. Pribilehiyo naton nga buligan an mga maaghop ha paghimo hin husto nga desisyon. Diri na mag-iiha, ha Armagedon, permanente nga sasaliwnan han pagmando ni Jehova an gobyerno han tawo nga kontrolado ni Satanas. (Dan. 2:44; Pah. 16:16) Matatapos na an pagmando han tawo ngan an Ginhadian han Dios an magmamando ha bug-os nga tuna. Hito nga panahon, mapapamatud-an nga husto gud an pagmando ni Jehova.—Basaha an Pahayag 21:3-5.
17. Ano nga mga impormasyon an mabulig ha mga maaghop nga makagdesisyon hin maopay may kalabotan ha pagmando?
17 Adton waray pa makagdesisyon ha pagdapig kan Jehova, sadang mag-ampo ngan maghunahuna han mga bendisyon nga makakarawat han katawohan ha pagmando han Dios. Waray masulbad han pagmando han tawo an mga krimen ngan terorismo. Kondi, wawad-on han pagmando han Dios an ngatanan nga karaotan dinhi ha tuna. (Sal. 37:1, 2, 9) An pagmando han tawo nagresulta hin padayon nga girra, kondi ha pagmando han Dios ‘mapapaukoy niya an mga away tubtob ha kataposan han tuna.’ (Sal. 46:9) Ipapahiuli pa ngani hito an kamurayawan butnga han mga tawo ngan hayop! (Isa. 11:6-9) Ha pagmando han tawo may-ada pirme kapobrehan ngan gutom, kondi ha pagmando han Dios mawawara ito.(Isa. 65:21) Bisan adton magmarando nga may maopay nga intensyon diri makakawara han sakit ngan kamatayon, kondi ha pagmando han Dios, magkakalipay an lagas ngan may sakit ha kahibalik han ira kusog ha pagkabatan-on.(Job 33:25; Isa. 35:5, 6) Oo, an tuna magigin paraiso ngan mababanhaw pa ngani an mga patay.—Luk. 23:43; Buh. 24:15.
18. Paonan-o naton maipapakita nga natoo kita nga an pagmando han Dios an gimaopayi?
18 Oo, susulbaron han Ginhadian han Dios an ngatanan nga kadaot nga ginhimo ni Satanas han gin-impluwensyahan niya an aton siyahan nga mga kag-anak nga magrebelde ha Maglalarang. Ngan hunahunaa nga hi Satanas naghihimo hin karaotan hin mga 6,000 ka tuig na, kondi pinaagi kan Kristo, wawad-on han Dios ito ngatanan nga karaotan ha sulod hin 1,000 ka tuig la! Nagpapamatuod gud ito nga waray na malabaw ha pagmando han Dios! Sugad nga iya mga Saksi, nagpapasakop kita ha iya sugad nga aton Magmarando. Salit, pirme naton ipakita nga magsiringba kita ni Jehova, mga sakop han iya Ginhadian, ngan diri naton iginkakaawod nga iya kita mga Saksi. Ngan salingabuton naton an tagsa nga higayon ha pagsumat ha bisan hin-o nga mamamati nga an pagmando ni Jehova an gimaopayi.
May Kalabotan ha Pagmando han Dios, Ano an Aton Hinbaroan ha Pagbasa han . . .
• Hebreo 13:17?
[Mga Pakiana]
[Mga Retrato ha pahina 29]
Padayon nga nagmamando hi Jehova
[Retrato ha pahina 31]
Bug-os kalibotan nga pagkaurosa an resulta han kinaburut-on nga pagpasakop ha pagmando ni Jehova