Pakyas Gud an Pagmando ni Satanas

I-PLAY

Pakyas Gud an Pagmando ni Satanas

“Diri ini magigin kaopayan han magraot.”—EKLES. 8:13.

1. Kay ano nga makalilipay an sumat nga hirani na hukman an magraot?

DIRI na mag-iiha, paghuhukman an magraot. Sisirotan hira tungod han ira ginbuhat. (Prob. 5:22; Ekles. 8:12, 13) Makalilipay gud ito nga sumat, labi na hadton nahigugma ha katadongan ngan nag-aantos hin kawaray hustisya ngan ginmamaltrato han magraot. An siyahan nga sisirotan amo an amay han karaotan, hi Satanas nga Yawa.—Juan 8:44.

2. Kay ano nga nagkikinahanglan hin panahon basi masulbad an isyu nga binangon ha Eden?

² Ha Eden, tungod ha pagpaimportante ni Satanas ha iya kalugaringon, ginsulay niya hira Adan ngan Eva nga magrebelde ha pagmando ni Jehova. Sugad nga resulta, dinapig hira kan Satanas ha pagkontra ha awtoridad ni Jehova salit nagin makasasala hira ha Iya pagkita. (Roma 5:12-14) Maaram gud hi Jehova han magigin resulta han ira kawaray-pagtahod ngan pagrebelde. Kondi, an ira sigurado nga dadangatan kinahanglan hibaroan han ngatanan nga tawo ngan anghel. Salit, nagkikinahanglan hin panahon basi masulbad an isyu ngan pamatud-an nga sayop gud an mga rebelde.

3. Ano an aton pagtagad ha mga gobyerno han tawo?

³ Tungod kay ginsalikway han mga tawo an paggiya ni Jehova, kinahanglan mag-establisar hira hin kalugaringon nga gobyerno. Ha surat ni apostol Pablo ha iya mga igkasi-tumuroo ha Roma, iya gin-unabi ito nga mga gobyerno han tawo sugad nga “higtaas” nga awtoridad. Ha panahon ni Pablo, an pinakahitaas nga awtoridad amo an gobyerno han Roma ha pagmando ni Emperador Nero han 54-68 K.P. Hi Pablo nagsiring nga iton higtaas nga awtoridad “aada niyan [ha relatibo nga posisyon] tikang ha Dios.” (Basaha an Roma 13:1, 2.) Karuyag ba sidngon ni Pablo nga mas labaw an pagmando han tawo kay ha pagmando han Dios? Diri. Lugod, karuyag la niya sidngon nga tubtob nga gintutugotan ni Jehova an pagmando han tawo, sadang tahuron han mga Kristiano an “kasugoanan han Dios” ngan magpasakop hito nga mga magmarando.

Dalan nga Tipakadto ha Kabungkagan

4. Isaysay kon kay ano nga pakyas gud an pagmando han tawo.

⁴ Kondi, an pagmando han tawo nga kontrolado ni Satanas pakyas gud. Kay ano? Usa nga hinungdan, waray ito igbasar ha kinaadman han Dios. Hi Jehova la an may hingpit nga kinaadman. Salit, hiya la an masasarigan ha paggiya basi magmalampuson an pagmando. (Jer. 8:9; Roma 16:27) Diri pariho ha mga tawo nga agsob nga nag-ieksperimento la, hi Jehova maaram gud han gimaopayi nga paagi. Bisan ano nga klase hin gobyerno nga diri nasunod han iya giya sigurado nga mapapakyas. Salit, hito pa la nga hinungdan—gawas pa ha pagkaada maraot nga motibo—an pagmando ni Satanas pinaagi han gobyerno han tawo pakyas gud tikang ha tinikangan.

5, 6. Kay ano nga nagrebelde hi Satanas kan Jehova?

⁵ An maaramon nga tawo diri nagtitikang hin trabaho nga maaram hiya nga diri maglalampos. Kon igpipirit niya ito, masasantop niya nga sayop gud hiya. Pauroutro nga ginpapamatud-an han kasaysayan nga waray pulos an pagpabilin nga nakontra ha Maglalarang nga makagarahum ha ngatanan. (Basaha an Proberbios 21:30.) Kondi, tungod han pagpaimportante ha kalugaringon ngan pagpahitaas ni Satanas, iginsalikway niya hi Jehova. Kon sugad, tinuyo nga ginpili han Yawa an dalan nga tipakadto la ha kabungkagan.

⁶ An pagkamapahitas-on ni Satanas nakita liwat ha magmarando han Babilonya nga naghambog: “Ako masaka ngadto ha langit, akon pagpapahitas-on an akon trono labaw han kabiton-an han Dios; ngan ako malingkod dida ha bukid han katiringban, didto ha gihihirayoi nga mga bahin ha amihanan; mapaigbaw ako labaw pa han kahigtaasan han mga dampog; hihimoon ko nga ako mapariho han Gihihitaasi.” (Isa. 14:13-15) Napakyas an waray pulos nga pangalimbasog hito nga magmarando, ngan natapos ha makaarawod nga paagi an dinastiya han Babilonya. Sugad man, hi Satanas ngan an iya kalibotan hirani na bungkagon hin bug-os.

Kay Ano nga Waray Pugngi an Pagrebelde?

7, 8. Ano an pipira nga kaopayan han temporaryo nga pagtugot ni Jehova nga magpadayon an karaotan?

⁷ Bangin nahipapausa an iba kon kay ano nga waray pugngi ni Jehova an mga tawo ha pagdapig kan Satanas ngan pagsunod hin iba nga paagi han pagmando nga sigurado nga diri maglalampos. Sugad nga Dios nga Makagarahum ha ngatanan, puydi gud niya ito himoon. (Eks. 6:3) Kondi, waray niya buhata ito. An iya kinaadman nagpagios ha iya nga temporaryo nga diri maghilabot ha pagrebelde han tawo, nga ha kamaihaan magriresulta hin maopay. Ha kataposan, mapapamatud-an nga hi Jehova matadong ngan mahigugmaon nga Magmarando, ngan an magtinumanon magpapahimulos han iya desisyon.

⁸ Waray gud unta mag-antos an katawohan kon waray magpasulay hira Adan ngan Eva kan Satanas ngan kon waray hira magrebelde ha pagmando han Dios! Bisan pa hito, an pagtugot ni Jehova ha mga tawo nga magmando ha ira kalugaringon naghatag hin mga kapulsanan. Tungod hito, nasabtan han mga tangkod an kasingkasing nga maaramon gud an pagpamati ngan pagsarig ha Dios. Ha paglabay han mga siglo, an mga tawo nag-eksperimento hin damu nga klase hin gobyerno, kondi waray gud hito naglampos. Nagparig-on ito ha pagtoo han mga magsiringba ni Jehova nga an iya pagmando amo gud an gimaopayi. Ha pagkamatuod, tungod ha temporaryo nga pagtugot han Dios ha maraot nga pagmando ni Satanas, an katawohan nagkukuri upod na an magtinumanon nga nagsisingba ha Dios; kondi, nagpapahimulos liwat hito ini nga magtinumanon.

Pagrebelde nga Nagresulta ha Paghimaya kan Jehova

9, 10. Isaysay kon paonan-o an pagmando ni Satanas nagriresulta ha paghimaya kan Jehova.

⁹ Tungod kay gintugotan an mga tawo nga maimpluwensyahan ni Satanas ngan magmando ha ira kalugaringon, napapasidunggan an pagmando ni Jehova. Pinamamatud-an han kasaysayan nga husto an ginsiring ni Jeremias mahitungod han pagin waray kapas han tawo ha pagmando ha kalugaringon. (Basaha an Jeremias 10:23.) Dugang pa, tungod ha pagrebelde ni Satanas mas naipapakita ni Jehova an iya mag-opay nga kalidad. Paonan-o?

¹⁰ Bisan pa han magraot nga resulta han pagmando ni Satanas, mas nakikita naton an hingpit nga mga kalidad ni Jehova. Hini nga paagi, napapasidunggan hiya han mga nahigugma ha iya. Oo, ha kabaliktaran, an pagmando ni Satanas naghihimaya lugod ha Dios. Pinaagi hito, mas naipapakita ni Jehova an gimaopayi nga paagi ha pag-atubang han ayat ha iya pagkasoberano. Ha pagpatin-aw hini nga kamatuoran, aton hisgotan hin madaliay an pipira nga kalidad ni Jehova ngan aton kitaon kon paonan-o an maraot nga pagmando ni Satanas nagpapagios kan Jehova nga mas ipakita ini nga mga kalidad.

11. Paonan-o iginpapakita ni Jehova an iya gugma?

¹¹Gugma. An Kasuratan nasiring nga ‘an Dios gugma.’ (1 Juan 4:8) An paglarang ha mga tawo kapahayagan na mismo han gugma han Dios. Dugang pa, an makatarag-ob ngan urusahon nga paagi han pagkahimo ha aton nagpapamatuod han iya gugma. Mahigugmaon nga gintagan liwat ni Jehova an mga tawo hin maopay gud nga urukyan nga aada an ngatanan nga ira ginkikinahanglan basi magmalipayon. (Gen. 1:29-31; 2:8, 9; Sal. 139:14-16) Kondi han nakasala hira, iginpahayag ni Jehova an iya gugma ha iba nga paagi. Paonan-o? Ginkotar ni apostol Juan an ginsiring ni Jesus: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray kataposan.” (Juan 3:16) May-ada pa ba malabaw hini nga paagi han iya pagpakita hin gugma, han ginsugo an iya Anak nganhi ha tuna basi lukaton an magpakasasala? (Juan 15:13) Inin daku nga kapahayagan han gugma usa liwat nga susbaranan ha mga tawo, nga naghahatag ha ira hin higayon ha pagpakita han may pagsakripisyo ha kalugaringon nga gugma ha kada adlaw, sugad han ginbuhat ni Jesus.—Juan 17:25, 26.

12. Ha ano nga paagi iginpapakita ni Jehova an iya gahum?

¹²Gahum. An ‘Dios la, nga Makagarahum’ ha ngatanan an may-ada gahum ha paglarang han kinabuhi. (Pah. 11:17; Sal. 36:9) Ha katawo, an usa nagtitikang han iya kinabuhi sugad hin blangko nga papel. Ha kamatayon, napuno niya ito hin mga desisyon, buhat, ngan eksperyensya ha bug-os nga kinabuhi nga nagmolde han iya mga kalidad ngan personalidad. Ito nga mga impormasyon gintitipigan ni Jehova ha iya panumdoman. Ha itinanda nga panahon, ibabalik ni Jehova an kompleto nga detalye han bug-os nga pagkatawo han tagsa nga indibiduwal ha pagkabanhaw. (Juan 5:28, 29) Salit, bisan kon diri orihinal nga katuyoan han Dios nga mamatay an tawo, naghahatag ito ha Iya hin higayon nga ipakita an iya gahum ha pagbanhaw han mga patay. Oo, hi Jehova ‘an Dios nga Makagarahum’ ha ngatanan.

13. Kay ano nga an kamatayon ni Jesus usa nga kapahayagan han hingpit nga hustisya ni Jehova?

¹³Hustisya. Hi Jehova diri nagbubuwa; diri liwat hiya nagpapakita hin kawaray hustisya. (Deut. 32:4; Tito 1:2) Pirme niya ginsusunod an gihitaasi nga prinsipyo han kamatuoran ngan hustisya, bisan kon kinahanglan hiya magsakripisyo ha pagbuhat hito. (Roma 8:32) Sigurado nga makuri gud para kan Jehova nga makita an kamatay han iya hinigugma nga Anak ha pasakitan nga kahoy nga baga hin makasasala ngan parapasipara. Kondi, tungod ha gugma ni Jehova ha diri hingpit nga mga tawo, andam hiya mag-antos hiton makuri ilubon nga kahimtang basi masunod an iya hingpit nga hustisya. (Basaha an Roma 5:18-21.) Hinin kalibotan nga puno hin kawaray hustisya, nagkaada higayon hi Jehova nga ipakita an hingpit nga hustisya nga hiya la an nakahimo.

14, 15. Ha ano nga mga paagi iginpakita ni Jehova an iya gihitaasi nga kinaadman ngan pagpailob?

¹⁴Kinaadman. Katapos gud makasala nira Adan ngan Eva, iginpahayag dayon ni Jehova kon paonan-o wawad-on an ngatanan nga maraot nga epekto han ira pagrebelde. (Gen. 3:15) Pinaagi hiton madagmit nga paggios ni Jehova, ngan han hinay-hinay nga pagpahayag ha iya katawohan han mga detalye hini nga katuyoan, naipakita gud an iya kinaadman. (Roma 11:33) Waray makakapugong ha Dios ha pagsulbad hito. Ha kalibotan nga kalyap an imoralidad, girra, kawaray hustisya, pagtalapas, kawaray kalooy, pagpasulabi, ngan kasalingkapaw, damu gud an higayon ni Jehova nga ipakita ha iya mga linarang kon ano an tinuod nga kinaadman. An disipulo nga hi Jakobo nagsiring: “An kinaadman nga tikang ha kahitas-an, siyahan putli, makigdaiton, matalunoy, mapuanguron, puno ha kalooy ngan mag-opay nga bunga, waray pagruhaduha, waray hin kasalingkapaw.”—Jak. 3:17.

¹⁵Pagpailob ngan Hilawig nga Pag-antos. Waray unta makita hin maopay an pagpailob ngan hilawig nga pag-antos ni Jehova kon waray hiya magpakita hin konsiderasyon ha mga sala, pagkadiri-hingpit, ngan kasaypanan han mga tawo. Kondi kinaburut-on nga iginpapakita niya ito hin yinukot ka tuig na, ngan nagpapamatuod ito nga may-ada hiya hinin mag-opay gud nga kalidad nga hingpit nga naipapakita niya; ngan nagpapasalamat gud kita hito. Husto an ginsiring ni apostol Pedro nga sadang naton “kilalahon . . . nga an pagkamailob han aton Ginoo amo an kaluwasan.”—2 Ped. 3:9, 15.

16. Kay ano nga an pagin mapinasayloon ni Jehova usa nga hinungdan han duro nga kalipay?

¹⁶Andam Magpasaylo. Kita ngatanan makasasala ngan damu ka beses nga nahipapakdol. (Jak. 3:2; 1 Juan 1:8, 9) Sadang kita magpasalamat nga hi Jehova andam magpasaylo “hin damu gud”! (Isa. 55:7) Tagda liwat ini: Tungod kay natawo kita nga makasasala ngan diri hingpit, nalilipay gud kita kon ginpapasaylo han Dios. (Sal. 51:5, 9, 17) An aton pakaeksperyensya han pagkamahigugmaon ni Jehova nagpaparig-on han aton gugma ha iya ngan nag-aaghat ha aton nga sundon an iya susbaranan ha pagtratar ha iba.—Basaha an Kolosas 3:13.

Kon Kay Ano nga “May Sakit” an Kalibotan

17, 18. Kay ano nga pakyas gud an pagmando ni Satanas?

¹⁷ An bug-os nga sistema han kalibotan ni Satanas—an iya paagi han pagmando—pauroutro ngan padayon nga napapakyas ha paglabay han mga siglo. Han 1991, an peryodiko nga The European nagsiring: “May sakit ba an kalibotan? Oo, kondi . . . diri tungod ha buhat han Dios—an mga tawo an naghatag hin sakit ha kalibotan.” Tinuod gud! Tungod kay naimpluwensyahan ni Satanas, ginpili han aton siyahan nga mga kag-anak an pagmando han tawo imbes nga an pagmando ni Jehova. Salit nag-establisar hira hin gobyerno nga sigurado nga mapapakyas. An kakurian ngan pag-antos han mga tawo ha bug-os nga kalibotan nagpapamatuod nga an pagmando han tawo nagriresulta hin grabe nga sakit, siring pa.

¹⁸ An pagmando ni Satanas nag-aaghat hin kahakog. Kondi, diri gud ito makakapirde ha gugma, nga amo an basihan han pagmando ni Jehova. Pakyas an pagmando ni Satanas nga magkaada karig-on, kalipay, o kasigurohan. Kondi, padayon nga nahihimaya an pagmando ni Jehova! May-ada ba kita ebidensya hito yana? Oo, ngan ito an hihisgotan naton ha sunod nga artikulo.

Ano an Aton Hibabaroan Mahitungod ha Pagmando ha Pagbasa han . . .

• Roma 13:1, 2?

• Proberbios 21:30?

• Jeremias 10:23?

• Kolosas 3:13?

[Mga Pakiana]

[Mga Retrato ha pahina 25]

Waray gud naihatag nga kaopayan ha katawohan an pagmando ni Satanas

[Ginkuhaan han mga Retrato]

U.S. Army photo

WHO photo by P. Almasy

[Retrato ha pahina 26]