Ayaw Pagsakita an Baraan nga Espiritu ni Jehova
Ayaw Pagsakita an Baraan nga Espiritu ni Jehova
‘Ayaw niyo pagsakita an espiritu han Dios, nga ha iya ginselyohan kamo.’—EFE. 4:30.
1. Ano an ginbuhat ni Jehova para ha minilyon nga katawohan, ngan ano an ira responsabilidad?
HI Jehova may maopay hinduro nga ginbuhat para ha minilyon nga katawohan nga nagkikinabuhi hinin masamok nga kalibotan. Ginhimo niya nga posible para ha ira nga magin duok ha iya pinaagi han iya bugtong nga Anak nga hi Jesu-Kristo. (Juan 6:44) Usa ka ha ira kon nagdedikar ka ha Dios ngan nagtutuman han imo dedikasyon. Sugad nga bawtismado ha ngaran han baraan nga espiritu, responsabilidad mo nga gumawi uyon hito nga espiritu.—Mat. 28:19.
2. Ano nga mga pakiana an aton hihisgotan?
2 Kita nga ‘nagpupugas ha espiritu’ nagsusul-ot han bag-o nga personalidad. (Gal. 6:8; Efe. 4:17-24) Kondi hi apostol Pablo nagsagdon ha aton ngan nagpahamangno nga diri naton pagsakiton an baraan nga espiritu han Dios. (Basaha an Efeso 4:25-32.) Usisahon naton hin maopay an sagdon ni Pablo. Ano an iya iginpapasabot han gin-unabi niya an pagsakit o pagpasubo ha espiritu han Dios? Ha ano nga mga paagi an usa nga dedikado kan Jehova makakapasubo ha Iya espiritu? Ngan paonan-o naton malilikyan nga mapasubo an espiritu ni Jehova?
Kon Ano an Iginpapasabot ni Pablo
3. Isaysay kon ano an iginpapasabot han mga pulong ha Efeso 4:30.
3 Siyahan, tigamni ini nga ginsiring ni Pablo ha Efeso 4:30: ‘Ayaw niyo pagsakita an espiritu han Dios, nga ha iya ginselyohan kamo tubtob ha adlaw han pagtubos.’ Diri karuyag ni Pablo nga mameligro an espirituwalidad han iya mga igkasi-tumuroo. An espiritu ni Jehova an ‘nagselyo ha ira tubtob ha adlaw han pagtubos.’ Tikang hadto tubtob yana, an baraan nga espiritu han Dios usa nga selyo o ‘pasarig han ngatanan nga gin-andam’ para ha mga dinihogan nga nagtitipig han integridad. (2 Kor. 1:22, Maopay nga Sumat) An selyo nagpapasabot nga panag-iya hira han Dios ngan may paglaom nga mabuhi ha langit. Adton makarawat han ultimo nga pagselyo may kadamu nga 144,000.—Pah. 7:2-4.
4. Kay ano nga kinahanglan likyan nga mapasubo an espiritu han Dios?
4 An pagpasubo ha espiritu an siyahan nga mahimo magin hinungdan nga bug-os nga mawara an giya han aktibo nga pwersa han Dios ha kinabuhi han usa nga Kristiano. Ginpapamatud-an ini han ginsiring ni David katapos niya makasala may kalabotan kan Batseba. Mabinasulon nga nanginyupo hiya kan Jehova: ‘Ayaw gud ako isalikway ha imo atubangan; ngan ayaw pagkuhaa ha akon an imo baraan nga espiritu.’ (Sal. 51:11) An mga dinihogan la nga napamatud-an nga ‘matinumanon tubtob ha kamatayon’ an makakakarawat han “pudong-pudong” han diri-mamaratyon nga kinabuhi ha langit. (Pah. 2:10; 1 Kor. 15:53) Ginkikinahanglan liwat han mga Kristiano nga may-ada tunan-on nga paglaom an baraan nga espiritu basi makapabilin nga maunungon ha Dios ngan makarawat an iya regalo nga kinabuhi pinaagi han pagtoo ha halad lukat ni Kristo. (Juan 3:36; Roma 5:8; 6:23) Salit, kita ngatanan sadang magin mabinantayon nga diri mapasubo an baraan nga espiritu ni Jehova.
Ha Ano nga Paagi Mapapasubo han Usa nga Kristiano an Espiritu?
5, 6. Ha ano nga paagi mahimo mapasubo han usa nga Kristiano an espiritu ni Jehova?
5 Sugad nga dedikado nga mga Kristiano, mahimo naton malikyan nga mapasubo an espiritu. Posible ito kon kita padayon nga nagawi ngan nagkikinabuhi uyon ha espiritu, kay diri kita magpapadaog ha makasasala nga mga hingyap ngan diri magpapakita hin magraot nga kinaiya. (Gal. 5:16, 25, 26) Kondi mahimo magbag-o an kahimtang. Mahimo naton mapasubo an espiritu han Dios kon pabay-an naton nga hinay-hinay, bangin haros diri-abat, nga mahidabi kita ha paggawi nga ginkukondenar han giniyahan-han-espiritu nga Pulong han Dios.
6 Kon kita padayon nga diri nasunod ha giya han baraan nga espiritu, mapapasubo naton ito; karuyag sidngon, mapapasubo naton hi Jehova, an Surok hito. An pag-usisa han Efeso 4:25-32 magtututdo ha aton kon paonan-o sadang gumawi, ngan mabulig ito ha aton nga malikyan nga mapasubo an espiritu han Dios.
Kon Paonan-o Malilikyan nga Mapasubo an Espiritu
7, 8. Isaysay kon kay ano nga sadang kita magyakan hin kamatuoran.
7Kinahanglan pirme kita magyakan hin kamatuoran. Ha Efeso 4:25, hi Pablo nagsurat: “Busa bayai niyo an buwa, magyakan kamo an tagsa-tagsa hin kamatuoran ha iya amyaw: kay mga bahin kita ha usa kag usa.” Tungod kay nagkakaurosa kita sugad nga ‘mga bahin ha usa kag usa,’ diri gud naton sadang uwaton o tinuyo nga limbongan an aton mga igkasi-tumuroo tungod kay sugad na ito hin pagbuwa. An bisan hin-o nga padayon nga nagbubuhat hito mawawarayan hin maopay nga relasyon ha Dios.—Basaha an Proberbios 6:16-19.
8 An maglimbong nga pulong ngan buhat makakawara han pagkaurosa han kongregasyon. Salit sadang naton subaron an masasarigan nga propeta nga hi Daniel, nga waray hinkit-an nga sayop ha iya an mga tawo. (Dan. 6:4) Ngan sadang naton hinumdoman an sagdon ni Pablo ha mga Kristiano nga may langitnon nga paglaom nga an tagsa nga bahin han “lawas ni Kristo” gintatag-iya han iba pa nga bahin ngan kinahanglan magpabilin nga kaurosa han tangkod nga dinihogan nga mga sumurunod ni Jesus. (Efe. 4:11, 12) Kon karuyag naton mabuhi ha waray kataposan ha Paraiso nga tuna, kita liwat kinahanglan magyakan hin kamatuoran, kay hito nga paagi makakabulig kita ha pagtipig han pagkaurosa han aton bug-os-kalibotan nga pagminagburugto.
9. Kay ano nga importante nga sundon naton an Efeso 4:26, 27?
9Kinahanglan atohan naton an Yawa ngan diri hiya tagan hin higayon nga dauton an aton espirituwalidad. (Jak. 4:7) An baraan nga espiritu nabulig ha aton nga makaato kan Satanas. Pananglitan, mahihimo naton ito pinaagi han pagpugong han kasina. Hi Pablo nagsurat: “Kasina, kondi ayaw pakasala: diri katunoran han adlaw an iyo kasina: diri niyo tagan hin lugar an yawa.” (Efe. 4:26, 27) Kon may makatadunganon nga hinungdan nga masina, an pag-ampo dayon hin hilom makakabulig ha aton nga magin ‘matugnaw an espiritu’ ngan magpugong ha kalugaringon imbes nga magbuhat hin makakapasubo ha espiritu han Dios. (Prob. 17:27) Salit diri kita magpabilin nga nasisina ngan tagan hin higayon hi Satanas nga sulayon kita ha pagbuhat hin maraot. (Sal. 37:8, 9) Usa nga paagi ha pag-ato ha iya amo an pagsulbad dayon han mga diri pagsinabtanay uyon ha iginsagdon ni Jesus.—Mat. 5:23, 24; 18:15-17.
10, 11. Kay ano nga diri kita sadang mangawat o magin diri tangkod?
10Kinahanglan diri kita magpasulay nga mangawat o magin diri tangkod. Mahitungod ha pangawat, hi Pablo nagsurat: “An kawatan diri na mangawat: kondi lugod magbuhat, magbuhat ha iya mga kamot ha maopay nga bagay, basi nga may niya ihatag ha mga kablas.” (Efe. 4:28) Kon mangawat an usa nga dedikado nga Kristiano, iya ‘mapapasiparahan an ngaran han Dios.’ (Prob. 30:7-9) Bisan an kapobrehan diri rason nga mangawat. Adton nahigugma ha Dios ngan ha ira igkasi-tawo maaram nga bisan san-o sayop an pangawat.—Mar. 12:28-31.
11 Hi Pablo waray la magsiring kon ano an diri sadang buhaton, kondi gin-unabi liwat niya kon ano an sadang buhaton. Kon nagkikinabuhi kita ngan nagawi uyon ha baraan nga espiritu, magtatrabaho kita hin maduruto basi maataman an aton pamilya ngan may-ada liwat “ihatag ha mga kablas.” (1 Tim. 5:8) Hi Jesus ngan an iya mga apostol naggahin hin pundo basi makabulig ha mga pobre, kondi an iba hito ginkawat han traydor nga hi Judas Iskariote. (Juan 12:4-6) Sigurado nga hi Judas waray giyahi han baraan nga espiritu. Kita nga ginigiyahan han espiritu han Dios ‘nagawi hin maopay ha ngatanan nga butang’ pariho kan Pablo. (Heb. 13:18) Hito nga paagi diri naton mapapasubo an baraan nga espiritu ni Jehova.
Iba nga mga Paagi nga Malilikyan nga Mapasubo an Espiritu
12, 13. (a) Sugad han ginsiring ha Efeso 4:29, ano nga paagi han pagyakan an sadang naton likyan? (b) Ano an sadang magin paagi han aton pagyakan?
12Kinahanglan maghirot kita ha pagyakan. Hi Pablo nagsiring: “Diri gumowa in bisan ano nga malaw-ay nga pulong ha iyo baba, kondi an maopay sugad nga kinahanglan ha pagparig-on, basi nga makahatag hin grasya ha mga nakakabati.” (Efe. 4:29) Dinhi liwat, hi Pablo waray la magsiring kon ano an diri sadang buhaton, kondi gin-unabi niya kon ano an sadang buhaton. Kon ginigiyahan kita han espiritu han Dios, magyayakan kita hin “maopay sugad nga kinahanglan ha pagparig-on, basi nga makahatag hin grasya ha mga nakakabati.” Dugang pa, diri kita sadang magyakan hin “malaw-ay nga pulong.” An Griego nga pulong nga iginhubad nga “malaw-ay” gin-gamit ha paghulagway hin nadudunot nga prutas o karne ngan nabubutod nga isda. Sugad la nga nadiri gud kita ha sugad hito nga pagkaon, kinangangalasan liwat naton an paagi han pagyakan nga maraot para kan Jehova.
13 An aton pagyakan sadang magin matinalahuron, buotan, ngan “ginparasa hin asin.” (Kol. 3:8-10; 4:6) Sadang masabtan han mga tawo nga iba kita kon nabati hira han mga pulong nga aton ginyayakan. Salit pirme kita magyakan hin “maopay sugad nga kinahanglan ha pagparig-on,” ngan aabaton naton an pariho han inabat han salmista nga nagkanta: “Makarawat unta ha imo atubangan an mga pulong han akon baba ngan an pamalandong han akon kasingkasing, O Jehova nga bantilis nakon, ngan akon manunubos.”—Sal. 19:14.
14. Sumala ha Efeso 4:30, 31, ano an kinahanglan wad-on naton?
14Kinahanglan wad-on naton an pagdumot, kapungot, nakakasakit nga pagyakan, ngan an ngatanan nga karaotan. Katapos magpahamangno nga diri pagsakiton an espiritu han Dios, hi Pablo nagsurat: “An ngatanan nga kapaitan, ngan kangalas, ngan kasina, ngan pagbusa, ngan paglibak ngan an ngatanan nga maraot ipahirayo ha iyo.” (Efe. 4:30, 31) Tungod kay kita ngatanan diri hingpit, kinahanglan mangalimbasog kita nga kontrolon an aton hunahuna ngan gios. Kon pabay-an la naton an aton kalugaringon nga magpakita hin “kapaitan, ngan kangalas, ngan kasina,” mapapasubo naton an espiritu han Dios. Mahitatabo liwat ito kon aton pag-inihapon an mga sayop han iba, magdinumot, ngan diri makighiuli hadton nakasala ha aton. Kon ibalewaray naton an sagdon han Biblia, mahimo kita magkaada mga batasan nga bangin magtugway ha pakasala ha espiritu ngan mag-antos nakakadaot nga resulta hito.
15. Kon ginbuhatan kita hin sayop, ano an sadang naton buhaton?
15Kinahanglan magin maloloy-on, mapinairon, ngan mapinasayloon kita. Hi Pablo nagsurat: “Magmalolooyon kamo an usa kag usa, magmahumok an iyo kasingkasing, magpinasayloay kamo an usa kag usa, sugad nga ginpasaylo man kamo han Dios pinaagi kan Kristo.” (Efe. 4:32) Bisan kon nasusubo gud kita tungod han sayop nga ginbuhat ha aton, magpasaylo kita, sugad la nga an Dios nagpapasaylo. (Luk. 11:4) Pananglitan may bugto nga nagyakan hin maraot mahitungod ha aton, ngan basi masulbad ito, ginkaistorya naton hiya. Nagbasol gud hiya ngan nangaro hin pasaylo salit ginpasaylo naton. Kondi labaw pa hito an sadang naton buhaton. An Lebitiko 19:18 nasiring: “Diri ka bumulos, bisan ha pagdumot patok han mga anak han imo katawohan; kondi higugmaon mo an imo igkasi-tawo sugad ha imo ngahaw: Ako hi Jehova.”
Kinahanglan Magmabinantayon
16. Pagsaysay hin ehemplo nga nagpapakita nga bangin kinahanglan maghimo kita hin pagbag-o basi diri mapasubo an espiritu ni Jehova.
16 Bisan kon nag-uusahan la, mahimo kita masulay nga magbuhat hin nakakapasubo ha Dios. Pananglitan, an usa nga Kristiano bangin nagpipinamati hin kwestyonable nga musika. Ha kamaihaan, nakonsensya hiya tungod kay iya ginbalewaray an sagdon han Biblia nga ginhisgotan ha mga publikasyon tikang ha “matinumanon ngan maaramon nga uripon.” (Mat. 24:45, NW) Bangin igin-ampo niya ini nga problema ngan ginhunahuna an ginsiring ni Pablo ha Efeso 4:30. Tungod kay determinado nga diri magbuhat hin bisan ano nga makakapasubo ha espiritu han Dios, nagdesisyon hiya nga tikang yana lilikyan na niya an kwestyonable nga musika. Bibendisyonan ni Jehova an sugad hito nga disposisyon. Salit, magmabinantayon kita pirme nga diri mapasubo an espiritu han Dios.
17. Ano an mahimo mahitabo kon diri kita mabinantayon ngan mainampoon?
17 Kon diri kita mabinantayon ngan mainampoon, mahimo kita masulay ha pagbuhat hin mahugaw o sayop nga makakapasubo ha espiritu. Tungod kay an baraan nga espiritu nagbubunga hin mga kalidad nga nagpapakita han personalidad han aton langitnon nga Amay, an pagpasubo hito nangangahulogan hin pagpasubo kan Jehova. Diri gud naton karuyag nga mahitabo ito. (Efe. 4:30) An Judio nga mga eskriba han siyahan nga siglo nakasala han naghunahuna hira nga an gahum ni Jesus ha paghimo hin milagro nagtikang kan Satanas. (Basaha an Markos 3:22-30.) Adto nga mga kaaway ni Kristo ‘nagpasipara kontra ha espiritu’ salit nakahimo hin diri mapapasaylo nga sala. Hinaot diri kita makabuhat hin sugad hito!
18. Paonan-o naton hibabaroan nga waray kita makabuhat hin diri mapapasaylo nga sala?
18 Tungod kay diri naton karuyag nga umabot ha punto nga haros makabuhat na kita hin diri mapapasaylo nga sala, kinahanglan hinumdoman naton an pahamangno ni Pablo nga diri pagsakiton an espiritu. Kondi ano man kon nakabuhat kita hin seryoso nga sala? Kon nagbasol na kita ngan ginbuligan han mga tigurang, makakasiring kita nga ginpasaylo na kita han Dios ngan waray makasala ha baraan nga espiritu. Ha bulig han Dios, malilikyan liwat naton nga mapasubo utro an espiritu ha bisan ano nga paagi.
19, 20. (a) Ano an mga buhat nga sadang naton likyan? (b) Ano an sadang naton magin determinasyon?
19 Ginagamit han Dios an iya baraan nga espiritu ha pagbulig ha iya katawohan nga magkaada gugma, kalipay, ngan pagkaurosa. (Sal. 133:1-3) Salit kinahanglan likyan naton nga mapasubo an espiritu tungod han nakakadaot nga tsismis o han pag-istorya hin mga butang nga makakaaghat ha iba nga mawarayan hin pagtahod ha mga paramangno nga ginpili han espiritu. (Buh. 20:28; Jud. 8) Lugod, sadang kita bumulig nga magkaada pagkaurosa ngan pagtahod ha usa kag usa. Diri gud kita sadang magkaada esklusibo nga grupo hin kasangkayan ha kongregasyon. Hi Pablo nagsurat: “Mga kabugtoan, nanginginyupo ako ha iyo, tungod ha ngaran han aton Ginoo Jesu-Kristo, nga magyakan kamo ngatanan hin sugad la nga bagay, ngan diri kamo magkabahin-bahin; kondi nga magkahihingpit kamo ha pagkaurosa hin sugad nga hunahuna, ngan hin sugad nga paghukom.”—1 Kor. 1:10.
20 Hi Jehova andam bumulig ngan makakabulig ha aton nga malikyan nga mapasubo an iya espiritu. Salit padayon nga mag-ampo kita ha pangaro han baraan nga espiritu ngan magin determinado nga diri ito mapasubo. Hinaot padayon kita nga ‘magpugas ngadto ha espiritu’ ngan sinsero nga magpagiya hito yana ngan ha kadayonan.
Ano an Imo Baton?
• Ano an iginpapasabot han pagpasubo ha espiritu han Dios?
• Ha ano nga paagi mahimo mapasubo han usa nga dedikado kan Jehova an Iya espiritu?
• Ha ano nga mga paagi malilikyan naton nga mapasubo an baraan nga espiritu?
[Mga Pakiana]
[Retrato ha pahina 30]
Sulbara dayon an mga diri pagsinabtanay
[Retrato ha pahina 31]
Hain hini nga mga prutas maipapariho an imo pagyakan?