Magpabilin nga Marig-on ha Espirituwal Samtang Nagmamangno ha May Sakit nga Kapamilya

HI Kim nga usa nga Saksi, hinbaroan nga may-ada kanser han may nakita nga tumor hirani ha iya butagtok. * “Katapos operahan ngan kuhaon an tumor, nag-radiotherapy ngan chemotherapy hiya. Tungod hito nagluya hiya ngan diri nakakakiwa hin maopay,” siring han iya bana nga hi Steve.

Nahahanduraw mo ba an duro nga kasubo ni Steve samtang iya nakikita an iya hinigugma nga asawa nga nag-aantos hin grabe nga sakit? Bangin may-ada ka duok nga kapamilya nga nag-aantos hin grabe nga sakit o han mga epekto han kalagas. (Ekles. 12:1-7) Kon amo, basi mamangnoan hiya hin maopay, kinahanglan atamanon mo an imo kalugaringon. Kon magluya an imo espirituwalidad, magluluya liwat an imo emosyonal ngan pisikal nga kahimsog ngan bangin diri mo na maataman an mga panginahanglan han imo kapamilya. Paonan-o ka makakapabilin nga timbang ha espirituwal samtang nag-aataman hin kapamilya nga may sakit o lagas na? Ano an maibubulig han mga membro han kongregasyon ha pagpakita hin pagtagad ha mga may sakit?

Kon Paonan-o Makakapabilin nga Timbang

Basi magpabilin nga timbang ngan mahimsog ha espirituwal ngan pisikal, kinahanglan magin mapauyon-uyon ka ngan makatadunganon ha paggamit han imo panahon ngan kusog. “An kaupod han mga ubos amo an kinaadman,” siring han Proberbios 11:2. An pulong nga iginhubad nga “ubos” nangangahulogan hin paghibaro han imo limitasyon. Basi masiguro nga an imo ginbubuhat diri sobra han imo maaakos, bangin kinahanglan usisahon mo an imo eskedyol ngan mga responsabilidad.

 Hi Steve nagin maaramon ngan ginkarawat an iya limitasyon pinaagi ha pag-usisa han kadamu han iya responsabilidad. Dugang pa han iya trabaho, koordinetor hiya han lawas han mga tigurang ngan paramangno han pag-alagad ha usa nga kongregasyon han mga Saksi ni Jehova ha Ireland. Membro liwat hiya han Hospital Liaison Committee ha ira lugar. “Waray gud magreklamo hi Kim nga napapabay-an ko hiya tungod han daku nga panahon nga akon igin-gagahin ha pagtuman hini nga mga responsabilidad,” siring ni Steve. “Kondi maaram ako nga ginbubuhat ko an sobra han akon maaakos.” Paonan-o niya ginsulbad ini? Hiya nagsiring: “Katapos usisahon an akon kahimtang ngan ig-ampo ito, nagdesisyon ako nga umundang ha pagin koordinetor. Padayon ako nga nag-alagad sugad nga tigurang, kondi pinaagi ha paghatag ha iba han pipira ko nga responsabilidad ha kongregasyon, nahatagan ko hi Kim han panahon ngan atensyon nga iya ginkikinahanglan.”

Inabot an panahon nga nag-opay-opay hi Kim. Gin-usisa utro nira nga mag-asawa an ira kahimtang, ngan tungod han suporta ni Kim, naibalik kan Steve an iya mga responsabilidad ha kongregasyon. “Nahibaro kami nga buhaton an amon la mahihimo tungod han mga limitasyon nga resulta han sakit ni Kim,” siring ni Steve. “Nagpapasalamat gud ako kan Jehova tungod  han iya bulig ngan han mapailubon nga pagsuporta han akon asawa bisan kon may sakit hiya.”

Tagda liwat an eksperyensya ni Jerry, usa nga nagbibyahe nga paramangno, ngan han iya asawa nga hi Maria. Kinahanglan bag-uhon nira an ira mga tumong basi maataman an ira lagas na nga mga kag-anak. “Tumong namon nga mag-asawa nga magin misyonero,” siring ni Maria. “Kondi hi Jerry usa la nga anak, ngan an iya mga kag-anak kinahanglan na mangnoan. Salit nagdesisyon kami nga magpabilin ha Ireland basi mamangnoan hira. Tungod hito, pirme namon ni Jerry nababantayan an iya tatay han nahospital antes mamatay. Yana nakikiistorya kami ha iya nanay kada adlaw, ngan hirani la kami kon nanginginahanglan hiya hin bulig. Mabinuligon gud an mga kakongregasyon han nanay ni Jerry, salit nakapabilin kami ha amon pribilehiyo.”

Kon Paonan-o Makakabulig an Iba

Han hi apostol Pablo naghisgot kon ano nga materyal nga mga tagana an sadang ihatag ha lagas na nga mga balo ha kongregasyon, hiya nagsurat: “Kon may-ada diri magpatigayon ha iya kalugaringon, labi na gud ha iya panimalay, naglirong na hiya han pagtoo, ngan mamaraot pa ha diri matinoohon.” Ginpahinumdoman niya an iya mga igkasi-Kristiano nga basi magin ‘makaruruyag ha Dios’ an ira pagsingba, kinahanglan suportahan nira ha pinansyal an ira mga kag-anak ngan kaapoyan. (1 Tim. 5:4, 8) Kondi, an iba ha kongregasyon mahimo bumulig ngan sadang bumulig ha praktikal nga mga paagi.

Tagda an kahimtang han lagas na nga mag-asawa nga hira Hakan ngan Inger ha Sweden. “Han amon hinbaroan nga may kanser an akon asawa,” siring ni Hakan, “diri gud kami makatoo hito. Mahimsog ngan matibaksi hi Inger. Kondi tigda na la nga kinahanglan kami kumadto ha hospital kada adlaw basi magpatambal, ngan an iya tambal nakakapaluya ha iya lawas. Durante hito nga panahon nakada la hiya ha balay, ngan kinahanglan ko hiya updan ngan mangnoan.” Paonan-o hira ginbuligan han ira mga kakongregasyon?

Ginhikay han mga tigurang nga makapamati hira ha mga katirok pinaagi han telepono. Dugang pa, an kabugtoan pirme nabisita ngan natawag ha telepono. Nagpapadara liwat hira hin mga surat ngan kard. “Inabat namon an suporta han kabugtoan ngan an bulig ni Jehova,” siring ni Hakan. “Ginkikinahanglan gud namon ito basi magpabilin nga marig-on ha espirituwal. Maopay na la nga naopay hi Inger, salit nakakatambong na liwat kami ha mga katirok ha Kingdom Hall.” Kon nangangalimbasog an mga membro ha kongregasyon nga buligan an mga may sakit ngan mga lagas, ira ginpapamatud-an nga hira tinuod nga mga ‘sangkay nga nahigugma ha ngatanan nga panahon, ngan usa nga bugto nga natawo para ha kakurian.’—Prob. 17:17.

Ginpapabilhan ni Jehova an Imo Pangalimbasog

Makapoy gud an pagmangno ha may sakit. Kondi hi Hadi David nagsiring: “Bulahan adton nagdudumdom han kablasanon,” sugad hadton nanginginahanglan hin bulig tungod han sakit.—Sal. 41:1.

Kay ano nga bulahan o malipayon adton nagmamangno ha may sakit o nag-aantos? “Hiya nga may pagbati han kablas naalayon kan Jehova,” siring han Proberbios 19:17, “ngan han iya maopay nga buhat iya hiya pagbabayaran liwat.” Ginpapabilhan han tinuod nga Dios an iya magtinumanon nga alagad nga nag-aantos tungod han sakit, ngan ginbibendisyonan niya adton nabulig ha ira. An salmista nga hi David nagkanta: “Hi Jehova magbibikyaw ha iya ha higdaan han mga kangutngot: Ginhuhumok nimo an iya higdaan ha iya sakit.” (Sal. 41:3) Salit, makakasiguro kita nga kon adton mahigugmaon nga nagmamangno amo liwat an mag-antos hin kakurian o kalamidad, bubuligan hiya ni Jehova.

Makalilipay gud hibaroan nga nakikita ngan inuuyonan ni Jehova nga Dios an aton ginbubuhat ha pagmangno ha aton kapamilya nga may sakit! Bisan kon an pagbulig bangin nagkikinahanglan hin pangalimbasog, an Kasuratan nagpapasarig ha aton nga “ha sugad nga mga halad an Dios nalilipay.”—Heb. 13:16.

[Footnote]

[Mga Retrato ha pahina 18]

Magin timbang ha espirituwal ngan karawata an bulig han iba