Mga Kababayin-an, Kay Ano nga Magpasakop ha Kahikayan han Pagkaulo?

“An ulo han babaye amo an lalaki.”—1 KOR. 11:3.

1, 2. (a) Ano an iginsurat ni apostol Pablo mahitungod han kahikayan ni Jehova han pagkaulo ngan pagpasakop? (b) Ano nga mga pakiana an babatunon hini nga artikulo?

HI Jehova an naghikay han mahapsay nga pagkasunod-sunod nga gin-unabi ni apostol Pablo han nagsurat hiya nga “an ulo han ngatanan nga mga tawo amo hi Kristo” ngan “an ulo ni Kristo amo an Dios.” (1 Kor. 11:3) Ginhisgotan ha nahiuna nga artikulo nga gintagad ni Jesus nga kadungganan ngan kalipay an pagpasakop ha iya Ulo nga hi Jehova nga Dios, ngan an ulo han Kristiano nga kalalakin-an amo hi Kristo. Hi Kristo buotan, malumo, mapinairon, ngan may pagsakripisyo ha iya pagtratar ha mga tawo. An kalalakin-an ha kongregasyon kinahanglan magin sugad liwat hito ha ira pagtratar ha iba, labi na ha ira asawa.

² Kondi, kumusta man an kababayin-an? Hin-o an ira ulo? “An ulo han babaye amo an lalaki,” siring ni Pablo. Paonan-o sadang tagdon han kababayin-an inin giniyahan nga mga pulong?  Aplikado ba liwat ini kon an bana diri Saksi? An pagpasakop ba ha pagkaulo han lalaki nangangahulogan nga an asawa waray katungod ha pagpahayag han iya opinyon kon naghihimo hin desisyon? Ano an nakakahimo ha usa nga babaye nga darayawon?

“Ako Maghihimo hin Iya Kabulig”

3, 4. Kay ano nga mapulsanon ha pag-asawa an kahikayan han pagkaulo?

³ An kahikayan han pagkaulo tikang ha Dios. Katapos larangon hi Adan, hi Jehova nagsiring: “Diri maopay nga an lalaki mag-uusahan la; ako maghihimo hin iya kabulig.” Han ginlarang na hi Eva, nalipay hinduro hi Adan nga may-ada na hiya kaupod ngan kabulig salit hiya nagsiring: “Ini yana tul-an han akon mga tul-an, ngan unod han akon unod.” (Gen. 2:18-24) Hira Adan ngan Eva may-ada makalilipay nga paglaom nga magin mga kag-anak han hingpit nga katawohan nga malipayon nga mabubuhi ha waray kataposan ha paraiso nga tuna.

⁴ Tungod kay nagrebelde an aton siyahan nga mga kag-anak, nawara an kahingpitan ha hardin han Eden. (Basaha an Roma 5:12.) Kondi waray mabag-o an kahikayan han pagkaulo. Kon ginsusunod ito, nagpapahimulos ngan nagigin malipayon an mag-asawa. Inaabat nira an pariho han inabat ni Jesus ha iya pagpasakop ha iya Ulo nga hi Jehova. Antes kumanhi ha tuna, hi Jesus “kanunay malipayon ha [kan Jehova] atubangan.” (Prob. 8:30) Tungod kay diri hingpit, an kalalakin-an waray na kapas nga magin hingpit nga ulo, ngan an kababayin-an diri liwat makakagpasakop hin hingpit. Kondi kon padayon nga nangangalimbasog an mag-asawa ha pagbuhat han ira gimaopayi ha pagsunod ha kahikayan han pagkaulo, makakab-ot nira an duro nga kalipay nga posible ha aton panahon.

5. Kay ano nga sadang iaplikar han mag-asawa an sagdon ha Roma 12:10?

⁵ Basi magmalampuson an pag-asawa, importante gud nga iaplikar han mag-asawa inin sagdon ha Kasuratan para ha ngatanan nga Kristiano: “Pagsighigugmaay gud kamo hin minagburugto an usa kag usa; . . . palabihon niyo an usa kag usa ha kadungganan.” (Roma 12:10) An mag-asawa sadang liwat mangalimbasog nga ‘magmaloloy-on ha usa kag usa, magmahumok an kasingkasing, magpinasayloay ha usa kag usa.’—Efe. 4:32.

Kon an Bana Diri Saksi

6, 7. Ano an mahimo magin resulta kon nagpapasakop an Kristiano nga asawa ha iya diri Saksi nga bana?

⁶ Ano man kon an imo padis diri nag-aalagad kan Jehova? Kasagaran na nga an bana amo an diri Saksi. Kon sugad hito an kahimtang, paonan-o hiya sadang trataron han iya asawa? Ini an baton han Biblia: “Mga kaasaw-an nga kababayin-an, magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.”—1 Ped. 3:1, 2.

⁷ An Pulong han Dios nagsusugo ha asawa nga pirme magpasakop ha iya diri-tumuroo nga bana. An iya maopay nga paggawi mahimo makaaghat ha iya bana nga maghunahuna kon kay ano nga sugad hiya hito. Sugad nga resulta, bangin usisahon han bana an gintotoohan han iya Kristiano nga asawa ngan ha urhi karawaton liwat an kamatuoran.

8, 9. Ano an mahimo buhaton han Kristiano nga asawa kon an iya diri Saksi nga bana diri magin interesado ha kamatuoran bisan pa han iya maopay nga paggawi?

 ⁸ Kondi, kumusta man kon an diri Saksi nga bana diri magin interesado ha kamatuoran bisan pa han maopay nga paggawi han iya asawa? An Kasuratan nag-aaghat ha Kristiano nga asawa nga magpakita hin Kristiano nga mga kalidad ha ngatanan nga panahon bisan kon makuri an pagbuhat hito. Pananglitan, ha 1 Korinto 13:4 ini an aton mababasa: “An gugma nag-aantos hin maiha.” Salit maopay para ha Kristiano nga asawa nga padayon nga gumawi “ha bug-os nga pagpaubos ngan pagkaaghop, ha pagkamapailubon,” ngan antuson an sitwasyon tungod han gugma. (Efe. 4:2) Ha bulig han aktibo nga pwersa han Dios—an iya baraan nga espiritu—maipapakita pa gihapon han asawa an Kristiano nga mga kalidad bisan ha magkuri nga kahimtang.

⁹ Hi apostol Pablo nagsurat: “Ngatanan mahihimo ko ha gahum han nagpaparig-on ha akon.” (Fil. 4:13) An espiritu han Dios nabulig ha Kristiano nga padis nga buhaton an damu nga butang nga diri niya mahihimo ha iya kalugaringon nga pangalimbasog. Pananglitan, kon mapintas an pagtratar han padis, bangin masulay an usa nga bumulos. Kondi an Biblia nasiring ha ngatanan nga Kristiano: “Diri kamo magbayad bisan kanay hin maraot ha maraot; . . . kay nahisurat na: Akon an pagbalos; ako an mabayad, siring han Ginoo.” (Roma 12:17-19) An 1 Tesalonika 5:15 nagsasagdon liwat ha aton: “Tan-awa niyo nga waray bisan hin-o nga magbayad hin maraot ha maraot; kondi magsunod kamo gihapon ha maopay, ha usa kag usa, ngan ha ngatanan.” Ha bulig han baraan nga espiritu ni Jehova, an imposible naton mahimo ha aton kalugaringon nga kusog nagigin posible. Angayan gud nga mag-ampo kita nga itagana han baraan nga espiritu han Dios an aton ginkikinahanglan!

10. Ano an reaksyon ni Jesus ha maraot nga pagyakan ngan paggios han iba?

¹⁰ Hi Jesus nagpakita hin maopay gud nga susbaranan ha pagtratar hadton nagyakan o nagbuhat hin maraot ha iya. An 1 Pedro 2:23 nasiring: “Han pagpakaalohi ha iya, waray hiya bulos hin pagpakaalo; han iya pag-antos, waray hiya magtarhog; kondi nga igintubyan niya an iya kalugaringon ngadto ha naghuhukom hin matadong.” Gin-aaghat kita nga subaron hiya. Ayaw kasina tungod han maraot nga paggawi han iba. Sugad han iginsasagdon ha ngatanan nga Kristiano, magin ‘maloloy-on, mapainubsanon: diri balosan an maraot hin maraot, o an pasipara hin pasipara.’—1 Ped. 3:8, 9.

Waray ba Hiya Katungod ha Pagpahayag han Iya Opinyon?

11. Ano an magigin daku nga pribilehiyo han iba nga Kristiano nga kababayin-an?

¹¹ An pagpasakop ba ha pagkaulo han bana nangangahulogan nga an asawa waray katungod ha pagpahayag han iya opinyon mahitungod ha kahimtang o buruhaton han pamilya o ha iba nga butang? Diri. An kababayin-an ngan kalalakin-an pariho gintatagan ni Jehova hin damu nga pribilehiyo. Hunahunaa an daku nga pribilehiyo han 144,000 nga magigin mga hadi ngan saserdote ha langit ha pagpanguna ni Kristo kon hiya na an magmando ha tuna! Kababayin-an an iba ha ira. (Gal. 3:26-29) Matin-aw nga an kababayin-an gintatagan ni Jehova hin daku nga pribilehiyo ha iya kahikayan.

12, 13. Paghatag hin ehemplo nga nagpapamatuod nga nanagna an kababayin-an.

¹² Pananglitan, ha kadaan nga panahon, may kababayin-an nga nanagna. Ini an igintagna han Joel 2:28, 29: ‘Akon iipison an akon espiritu ngada ha ngatanan nga unod; ngan an iyo mga anak nga kalalakin-an ngan an iyo mga anak nga kababayin-an mananagna. Akon liwat iipison an akon espiritu ngada ha mga surugoon nga kalalakin-an ngan ngada ha mga surugoon nga kababayin-an.’

¹³ An 120 nga disipulo ni Jesus nga nagkatirok ha igbaw nga kwarto ha Jerusalem han Pentekostes 33 K.P. mga kababayin-an ngan kalalakin-an. Iginbubo an espiritu han Dios ha ira ngatanan. Salit ginkotar ni apostol Pedro an tagna ni propeta Joel ngan igin-aplikar ito ha kalalakin-an ngan kababayin-an. Hiya nagsiring: ‘Ini amo an iginyakan han manaragna nga hi Joel: Ngan mahinanabo ha kataposan nga mga adlaw, nagsiring an Dios: Akon pag-iipisan han akon espiritu ha ngatanan  nga unod; ngan an iyo mga anak nga lalaki, ngan mga anak nga babaye, mananagna, ngan an akon mga surugoon nga kalalakin-an ngan kababayin-an hadto nga mga adlaw akon pag-iipisan han akon espiritu, ngan hira mananagna.’—Buh. 2:16-18.

14. Paonan-o nakabulig an kababayin-an ha pagpasarang han Kristianidad ha siyahan nga siglo?

¹⁴ Ha siyahan nga siglo, daku an naibulig han kababayin-an ha pagpasarang han Kristianidad. Iginsangyaw nira an Ginhadian han Dios ngan ginsuportahan ito nga buruhaton. (Luk. 8:1-3) Pananglitan, gintawag ni apostol Pablo hi Pebe nga “surugoon han singbahan nga didto ha Kenkrea.” Han nangumusta hiya ha iya mga igkasi-magburuhat, ginngaranan niya an pipira nga matinumanon nga kababayin-an, upod na “hi Trepena ngan hi Triposa, nga nagbubuhat tungod han Ginoo.” Gin-unabi liwat niya “hi Persida nga hinigugma nga nagbuhat hin damu tungod ha Ginoo.”—Roma 16:1, 12.

15. Paonan-o nakakabulig an kababayin-an ha pagpasarang han Kristianidad ha aton panahon?

¹⁵ Ha aton panahon, damu han sobra pito ka milyon nga nagsasangyaw han maopay nga sumat han Ginhadian han Dios ha bug-os nga kalibotan an kababayin-an nga iba-iba an pangidaron. (Mat. 24:14) Damu ha ira an bug-os-panahon nga ministro, misyonera, ngan Bethelite. An salmista nga hi David nagkanta: “An Ginoo naghahatag hin pulong: Daku nga kadam-an an mga babaye nga nagpapahayag han sumat.” (Sal. 68:11) Natutuman gud ito! Ginpapabilhan ni Jehova an nahihimo han kababayin-an ha pagpasamwak han maopay nga sumat ngan ha pagtuman han iya mga katuyoan. Matin-aw nga an iya sugo nga magpasakop an Kristiano nga kababayin-an diri nangangahulogan nga diri hira puydi magyakan.

Duha nga Babaye nga Nagyakan

16, 17. Paonan-o iginpapakita han ginbuhat ni Sara nga an kababayin-an mahimo magpahayag han ira opinyon ha ira bana?

¹⁶ Kon hi Jehova naghahatag ha kababayin-an hin damu nga pribilehiyo, diri ba sadang pakianhan han bana an iya asawa antes maghimo hin dagku nga desisyon? Maaramon an pagbuhat hito. Gin-uunabi han Biblia an pipira nga kahimtang diin an asawa nagyakan o ginios bisan kon waray hangyoa han iya bana. Aton hisgotan an duha hito.

¹⁷ Hi Sara nga asawa han patriarka nga hi Abraham nagsiniring ha iya bana nga paiwason an iya ikaduha nga asawa ngan an iya anak tungod han ira kawaray pagtahod. “Ini nga bagay uraura ka mabug-at ha paniplatan ni Abraham,” kondi diri ha Dios. Hi Jehova nagsiring kan Abraham: “Diri mo igmakuri ha imo paniplatan tungod han bata, ngan tungod han imo surugoon nga babaye; ha ngatanan nga kan Sara iginsiring ha imo, pamatii an iya tingog.” (Gen. 21:8-12) Sinugot hi Abraham kan Jehova, namati kan Sara, ngan gintuman an iya hangyo.

18. Ano an ginbuhat ni Abigail?

¹⁸ Tagda liwat hi Abigail nga asawa ni Nabal. Han pinalagiw hi David ha nangangabugho nga hi Hadi Saul, may panahon nga hiya ngan an iya katawohan nagkampo hirani han kakarnerohan han riko nga hi Nabal. Imbes nga manguha ha iya damu nga panag-iya, ira lugod ginpanalipdan ito. Kondi, hi Nabal “bastos ngan maraot ha iya mga binuhatan,” ngan iya “ginpakaalohan” an mga tawo ni David. Hiya “tawo nga waray pulos,” ngan “an  kalurongan aada ha iya.” Han an mga tawo ni David matinalahuron nga nangaro hin pagkaon, nagdumiri paghatag hi Nabal. Ano an ginbuhat ni Abigail han iya hinbaroan an nahitabo? Waray hiya magsarit kan Nabal. Hiya “nagdagmit, ngan kinmuha hin duha ka gatos ka bug-os nga tinapay, ngan hin duha ka botilya nga alaksiw, ngan hin lima nga karnero nga linisan na, ngan hin lima ka gatos nga sinanglag nga trigo, ngan hin usa ka gatos nga urapong han mga ubas, ngan hin duha ka gatos ka bulalo nga igera” ngan iginhatag ito kan David ngan ha iya mga tawo. Husto ba an ginbuhat ni Abigail? Iginpapakita han sunod nga mga hitabo nga husto ito. An Biblia nasiring: “Hinampak ni Jehova hi Nabal, nga tungod hini hiya namatay.” Ha urhi, nagin asawa ni David hi Abigail.—1 Sam. 25:3, 14-19, 23-25, 38-42.

‘An Babaye nga Dadayawon’

19, 20. Ano an nakakahimo ha usa nga babaye nga darayawon gud?

¹⁹ Ginkukumendasyonan han Kasuratan an asawa nga nagbubuhat uyon ha paagi ni Jehova. Ha libro han Proberbios, gindadayaw an “birilhon nga babaye,” nasiring nga “an iya bali [o bili] labaw pa gud han mga rubi. An kasingkasing han iya bana nasarig ha iya, ngan hiya mawawaray kulang han ganansya. Hiya nagbubuhat ha iya han maopay ngan diri han maraot ha ngatanan nga adlaw han iya kinabuhi.” Dugang pa, “hiya nabungat han iya baba dara an kinaadman; ngan an balaud ha pagpaid aada ha iya dila. Hiya nagbabantay hin maopay han mga kiwa han iya sulod-balay, ngan diri nakaon han tinapay ha kahubya. An iya mga anak nabangon, ngan natawag ha iya nga bulahan; an iya bana liwat, ngan hiya nagdadayaw ha iya.”—Prob. 31:10-12, 26-28.

²⁰ Ano an nakakahimo ha usa nga babaye nga darayawon gud? An Proberbios 31:30 nasiring: “An kaangayan malimbungon, ngan an katahom kawang. Kondi an babaye nga nahadlok kan Jehova, hiya pagdadayawon.” An kahadlok kan Jehova nag-uupod han kinaburut-on nga pagpasakop ha Iya kahikayan han pagkaulo. “An ulo han babaye amo an lalaki,” sugad la nga “an ulo han ngatanan nga mga tawo amo hi Kristo,” ngan “an ulo ni Kristo amo an Dios.”—1 Kor. 11:3.

Magin Mapasalamaton ha Regalo han Dios

21, 22. (a) Ano an mga hinungdan nga an inasaw-an nga mga Kristiano kinahanglan magin mapasalamaton ha regalo han Dios nga pag-asawa? (b) Kay ano nga sadang naton tahuron an mga kahikayan ni Jehova may kalabotan ha awtoridad ngan pagkaulo? (Kitaa an kahon ha pahina 17.)

²¹ Damu gud an hinungdan han Kristiano nga mga mag-asawa nga magpasalamat ha Dios! Mahimo hira magpasalamat labi na han makalilipay nga regalo han Dios nga kahikayan han pag-asawa tungod kay naghahatag ito ha ira hin higayon nga mag-alagad kan Jehova nga magkaupod sugad nga malipayon nga mag-asawa. (Rut 1:9; Mika 6:8) Tungod kay hiya an nagpatikang han kahikayan han pag-asawa, maaram gud hiya kon ano an ginkikinahanglan basi magmalipayon ito. Buhata pirme an mga butang uyon ha iya paagi, ngan ‘an kalipay ni Jehova magigin iyo kusog,’ bisan ha masamok nga kalibotan yana.—Neh. 8:10.

²² An Kristiano nga bana nga nahigugma ha iya asawa sugad ha iya kalugaringon magigin malumo ngan makonsiderasyon nga ulo. An iya diosnon nga asawa magigin takos gud higugmaon, tungod kay masuporta hiya ha iya bana ngan magpapakita hin hilarom nga pagtahod. Labaw ha ngatanan, an ira malipayon nga pag-asawa magpapasidungog ha aton darayawon nga Dios, hi Jehova.

Nahinunumdoman Mo Ba?

• Ano an kahikayan ni Jehova ha pagkaulo ngan pagpasakop?

• Kay ano nga sadang pasidunggan han mag-asawa an usa kag usa?

• Paonan-o sadang trataron han Saksi nga asawa an iya diri Saksi nga bana?

• Kay ano nga sadang pakianhan han mga bana an ira asawa antes maghimo hin dagku nga desisyon?

[Mga Pakiana]

 [Kahon ha pahina 17]

Kay Ano nga Sadang Tahuron an Awtoridad?

Hi Jehova naghimo hin kahikayan may kalabotan ha awtoridad ngan pagkaulo para ha iya intelihente nga mga linarang. Para ito ha kaopayan han mga anghel ngan han mga tawo. Naghahatag ito ha ira hin higayon nga gamiton an ira kagawasan ha pagbuot basi pasidunggan an Dios pinaagi han nagkakaurosa ngan nagkakauruyon nga pag-alagad ha iya.—Sal. 133:1.

Kinikilala han kongregasyon han dinihogan nga mga Kristiano an awtoridad ngan pagkaulo ni Jesu-Kristo. (Efe. 1:22, 23) Ha pagkilala han awtoridad ni Jehova, ha kataposan “an Anak ngahaw masasakop man ha nagsakop ha ngatanan nga mga bagay ha iya, basi nga an Dios magin an ngatanan ha ngatanan.” (1 Kor. 15:27, 28) Salit, angayan gud nga sundon han dedikado nga katawohan han Dios an kahikayan han pagkaulo ha kongregasyon ngan ha pamilya! (1 Kor. 11:3; Heb. 13:17) Pinaagi ha pagbuhat hito, magpapahimulos kita tungod kay uuyonan ngan bibendisyonan kita ni Jehova.—Isa. 48:17.

[Retrato ha pahina 13]

An pag-ampo makakabulig ha Kristiano nga asawa nga magpakita hin diosnon nga mga kalidad

[Mga Retrato ha pahina 15]

Ginpapabilhan ni Jehova an nahihimo han kababayin-an ha pagpauswag han mga buruhaton han Ginhadian