Padayon nga Bansaya an Imo Abilidad ha Pagsabot

MAKARURUYAG gud pagkit-on an maabtik nga gymnast nga malaksi ngan malubay nga nag-eeksibisyon! An Biblia nag-aaghat ha mga Kristiano nga bansayon an ira abilidad ha pagsabot sugad han pagbansay han gymnast.

Ha surat ni apostol Pablo ha Hebreohanon nga mga Kristiano, hiya nagsiring: “An mabaskog nga kakaunon kanan katigurangan, kanan hadton mga tawo nga pinaagi han paggamit, an ira mga balatian [“abilidad ha pagsabot,” NW] nagkababatid * na pagkilala han maopay ngan han maraot.” (Heb. 5:14) Kay ano nga gin-aghat hira ni Pablo nga bansayon an ira abilidad ha pagsabot sugad la nga nagbabansay an usa nga gymnast? Paonan-o naton mababansay an aton abilidad ha pagsabot?

“Magturutdo Na Unta Kamo”

Ha pagsaysay han katungdanan ni Jesus sugad nga “Hitaas nga Saserdote sumala ha katungdanan ni Melkisedek,” hi Pablo nagsurat: “Tungod ha iya [Jesus] damu an amon igsisiring, ngan makuri igsaysay, kay nabungol kamo ha pamati. Kay bisan kon angay na kamo, tungod han maiha na nga panahon magin magturutdo na unta kamo, kinahanglan na liwat niyo in magturutdo han mga tinikangan han siyahan nga pag-aradman han Dios; ngan nagin sugad han mga may kinahanglan han gatas, ngan diri han mabaskog nga kakaunon.”—Heb. 5:10-12.

Matin-aw nga an iba nga Judio nga Kristiano ha siyahan nga siglo waray mag-uswag ha ira pagsabot ngan waray magin hamtong ha espirituwal. Pananglitan, nakurian hira pagkarawat han dugang nga pagpatin-aw mahitungod han Balaud ngan han pagturi. (Buh. 15:1, 2, 27-29; Gal. 2:11-14; 6:12, 13) An iba liwat nakurian pagbaya han nahiaraan nga mga buruhaton ha sinemana nga Sabbath ngan ha tinuig nga Adlaw han Pagbayad han Sala. (Kol. 2:16, 17; Heb. 9:1-14) Salit gindasig hira ni Pablo nga bansayon an ira abilidad ha pagsabot basi makilala an husto ngan sayop, ngan iya liwat hira gin-aghat nga ‘magpadayon ha hingpit pa gud,’ o ha pagkahamtong. (Heb. 6:1, 2) An iya sagdon sigurado nga nagpagios ha iba nga maghunahuna kon paonan-o nira ginagamit an ira abilidad ha pagsabot ngan posible nga nakabulig ha ira nga mag-uswag ha espirituwal. Kumusta man kita?

Bansaya an Imo Abilidad ha Pagsabot

Paonan-o naton mababansay an aton abilidad ha pagsabot basi magin hamtong ha espirituwal? “Pinaagi han paggamit,” siring ni Pablo. Pariho hin gymnast nga nag-iehersisyo basi mabansay an iya lawas ha paghimo hin makaruruyag ngan komplikado nga mga eksibisyon, sadang naton bansayon an aton abilidad ha pagsabot basi makilala an husto ngan sayop.

“An pag-ehersisyo amo an imo gimaopayi nga mahihimo para ha imo utok,” siring ni John Ratey, usa nga propesor ha Harvard Medical School. Sumala kan Gene Cohen nga direktor han Center on Aging, Health and Humanities ha George Washington University, “kon may ginhuhunahuna kita nga makuri, an mga selyula han utok nagkakaada bag-o nga mga dendrite, ngan tungod hito nagdadamu an mga synapse o koneksyon nga nagpapasa hin impormasyon tikang ha usa nga selyula ngadto ha lain.”

Salit maaramon gud nga bansayon an aton abilidad ha pagsabot ngan dugangan an aton kahibaro ha Pulong han Dios. Pinaagi hito, mas masasangkapan kita ha pagbuhat han “hingpit nga kaburut-on han Dios.”—Roma 12:1, 2.

 Hingyapa an “Mabaskog nga Kakaunon”

Kon karuyag naton magin hamtong, kinahanglan pakianhan naton an aton kalugaringon: ‘Nag-uuswag ba an akon pagsabot ha kamatuoran han Biblia? Gintatagad ba han iba nga hamtong ako ha espirituwal?’ An usa nga nanay nalilipay nga pasusuhon hin gatas ngan pakaunon hin kanan bata pagkaon an iya anak samtang minasus-an pa. Kondi handurawa an iya kabaraka kon mga tuig na an naglabay pero an iya anak diri pa gihapon nakaon hin matig-a nga pagkaon. Ha pariho nga paagi, nalilipay kita kon an aton gindudumarahan hin pag-aram ha Biblia nag-uuswag tubtob nga magdedikar ngan magpabawtismo. Kondi, ano man kon katapos hito diri na hiya mag-uswag ha espirituwal? Diri ba makasurubo ito? (1 Kor. 3:1-4) An magturutdo naglalaom nga maabot an panahon nga an bag-o nga disipulo magigin magturutdo liwat.

An paggamit han aton abilidad ha pagsabot basi mangatadongan nagkikinahanglan hin pamalandong, ngan an pagbuhat hito nag-uupod hin pangalimbasog. (Sal. 1:1-3) Kinahanglan diri naton pabay-an nga an pagkita hin TV o an mga hilangkagan—mga buruhaton nga diri nagkikinahanglan hin duro nga paghunahuna—makaulang han aton pamalandong ha mapulsanon nga mga butang. Basi mabansay an aton abilidad ha pagsabot, kinahanglan hingyapon naton an pag-aram han Biblia ngan han mga publikasyon tikang ha “matinumanon ngan maaramon nga uripon,” ngan kinahanglan tumanon naton ito nga hingyap. (Mat. 24:45-47, NW) Dugang pa ha regular nga pagbasa han Biblia, importante an paggahin hin panahon ha Pagsingba han Pamilya ngan ha pag-aram hin maopay han mga topiko ha Biblia.

Hi Jerónimo nga nagbibyahe nga paramangno ha Mexico, nagsiring nga gin-aadman niya an tagsa nga gowa han The Watchtower pag-abot gud hito. Naggagahin liwat hiya hin panahon ha pag-aram upod han iya asawa. Hiya nagsiring, “Sugad nga mag-asawa, magkaupod kami nga nagbabasa han Biblia kada adlaw, ngan ginagamit namon an mga publikasyon sugad han ‘Good Land’ nga brosyur.” An Kristiano nga hi Ronald nagsiring nga pirme niya ginsusundan an sinemana nga eskedyol han kongregasyon ha pagbasa han Biblia. May-ada liwat hiya usa o duha nga espisipiko nga topiko nga gin-aadman nga nagkikinahanglan hin hilawig nga panahon. “Tungod hini, ginpapamulat ko gud an akon sunod nga eskedyol han pag-aram,” siring ni Ronald.

Kumusta man kita? Naggagahin ba kita hin igo nga panahon ha pag-aram han Pulong han Dios ngan pamalandong hito? Ginbabansay ba naton an aton abilidad ha pagsabot ngan pirme nagdidesisyon uyon ha mga prinsipyo ha Kasuratan? (Prob. 2:1-7) Hinaot magin tumong naton nga magin hamtong nga Kristiano ngan magkaada kahibaro ngan kinaadman pariho hadton nagbabansay han ira abilidad ha pagsabot basi makilala an husto ngan sayop!

[Footnote]

[Retrato ha pahina 23]

Ginbabansay naton an aton abilidad ha pagsabot “pinaagi han paggamit” hito