Magpabilin nga Tangkod ha Diri Tangkod nga Kalibotan

SUGAD la nga bisan diin may hangin, an pagkadiri-tangkod nakikita ha bisan diin. An mga tawo nagbubuwa, sobra an ginsusukot, nangangawat, diri nabayad hin utang, ngan naghahambog mahitungod han ira panlimbong ha negosyo. Tungod kay nagkikinabuhi kita upod han mga tawo nga sugad hito an kinaiya, agsob nga nasasarihan an aton determinasyon nga magin tangkod. Paonan-o naton padayon nga maaatohan an tendensya nga magin diri tangkod? Aton hisgotan an tulo nga makakabulig ha aton ha pagbuhat hito—an kahadlok kan Jehova, maopay nga konsensya, ngan pagin kontento.

Husto nga Kahadlok kan Jehova

Hi propeta Isaias nagsurat: “Hi Jehova amo an aton hukom, hi Jehova amo an aton magharatag han balaud, hi Jehova amo an aton hadi.” (Isa. 33:22) Kon aton ginkikilala an awtoridad ni Jehova, magkakaada kita diosnon nga kahadlok, ngan tungod hito magigin determinado kita nga likyan an pagkadiri-tangkod. An Proberbios 16:6 nasiring: “Pinaagi han kahadlok kan Jehova an mga tawo nabaya han karaotan.” Diri ito kahadlok ha madumot nga Dios, kondi kabaraka nga mapasubo an aton langitnon nga Amay nga interesado gud ha aton kaopayan.—1 Ped. 3:12.

Iginpapakita han usa nga eksperyensya an maopay nga epekto han sugad hito nga kabaraka, o kahadlok. Hi Ricardo ngan an iya asawa nga hi Fernanda nag-withdraw ha bangko hin kantidad nga katugbang hin $700 (U.S.). * Ginsulod ito ni Fernanda ha iya pitaka pero waray niya ihapa. Pag-uli nira tikang magbayad hin mga baraydan, nahipausa hira nga baga hin waray maibani an ira kwarta. “Bangin sobra an ginhatag ha aton han teller ha bangko,” siring nira. Ha siyahan nasulay hira nga diri iuli an kwarta kay damu pa an ira baraydan. Hi Ricardo nagsiring: “Nag-ampo kami kan Jehova nga tagan kami hin kusog nga ibalik an kwarta. An amon hingyap nga lipayon hiya uyon ha iya hangyo ha Proberbios 27:11 nakaaghat ha amon nga ibalik ito.”

Konsensya nga Binansay ha Biblia

Mababansay naton an aton konsensya pinaagi ha pag-aram han Biblia ngan pangalimbasog nga iaplikar an aton hinbabaroan. Hito nga paagi, ‘an pulong han Dios nga buhi ngan maabtik’ makakaabot diri la ha aton hunahuna kondi pati ha aton kasingkasing. Magpapagios ini ha aton nga ‘gumawi hin maopay ha ngatanan nga butang.’—Heb. 4:12; 13:18.

Tagda an kahimtang ni João. Nagkaada hiya daku nga utang nga katugbang hin $5,000 (U.S.). Waray niya ito baydi ngan binalhin ha iba nga bungto. Paglabay hin walo ka tuig, nahibaro hiya han kamatuoran, ngan an iya konsensya nga binansay ha Biblia nagpagios ha iya nga makigkomunikar ha nagpautang ha iya ngan bayaran an iya utang! Tungod kay gutiay la an iya kità ngan may-ada hiya asawa ngan upat nga anak, an iya gin-utangan sinugot nga daginuton niya ito pagbayad kada bulan.

Pagin Kontento

Hi apostol Pablo nagsurat: “Nakakapariko gud an toloohan, kon kontento la an tawo han aada na ha iya. . . . Kon may-ada na kita pagkaon ngan panapton, igo na unta ito ha aton.” (1 Tim. 6:6-8, Maopay nga Sumat) An pagsunod hinin maaramon nga sagdon mabulig ha aton nga diri mahidabi ha hakugnon ngan  kwestyonable nga paagi han pagnegosyo o ha negosyo nga may diri-reyalistiko nga estratihiya han madagmit nga pagriko. (Prob. 28:20) Mabulig liwat ito ha aton nga unahon an Ginhadian han Dios, tungod kay nasarig kita nga itatagana ha aton an aton ginkikinahanglan.—Mat. 6:25-34.

Kondi tungod han “limbong han mga manggad,” diri gud naton sadang hunahunaon nga diri kita puydi masulay nga magin hakog ngan aw-anon. (Mat. 13:22) Hinumdumi an nahitabo kan Akan. Nakita niya an milagroso nga pagtabok han mga Israelita ha Salog Jordan. Kondi tungod kay nadaog hiya han kahakog, waray niya maatohi an hingyap nga mangawat hin salapi ngan bulawan ngan marahalon nga bado tikang ha mga dinag-an ha Jeriko. Nagin hinungdan ito han iya kamatayon. (Jos. 7:1, 20-26) Diri urusahon nga paglabay hin mga siglo, hi Jesus nagpahamangno: “Pagmatngon kamo ngan maglikay kamo ha ngatanan nga kahikaw,” o kahakog!—Luk. 12:15.

Magin Tangkod ha Trabaho

Hisgotan naton yana an pipira nga kahimtang diin masasarihan an aton determinasyon nga magin tangkod ha ngatanan nga butang. Upod ha pagin tangkod ha trabaho an ‘diri pagkuha hin tago’ bisan kon damu an nagbubuhat hito. (Tito 2:9, 10) Hi Jurandir nga nagtatrabaho ha usa nga ahensya han gobyerno tangkod gud ha pagreport han iya nagagasto ha pagbiyahe. Kondi an iya mga katrabaho nagrireport hin sobra kay han ira nagasto. Nahihimo nira ito kay ginkukonsinter han ira superbisor an ira pagkadiri-tangkod. Ngani, iya ginsaway hi Jurandir tungod ha pagin tangkod ngan waray na hiya pabiyahia. Kondi inabot an panahon nga gin-awdit hira, ngan ginkumendasyonan hi Jurandir tungod han iya pagin tangkod. Gintagan liwat hiya hin hurohitaas nga posisyon ha trabaho.

Hi André nga salesman ginsidngan han iya agaron nga duha ka beses nga ibutang an service charge ha listahan han baraydan han ira mga kustomer. Nag-ampo hiya kan Jehova nga tagan hiya hin kaisog nga sundon an mga prinsipyo ha Biblia. (Sal. 145:18-20) Iginsaysay liwat niya ha iya agaron kon kay ano nga diri hiya masugot, kondi ginpirit la gihapon hiya nga buhaton ito. Salit bisan kon daku an sweldo ni André, nagdesisyon hiya nga umundang pagtrabaho. Kondi katapos hin usa ka tuig, ginpabalik hiya han iya agaron ngan ginpasarig nga diri na ginsusuktan hin sobra an mga kustomer. Nagin manidyer hi André.

Bayari an Imo Utang

Hi apostol Pablo nagsagdon ha mga Kristiano: “Diri kamo mangutang hin bisan ano kan kanay.” (Roma 13:8) Bangin mangatadongan kita nga diri naton kinahanglan baydan an aton  utang, tungod kay ginhuhunahuna naton nga riko man an aton gin-utangan ngan diri na niya kinahanglan an kwarta. Kondi an Biblia nagpapahamangno: “An tawo nga maraot nahuram ngan diri nabayad.”—Sal. 37:21.

Kondi ano man kon tungod han diri ginlalaoman nga panhitabo, diri naton mabayaran an aton utang? (Ekles. 9:11) Hi Francisco nangutang kan Alfredo hin kantidad nga katugbang hin $7,000 (U.S.) basi bayaran an iya utang ha bangko. Pero tungod han mga problema ha negosyo, waray hiya makabayad ha ira ginsabotan nga petsa. Ginkaistorya niya hi Alfredo mahitungod hito, ngan sinugot hi Alfredo nga daginuton niya ito pagbayad.

Ayaw Paghatag hin Sayop nga Impresyon

Hinumdumi an maraot nga ginbuhat nira Ananias ngan Sapira, usa nga mag-asawa nga Kristiano ha siyahan nga siglo. Nagbaligya hira hin uma, pero waray nira ihatag ha mga apostol an bug-os nga kantidad hito. Kondi siring nira nga an ira ginhatag amo na an bug-os nga kantidad. Karuyag nira nga hunahunaon han iba nga mahinatagon gud hira. Kondi pinaagi han giya han baraan nga espiritu han Dios, iginbuhayhag ni apostol Pedro an ira panlimbong, ngan ginpatay hira ni Jehova.—Buh. 5:1-11.

Diri pariho kanda Ananias ngan Sapira, an mga nagsurat han Biblia prangka ngan tangkod. Iginsumat ni Moises nga waray niya mapugngi an iya kasina salit waray hiya tuguti nga makasulod ha Tuna nga Iginsaad. (Num. 20:7-13) Ha pariho nga paagi, waray itago ni Jonas an mga kaluyahan nga iya iginpakita antes ngan katapos niya magsangyaw ha mga taga-Ninibe. Lugod, iginsurat niya ito.—Jon. 1:1-3; 4:1-3.

Matin-aw nga ginkikinahanglan an kaisog ha pagsumat han kamatuoran bisan kon diri maopay an magin resulta hito, sugad han nahitabo ha 14-anyos nga hi Nathalia ha ira eskwelahan. Iya ginkita utro an resulta han ira eksamin ngan napanginano nga sayop ngay-an an usa han iya baton nga gintsekan han iya maestro. Bisan kon maaram hiya nga maaapektohan gud hito an iya grado, waray hiya mag-alang pagsumat ha iya maestro. “Pirme ako ginsisidngan han akon mga kag-anak nga basi mapalipay hi Jehova, kinahanglan magin tangkod ako. Makukonsensya gud ako kon waray ko ito igsumat ha akon maestro,” siring niya. Gindayaw han maestro an pagin tangkod ni Nathalia.

Pagin Tangkod—Kalidad nga Nagpapasidungog kan Jehova

An 17-anyos nga hi Giselle nakaagi hin pitaka nga may mga papeles ngan kwarta nga katugbang hin $35 (U.S.). Nakigkomunikar hiya ha mga nagdudumara han eskwelahan basi maibalik ito ha tag-iya. Paglabay hin usa ka bulan, an assistant principal nagbasa hin surat ha klase nira Giselle. Hito nga surat iya gindayaw hi Giselle han iya pagin tangkod ngan ginkumendasyonan an iya pamilya ha maopay nga pagbansay ngan pagtutdo ha iya mahitungod ha Dios. An iya “mag-opay nga buhat” naghimaya kan Jehova.—Mat. 5:14-16.

Ginkikinahanglan an pangalimbasog basi magin tangkod samtang nagkikinabuhi kaupod han ‘mga tawo nga mahigugmaon ha kalugaringon, mahigugmaon ha salapi, hambog, palabilabihon, ngan diri baraan’ o diri maunungon. (2 Tim. 3:2) Kondi an husto nga kahadlok kan Jehova, konsensya nga binansay ha Biblia, ngan pagin kontento nabulig ha aton nga pirme magin tangkod dinhi hinin diri tangkod nga kalibotan. Ngan nagigin mas duok gud kita kan Jehova, nga ‘matadong ngan nahigugma ha katadongan.’—Sal. 11:7.

[Footnote]

[Mga Retrato ha pahina 7]

An husto nga kahadlok kan Jehova nagpaparig-on han aton determinasyon nga magin tangkod

[Retrato ha pahina 8]

An aton pagin tangkod naghihimaya kan Jehova