Matin-aw ba ha Imo an Ebidensya han Paggiya han Dios?

AN MGA Israelita ngan mga Ehiptohanon waray pa gud makakita hin sugad hito. Han an mga Israelita binaya ha Ehipto, may harigi nga dampog nga nakada hirani ha ira ngan pirme kaupod nira. Ha gab-i nagigin harigi ito nga kalayo. Urusahon gud ito! Pero diin ito tikang? Ano an katuyoan hito? Ngan mga 3,500 ka tuig katapos hito, ano an aton hibabaroan ha pagtagad han mga Israelita ha “harigi nga kalayo ngan hin dampog”?—Eks. 14:24.

Iginsusumat han Pulong han Dios an gintikangan ngan katuyoan hito nga harigi, nasiring: “Hi Jehova nag-una ha ira ha adlaw pinaagi hin dampog nga daw harigi ha ira atubangan, ngan ha gab-i kalayo nga daw harigi, nga nag-uuna ha ira ha paghatag ha ira hin kapawa: basi hira maglakat ha adlaw ngan ha gab-i.” (Eks. 13:21, 22) Gin-gamit ni Jehova an harigi nga kalayo ngan dampog ha paggiya han iya katawohan ha paggawas ha Ehipto ngan ha ira paglakaton ha kamingawan. Kinahanglan andam hira pirme sumunod hito. Han an naglalanat nga kasundalohan han Ehipto maatake na ha katawohan han Dios, an harigi binalhin ha butnga han duha nga grupo basi panalipdan an mga Israelita. (Eks. 14:19, 20) Bisan kon waray ito maggiya ha ira ha pinakahirani nga ruta, an pagsunod hito amo la an paagi nga an mga Israelita makakaabot ha Tuna nga Iginsaad.

An harigi nga dampog nagpasarig ha katawohan han Dios nga hiya kaupod nira. Nagrepresentar ito kan Jehova, ngan usahay an iya tingog hinbabatian tikang hito. (Num. 14:14; Sal. 99:7) Dugang pa, nagpamatuod ito nga hi Moises an ginpili ni Jehova nga manguna ha Israel. (Eks. 33:9) Sugad man, an ultimo nga pagpakita hito nga dampog nagpamatuod nga hi Josue an ginpili ni Jehova nga sumaliwan kan Moises. (Deut. 31:14, 15) Oo, an malampuson nga pagbaya han mga Israelita ha Ehipto nadepende ha ira pagsabot han ebidensya han paggiya han Dios ngan pagsunod hito.

Hinngalimtan Nira an Ebidensya

Han siyahan nga nakita han mga Israelita an harigi nga dampog, sigurado nga nahipausa gud hira. Kondi makasurubo nga ito nga pirme nira nakikita nga milagro waray makaaghat ha ira nga padayon nga sumarig kan Jehova. Damu ka beses nga nagruhaduha hira ha paggiya han Dios. Han ginlanat hira han kasundalohan han Ehipto, waray hira sumarig ha gahum ni Jehova ha pagluwas. Lugod, ira gin-akusaran an surugoon han Dios nga hi Moises nga gintutugwayan hira ha ira kamatayon. (Eks. 14:10-12) Katapos hira luwason ha Dagat nga Pula, nagngurutob hira kan Moises, kan Aaron, ngan kan Jehova tungod han ira ginhuhunahuna nga kakulang hin pagkaon ngan tubig. (Eks. 15:22-24; 16:1-3; 17:1-3, 7) Ngan pipira ka semana katapos hito, ira ginpirit hi Aaron nga maghimo hin bulawan nga baka. Hunahunaa daw ito! Ha usa nga bahin han kampo, nakikita han mga Israelita an harigi nga kalayo ngan dampog—an urusahon nga ebidensya han paggiya ni Jehova ha ira ha paggawas ha Ehipto—ngan diri hirayo tikang hito, nagsingba hira ha waray kinabuhi nga idolo, nasiring: “Amo ini an imo Dios nga nagdara ha imo tikang ha Ehipto.” Duro gud ito nga kawaray pagtahod!—Eks. 32:4; Neh. 9:18.

An pagrebelde han Israel nagpakita hin daku nga kawaray pagtagad ha paggiya ni Jehova. May problema hira, diri ha literal nga pagkita, kondi ha ira espirituwal nga panlantaw. Nakita nira an harigi nga dampog, pero hinngalimtan nira nga nagrepresentar ito han paggiya ni Jehova. Bisan kon an ira mga buhat ‘nakapasina han Baraan ha  Israel,’ nalooy hi Jehova ha ira ngan padayon nga gin-giyahan hira pinaagi hito nga harigi tubtob nga nakaabot hira ha Tuna nga Iginsaad.—Sal. 78:40-42, 52-54; Neh. 9:19.

An Nakikita nga Ebidensya han Paggiya han Dios Yana

Ha aton panahon, ginigiyahan liwat ni Jehova an iya katawohan. Sugad la nga waray niya pabay-i an mga Israelita nga maglugaring pamiling hin ruta, yana diri kita ginpapabay-an nga maglugaring pamiling han aton aagian ngadto ha iginsaad nga bag-o nga kalibotan. Hi Jesu-Kristo an igintoka nga Lider han kongregasyon. (Mat. 23:10; Efe. 5:23) Naghatag hiya hin awtoridad ha matinumanon nga uripon nga klase nga ginkukompwesto han dinihogan han espiritu nga mga Kristiano. Ngan ito nga uripon nga klase nagpipili hin mga paramangno ha Kristiano nga kongregasyon.—Mat. 24:45-47; Tito 1:5-9.

Paonan-o kita makakasiguro han pangirilal-an hiton matinumanon nga uripon o tinaporan nga klase? Tagda kon paonan-o hira iginhulagway ni Jesus: “Hin-o ba an matinumanon ngan buotan [“maaramon,” NW] nga tinaporan, nga pinalabi han agaron ha iya panimalay, basi maghatag han bahin nira nga karan-on han iya panahon? Bulahan adton nga surugoon nga kon umabot an iya agaron, iya hiaagian nga magbubuhat sugad hini.”—Luk. 12:42, 43.

Kon sugad, an tinaporan nga klase “matinumanon,” karuyag sidngon, diri gud hira nagtatraydor o nabaya kan Jehova, kan Jesus, ha kamatuoran ha Biblia, o ha katawohan han Dios. “Maaramon” hira ha paghimo hin mga desisyon ha panguna ha pinakaimportante nga buruhaton nga pagsangyaw han ‘maopay nga sumat han ginhadian’ ngan paghimo hin “mga tinon-an ha ngatanan nga mga nasud.” (Mat. 24:14; 28:19, 20) An tinaporan nga klase masinugtanon nga nagtatagana hin masustansya ngan makapahimsog nga espirituwal nga pagkaon ha husto nga panahon. An pag-uyon ni Jehova ha ira nakikita tungod kay ginbibendisyonan niya an iya katawohan nga magdamu, ginigiyahan ha paghimo hin importante nga mga desisyon, ginbubuligan nga mas masabtan an mga kamatuoran ha Biblia, ginpapanalipdan basi diri mapoo han ira mga kaaway, ngan gintatagan hin kamurayawan ha hunahuna ngan kasingkasing.—Isa. 54:17; Fil. 4:7.

Sunda an Paggiya han Dios

Paonan-o naton maipapakita nga gin-aapresyar naton an paggiya han Dios? Hi apostol Pablo nagsiring: “Magtuman ngan magpasakop kamo ha iyo mga magmarando.” (Heb. 13:17) Bangin diri pirme masayon an pagbuhat hito. Ha pag-ilustrar: Hunahunaa nga usa ka nga Israelita ha panahon ni Moises. Katapos niyo magbinaktas hin maiha, inukoy an harigi nga dampog. Tubtob san-o ito dida? Usa ka adlaw? Usa ka semana? Pipira ka bulan? Bangin maghunahuna ka, ‘Kinahanglan ko ba ipanggawas an ngatanan ko nga gamit?’ Siyahan, bangin igawas mo an pinakaimportante la nga mga butang. Kondi katapos hin pipira ka adlaw, bangin kinakapoy ka na pagpinanguliskay kon may ginbibiling ka, salit ginpanggawas mo an ngatanan nga gamit. Pero han naigawas mo na an haros ngatanan, nakita mo nga nagtipaigbaw an harigi nga dampog—ngan kinahanglan mag-impaki ka na liwat! Diri gud ito masayon o kombinyente. Bisan pa hito, an mga Israelita kinahanglan lumakat dayon katapos hito.—Num. 9:17-22.

Kon sugad, ano an aton reaksyon kon nakakakarawat hin mga instruksyon tikang ha Dios? Nangangalimbasog ba kita nga iaplikar ito dayon? O iginpapadayon la gihapon naton an aton nahiaraan na? Maaram ba kita han pinakabag-o nga mga instruksyon, sugad han mahitungod ha pagdumara hin pag-aram ha Biblia, pagsangyaw ha mga tawo nga iba an yinaknan, regular nga pakigbahin ha pagsingba han pamilya, pakigkooperar ha Hospital Liaison Committee, ngan pagpakita hin maopay nga paggawi ha mga kombensyon? Iginpapakita liwat naton nga ginpapabilhan naton an giya han Dios pinaagi ha pagsunod ha sagdon. Kon naghihimo hin importante nga mga desisyon, diri kita natapod ha aton kinaadman kondi nagpapagiya kan Jehova ngan ha iya organisasyon. Ngan sugad la nga an usa nga bata naayop ha iya mga kag-anak ha panahon han bagyo, naayop liwat kita ha organisasyon  ni Jehova kon an mga problema naabot ha aton sugad hin bagyo.

Syempre, an mga nangunguna ha tunan-on nga bahin han organisasyon ni Jehova diri mga hingpit pariho kan Moises. Bisan pa hito, pirme ginpapamatud-an han harigi nga ginpili ngan gin-uuyonan hiya han Dios. Tigamni liwat nga diri an bisan hin-o nga Israelita an magbubuot kon san-o hira mabalhin. Lugod, ginsusunod nira an “sugo ni Jehova pinaagi kan Moises.” (Num. 9:23) Salit sigurado nga hi Moises, an representante han Dios, amo an naghahatag han instruksyon nga bumalhin.

Yana, an tinaporan nga klase ni Jehova naghahatag hin matin-aw nga instruksyon ha kada panahon nga may kinahanglan buhaton o bag-uhon. Paonan-o nira ginbubuhat ito? Pinaagi han An Barantayan ngan An Aton Ministeryo ha Ginhadian, bag-o nga mga publikasyon, ngan mga pahayag ha mga asembleya ngan kombensyon. An mga instruksyon iginpapahibaro liwat ha mga kongregasyon pinaagi han mga nagbibiyahe nga paramangno, mga surat, o mga pagbansay nga gintatambongan han kabugtoan nga kalalakin-an nga may mga responsabilidad ha kongregasyon.

Matin-aw ba ha imo an ebidensya han paggiya han Dios? Sugad nga katawohan ni Jehova, ginigiyahan kita niya pinaagi han iya organisasyon samtang nagkikinabuhi kita ha kataposan nga mga adlaw hinin sugad-kamingawan nga maraot nga kalibotan ni Satanas. Tungod hito, may-ada kita pagkaurosa, gugma, ngan kasigurohan.

Han an mga Israelita nakaabot ha Tuna nga Iginsaad, hi Josue nagsiring: “Maaram kamo ha ngatanan niyo nga mga kasingkasing ngan ha ngatanan niyo nga mga kalag, nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo.” (Jos. 23:14) Ha pariho nga paagi, an katawohan han Dios yana sigurado nga makakaabot ha iginsaad nga bag-o nga kalibotan. Kondi sugad nga indibiduwal, an aton pakaabot didto nadepende gud ha aton mapainubsanon nga pagsunod ha giya han Dios. Salit, hinaot magin matin-aw pirme ha aton an ebidensya han paggiya ni Jehova!

[Mga Retrato ha pahina 5]

Ginigiyahan kita han organisasyon ni Jehova yana

Bag-o nga publikasyon nga iginpapagowa

Teokratiko nga mga eskwelahan

Pagbansay ha katirok para ha pag-alagad