Nagpapagiya Ka ba ha Espiritu han Dios?
Nagpapagiya Ka ba ha Espiritu han Dios?
‘An imo espiritu maopay; igsulsog ako ha tuna han katul-iran.’—SAL. 143:10.
1, 2. (a) Pag-unabi hin pipira nga kahimtang diin ginagamit ni Jehova an iya baraan nga espiritu ha pagbulig ha iya mga alagad. (b) An baraan nga espiritu ba nagios la ha espesyal nga mga okasyon? Isaysay.
ANO an imo nahahanduraw kon nahuhunahuna mo an paggios han baraan nga espiritu? Nahahanduraw mo ba an gamhanan nga mga buhat nira Gideon ngan Samson? (Huk. 6:33, 34; 15:14, 15) Bangin nahuhunahuna mo an kaisog han mga Kristiano ha siyahan nga siglo ngan an pagin kalmado ni Esteban samtang naatubang ha Sanhedrin. (Buh. 4:31; 6:15) Ha aton panahon, nahuhunahuna mo ba an kalipay han kabugtoan ha internasyonal nga mga kombensyon, an integridad han mga napriso tungod han pagin neutral, ngan an makatirigamnan nga pag-uswag han pagsangyaw? Ini ngatanan nagpapamatuod han paggios han baraan nga espiritu.
2 An baraan nga espiritu ba nagios la ha espesyal nga mga okasyon o ha talagsahon nga mga kahimtang? Diri. An Pulong han Dios nag-uunabi nga an mga Kristiano ‘nagawi sugad ha espiritu,’ ‘ginmamandoan han espiritu,’ ngan ‘nag-uukoy tungod ha espiritu.’ (Gal. 5:16, 18, 25) Iginpapakita hini nga mga pulong nga an baraan nga espiritu mahimo maggiya pirme ha aton kinabuhi. Kada adlaw, sadang naton hangyoon hi Jehova nga giyahan kita pinaagi han iya espiritu ha aton paghunahuna, pagyakan, ngan paggios. (Basaha an Salmo 143:10.) Kon pirme kita nagpapagiya ha espiritu, mabulig ito ha aton nga ipakita an mga kalidad nga nakakarepresko ha iba ngan nagdadayaw ha Dios.
3. (a) Kay ano nga kinahanglan magpagiya kita ha baraan nga espiritu? (b) Ano nga mga pakiana an aton babatunon?
3 Kay ano nga importante nga magpagiya kita ha baraan nga espiritu? Tungod kay may iba nga pwersa nga karuyag magkontrol ha aton. Ito nga pwersa nakontra ha paggios han baraan nga espiritu. Gintatawag ito han Kasuratan nga ‘an unod,’ nga nagtutudlok han aton tendensya nga makasala tungod han pagkadiri-hingpit nga aton napanunod kan Adan. (Basaha an Galasia 5:17.) Kon sugad, ano an nahiuupod ha pagpagiya ha espiritu han Dios? May-ada ba praktikal nga mga paagi nga puydi naton himoon basi maatohan an aton pagkadiri-hingpit? Batunon naton ini nga mga pakiana samtang aton ginhihisgotan an unom pa nga bahin han “bunga han espiritu,” an “hilawig nga pagpailob, pagkabuotan, pagkamaopay, pagtoo, pagkamalumo, pagpugong ha kalugaringon.”—Gal. 5:22, 23, NW.
An Pagkamalumo Ngan Hilawig nga Pagpailob Nabulig nga Magmamurayawon an Kongregasyon
4. Paonan-o an pagkamalumo ngan hilawig nga pagpailob nakakabulig basi magin mamurayawon an kongregasyon?
4Basaha an Kolosas 3:12, 13. An pagkamalumo ngan hilawig nga pagpailob nakakabulig basi magin mamurayawon an kongregasyon. Inin duha nga bahin han bunga han espiritu nabulig ha aton nga trataron hin maopay an iba, magin kalmado bisan kon gin-aaghat nga masina, ngan diri bumulos kon an iba nagyayakan o nagbubuhat hin diri maopay ha aton. Kon may bugto nga diri naton iginkakasinabot, an hilawig nga pagpailob o pagkamainantuson mabulig ha aton nga diri hunahunaon nga waray na hiya paglaom nga magbag-o kondi buhaton an ngatanan basi maibalik an maopay nga relasyon. Ginkikinahanglan gud ba an pagkamalumo ngan hilawig nga pagpailob ha kongregasyon? Oo, tungod kay kita ngatanan diri hingpit.
5. Ano an nahitabo kanda Pablo ngan Bernabe, ngan ano an iginpapakita hini?
5 Tagda an nahitabo kanda Pablo ngan Bernabe. Damu ka tuig nga magkaupod hira ha pagpauswag han buruhaton nga pagsangyaw. An tagsa ha ira may mag-opay nga kalidad. Kondi makausa, nagkaada hira “daku nga paglaris, amo an ira pagbulag ha usa kag usa.” (Buh. 15:36-39) Iginpapakita hini nga bisan an maunungon nga mga alagad han Dios usahay diri nagkakasinabtanay. Kon may bugto nga diri mo iginkakasinabot, ano an puydi mo buhaton basi diri kamo maglantugi nga tungod hito madaot an iyo maopay nga relasyon?
6, 7. (a) Ano nga sagdon han Kasuratan an mahimo naton sundon antes magkaada mapaso nga diskusyon ha aton igkasi-tumuroo? (b) Ano an mga kapulsanan han pagin ‘maabtik ha pamati, mahinay ha pagyakan, mahinay ha kasina’?
6 Iginpapakita han iba nga hubad han Biblia nga tigda ngan grabe an paglaris nira Pablo ngan Bernabe. Kon durante han pakiistorya ha usa nga bugto an usa nga Kristiano naabat nga nasisina na hiya, maaramon gud nga iya sundon an sagdon ha Jakobo 1:19, 20: “An ngatanan nga mga tawo magmaabtik ha pagbati, mahinay ha pagyakan, mahinay ha kasina: kay an kasina han tawo diri makakahimo ha katadongan han Dios.” Depende ha kahimtang, puydi niya ibahon an topiko, makigsabot nga ha sunod na la hira mag-istorya, o bumaya la anay antes magin mapaso an diskusyon.—Prob. 12:16; 17:14; 29:11.
7 Ano an mga kapulsanan han pagsunod hini nga sagdon? Pinaagi ha pagpakalma han kalugaringon, pag-ampo, ngan paghunahuna kon ano an gimaopayi nga paagi han pagbaton, an usa nga Kristiano nagpapagiya ha espiritu han Dios. (Prob. 15:1, 28) Ha bulig hito, maipapakita niya an pagkamalumo ngan hilawig nga pagpailob. Hito nga paagi masusunod niya an sagdon ha Efeso 4:26, 29: “Kasina, kondi ayaw pakasala . . . Diri gumowa in bisan ano nga malaw-ay nga pulong ha iyo baba, kondi an maopay sugad nga kinahanglan ha pagparig-on, basi nga makahatag hin grasya ha mga nakakabati.” Oo, kon malumo kita ngan may hilawig nga pagpailob, nakakabulig kita nga magin mamurayawon ngan nagkakaurosa an kongregasyon.
Magin Nakakarepresko ha Imo Pamilya Pinaagi ha Pagin Buotan Ngan Maopay
8, 9. Ano an pagkabuotan ngan pagkamaopay, ngan ano an epekto hito ha sulod han pamilya?
8Basaha an Efeso 4:31, 32; 5:8, 9. Pariho hin harupoy han hangin ngan matugnaw nga irimnon ha mapaso nga panahon, an pagkabuotan ngan pagkamaopay nakakarepresko. Nakakabulig ito basi magin makalilipay an pag-urupod han pamilya. An pagkabuotan usa nga makaruruyag nga kalidad nga resulta han sinsero nga pagtagad ha iba nga iginpapakita pinaagi han pagbulig ngan han makonsiderasyon nga pagyakan. Pariho han pagkabuotan, an pagkamaopay usa nga positibo nga kalidad nga iginpapakita pinaagi han mga buhat para ha kaopayan han iba. Nakikita ito ha pagin mahinatagon. (Buh. 9:36, 39; 16:14, 15) Kondi labaw pa an nahiuupod ha pagkamaopay.
9 An pagkamaopay amo an pagsunod ha higtaas nga prinsipyo ha moral. Nahiuupod hito diri la kon ano an aton ginbubuhat kondi pati na an aton pagkatawo. Pariho ito hin prutas nga hinog ngan matam-is ngan waray dunot ha sulod o ha gawas. An pagkamaopay nga iginbubunga han baraan nga espiritu nakakaapekto ha bug-os nga pagkinabuhi han usa nga Kristiano.
10. Ano an puydi buhaton basi mabuligan an mga membro han pamilya nga makultibar an bunga han espiritu?
10 Ano an makakabulig ha mga membro han Kristiano nga pamilya nga magin buotan ngan maopay ha pagtratar ha usa kag usa? Daku an maibubulig han husto nga kahibaro ha Pulong han Dios. (Kol. 3:9, 10) Igin-aapi han iba nga ulo han pamilya ha ira sinemana nga Pagsingba han Pamilya an paghisgot han bunga han espiritu. Diri ito makuri. Pinaagi han mga garamiton ha pagsaliksik nga may-ada ha iyo yinaknan, pagpili hin materyal mahitungod han tagsa nga bahin han bunga han espiritu. Kada semana puydi kamo maghisgot hin pipira la nga parapo mahitungod han usa nga bahin ngan ipadayon ito ha sunod nga mga semana. Ha iyo pag-aram, basaha ngan hisguti an gin-unabi nga mga teksto. Pamiling hin mga paagi ha pag-aplikar han iyo hinbaroan, ngan pag-ampo kan Jehova nga bendisyonan an iyo pangalimbasog. (1 Tim. 4:15; 1 Juan 5:14, 15) Ito ba nga pag-aram makakabulig ha mga membro han pamilya ha paagi han ira pagtratar ha usa kag usa?
11, 12. Paonan-o nagpahimulos an duha nga Kristiano nga mag-asawa ha ira pag-aram mahitungod han pagkabuotan?
11 Usa nga batan-on nga mag-asawa an naruyag nga magmalampuson an ira pag-asawa, salit nagdesisyon hira nga adman hin maopay an bunga han espiritu. Ano an resulta? An asawa nagsiring: “An paghibaro nga nahiuupod ha pagkabuotan an pagkamaunungon nakabulig ha paagi han amon pagtratar ha usa kag usa tubtob yana. Natutdoan kami hito nga magin makatadunganon ngan mapinasayloon. Ngan nakabulig ito ha amon nga mahibaro pagsiring hin ‘salamat’ ngan ‘pasayloa ako.’”
12 Usa pa nga Kristiano nga mag-asawa nga may problema ha ira pag-asawa an nakasantop nga diri nira naipapakita an pagkabuotan. Nagdesisyon hira nga adman nga magkaupod an mahitungod han pagkabuotan. Ano an resulta? An bana nagsiring: “An amon pag-aram mahitungod han pagkabuotan nakabulig ha amon nga masantop nga kinahanglan sumarig kami ha usa kag usa imbes nga ruhaduhaan an motibo han kada tagsa. Nahibaro kami nga pamilngon an mag-opay nga kalidad han usa kag usa ngan mas magin interesado ha panginahanglan han kada tagsa. Upod ha pagin buotan an pag-aghat ha akon asawa nga isumat an iya ginhuhunahuna ngan diri masina ha iya ginsisiring. Nangangahulogan ito nga kinahanglan diri ako magpahitaas. Han iginpakita na namon an pagkabuotan, hinay-hinay nga nawara an amon hilig nga magpinangatadongan. Makalilipay gud ito.” Magpapahimulos ba an iyo pamilya ha pag-aram mahitungod han bunga han espiritu?
Ipakita an Pagtoo Bisan kon Nag-uusahan
13. Ano an usa nga makakadaot han aton relasyon kan Jehova nga sadang naton likyan?
13 An mga Kristiano kinahanglan magpagiya ha espiritu han Dios, ha publiko man o ha pribado. Ha kalibotan ni Satanas yana, nagtitikadamu gud an maglaw-ay nga retrato ngan imoral nga mga kiritaon. Makakadaot ito ha aton relasyon kan Jehova. Ano an sadang buhaton han usa nga Kristiano? An Pulong han Dios nagsasagdon ha aton: “Isikway niyo an ngatanan nga maghugaw ngan kahura han magraot, karawata niyo ha kaaghop an pulong nga gintanom dida ha iyo, nga amo an sadang makaluwas ha iyo mga kalag.” (Jak. 1:21) Aton hisgotan kon paonan-o an pagtoo, usa pa nga bahin han bunga han espiritu, makakabulig ha aton nga magpabilin nga limpyo ha atubangan ni Jehova.
14. Paonan-o an kakulang hin pagtoo mahimo magresulta hin sayop nga paggawi?
14 Kon tinuod an aton pagtoo, tinuod ha aton hi Jehova. Kon diri hiya tinuod ha aton, madali kita makabuhat hin sayop. Tagda an nahitabo ha katawohan han Dios ha kadaan nga panahon. Iginbuhayhag ni Jehova kan propeta Esekiel an mangil-ad nga mga butang nga sekreto nga ginbubuhat nira, nasiring: “Anak han tawo, nakakita ka ba kon ano an binubuhat han katigurangan han balay han Israel dida ha kasisidman, an tagsa ka tawo aada ha iya mga sulod nga binubutangan han mga ladawan? kay hira nasiring: Hi Jehova diri nakita ha aton; hi Jehova binaya ha tuna.” (Esek. 8:12) Naobserbaran mo ba kon ano an usa nga hinungdan han ira pakasala? Diri hira natoo nga nakikita ni Jehova an ira ginbubuhat. Hi Jehova diri tinuod ha ira.
15. Paonan-o an marig-on nga pagtoo kan Jehova nagpapanalipod ha aton?
15 Ha luyo nga bahin, tagda an susbaranan ni Jose. Bisan kon hirayo hiya ha iya pamilya ngan katawohan, nagdumiri hiya pagbuhat hin imoralidad upod han asawa ni Potipar. Kay ano? Hiya nagsiring: “Oonanhon ko in pagbuhat hini nga daku nga karat-an, ngan paglapas kontra han Dios?” (Gen. 39:7-9) Oo, tinuod ha iya hi Jehova. Kon tinuod ha aton an Dios, diri kita magkikita hin mahugaw nga mga kaliawan o sekreto nga magbubuhat hin bisan ano nga makakapasubo ha Dios. Magigin determinado kita nga subaron an salmista nga nagkanta: “Maglalakat ako ha akon balay ha sakob han hingpit nga kasingkasing. Diri ako magbubutang hin bagay nga malamiri ha atubangan han akon mga mata.”—Sal. 101:2, 3.
Panalipdi an Imo Kasingkasing Pinaagi ha Pagpugong ha Kalugaringon
16, 17. (a) Sugad han iginhuhulagway ha Proberbios, paonan-o an “usa ka batan-on nga waray sarabotan” nahilit-ag ha pagbuhat hin sala? (b) Sugad han makikita ha retrato ha pahina 26, paonan-o ito mahimo mahitabo ha bisan hin-o yana?
16 An pagpugong ha kalugaringon, an ultimo nga bahin han bunga han espiritu, nabulig ha aton nga magdumiri pagbuhat han mga butang nga ginkukondenar han Dios. Makakabulig ito nga mapanalipdan an aton kasingkasing. (Prob. 4:23) Tagda an kahimtang nga mababasa ha Proberbios 7:6-23, nga naghuhulagway kon paonan-o an “usa ka batan-on nga waray sarabotan” nadani han usa nga puta. Nalit-ag hiya han ‘inagi hiya ha kalsada hirani han likoan han babaye.’ Bangin kinadto hiya hirani ha balay han babaye basi mag-usyuso. Kondi waray gud niya mahunahuna nga gin-aaghat hiya nga magbuhat hin sayop nga nahidadabi an iya kinabuhi.
17 Paonan-o unta nalikyan han batan-on iton daku hinduro nga sala? Pinaagi ha pagsunod hini nga pahamangno: “Ayaw kadto ha paghisalaag ha iya mga agianan.” (Prob. 7:25) May leksyon ini para ha aton: Kon karuyag naton nga giyahan han espiritu han Dios, kinahanglan likyan naton an nakakasulay nga mga kahimtang. An usa nga paagi nga mahimo mahingadto an usa ha sayop nga dalan nga ginkadtoan han “batan-on nga waray sarabotan” amo an pagpinamiling hin iba-iba nga channel ha TV o pagpinangabri hin mga web site ha Internet. Tinuyo man o diri, bangin may makita hiya nga nakakaaghat hin seksuwal nga mga pagbati. Hinay-hinay nga magkakaada hiya sayop nga hingyap ha pagkinita hin pornograpiya, nga makakadaot gud han iya konsensya ngan han iya relasyon ha Dios. Mamimeligro gud an iya kinabuhi.—Basaha an Roma 8:5-8.
18. Ano nga mga paagi an puydi himoon han usa nga Kristiano basi panalipdan an iya kasingkasing, ngan paonan-o nahiuupod hito an pagpugong ha kalugaringon?
18 Syempre, mahimo naton pugngan an aton kalugaringon pinaagi ha paghimo dayon hin paagi kon may makita kita nga malaw-ay nga kiritaon, ngan sadang naton buhaton ito. Pero mas maopay gud kon lilikyan naton an sugad hito nga kahimtang! (Prob. 22:3) An paghimo hin paagi nga mapanalipdan an aton kalugaringon ngan pagsunod hito nagkikinahanglan hin pagpugong ha kalugaringon. Pananglitan, usa nga panalipod an pagbutang han kompyuter ha lugar nga nakikita han iba. Para ha iba, maopay an paggamit han kompyuter o pagkita hin TV kon may upod hira. An iba nagdesisyon nga diri magpataod hin Internet. (Basaha an Mateo 5:27-30.) Hinaot buhaton naton an ngatanan ha pagpanalipod ha aton kalugaringon ngan ha aton pamilya basi magsingba kita kan Jehova “tikang ha usa nga kasingkasing nga putli ngan ha usa nga maopay nga konsensya ngan maputli nga pagtoo.”—1 Tim. 1:5.
19. Ano an mga kapulsanan han pagpagiya ha baraan nga espiritu?
19 Damu an kapulsanan han bunga nga resulta han paggios han baraan nga espiritu. An pagkamalumo ngan hilawig nga pagpailob nakakabulig basi magin mamurayawon an kongregasyon. An pagkabuotan ngan pagkamaopay nakakabulig ha pamilya nga magin malipayon. An pagtoo ngan pagpugong ha kalugaringon nabulig ha aton nga magpabilin nga limpyo ngan duok kan Jehova. Dugang pa, an Galasia 6:8 nagpapasarig ha aton: ‘An magpugas ngadto ha espiritu, tikang ha espiritu mag-aani hin kinabuhi nga waray kataposan.’ Oo, pinaagi han lukat ni Kristo, gagamiton ni Jehova an baraan nga espiritu basi tagan hin kinabuhi nga waray kataposan an nagpapagiya ha espiritu.
Ano an Imo Baton?
• Paonan-o nakakabulig an pagkamalumo ngan hilawig nga pagpailob basi magin mamurayawon an kongregasyon?
• Ano an makakabulig ha mga Kristiano nga ipakita an pagkabuotan ngan pagkamaopay ha sulod han pamilya?
• Paonan-o an pagtoo ngan pagpugong ha kalugaringon nabulig ha usa nga Kristiano nga panalipdan an iya kasingkasing?
[Mga Pakiana]
[Retrato ha pahina 24]
Paonan-o mo malilikyan an pakiglantugi?
[Retrato ha pahina 25]
Mapulsanon ha imo pamilya an pag-aram mahitungod han bunga han espiritu
[Retrato ha pahina 26]
Ano nga mga peligro an aton nalilikyan kon may-ada kita pagtoo ngan pagpugong ha kalugaringon?
