Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

• Kay ano nga makakasiring kita nga tinuod nga lugar an hardin han Eden?

An Biblia nasiring nga tinuod ito nga lugar ngan naghatag hin mga detalye mahitungod han hinmumutangan hito. An duha han mga salog nga gin-unabi ha asoy naeksister pa yana. Kondi an mga susmatanon o fairy tale kasagaran na nga diri nag-uunabi hin sugad hito nga mga detalye. Hi Jesus, an pinakamasasarigan nga Testigo, nag-unabi nga tinuod hira Adan ngan Eva.—1/1, pahina 5-6, 9.

• Maaram ba an Dios nga makakasala hira Adan ngan Eva?

Diri. Gintagan hira ni Jehova hin kapas ha paghunahuna ngan kagawasan ha pagbuot, salit puydi hira magpili kon masugot ba hira o diri. Bisan kon an Dios may abilidad ha paghibaro han tidaraon, ginpipili niya kon san-o ito gagamiton.—1/1, pahina 13-15.

• Ginagamit ba han tinuod nga mga Kristiano an ngaran han Dios sugad nga anting-anting?

Gintatagad han iba an usa nga butang o simbolo sugad nga anting-anting, usa nga pangontra nga makakapanalipod ha ira, pero diri sugad hito an panhunahuna han katawohan han Dios ha iya ngaran. Natoo hira kan Jehova ngan nangangalimbasog nga buhaton an iya kaburut-on. Hito nga paagi naayop hira ha iya ngaran. (Sep. 3:12, 13)—1/15, pahina 5-6.

• Hin-o ha Israel an nagpahimulos ha kustomre nga panguha hin salin?

Hira ngatanan. Nag-aghat ito ha mga pobre nga magin maduruto, kay kinahanglan hira manguha hin salin. Nagpahimulos liwat an iba tungod kay nakaaghat ito ha ira nga magin mahinatagon ngan sumarig ha bendisyon han Dios.—2/1-E, pahina 15.

• Kay ano nga ginsalikway ni Jehova hi Hadi Saul?

Sadang unta hulaton ni Saul nga an propeta han Dios an maghalad, pero nagtalapas hi Saul ngan naglugaring paghalad. Ha urhi, waray niya sunda an sugo nga poohon an ira kaaway.—2/15, pahina 22-23.

• Paonan-o naton maipapakita nga nangangalas kita ha karaotan?

Lilikyan naton an sayop nga paggamit hin de-alkohol nga irinmon ngan an espiritismo, ngan susundon naton an pahamangno ni Jesus may kalabotan ha imoralidad. Pananglitan, lilikyan naton an pagkinita hin pornograpiya ngan an sayop nga mga hingyap nga mahimo magin resulta hito. (Mat. 5:27, 28) Diri liwat kita makikig-upod ha mga ginpaiwas ha kongregasyon.—2/15, pahina 29-32.

• Ano an makatirigamnan ha naagian han mga arkeologo nga damu nga kadaan nga balay hin putyukan ha nasud han Israel yana?

An mga arkeologo nakaagi hin sobra 30 nga balay hin putyukan, ngan sumala ha pagbanabana han mga eskolar, makukuhaan ito hin mga tunga hin tonilada nga dugos kada tuig. Iginpapakita hito nga kustomre an pag-ataman hin mga putyukan ha tuna nga ginsiring han Dios nga ‘nag-aagay hin gatas ngan dugos.’ (Eks. 3:8)—3/1-E, pahina 15.

• Paonan-o hi Jeremias iginpariho ha kahoy nga “gintanom ha harani han katubigan, nga napapangamway han iya mga gamot”? (Jer. 17:7, 8)

Waray gud hiya humunong hin pamunga, ngan waray hiya magpaimpluwensya ha mga nanyuyubit ha iya. Lugod, nagmaunungon hiya ha Surok han tubig nga nagtitipig han kinabuhi ngan ginsunod an mga sugo han Dios.—3/15, pahina 14.

• Ano an karuyag sidngon ni Jesus han nagsiring hiya kan Marta nga gutiay la o usa la nga butang an ginkikinahanglan? (Luk. 10:41, 42)

Diri niya karuyag sidngon nga materyalistiko hi Marta ha pag-andam hin iba-iba nga putahe; diri liwat niya ginbabalewaray an kamaduruto ni Marta. Lugod, ginpapabug-atan niya kon ano an sadang magin prayoridad. Waray salingabota ni Marta an talagsahon nga higayon nga maparig-on an iya pagtoo.—4/1, pahina 12-13.

• Ano an pipira nga anomaliya ha pagbista kan Jesus?

An korte waray ginpamatian nga testimonya ha pag-abswelto ha iya. Namiling hin mga testigo nga buwaon. An kaso ginbista ha gab-i. An pagbista ginhimo ha usa la ka adlaw.—4/1, pahina 20.