Paghimo hin mga Desisyon nga Nagpapasidungog ha Dios

“An tawo nga mainalam-agamon nagtatan-aw hin maopay ha iya kakadtoan.”—PROB. 14:15.

1, 2. (a) Ano an sadang magin pinakaimportante ha aton ha ngatanan nga desisyon nga aton ginhihimo? (b) Ano nga mga pakiana an aton hihisgotan?

POSIBLE nga damu ka beses naton ito ginhihimo kada adlaw. Damu hito an diri nag-iiha an epekto. Kondi an iba may daku nga epekto ha aton kinabuhi. Ano ito? Mga desisyon. Ha ngatanan naton nga desisyon, dagku man o gudtiay, an pinakaimportante ha aton amo an pagpasidungog ha Dios.—Basaha an 1 Korinto 10:31.

² Masayon ba ha imo an pagdesisyon, o nakukurian ka pagbuhat hito? Basi magin hamtong nga Kristiano, sadang kita mahibaro pagkilala han husto ngan sayop ngan magdesisyon uyon ha aton gintotoohan, diri ha gintotoohan han iba. (Roma 12:1, 2; Heb. 5:14) Ano an iba pa nga importante nga hinungdan nga kinahanglan mahibaro kita paghimo hin mag-opay nga desisyon? Kay ano nga usahay makuri an paghimo hito? Ngan ano an puydi naton buhaton basi masiguro nga an aton mga desisyon magpapasidungog ha Dios?

Kay Ano nga Kinahanglan Pa man Magdesisyon?

3. Ano an diri naton sadang tugotan nga makaapekto ha aton pagdesisyon?

³ Kon nakukurian kita pagdesisyon ha mga butang nga nahidadabi an mga prinsipyo ha Biblia, bangin hunahunaon han aton mga kaeskwela o katrabaho nga diri kita kombinsido ha aton gintotoohan salit masayon kita maimpluwensyahan.  Bangin magbuwa hira, manlimbong, o mangawat ngan kombinsihon kita nga “sumunod han kadam-an” pinaagi ha pagsubad o pagkonsinter ha ira. (Eks. 23:2) Kondi, an usa nga maaram maghimo hin mga desisyon nga nagpapasidungog ha Dios diri magawi hin supak ha iya konsensya nga binansay ha Biblia tungod han kahadlok o han hingyap nga karawaton han iba.—Roma 13:5.

4. Kay ano nga bangin karuyag han iba nga magdesisyon para ha aton?

⁴ Diri ngatanan nga karuyag magdesisyon para ha aton may maraot nga motibo. An kasangkayan nga maopay an intensyon bangin mag-insister nga sundon naton an ira sagdon. Bisan kon diri na kita nalungon ha aton mga kag-anak, sigurado nga an aton mga paryente interesado pa gihapon ha aton kaopayan ngan bangin karuyag pa gihapon nira bumulig ha dagku nga desisyon nga sadang naton himoon. Pananglitan, tagda an may kalabotan ha pagpatambal. Matin-aw nga ginkukondenar han Biblia an sayop nga paggamit han dugo. (Buh. 15:28, 29) Kondi, an iba nga butang may kalabotan ha pagmangno han kahimsog waray igsaysay hin matin-aw ngan kinahanglan magdesisyon an tagsa ha aton kon ano nga pagtambal an aton kakarawaton ngan kon ano an diri. * An aton mga hinigugma bangin may marig-on nga opinyon may kalabotan hito. Kondi kon nagdidesisyon mahitungod hito, an tagsa nga dedikado ngan bawtismado nga Kristiano kinahanglan magpas-an han “iya kalugaringon nga darad-on” o responsabilidad. (Gal. 6:4, 5) An pinakaimportante ha aton amo an pagtipig hin maopay nga konsensya ha Dios, diri basi uyonan han tawo.—1 Tim. 1:5.

5. Paonan-o naton malilikyan an kadaot han aton pagtoo?

⁵ An pagruhaduha bangin magin peligroso gud ha aton. An disipulo nga hi Jakobo nagsurat nga an tawo nga diri nakakadesisyon “maruhaduhaon ha ngatanan niya nga paagi.” (Jak. 1:8) Sugad hin sakayan nga waray timon ha mabagyo nga kadagatan, maiimpluwensyahan hiya han diri masasarigan ngan nagbuburobag-o nga panhunahuna han tawo. Madali gud la madaot an iya pagtoo ngan katapos babasulon niya an iba tungod han iya makasurubo nga kahimtang! (1 Tim. 1:19) Paonan-o naton ito malilikyan? Kinahanglan magin ‘marig-on an aton pagtoo.’ (Basaha an Kolosas 2:6, 7.) Basi magin marig-on, kinahanglan mahibaro kita paghimo hin mga desisyon nga nagpapakita han aton pagtoo ha giniyahan nga Pulong han Dios. (2 Tim. 3:14-17) Kondi, ano an bangin makaulang ha aton ha paghimo hin mag-opay nga desisyon?

Kon Kay Ano nga Bangin Makuri an Pagdesisyon

6. Ha ano nga paagi bangin makaapekto ha aton an kahadlok?

⁶ An kahadlok bangin makapugong ha aton nga magdesisyon. Bangin nahahadlok kita nga sayop an aton magin desisyon, nahahadlok nga mapakyas, o nahahadlok nga maalohan. Natural la nga abaton naton ito. Waray naruruyag paghimo hin desisyon nga magigin hinungdan hin problema o kaarawdan pa ngani. Bisan pa hito, an gugma ha Dios ngan ha iya Pulong makakabulig basi mawara an aton kahadlok. Ha ano nga mga paagi? An gugma ha Dios magpapagios ha aton nga pirme usisahon an iya Pulong ngan an mga publikasyon nga basado hito antes maghimo hin dagku nga desisyon. Hito nga paagi malilikyan naton an pakahimo hin damu nga sayop. Kay ano? Tungod kay an Biblia ‘makakahatag hin kinaadman ha mga tapang, ha batan-on nga lalaki hin hibaro ngan hin katakos ha pagturotimbang.’—Prob. 1:4.

7. Ano an igintututdo ha aton han ehemplo ni Hadi David?

⁷ Pirme ba husto an aton magigin desisyon? Diri. Kita ngatanan nagsasayop. (Roma 3:23 ) Pananglitan, hi Hadi David maaramon ngan matinumanon. Pero may mga panahon nga nakahimo hiya hin mga desisyon nga nagin hinungdan nga mag-antos hiya ngan an iba. (2 Sam. 12:9-12) Kondi waray niya tuguti nga makaulang ito ha iya ha paghimo hin mga desisyon nga gin-uuyonan han Dios. (1 Hadi 15:4, 5) Bisan pa han aton mga sayop ha naglabay, mahimo kita magin marig-on ha pagdesisyon kon pariho kan David, hinumdoman naton nga kakalimtan ni Jehova an aton mga sayop ngan papasayloon an aton mga sala. Padayon  nga bubuligan niya an mga nahigugma ngan nasugot ha iya.—Sal. 51:1-4, 7-10.

8. Ano an aton hibabaroan ha ginsiring ni apostol Pablo mahitungod ha pag-asawa?

⁸ Puydi maibanan an aton kahadlok ha paghimo hin desisyon. Paonan-o? Pinaagi ha pagkarawat nga usahay damu an mapipilian nga ngatanan husto. Tagda an pangatadongan ni apostol Pablo may kalabotan ha pag-asawa. Pinaagi ha giya han Dios hiya nagsurat: “Kon naabat an lalaki nga an iya mga panggawi para han babaye diri matadong, ngan kon makusog an iya balatian sanglit maopay nga mag-asawa nala hira, kinahanglan mag-asawa hira. Diri ini sala. Kondi kon an lalaki, ha waray pagpirita, nagdidig-on gud nga diri hiya mangangasawa; kon nakakapugong hiya han iya mga tinguha ngan kon naglarang na hiya kon ano an iya pagbubuhaton, maopay nga diri hiya mangasawa.” (1 Kor. 7:36-38, Maopay nga Sumat) Hi Pablo nagsiring nga an pagin solo an gimaopayi pilion, pero diri la ito an husto nga desisyon.

9. Sadang ba naton tagdon an panhunahuna han iba antes magdesisyon? Isaysay.

⁹ Sadang ba naton tagdon an panhunahuna han iba antes magdesisyon? Ha pipira nga kahimtang. Tigamni an ginsiring ni Pablo mahitungod ha mga pagkaon nga baga hin iginhalad ha mga idolo. Hiya nagsiring nga bangin diri sayop an pagkaon hito, pero makakadaot ito ha maluya an konsensya. Ano an nagin desisyon ni Pablo? “Kon an karne nakakahatag ha akon bugto ha paghipakdol,” siring niya, “diri na gud ako makaon hin karne, basi diri na ako makahatag hin katigayonan ha akon bugto ha paghipakdol.” (1 Kor. 8:4-13) Kinahanglan liwat naton tagdon kon paonan-o maaapektohan han aton mga desisyon an konsensya han iba. Syempre, an pinakaimportante ha aton amo an magigin epekto hito ha aton relasyon kan Jehova. (Basaha an Roma 14:1-4.) Ano nga mga prinsipyo ha Biblia an mabulig ha aton nga maghimo hin mga desisyon nga nagpapasidungog ha Dios?

Unom nga Sadang Buhaton Basi Makahimo hin Mag-opay nga Desisyon

10, 11. (a) Paonan-o naton malilikyan nga magparagbuot ha sulod han pamilya? (b) Ano an sadang hinumdoman han mga tigurang kon naghihimo hin mga desisyon nga nakakaapekto ha kongregasyon?

¹⁰Ayaw pagparagbuot. Antes magdesisyon, kinahanglan pakianhan naton an aton kalugaringon, ‘Ako ba an may katungod ha pagdesisyon hini?’ Hi Hadi Salomon nagsurat: “Kon maabot an palabilabi [o pagparagbuot], dida maabot an pakaalo; kondi an kaupod han mga ubos amo an kinaadman.”—Prob. 11:2.

¹¹ Bangin tugotan han mga kag-anak an ira mga anak nga maghimo hin pipira nga desisyon, kondi an mga anak kinahanglan diri basta na la magdesisyon. (Kol. 3:20) An asawa ngan nanay may awtoridad ha pamilya pero sadang hiya magpasakop ha pagkaulo han iya bana. (Prob. 1:8; 31:10-18; Efe. 5:23) Ha pariho nga paagi, kinahanglan karawaton han bana nga limitado la an iya awtoridad ngan kinahanglan magpasakop hiya kan Kristo. (1 Kor. 11:3) An mga tigurang naghihimo hin mga desisyon nga nakakaapekto ha kongregasyon. Kondi ginsisiguro nira nga ‘diri magtalapas han nahisurat na’ ha Pulong han Dios. (1 Kor. 4:6) Ira liwat ginsusunod hin maopay an instruksyon tikang ha matinumanon nga uripon. (Mat. 24:45-47, NW) Kon sugad, maaramon an pagdesisyon kon gintagan la kita hin katungod ha pagbuhat hito basi malikyan naton an duro nga kabaraka ngan kasubo nga makakaapekto liwat ha iba.

12. (a) Kay ano nga sadang kita magsaliksik? (b) Isaysay kon paonan-o kita magsasaliksik.

 ¹²Pagsaliksik. “An mga hunahuna han maduruto tipakadto la ha kahuraan,” siring ni Salomon, “kondi an tagsa-tagsa nga madinalidalion nagdadagmit la ha kakulangan.” (Prob. 21:5) Pananglitan, gintuturotimbang mo ba an usa nga igintatanyag nga negosyo? Ayaw pagpadaog ha emosyon. Usisaha an ngatanan nga impormasyon mahitungod hito, pangaro hin sagdon ha mga eksperyensyado hito, ngan usisaha an mga prinsipyo ha Biblia nga aplikado hito. (Prob. 20:18) Basi magin organisado an imo pagsaliksik, paghimo hin duha nga listahan, an usa para ha mga bentaha ngan an usa para ha mga disbentaha. Antes magdesisyon, ‘ihapa an magagasto.’ (Luk. 14:28) Tagda an posible magin epekto han imo desisyon diri la ha imo kahimtang ha pinansyal kondi ha imo liwat espirituwalidad. An pagsaliksik nagkikinahanglan hin panahon ngan pangalimbasog. Kondi pinaagi hito malilikyan mo an dinali-dali nga pagdesisyon nga magriresulta hin mga problema.

13. (a) Ano an iginpapasarig ha aton han Jakobo 1:5? (b) Paonan-o an pag-ampo ha pangaro hin kinaadman makakabulig ha aton?

¹³Pag-ampo para hin kinaadman. An aton mga desisyon magpapasidungog la ha Dios kon magpapabulig kita ha iya ha paghimo hito. An disipulo nga hi Jakobo nagsurat: “Kon may-ada ha iyo an nakulang hin kaaram, mangaro hiya ha Dios, nga mahatagon ha ngatanan ngan diri mabadlungon; ngan ito ihatag ha iya.” (Jak. 1:5) Diri makaarawod an pagkarawat nga ginkikinahanglan naton an kinaadman han Dios ha paghimo hin mga desisyon. (Prob. 3:5, 6) Kay ha tinuod la, madali gud kita magsayop kon sumarig kita ha aton kalugaringon nga pagsabot. Kon nag-aampo kita para hin kinaadman ngan ginsasaliksik an mga prinsipyo ha Pulong han Dios, nagpapabulig kita ha baraan nga espiritu nga masabtan an aton tinuod nga motibo kon kay ano nga karuyag naton buhaton an usa nga butang.—Heb. 4:12; basaha an Jakobo 1:22-25.

14. Kay ano nga diri kita sadang maglangan ha pagdesisyon?

¹⁴Pagdesisyon. Ayaw pagdiretso pagdesisyon kon waray ka pa magsaliksik ngan mag-ampo para hin kinaadman. An maaramon naggagahin hin panahon ha ‘pagtan-aw hin maopay ha iya kakadtoan.’ (Prob. 14:15) Kondi ayaw paglangan ha pagdesisyon. An tawo nga pirme naglalangan bangin may diri makatadunganon nga mga pasangil. (Prob. 22:13) Pero ha pagkamatuod, nagdidesisyon gihapon hiya—nga an iba an magkontrol ha iya kinabuhi.

15, 16. Ano an nahiuupod ha pagbuhat han usa nga desisyon?

¹⁵Buhata an imo desisyon. An aton pangalimbasog nga makahimo hin maopay nga desisyon makakawang la kon diri naton ito buhaton. “Bisan ano nga buhat an hiagian han imo kamot, buhata ini ha imo kusog,” siring ni Salomon. (Ekles. 9:10) Basi maglampos, kinahanglan andam kita nga ihatag an ngatanan nga ginkikinahanglan ha pagbuhat han aton desisyon. Pananglitan, an usa nga magwarali bangin nagdesisyon pagpayunir. Maglalampos ba hiya? Oo, kon diri niya tutugotan nga  an sobra nga trabaho ngan kaliawan mag-ubos han iya kusog ngan panahon nga kinahanglan niya gamiton ha ministeryo.

¹⁶ Kasagaran na nga an pinakamaopay nga mga desisyon amo an pinakamakuri buhaton. Kay ano? Tungod kay “an bug-os nga kalibotan kanan kayawan-on.” (1 Juan 5:19) Kinahanglan atohan naton an ‘mga magburuot hinin masirom nga kalibotan ngan an espirituhanon nga kasundalohan han karaotan ha mga langitnon nga lugar.’ (Efe. 6:12) Hi apostol Pablo ngan an disipulo nga hi Judas pariho nag-unabi nga an mga nagdidesisyon nga pasidunggan an Dios may kinahanglan pakig-awayan.—1 Tim. 6:12; Jud. 3.

17. May kalabotan ha aton mga desisyon, ano an ginlalaoman ni Jehova ha aton?

¹⁷Usisaha utro an imo desisyon ngan paghimo hin mga pagbag-o kon kinahanglanon. Diri ngatanan nga desisyon natutuman sugad han aton karuyag. “An panahon ngan an higayon” o diri ginlalaoman nga panhitabo naieksperyensyahan naton ngatanan. (Ekles. 9:11) Bisan pa hito, karuyag ni Jehova nga padayon nga tumanon naton an pipira nga desisyon bisan kon magkaproblema. An pagdedikar kan Jehova o an panumpa ha kasal mga desisyon nga diri puydi bag-uhon. Karuyag han Dios nga tumanon naton an sugad hito nga mga desisyon. (Basaha an Salmo 15:1, 2, 4.) Kondi an kadam-an nga desisyon diri sugad hito kaimportante. Ha panapanahon uusisahon han maaramon nga tawo an iya mga nagin desisyon. Diri niya tutugotan nga an pagpahitaas o katig-a han ulo magpugong ha iya nga bag-uhon o bawion pa ngani an iya desisyon. (Prob. 16:18) An pinakaimportante ha iya amo an pagsiguro nga an iya pagkinabuhi pirme nagpapasidungog ha Dios.

Tutdui an Iba nga Maghimo hin mga Desisyon nga Nagpapasidungog ha Dios

18. Paonan-o matututdoan han mga kag-anak an ira mga anak nga makahimo hin mag-opay nga desisyon?

¹⁸ Daku an mahihimo han mga kag-anak ha pagbulig ha ira mga anak nga mahibaro paghimo hin mga desisyon nga nagpapasidungog ha Dios. Usa han gimaopayi nga paagi han pagtutdo ha ira amo an pagin maopay nga susbaranan. (Luk. 6:40) Kon angayan, puydi isaysay han mga kag-anak ha ira mga anak kon paonan-o hira nagdidesisyon. Puydi liwat nira tugotan an ira mga anak nga maghimo hin mga desisyon para ha ira kalugaringon ngan kumendasyonan hira kon maopay an resulta hito. Kondi ano man kon an anak nakahimo hin sayop nga desisyon? An siyahan nga tendensya han kag-anak bangin amo an pagpanalipod ha iya ha magraot nga resulta hito, kondi an pagbuhat hito bangin diri pirme makakaopay ha iya. Pananglitan, bangin tugotan han kag-anak an iya anak nga kumuha hin lisensya ha pagdrayb. Ano man kon an anak makatalapas hin balaud ha trapiko ngan multahan hiya? Bangin bayaran ito han kag-anak. Pero kon obligaron an anak nga magtrabaho basi mabayaran an multa, posible nga mahibabaro hiya nga maghirot.—Roma 13:4.

19. Ano an sadang naton itutdo ha aton gindudumarahan hin pag-aram ha Biblia, ngan paonan-o naton ito mahihimo?

¹⁹ Ginsugo ni Jesus an iya mga sumurunod nga tutdoan an iba. (Mat. 28:20) Usa han pinakaimportante nga mga leksyon nga maitututdo naton ha aton gindudumarahan hin pag-aram ha Biblia amo an paghimo hin mag-opay nga desisyon. Basi magin epektibo ha pagbuhat hito, kinahanglan likyan naton nga magdesisyon para ha ira. Mas maopay gud nga tutdoan naton hira nga mangatadongan uyon ha mga prinsipyo ha Biblia basi hira mismo an magdesisyon kon ano an bubuhaton. Kay ha pagkamatuod, “an tagsa-tagsa ha aton maghahatag ha Dios hin ihap mahitungod han iya kalugaringon.” (Roma 14:12) Salit kita ngatanan may marig-on nga hinungdan nga maghimo hin mga desisyon nga nagpapasidungog ha Dios.

[Footnote]

Ano an Imo Baton?

• Kay ano nga kinahanglan mahibaro kita pagdesisyon?

• Paonan-o kita bangin maapektohan han kahadlok, ngan paonan-o naton ito malalamposan?

• Ano an unom nga sadang naton buhaton basi masiguro nga an aton desisyon nagpapasidungog ha Dios?

[Mga Pakiana]

[Kahon/Retrato ha pahina 16]

Mga Sadang Buhaton Basi Makahimo hin Mag-opay nga Desisyon

1 Ayaw Pagparagbuot

2 Pagsaliksik

3 Pag-ampo Para hin Kinaadman

4 Pagdesisyon

5 Buhata an Imo Desisyon

6 Usisaha Utro Ngan Bag-oha kon Kinahanglanon

[Retrato ha pahina 15]

An tawo nga diri nakakadesisyon pariho hin sakayan nga waray timon ha mabagyo nga kadagatan