Magkalipay Kita Upod han Kabugtoan!

BAGA hin imposible na yana an pagin malipayon. Damu an nakukurian paghunahuna hin makalilipay o maopay nga mga butang nga maisusumat ha iba. An pagkinabuhi labi na ha dagku nga syudad nagigin hinungdan nga an mga tawo diri na nakikiistorya ha iba ngan karuyag na la mag-usahan.

“Damu na gud yana an naabat nga nag-uusahan,” siring han propesor han Psychobiology nga hi Alberto Oliverio, ngan “waray ruhaduha nga an pagkinabuhi ha dagku nga syudad nakakadugang han pag-abat nga nag-uusahan. Ha damu nga sitwasyon, nagigin hinungdan ito nga balewarayon naton an nahitatabo ha aton katrabaho, amyaw, o ha cashier ha supermarket hirani ha aton.” Ito nga pagbati kasagaran nga nagriresulta hin depresyon.

Kondi diri sugad hito an kahimtang ngan disposisyon han mga Kristiano. Hi apostol Pablo nagsurat: “Magkalipay kamo gihapon.” (1 Tes. 5:16) Damu an aton hinungdan nga magin malipayon ngan magkalipay upod han kabugtoan. Aton ginsisingba an Gihitaasi nga Dios, hi Jehova; nasasabtan naton an mga kamatuoran ha  Biblia; may paglaom kita nga maluwas ngan mabuhi ha waray kataposan; ngan mahimo naton mabuligan an iba nga makarawat liwat ito nga mga bendisyon.—Sal. 106:4, 5; Jer. 15:16; Roma 12:12.

An tinuod nga mga Kristiano nagkakalipay ngan nagsusumat ha ira igkasi-tumuroo han kalipay nga ira inaabat. Salit diri urusahon nga nagsurat hi Pablo ha mga taga-Filipos: “Nagkakalipay ako, ngan malipayon kaupod ha iyo ngatanan: ngan sugad man nagkalipay kamo, ngan maglipay upod ha akon.” (Fil. 2:17, 18) Hinin duha la ka bersikulo, pauroutro nga gin-unabi ni Pablo an pagkalipay upod han usa kag usa.

Syempre, kinahanglan likyan han mga Kristiano an tendensya nga mag-usahan. An bisan hin-o nga nagpapahirayo ha kabugtoan diri malilipay upod ha ira. Salit paonan-o naton masusunod an sagdon ni Pablo nga ‘magkalipay ha Ginoo’ upod han aton kabugtoan?—Fil. 3:1.

Magkalipay Upod han Kabugtoan

Han nagsurat hi Pablo ha mga taga-Filipos, posible nga priso hiya ha Roma tungod han iya pagsangyaw. (Fil. 1:7; 4:22) Pero waray ito makaiban han iya kadasig ha ministeryo. Lugod, nalipay hiya nga mag-alagad kan Jehova tubtob ha iya mahihimo ngan “ighalad” sugad hin halad nga irimnon. (Fil. 2:17) Iginpapakita han disposisyon ni Pablo nga an kalipay diri nadepende ha kahimtang han usa. Bisan kon priso, hiya nagsiring: ‘Magkakalipay ako.’—Fil. 1:18.

Hi Pablo an nag-establisar han kongregasyon ha Filipos ngan hinigugma gud niya an kabugtoan didto. Maaram hiya nga madadasig hira kon isusumat niya ha ira an iya kalipay ha pag-alagad kan Jehova. Salit hiya nagsurat: “Buot ko, mga kabugtoan, nga hibaroan niyo nga an mga bagay nga nanhinabo ha akon nakahimo lugod ha pagpasarang han Maopay nga Sumat; amo in kasugad nga an akon mga gapos nasayoran nga kan Kristo, ha bug-os nga hurukmanan nga Romanhon, ngan ha iba pa man.” (Fil. 1:12, 13) An pagsumat ni Pablo hinin makapadasig nga eksperyensya usa nga paagi han iya pagkalipay upod han kabugtoan. Sigurado nga nalipay liwat an mga taga-Filipos upod ni Pablo. Kondi kinahanglan hinumdoman nira an mga hinungdan han ira kalipay ngan diri manluya tungod kay priso hi Pablo. Lugod, kinahanglan subaron nira an iya disposisyon. (Fil. 1:14; 3:17) Dugang pa, mahimo liwat nira ig-upod pirme hi Pablo ha ira mga pag-ampo ngan buligan hiya ha anoman nga paagi nga ira mahihimo.—Fil. 1:19; 4:14-16.

Iginpapakita ba naton an kalipay nga pariho han iginpakita ni Pablo? Nangangalimbasog ba kita nga hunahunaon an mag-opay nga  nahitatabo ha aton ngan ha aton ministeryo? Kon kaupod naton an kabugtoan, mahimo kita mag-istorya hin mag-opay nga eksperyensya ha ministeryo. Diri na kinahanglan nga magkaada pa kita talagsahon nga eksperyensya antes buhaton ini. Bangin nabuligan naton an iba nga magin interesado ha mensahe han Ginhadian pinaagi hin epektibo nga introduksyon o pangatadongan. Bangin nakaistorya naton hin maopay an usa nga tagbalay mahitungod han usa nga teksto ha Biblia. O bangin nakilala kita ha teritoryo sugad nga Saksi ni Jehova, ngan nagin maopay ito nga pamatuod. An pagsumat han sugad nga mga eksperyensya usa nga paagi nga magkalipay upod han kabugtoan.

Damu han katawohan ni Jehova an nagsakripisyo ngan padayon nga nagsasakripisyo basi maisangyaw an maopay nga sumat. An mga payunir, nagbibiyahe nga paramangno, Bethelite, misyonero, ngan international servant bug-os-panahon nga nag-aalagad ngan malipayon ha pagbuhat hito. Nalilipay ba kita upod ha ira? Kon sugad, ipakita naton nga inaapresyar naton inin hinigugma nga kabugtoan nga ‘nagbubuhat kaupod naton para han ginhadian han Dios.’ (Kol. 4:11, Maopay nga Sumat) Kon nakakaupod naton hira ha mga katirok o ha mga asembleya, mahimo naton hira dasigon. Mahimo liwat naton subaron an ira kadasig. Ngan puydi kita mamiling hin higayon nga mamati ha ira mga eksperyensya ngan makaparig-on nga mga istorya pinaagi ha pag-abiabi ha ira, sugad han pag-imbitar ha ira ha pangaon.—Fil. 4:10.

Magkalipay Upod han mga Naatubang hin Pagsari

An pag-ilob hin pagtimaraot ngan paglampos ha mga pagsari nagparig-on han determinasyon ni Pablo nga magpabilin nga matinumanon kan Jehova. (Kol. 1:24; Jak. 1:2, 3) Maaram hiya nga an kabugtoan ha Filipos posible makaeksperyensya hin pariho nga mga pagsari. Nalipay hiya ha paghunahuna nga pinaagi ha pag-ilob han mga pagsari ha iya, madadasig niya hira. Salit hiya nagsurat: “Ha iyo igintugot tungod kan Kristo, diri la an pagtoo ha iya, kondi an pag-antos man tungod ha iya. Nga may-ada man kamo kasamok nga iyo hinkit-an ha akon, ngan iyo hinbatian nga aadi ha akon.”—Fil. 1:29, 30.

Yana, an mga Kristiano ginkukontra liwat tungod han ira pagsangyaw. An pagkontra usahay madarahog, kondi agsob nga diri. Bangin mahitabo ito pinaagi han buwa nga mga akusasyon han mga apostata, pagkontra han mga kapamilya, ngan pagtamay han mga katrabaho o kaeskwela. Hi Jesus nagpahamangno nga diri kita sadang mahipausa o manluya tungod hini nga mga pagsari. Lugod, mga hinungdan ito ha pagkalipay. Hiya nagsiring: “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit.”—Mat. 5:11, 12.

Diri kita sadang mahadlok kon hinbabaroan naton nga an aton kabugtoan madarahog nga gintitimaraot ha iba nga nasud. Lugod, sadang kita malipay ha ira pagpailob. Mahimo naton hira ig-ampo ngan hangyoon hi Jehova nga parig-unon an ira pagtoo ngan buligan hira nga makailob. (Fil. 1:3, 4) Bisan kon bangin gutiay la an aton maibubulig hito nga hinigugma nga kabugtoan, makakabulig kita ha aton mga kakongregasyon nga nakakaeksperyensya hin mga pagsari. Mahimo kita magpakita hin personal nga interes ha ira ngan buligan hira. Puydi kita mamiling hin mga higayon nga magkalipay upod ha ira pinaagi ha pag-imbitar ha ira nga umapi ha aton Pagsingba han Pamilya ha panapanahon, pakig-upod ha ira ha pagsangyaw, ngan pagpaupod ha ira ha aton pagpahalibway.

Damu an aton hinungdan nga magkalipay upod han kabugtoan! Likyan naton an tendensya han mga tawo ha kalibotan nga mag-usahan ngan padayon nga isumat ha kabugtoan an aton kalipay. Hito nga paagi, makakabulig kita nga makita an gugma ngan pagkaurosa ha kongregasyon ngan bug-os nga mapapahimulosan naton an Kristiano nga pagminagburugto. (Fil. 2:1, 2) Oo, pirme kita ‘magkalipay ha Ginoo,’ kay hi Pablo nag-aghat ha aton: “Liwat masiring ako, Magkalipay kamo.”—Fil. 4:4.

[[Ginkuhaan han Retrato ha pahina 6]

Globo: Ha pagtugot han Replogle Globes