Mga Pakiana Tikang ha mga Magbarasa

Ano an sadang ko buhaton kon may pakiana ako mahitungod ha akon nabasa ha Biblia o kon nagkikinahanglan ako hin sagdon mahitungod ha usa nga problema?

An Proberbios 2:1-5 nag-aaghat ha aton nga pamilngon an pagsabot nga sugad hin namimiling kita hin “tinago nga mga bahandi.” Karuyag sidngon hini nga sadang kita mangalimbasog ha pagbiling hin mga baton ha aton mga pakiana ha Biblia ngan hin mga solusyon ha aton mga problema. Paonan-o naton ito bubuhaton?

Ha pahina 33 tubtob 38 han libro nga Magpahimulos han Edukasyon Tikang ha Teokratiko nga Eskwelahan ha Ministeryo, ginhihisgotan “Kon Paonan-o an Pagsaliksik” gamit an mga publikasyon nga igintatagana han “matinumanon ngan maaramon nga uripon.” (Mat. 24:45, NW) Iginsaysay ha pahina 36 kon paonan-o gagamiton an Watch Tower Publications Index, nga may lista hin mga topiko ngan mga teksto. Puydi ka magsaliksik pinaagi ha pagbiling han mga pulong o han mga teksto, ngan makikita mo an mga reperensya nga bangin naghihisgot han baton ha imo pakiana. Magin mapailubon ha pagbiling han baton o sagdon nga imo ginkikinahanglan. Hinumdumi nga namimiling ka hin “tinago nga mga bahandi,” ngan nagkikinahanglan ito hin panahon ngan pangalimbasog.

Syempre, may mga topiko ngan teksto nga waray hisguti ha aton mga publikasyon. Ngan bisan kon nahisgotan na an usa nga teksto, bangin waray pa mahisguti an imo pakiana mahitungod hito. Sugad man, may mga pakiana kita mahitungod han pipira nga asoy ha Biblia tungod kay may mga detalye nga waray unabiha hito. Salit diri dayon kita makakabiling hin baton ha tagsa nga pakiana nga nabangon. Ha sugad nga kahimtang, diri kita sadang magbanabana hin baton ha mga pakiana nga diri mababaton, kay bangin makigdebate la kita mahitungod ha mga pakiana nga kinahanglan pa saliksikon imbes nga maghatag hin bisan ano tikang ha Dios may kalabotan ha pagtoo. (1 Tim. 1:4; 2 Tim. 2:23; Tito 3:9) Diri mababaton han kabugtoan ha sanga nga opisina o ha sentro nga opisina an mga pakiana nga waray pa hisguti ha aton mga publikasyon. Makakasiguro kita nga an Biblia naghahatag hin igo nga impormasyon basi giyahan kita ha aton pagkinabuhi, kondi may mga detalye nga waray iapi basi magkaada kita higayon nga ipakita an aton marig-on nga pagtoo ha Awtor hito, an Dios.—Kitaa an pahina 185-187 han libro nga Magin Duok kan Jehova.

Ano man kon ginbuhat mo na an ngatanan ha pagsaliksik han usa nga butang nga nakakaapekto ha imo kondi waray mo pa gihapon hiagii an sagdon o solusyon nga imo ginkikinahanglan? Ayaw pag-alang pagdaop ha usa nga hamtong nga bugto, bangin ha usa han mga tigurang ha iyo kongregasyon. Damu an ira kahibaro ha Biblia ngan eksperyensya ha kinabuhi sugad nga Kristiano. An ira timbang nga bulig angayan gud kon nagkikinahanglan ka hin sagdon mahitungod ha imo problema o desisyon, kay hirani la hira ngan nakilala hira ha imo ngan maaram han imo kahimtang. Ngan ayaw hingalimti nga espisipiko nga ig-ampo ito kan Jehova ngan paghangyo nga giyahan niya an imo hunahuna pinaagi han iya baraan nga espiritu, ‘kay hi Jehova nahatag hin kinaadman ngan sarabotan.’—Prob. 2:6; Luk. 11:13.