“Padayon nga Magbantay”—Kay Ano nga Importante Hinduro?

“ANO an tigaman han imo pagkanhi, ngan ha kataposan han kalibotan?” (Mat. 24:3) Ha pagbaton hito nga pakiana, hi Jesus naghatag ha iya mga disipulo hin matin-aw, detalyado, masayon masabtan, ngan diri karuhaduhaan nga tigaman nga mababasa ha Mateo kapitulo 24, Markos kapitulo 13, ngan Lukas kapitulo 21. Hiya dugang nga nagsiring: “Padayon nga magbantay.”—Mat. 24:42, NW.

Kon magigin matin-aw gud an tigaman, kay ano nga ginhatag pa inin dugang nga pahamangno? Tagda an duha nga posible nga hinungdan. Siyahan, may mga butang nga bangin makaaghat ha iba nga igbalewaray an tigaman ngan magresulta hin kadaot han ira espirituwalidad ngan pagin diri mabinantayon. Ikaduha, bangin nakikita han usa nga Kristiano an mga bahin han tigaman pero tungod han iya kahimtang diri hiya naabat nga apektado hiya. Salit bangin mangatadongan hiya nga maiha pa an “daku nga kagol-anan,” an kataposan han tagna ni Jesus, ngan diri pa kinahanglan nga “padayon nga magbantay.”—Mat. 24:21.

Ginbalewaray Nira Ito

Ginpahinumdoman ni Jesus an iya mga sumurunod mahitungod han mga tawo ha panahon ni Noe. Sigurado nga nakita nira an pagsangyaw ni Noe, an paghimo han daku hinduro nga arka, ngan an kamadarahog nga kalyap hito nga panahon. Kondi kadam-an ha ira an nagbalewaray hito. (Mat. 24:37-39) Sugad liwat hito an pagtagad han kadam-an yana ha mga pahamangno. Pananglitan, matin-aw an mensahe han speed-limit nga mga karatola, pero damu la gihapon an diri nasunod hito. Kasagaran na nga nagbubutang an mga awtoridad hin mga hump ha mga kalsada ha syudad basi mapiritan an mga drayber nga magminor. Ha pariho nga paagi, bangin maaram an usa nga Kristiano han tigaman han kataposan nga mga adlaw kondi nakikigbahin la gihap hiya ha mga buruhaton nga makakaulang ha iya ha pagin mabinantayon. Nahitabo ini kan Arielle, usa nga tin-edyer ha Weste nga Aprika.

Hi Arielle mahilig magkita ha TV hin isport nga women’s handball. Han nagporma hin team an ira eskwelahan, nagkaada hiya oportunidad nga makaapi salit nabalewaray niya an posible magin peligro hito ha iya espirituwalidad. Inapi hiya sugad nga goalkeeper. Ano an nahitabo? Hiya nagsiring: “An iba han akon ka-team may mga uyab nga nagdudroga ngan nagsisigarilyo. Gintinawaan nira ako kay iba ako ha ira, pero naghunahuna ako nga diri nira ako maiimpluwensyahan. Waray ko laumi nga an isport an makakadaot han akon espirituwalidad. Dida na nakasentro an akon hunahuna ngan kasingkasing. Durante han mga katirok, kasagaran na nga diri ako nakakapokus kay an pag-uyag an akon nahuhunahuna. Naapektohan liwat an akon personalidad sugad nga Kristiano. An akon hilig ha pag-uyag nagin duro nga hingyap nga magdaog. Naniguro ako pagpraktis basi matuman ito nga akon hingyap. Nagtikaduro an akon stress. Nagin mas importante ha akon an handball kay han akon kasangkayan.

“Pinakagrabe an nahitabo ha usa han amon mga uyag. Han an amon kakontra nga team  gintagan hin penalty shot, ako an bantay basi diri makasulod ha goal an bola. Tigda ako nga nag-ampo kan Jehova nga unta masagang ko an bola! Dida hito nasantop ko nga nadaot na gud an akon espirituwalidad. Paonan-o ko ito naibalik?

“Nakita ko na hadto an aton DVD nga Young People Ask—What Will I Do With My Life? * Nagdesisyon ako nga kitaon ito utro ngan pamalandungon. Kay kon huhunahunaon, pariho an amon kahimtang ni André, an batan-on ha drama. Gintigamnan ko labi na an iginsuhestyon han usa nga tigurang nga buhaton ni André—basahon ngan pamalandungon an Filipos 3:8. Ito an nakabulig ha akon nga bumaya ha team.

“Daku gud an nabag-o ha akon! Nawara an akon hilig ha pakigkompetensya ngan an stress nga resulta hito. Nagin mas malipayon ako ngan mas duok ha kabugtoan. Mas ginpabilhan ko na an espirituwal nga mga buruhaton. Atentibo na ako ha mga katirok ngan naapresyar ko na liwat ito. Nag-uswag liwat an akon ministeryo. Yana padayon ako nga auxiliary payunir.”

Kon may mga butang nga nakakaaghat ha imo nga igbalewaray an tigaman nga gin-unabi ni Jesus, pangalimbasog gud nga bayaan ito, sugad han ginbuhat ni Arielle. Ini an puydi mo buhaton. Kitaa an Watch Tower Publications Index, nga gintatawag nga mapa han tinago nga mga bahandi. Mabibilngan mo an mga reperensya diin mababasa an maaramon nga mga sagdon ngan mga eksperyensya kon paonan-o nalamposan han iba an mga pagsulay. Bug-os nga pahimulusi an mga katirok pinaagi ha pagpangandam hin maopay ngan pagsurat han importante nga mga punto. Naobserbaran han iba nga nakakabulig an paglingkod ha prente. Kon may pakigbahin han mamarati, pangalimbasog nga magkomento dayon. Dugang pa, magpabilin nga nagmamata ha espirituwal pinaagi ha pag-obserbar han bag-o nga mga panhitabo ngan pagtanding hito ha mga bahin han tigaman ngan iba pa nga pangirilal-an han “kataposan nga mga adlaw.”—2 Tim. 3:1-5; 2 Ped. 3:3, 4; Pah. 6:1-8.

‘Mag-andam Kamo’

An tigaman han kataposan nga mga adlaw nakikita ha “bug-os nga kalibotan.” (Mat. 24:7, 14) Minilyon an naukoy ha mga lugar nga apektado han epidemya, kakulang hin pagkaon, mga linog, ngan iba pa nga igintagna nga panhitabo. Ha luyo nga bahin, damu an naukoy ha mamurayawon nga mga lugar. Kon waray ka pa makaeksperyensya han iba nga bahin han tigaman, sadang ka ba maghunahuna nga maiha pa an daku nga kagol-anan? Diri gud ito maaramon.

Pananglitan, pamalandonga an igintagna ni Jesus mahitungod han “mga gutom, ngan mga peste.” (Luk. 21:11; Maopay nga Sumat) Siyahan, waray hiya magsiring nga durungan ito nga mahitatabo ha ngatanan nga lugar o parapriho an magigin epekto hito. Lugod, nagsiring hiya nga mahitatabo ito ha “magkadurodilain nga mga lugar.” Salit diri kita makakalaom nga parapriho an mahitatabo ha ngatanan nga lugar ha pariho nga panahon. Ikaduha, waray pag-iha katapos unabihon ni Jesus an mga gutom, nagsiring hiya nga an iba han iya mga sumurunod sadang mag-ikmat nga diri magkinaon hin sobra: “Pagbantay kamo! Ayaw itugot nga magpatakas kamo hin pagkinaon.” (Luk. 21:34, Maopay nga Sumat) Salit diri sadang hunahunaon han ngatanan nga Kristiano nga maieksperyensyahan nira an tagsa nga bahin han tigaman. Lugod, hi Jesus nagsiring: “Kon  kamo kumita hini nga mga bagay nga mahinabo, hibabaroan niyo nga an ginhadian han Dios tikahirani.” (Luk. 21:31) Anoman an kahimtang ha aton lugar, mahimo naton makita an ngatanan nga bahin han tigaman pinaagi han moderno nga komunikasyon.

Hinumdumi liwat nga hi Jehova may itinanda na nga “adlaw ngan oras” ha pag-abot han daku nga kagol-anan. (Mat. 24:36) Ito nga petsa diri mababag-o han mga panhitabo ha kalibotan.

Hi Jesus nagsagdon ha ngatanan nga Kristiano: ‘Mag-andam kamo.’ (Mat. 24:44) Kinahanglan pirme kita andam. Syempre, diri naton mahihimo nga ha kada adlaw bug-os nga adlaw kita makikigbahin ha teokratiko nga mga buruhaton. Labot pa, waray bisan hin-o ha aton an maaram kon ano an aton ginhihimo ha pag-abot han daku nga kagol-anan. An iba bangin nagtatrabaho ha uma o ha balay. (Mat. 24:40, 41) Salit ano an aton bubuhaton basi magin andam?

Hira Emmanuel ngan Victorine ngan an ira unom nga anak nga babaye naukoy ha usa nga lugar ha Aprika nga diri duro nga naaapektohan han ngatanan nga bahin han tigaman. Salit nagdesisyon hira nga maghisgot hin espirituwal nga mga butang kada adlaw basi mabuligan hira nga magin andam. Hi Emmanuel nagsiring: “Makuri an pagbiling hin panahon nga kombinyente ha ngatanan. Ha urhi nagkaurosa kami nga buhaton ito tikang ha alas–6:00 tubtob alas–6:30 ha aga. Katapos hisgotan an inadlaw nga teksto, gin-aadman namon an pipira nga parapo han usa nga publikasyon nga pag-aadman ha kongregasyon hito nga semana.” Nakabulig ba ini ha ira nga magpabilin nga nagmamata? Oo! Hi Emmanuel koordinetor han lawas han mga tigurang ha ira kongregasyon. Hi Victorine agsob mag-auxiliary payunir ngan damu an iya nabuligan nga kumarawat han kamatuoran. An ira mga anak aktibo liwat ha pag-alagad.

Hi Jesus nagsagdon ha aton: “Pagmatngon kamo, ngan pag-agma.” (Mar. 13:33) Ayaw tuguti nga may makaulang ha imo ha pagin mabinantayon ha espirituwal. Lugod, tigamni an mag-opay nga sagdon ha aton mga publikasyon ngan ha mga katirok, sugad han ginbuhat ni Arielle. Pariho han pamilya ni Emmanuel, pangalimbasugi nga kada adlaw may buhaton kamo nga mabulig ha iyo nga magin andam ngan “padayon nga magbantay.”

[Footnote]

[Retrato ha pahina 4]

An paghisgot hin espirituwal nga mga butang kada adlaw nakakabulig kan Emmanuel ngan ha iya pamilya nga ‘magin andam’