An “Uusa La nga Jehova” Nagtitirok han Iya Pamilya

‘Ako nanginginyupo ha iyo nga bantayan an pagkaurosa han espiritu.’—EFE. 4:1, 3.

PAONAN-O MO ISASAYSAY?

Ano an katuyoan han administrasyon han Dios?

Paonan-o naton ‘ginbabantayan an pagkaurosa han espiritu’?

Ano an mabulig ha aton nga “magmalolooyon,” o magin buotan ha usa kag usa?

1, 2. Ano an katuyoan ni Jehova para ha tuna ngan ha katawohan?

 PAMILYA. Ano an imo nahuhunahuna kon nababatian mo ito nga pulong? Gugma? Kalipay? Pagbuhat nga nagkakaurosa basi makab-ot an usa nga tumong? Usa nga talwas nga lugar diin magdadaku, mahibabaro, ngan magbabalyoay hin mga ideya? Bangin ito an imo mahunahuna kon bahin ka han usa nga mahigugmaon nga pamilya. Hi Jehova an gintikangan han pamilya. (Efe. 3:14, 15) Katuyoan niya nga an ngatanan niya nga linarang ha langit ngan tuna maabat nga talwas, masarig ha usa kag usa, ngan tinuod nga magkakaurosa.

² Katapos makasala an mga tawo, diri na hira bahin han pamilya han Dios. Kondi waray mabag-o an katuyoan ni Jehova. Sisiguruhon niya nga an Paraiso nga tuna mapupuno han mga anak nira Adan ngan Eva. (Gen. 1:28; Isa. 45:18) Igin-andam niya an ngatanan nga ginkikinahanglan basi masiguro nga matuman an iya katuyoan. An pipira hito ginpapabug-atan ha Biblia ha libro han Efeso, nga an tema mahitungod han pagkaurosa. Aton hisgotan an pipira nga bersikulo hito nga libro basi hibaroan kon paonan-o kita makikigkooperar ha katuyoan ni Jehova nga pag-urusahon an iya mga linarang.

AN ADMINISTRASYON NGAN AN GINBUBUHAT HITO

3. Ano an administrasyon han Dios nga gin-unabi ha Efeso 1:10, ngan kakan-o nagtikang an siyahan nga bahin hito?

³ Hi Moises nagsiring ha mga Israelita: “Hi Jehova nga aton Dios, uusa la nga Jehova.” (Deut. 6:4) An ngatanan nga ginbubuhat ni Jehova nasuporta ha iya katuyoan. Salit ha “kabug-osan han panahon,” an Dios nagtikang pagpatuman han usa nga “pagkatinugyanan” o administrasyon—usa nga kahikayan basi pag-urusahon an ngatanan nga iya intelihente nga linarang. (Basaha an Efeso 1:8-10.) Ini nga administrasyon may duha nga bahin. Siyahan,  igin-aandam han Dios an kongregasyon han mga dinihogan para ha kinabuhi ha langit, ha pagpanguna ni Jesu-Kristo sugad nga ira Ulo. Nagtikang ini han Pentekostes 33 C.E. han gintikangan ni Jehova an pagtirok han mga magmamando kaupod ni Kristo ha langit. (Buh. 2:1-4) Tungod kay an mga dinihogan iginpahayag nga matadong para ha kinabuhi pinaagi han halad lukat ni Kristo, maaram hira nga gin-ampon hira sugad nga ‘mga anak han Dios.’—Roma 3:23, 24; 5:1; 8:15-17.

4, 5. Ano an ikaduha nga bahin nga iginpapatuman han administrasyon?

⁴ Ikaduha, igin-aandam han Dios an mga maukoy ha Paraiso nga tuna sugad nga sakop han Mesianiko nga Ginhadian ni Kristo. An daku nga panon an siyahan nga maukoy ha Paraiso. (Pah. 7:9, 13-17; 21:1-5) Durante han Usa ka Yukot ka Tuig nga Pagmando, makakaupod nira an binilyon nga binanhaw. (Pah. 20:12, 13) Hunahunaa kon paonan-o mas makikita ha pagkabanhaw an aton pagkaurosa! Ha kataposan han usa ka yukot ka tuig, an ‘mga bagay ha tuna’ makakaeksperyensya han ultimo nga pagsari. Adton magpapabilin nga matinumanon aampunon sugad nga ‘mga anak han Dios’ dinhi ha tuna.—Roma 8:21; Pah. 20:7, 8.

⁵ An duha nga bahin han administrasyon han Dios padayon nga iginpapatuman yana ha langit ngan ha tuna. Kondi sugad nga indibiduwal, paonan-o kita makikigkooperar ha administrasyon han Dios?

‘BANTAYI AN PAGKAUROSA HAN ESPIRITU’

6. Paonan-o iginpapakita han Kasuratan nga an mga Kristiano kinahanglan magturotarampo?

⁶ An Kasuratan nasiring nga an mga Kristiano sadang magturotarampo. (1 Kor. 14:23; Heb. 10:24, 25) Diri ito basta pag-urupod la ha usa nga lugar sugad han ginbubuhat han mga tawo nga napakadto ha merkado o ha usa nga istadyum. Labaw pa hito an nahiuupod ha tinuod nga pagkaurosa. Nagkakaurosa kita kon gin-aaplikar naton an mga instruksyon ni Jehova ngan ginkakarawat an bulig han iya baraan nga espiritu basi magin mas maopay kita nga tawo.

7. Paonan-o naton iaaplikar an sagdon nga ‘bantayan an pagkaurosa han espiritu’?

⁷ Bisan kon iginpahayag na ni Jehova nga matadong an mga dinihogan sugad nga mga anak ngan an iba nga mga karnero sugad nga sangkay pinaagi han halad lukat ni Kristo, magkakaada pa gihapon diri pagsinabtanay tubtob nga nagkikinabuhi pa kita hini nga sistema. (Roma 5:9; Jak. 2:23) Kay kon waray, diri na unta kita kinahanglan sagdonan han Biblia nga padayon nga ‘mag-inantosay ha usa kag usa.’ Paonan-o kita magkakaurosa? Kinahanglan magkaada kita “bug-os nga pagpaubos ngan pagkaaghop.” Dugang pa, gin-aaghat kita ni Pablo nga pangalimbasogan gud nga ‘bantayan an pagkaurosa han espiritu ha gapos han kamurayawan.’ (Basaha an Efeso 4:1-3.) An pag-aplikar hini nga sagdon nag-uupod han pagsunod ha giya han espiritu han Dios ngan pagkarawat han bulig hito basi maipakita naton an bunga hito. Ito nga bunga nakakabulig ha pagsulbad han mga diri pagsinabtanay, nga kabaliktaran han mga buhat han unod nga pirme nagigin hinungdan han pagkabahin-bahin.

8. Paonan-o an “mga buhat han unod” nagriresulta hin pagkabahin-bahin?

⁸ Tagda kon paonan-o an “mga buhat han unod” nagriresulta hin pagkabahin-bahin. (Basaha an Galasia 5:19-21.) An nagbubuhat hin pornikasyon nahibubulag kan Jehova ngan ha kongregasyon. An pag-adulteryo nagriresulta hin duro nga kasakit ha pamilya ngan iginbubulag hito an mga anak ha ira mga kag-anak ngan an inosente nga padis ha iya bana o asawa. An kahugawan nakakaapekto han pakighiusa han usa nga indibiduwal ha Dios ngan han iya relasyon ha mga nahigugma ha iya. Maaram kita nga kon karuyag naton pagdugkuton an duha nga butang, kinahanglan pariho ito malimpyo basi dumukot ha usa kag usa. An waray awod nga panggawi nagpapakita hin bug-os nga pagbalewaray  han matadong nga mga balaud han Dios. An iba pa nga mga buhat han unod nagbubulag han mga tawo ha usa kag usa ngan ha Dios. Ito nga mga buhat diri gud uyon ha personalidad ni Jehova.

9. Paonan-o naton uusisahon an aton kalugaringon kon kita ba ‘nagtitinguha ha pagbantay ha pagkaurosa han espiritu’?

⁹ Salit sadang pakianhan han tagsa ha aton an aton kalugaringon: ‘Nangangalimbasog gud ba ako nga “bantayan an pagkaurosa han espiritu ha gapos han kamurayawan”? Ano an akon reaksyon kon may mga problema? Iginsusumat ko ba ito ha damu han akon kasangkayan ha paglaom nga maugop hira ha akon? Naglalaom ba ako nga an mga tigurang an magsusulbad han akon problema imbes nga ako an mangalimbasog gud nga makigmurayaw? Ngan kon maaram ako nga an usa nga bugto may nadidirian ha akon, ginlilikyan ko ba hiya basi diri namon maistoryahan an problema?’ An sugad ba nga mga buhat nagpapakita nga nagios kita uyon ha katuyoan ni Jehova nga pag-urusahon utro an ngatanan sugad nga pamilya nga ginmamandoan ni Kristo?

10, 11. (a) Ano kaimportante an pakigmurayaw ha aton kabugtoan? (b) Ano nga mga buhat an nagriresulta hin kamurayawan ngan bendisyon ni Jehova?

¹⁰ Hi Jesus nagsiring: “Busa, kon ikaw magdadara han imo halad ha halaran, ngan mahinumdom ka, nga an imo bugto may gutiay nga butang kontra ha imo. Bayai didto an imo halad ha atubangan han halaran, ngan lakat pakighiuli siyahan ha imo bugto, ngan niyan balik, ngan paghalad han imo halad. Umuyon ka ha kadagmitan.” (Mat. 5:23-25) Hi Jakobo nagsurat nga “an bunga han katadongan iginsabwag ha kamurayawan tungod ha ira nga magbuhat hin kamurayawan.” (Jak. 3:17, 18) Kon sugad, diri naton matitipigan an matadong nga panggawi kon waray kamurayawan.

¹¹ Ha pag-ilustrar, ha mga nasud nga nagkaada mga girra, ginbabanabana nga 35 porsyento nga tuna an puydi unta umhan kon diri la nababaraka an mga umurukoy nga mabuthan han mga bomba nga nakalubong ha tuna. Kon an usa nga bomba nabuto, ginbabayaan han mga parauma an uma, an mga tawo nawawarayan hin pakabuhi, ngan nagkukulang an suplay hin pagkaon ha mga syudad. Ha pariho nga paagi, napupugngan an aton pag-uswag ha espirituwal kon may mga kinaiya kita nga nagigin hinungdan nga nakukurian kita ha pakigmurayaw ha aton kabugtoan. Pero kon nagpapasaylo dayon kita ngan nagios para ha kaopayan han iba, magkakaada kita kamurayawan ngan bibendisyonan kita ni Jehova.

12. Paonan-o kita mabubuligan han mga tigurang nga magkaurosa?

¹² Dugang pa, an regalo nga kalalakin-an nabulig liwat ha aton nga ‘makadangat ha pagkaurosa han pagtoo.’ (Efe. 4:8, 13) Kon an mga tigurang nakikig-upod ha aton ha mga buruhaton ha pag-alagad kan Jehova ngan naghahatag hin  mga sagdon nga basado ha Biblia, ginbubuligan kita nira nga mag-uswag ha pagkaada bag-o nga personalidad. (Efe. 4:22-24) Nakikita mo ba ha ira mga sagdon an pangalimbasog ni Jehova nga iandam ka ha kinabuhi ha bag-o nga kalibotan ilarom han pagmando han iya Anak? Mga tigurang, ito ba an iyo motibo kon nangangalimbasog kamo nga tadungon an iba?—Gal. 6:1.

“MAGMALOLOOYON KAMO AN USA KAG USA”

13. Ano an magigin resulta kon diri naton sundon an sagdon ha Efeso 4:25-32?

¹³ Gin-unabi ha Efeso 4:25-29 an mga panggawi nga sadang naton likyan. Upod hini an pagbuwa, kasina o kahubya, ngan pagyakan hin malaw-ay nga mga pulong imbes han mag-opay ngan makaparig-on nga mga pulong. Kon an usa diri sumunod hini nga sagdon, mapapasubo niya an espiritu han Dios, kay an baraan nga espiritu nag-aaghat hin pagkaurosa. (Efe. 4:30) Basi magkaada kamurayawan ngan pagkaurosa, kinahanglan iaplikar liwat naton an sunod nga iginsurat ni Pablo: “An ngatanan nga kapaitan, ngan kangalas, ngan kasina, ngan pagbusa, ngan paglibak ngan an ngatanan nga maraot ipahirayo ha iyo: ngan magmalolooyon kamo an usa kag usa, magmahumok an iyo kasingkasing, magpinasayloay kamo an usa kag usa, sugad nga ginpasaylo man kamo han Dios pinaagi kan Kristo.”—Efe. 4:31, 32.

14. (a) Ano an iginpapasabot han pulong nga “magmalolooyon,” o magin buotan? (b) Ano an mabulig ha aton nga magin buotan?

¹⁴ An mga pulong nga “magmalolooyon,” o magin buotan, nangangahulogan nga bangin may mga panahon nga waray kita magin buotan ngan bangin kinahanglan may pauswagon kita hito nga bahin. Angayan gud nga bansayon naton an aton kalugaringon nga unahon paghunahuna an pagbati han iba kay han aton kalugaringon! (Fil. 2:4) Bangin may karuyag kita iyakan nga makakatawa an iba o magpapakita nga baga hin baltok kita, pero magpapakita ba ito hin pagkabuotan? Kon maghunahuna anay kita antes magyakan, makakabulig ito ha aton nga magin buotan.

MAHIBARO HA PAGPAKITA HIN GUGMA NGAN PAGTAHOD DIDA HA PAMILYA

15. Ano nga bahin han pagtratar ni Kristo ha kongregasyon an gintutudlok ni Pablo ha Efeso 5:28?

¹⁵ Iginpariho han Biblia an relasyon ni Kristo ha kongregasyon ha relasyon han bana ha iya asawa. Ginpapabug-atan hini nga kinahanglan giyahan, higugmaon, ngan mangnoan han bana an iya asawa ngan an asawa kinahanglan magpasakop ha iya bana. (Efe. 5:22-33) Han hi Pablo nagsurat: “Sugad man an mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas,” ano an iya karuyag sidngon ha pagsiring nga “sugad man”? (Efe. 5:28) An iya nahiuna nga mga pulong nag-unabi han paagi nga ‘hi Kristo naghigugma ha singbahan ngan igintubyan an iya kalugaringon tungod hito, ginlinisan ito pinaagi han paglaba ha tubig tungod ha pulong.’ Oo, basi makigkooperar ha katuyoan ni Jehova nga pag-urusahon an ngatanan sugad nga pamilya nga ginmamandoan ni Kristo, kinahanglan buligan han usa nga bana an tagsa nga membro han iya pamilya nga magkaada maopay nga relasyon kan Jehova.

16. Ano an resulta kon gintutuman han mga kag-anak an mga responsabilidad nga hatag ha ira ni Jehova?

¹⁶ Sadang hinumdoman han mga kag-anak nga an pagmangno han ira mga anak responsabilidad nga hatag ha ira ni Jehova. Makasurubo nga damu ha kalibotan yana an “waray gugma nga kinaiya.” (2 Tim. 3:1, 3) Damu nga amay an nagpapasibaya han ira mga responsabilidad, ngan nakakapasubo ini ngan may maraot nga epekto ha ira mga anak. Kondi hi Pablo nagsagdon ha Kristiano nga mga amay: “Diri niyo pag-aghaton ha kasina an iyo mga anak: kondi aghata hira ha pagturon-an ngan paglaygay han Ginoo.” (Efe. 6:4) Diri ba ha pamilya siyahan nga nahibabaro an kabataan mahitungod han gugma ngan pagtahod ha awtoridad?  An mga kag-anak nga malampuson nga nagtutdo hini ha ira mga anak nakikigkooperar ha administrasyon ni Jehova. Kon ha aton panimalay iginpapakita naton an gugma ngan ginlilikyan an kasina, kangalas, ngan nakakasakit nga mga pulong, gintututdoan naton an aton mga anak hin importante nga mga leksyon kon paonan-o ipapakita an gugma ngan pagtahod ha awtoridad. Maiaandam hira hini para ha kinabuhi ha bag-o nga kalibotan han Dios.

17. Ano an ginkikinahanglan basi makaato kita ha Yawa?

¹⁷ Kinahanglan naton masabtan nga an Yawa, an siyahan nga hinungdan nga nawara an kamurayawan ha uniberso, makontra gud ha aton pangalimbasog ha pagbuhat han kaburut-on han Dios. Sigurado nga natutuman an karuyag ni Satanas samtang nagtitikadamu an nagdidiborsyo, naglulungon nga diri kasal, ngan nauyon ha pagpakasal han mga homoseksuwal. Diri naton ginsusubad an panggawi o disposisyon nga kinakarawat ha kalibotan yana. Hi Kristo an aton ginsusubad. (Efe. 4:17-21) Salit ginsasagdonan kita nga ‘isul-ot an bug-os nga hinganiban han Dios’ basi magmalampuson ha pag-ato ha Yawa ngan ha iya mga demonyo.—Basaha an Efeso 6:10-13.

“MANGGAWI KAMO HA GUGMA”

18. Ano an ginkikinahanglan basi kita magkaurosa?

¹⁸ Basi magkaurosa kita, ginkikinahanglan an gugma. Tungod kay an aton kasingkasing puno hin gugma ha aton “usa nga Ginoo,” ha aton “usa nga Dios,” ngan ha usa kag usa, determinado kita nga ‘bantayan an pagkaurosa han espiritu ha gapos han kamurayawan.’ (Efe. 4:3-6) Hi Jesus nag-ampo mahitungod han sugad hito nga gugma: “Diri ako nag-aampo tungod hini la, kondi tungod hadton nagtotoo ha akon pinaagi ha ira pulong; basi hira ngatanan magkaurosa; nga sugad man ikaw, Amay, aadi ha akon, ngan ako ha imo, basi man hira magkaurosa dinhi ha aton . . . Ngan akon iginpakilala ha ira an imo ngaran, ngan akon pa ipinakikilala: basi an higugma nga imo ihinihigugma ha akon, maira, ngan ako ha ira.”—Juan 17:20, 21, 26.

19. Ano an imo determinasyon?

¹⁹ Kon may-ada kita kinaiya nga makuri bag-uhon, hinaot mapagios kita han gugma nga mag-ampo sugad han igin-ampo han salmista: “Pag-usaa an akon kasingkasing ha kahadlok han imo ngaran.” (Sal. 86:11) Magin determinado kita nga atohan an pangalimbasog han Yawa nga ibulag kita ha aton mahigugmaon nga Amay ngan ha aton kabugtoan. Mangalimbasog gud kita nga ‘magsubad ha Dios sugad ha mga hinigugma nga anak, ngan manggawi ha gugma’—ha pamilya, ha ministeryo, ngan ha kongregasyon.—Efe. 5:1, 2.

[Mga Pakiana]

[Retrato ha pahina 29]

Iya ginbayaan an iya halad ha altar ngan linakat basi makigmurayaw ha iya bugto

[Retrato ha pahina 31]

Mga kag-anak, tutdui an iyo mga anak nga magpakita hin pagtahod