“Hin-o ba an Akon Kahahadlokan?”
“Hin-o ba an Akon Kahahadlokan?”
“Bisan an away an tumindog kontra ha akon, dida hito marig-on ako.”—SAL. 27:3.
SUMALA HA MASUNOD NGA MGA TEKSTO, ANO AN MAKAKABULIG HA IMO NGA MAGKAADA KAISOG?
1. Ano nga mga pakiana an aton mababaton ha bulig han Salmo 27?
KAY ano nga nag-uuswag an aton pagsangyaw nga buruhaton bisan kon nagtitikaraot an kahimtang han kalibotan? Kay ano nga malipayon nga ginagamit naton an daku nga panahon ngan kusog ha pagsangyaw bisan kon may dagku nga problema ha ekonomiya? Paonan-o kita makakapabilin nga maisugon bisan kon damu an nahahadlok han mahitatabo ha tidaraon? An kanta ni Hadi David nga nakarekord ha Salmo 27 naghahatag han baton hini nga mga pakiana.
2. Ano an mahimo mahitabo ha usa tungod han duro nga kahadlok, kondi ha ano kita makakasiguro?
2 Gintikangan ni David ini nga salmo pinaagi hini nga mga pulong: “Hi Jehova amo an akon kalamragan ngan akon kaluwasan; hin-o ba an akon kahahadlokan? Hi Jehova amo an kabaskogan han akon kinabuhi; hin-o ba an akon kahahadlokan?” (Sal. 27:1) An duro nga kahadlok mahimo makapaluya gud ha usa ka tawo ngan waray na hiya nahihimo. Kondi an tawo nga nasarig kan Jehova may kaisog ngan diri nahahadlok. (1 Ped. 3:14) Kon ginhihimo naton hi Jehova nga aton arayopan, “magpupuyo [kita] ha marig-on, ngan magmamamingaw ha waray kahadlok han karaotan.” (Prob. 1:33; 3:25) Kay ano?
“HI JEHOVA AMO AN AKON KALAMRAGAN NGAN AKON KALUWASAN”
3. Ha ano nga paagi hi Jehova an aton kalamrag, kondi ano an sadang naton buhaton?
3 An metapora nga “hi Jehova amo an akon kalamragan” nagpapabug-at han kamatuoran nga gintatalwas kita ni Jehova ha kawaray sarabotan ngan espirituwal nga kasisidman. (Sal. 27:1) An literal nga kalamrag mahimo magpakita han usa nga peligro o ulang ha aton agian kondi diri nagkukuha hito. Kinahanglan likyan naton an peligro. Ha pariho nga paagi, iginsusumat ha aton ni Jehova an kahulogan han mga nahitatabo ha kalibotan. Ginpapahamangnoan liwat kita niya han mga peligro hinin maraot nga sistema. Nagtatagana hiya hin mga prinsipyo ha Biblia nga pirme mapulsanon, kondi kinahanglan iaplikar naton an aton nahibabaroan. Kon bubuhaton naton ito, magigin maaramon kita pariho han salmista nga nagin ‘makinaadmananon kapin pa ha iya mga kaaway’ ngan ‘kapin pa nga nasabot kay han iya mga magturutdo.’—Sal. 119:98, 99, 130.
4. (a) Kay ano nga may pagsarig nga nakasiring hi David: “Hi Jehova amo an akon . . . kaluwasan”? (b) San-o labi na nga luluwason ni Jehova an iya mga surugoon?
4 An mga pulong ni David ha Salmo 27:1 nagpapakita nga sigurado nga nahinumdoman niya an mga pagluwas ni Jehova ha iya han naglabay. Pananglitan, ginluwas hiya ni Jehova “tikang ha kulo han leon, ngan tikang ha kulo han oso.” Ginbuligan liwat hiya ni Jehova nga pirdihon an higante nga hi Goliat. Ha urhi, makapira magsari hi Hadi Saul nga patayon hi David pinaagi hin bangkaw, pero ha tagsa hito nga higayon ginluwas hiya ni Jehova. (1 Sam. 17:37, 49, 50; 18:11, 12; 19:10) Salit diri urusahon nga may pagsarig nga nakasiring hi David: “Hi Jehova amo an akon . . . kaluwasan”! Sugad la nga ginluwas ni Jehova hi David, luluwason liwat Niya an Iya mga surugoon. Paonan-o? Pinaagi ha pagluwas ha ira ha tiarabot nga “daku nga kagol-anan.”—Pah. 7:14; 2 Ped. 2:9.
HINUMDUMI AN TAGSA NGA HIGAYON NGA GINBULIGAN KA NI JEHOVA
5, 6. (a) Paonan-o an paghinumdom han aton mga eksperyensya nabulig ha aton nga magin mas maisugon? (b) Paonan-o an mga asoy mahitungod han pagbulig ni Jehova ha iya katawohan ha naglabay nakakahatag ha imo hin dugang nga kaisog?
5 An usa nga makakabulig gud ha aton nga magin maisugon gin-unabi ha Salmo 27:2, 3. (Basaha.) Nahinumdoman ni David an mga hitabo diin nakatalwas hiya ha bulig ni Jehova. (1 Sam. 17:34-37) An paghinumdom hito nakabulig ha iya nga magin maisugon ha pag-atubang han pinakamakuri nga mga kahimtang. An paghinumdom ba han imo mga eksperyensya nakakabulig liwat ha imo nga magin maisugon? Pananglitan, nag-inampo ka ba mahitungod han usa nga mabug-at nga problema ngan katapos hito nakita mo kon paonan-o ka ginhatagan ni Jehova hin kinaadman o kusog basi mailob ito? O nahinunumdoman mo ba kon paonan-o mo nalamposan an mga ulang ha imo malipayon nga pag-alagad o kon paonan-o gin-abrihan ha imo an “daku nga ganghaan” ha pag-alagad kan Jehova? (1 Kor. 16:9) Ano an epekto ha imo yana han paghinumdom hito nga mga eksperyensya? Diri ba padayon nga nakukombinse ka nga mabubuligan ka ni Jehova nga malamposan o mailob an mas makuri pa nga mga ulang o kakurian?—Roma 5:3-5.
6 Ano man kon may gamhanan nga gobyerno nga magplano pagpoo ha mga Saksi ni Jehova sugad nga organisasyon? Ha moderno nga panahon damu an nagsari pagbuhat hito pero waray maglampos. An paghinumdom kon paonan-o ginbuligan ni Jehova an iya katawohan ha naglabay mabulig ha aton nga magin maisugon ha pag-atubang han tidaraon.—Dan. 3:28.
HIGUGMAA AN TINUOD NGA PAGSINGBA
7, 8. (a) Sumala ha Salmo 27:4, ano an ginhangyo ni David kan Jehova? (b) Ano an daku nga espirituwal nga templo ni Jehova, ngan paonan-o kita nagsisingba dinhi hini nga templo?
7 Usa pa nga makakabulig ha aton nga magin maisugon amo an aton gugma ha tinuod nga pagsingba. (Basaha an Salmo 27:4.) Ha panahon ni David, an “balay ni Jehova” amo an tabernakulo. Hi David an naghikay nga magkaada makaruruyag nga templo nga tutukuron han iya anak nga hi Salomon. Paglabay hin mga siglo, iginsaysay ni Jesus nga maabot an panahon nga an mga tawo diri na kinahanglan kumadto ha templo basi magsingba kan Jehova. (Juan 4:21-23) Iginsaysay ni apostol Pablo ha Hebreo kapitulo 8 tubtob 10 nga nagkaada daku nga espirituwal nga templo han ginbawtismohan hi Jesus han 29 C.E. ngan ginpresentar an iya kalugaringon ha pagbuhat han kaburut-on ni Jehova. (Heb. 10:10) Inin daku nga espirituwal nga templo amo an kahikayan nga ginhimo ni Jehova basi pinaagi han aton pagtoo ha halad lukat ni Jesus makakagsingba kita ha Dios ha paagi nga iya ginkakarawat. Paonan-o kita magsisingba dinhi hini nga templo? Pinaagi han pag-ampo nga may ‘matuod nga kasingkasing ngan bug-os nga pagtoo’; pinaagi han marig-on nga pagpasamwak han aton paglaom; ngan pinaagi han paghunahuna, pag-aghat, ngan pagdasig ha aton mga igkasi-magsiringba kon natambong kita ha mga katirok ngan durante han pagsingba han pamilya. (Heb. 10:22-25) An aton gugma ha tinuod nga pagsingba nagpaparig-on ha aton hinin makuri nga kataposan nga mga adlaw.
8 Ha bug-os nga kalibotan, an magtinumanon nga surugoon ni Jehova naggagahin hin mas damu nga panahon ha ministeryo, nag-aaram hin iba nga yinaknan, ngan nabalhin ha mga lugar nga mas daku an panginahanglan hin magwarali han Ginhadian. Ira iginpapakita nga pariho han salmista, usa la an ira karuyag hangyoon kan Jehova. Karuyag nira malipay ha pagkamaopay ni Jehova ngan mag-alagad ha iya anoman an mahitabo.—Basaha an Salmo 27:6.
SARIG HA BULIG HAN DIOS
9, 10. Ano an iginpapasabot han pasarig ha Salmo 27:10?
9 Marig-on nga iginpahayag ni David an iya pagsarig ha bulig ni Jehova pinaagi ha pagsiring: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” (Sal. 27:10) An aton mababasa ha 1 Samuel kapitulo 22 nagpapakita nga hi David waray bayai han iya mga kag-anak. Kondi damu yana an ginsalikway han ira pamilya. Bisan pa hito, damu ha ira an ginbuligan ngan ginpanalipdan han mahigugmaon nga Kristiano nga kongregasyon.
10 Tungod kay hi Jehova andam ha pagsuporta han iya mga surugoon kon ginsasalikway hira han iba, diri ba bubuligan liwat niya hira durante han anoman nga iba pa nga problema? Pananglitan, kon nababaraka kita kon paonan-o naton maitatagana an materyal nga panginahanglan han aton pamilya, diri ba makakasiguro kita nga bubuligan kita ni Jehova? (Heb. 13:5, 6) Nasasabtan niya an kahimtang ngan panginahanglan han ngatanan nga iya maunungon nga surugoon.
11. Ano an mahimo magin epekto ha iba han aton pagsarig kan Jehova? Paghatag hin ehemplo.
11 Tagda an kahimtang ni Victoria, usa nga Bible study ha Liberia. Samtang nag-uuswag hiya ha espirituwal, hiya ngan an iya tulo nga anak ginbayaan han lalaki nga iya kalungon. Bisan kon nawarayan hiya urukyan ngan trabaho, padayon hiya nga nag-aram han Biblia ngan ha urhi nabawtismohan. Katapos mabawtismohan hi Victoria, an iya 13-anyos nga anak nga babaye nakaagi hin pitaka nga puno hin kwarta. Basi diri masulay, nagdesisyon hira nga diri ihapon an kwarta. Lugod, ginbiling dayon nira an sundalo nga tag-iya hito. Ginsidngan hira han sundalo nga kon an ngatanan nga tawo pariho katangkod han mga Saksi ni Jehova, an bug-os nga kalibotan magigin mas maopay pag-ukyan ngan mas mamurayawon. Iginpakita ni Victoria ha sundalo an ginsisiring han Biblia nga saad ni Jehova nga bag-o nga kalibotan. Nabantad an sundalo han pagtoo ngan pagkatangkod ni Victoria salit gintagan niya hi Victoria hin daku nga kantidad tikang ha kwarta nga iginbalik ha iya. Oo, an mga Saksi ni Jehova kilala gud ha pagin tangkod tungod han ira marig-on nga pagtoo ha kapas ni Jehova ha pagtagana han ira panginahanglan.
12. Ano an aton iginpapakita kon padayon nga nag-aalagad kita kan Jehova bisan kon mawarayan kita trabaho o kwarta? Paghatag hin ehemplo.
12 Hunahunaa liwat an posible nga inabat ni Thomas, usa nga diri bawtismado nga magwarali ha Sierra Leone. Nagtrabaho hiya sugad nga maestro ha hayskul, pero haros usa ka tuig nga waray hiya swelduhi. Basi makuha niya an iya sweldo, kinahanglan interbyuhon hiya han administrador han eskwelahan nga usa nga padi. Nagsiring an padi nga an mga gintotoohan han mga Saksi ni Jehova diri kinakarawat ha eskwelahan, ngan kon karuyag niya magpadayon ha iya trabaho kinahanglan bumaya hiya ha pagin Saksi. Binaya hi Thomas ha iya trabaho nga waray makuha an haros kanan usa ka tuig nga sweldo, ngan nakaagi hin iba nga trabaho—pag-ayad hin mga radyo ngan cellphone. Damu nga ehemplo an nagpapakita nga kon nasarig kita kan Jehova, diri gud kita sadang mahadlok nga bangin mawarayan kita han aton mga panginahanglan. Hi Jehova an Maglalarang han ngatanan nga butang ngan an Parapanalipod han iya katawohan, salit maaram kita nga magmamangno hiya ha aton.
13. Paonan-o an pagsangyaw han Ginhadian nag-uuswag ha pobre nga mga nasud?
13 Ha damu nga nasud diin makuri an kahimtang ha kinabuhi, kasagaran na nga an kabugtoan aktibo gud ha pagsangyaw. Kay ano? Usa nga sanga nga opisina an nagsurat: “Damu han mga tagbalay nga nakarawat hin Bible study an waray trabaho salit mas daku an ira panahon nga mag-aram ha adlaw. Mas daku liwat an panahon han kabugtoan nga magsangyaw. An mga tawo, labi na adton naukoy ha mga lugar nga makuri gud an kahimtang, diri na kinahanglan sidngan nga nagkikinabuhi kita ha kataposan nga mga adlaw kay nakikita nira an maraot nga mga kahimtang ha ira palibot.” Usa nga misyonero nga sobra 12 ka tuig na nga nag-aalagad ha usa nga nasud nga an tagsa nga magwarali nagdudumara hin aberids nga sobra 3 nga Bible study an nagsurat: “Damu nga magwarali an simple an pagkinabuhi ngan gutiay la an nakakaulang ha ira, salit kasagaran na nga mas daku an ira panahon ha ministeryo ngan ha pagdumara hin mga pag-aram ha Biblia.”
14. Ha ano nga mga paagi papanalipdan han Dios an daku nga panon?
14 Hi Jehova nagsaad nga hiya mabulig, magpapanalipod, ngan magluluwas ha iya katawohan sugad nga grupo, ha pisikal ngan ha espirituwal, ngan nasarig kita ha iya. (Sal. 37:28; 91:1-3) May daku nga panon nga maluluwas ha “daku nga kagol-anan.” (Pah. 7:9, 14) Salit sugad nga grupo, papanalipdan hira nga diri mapoo tubtob nga matapos ini nga sistema. Itatagana ha ira an ngatanan nga ira ginkikinahanglan basi makailob ha mga pagsari ngan mapanalipdan an ira relasyon kan Jehova. Ngan durante han kataposan nga bahin han daku nga kagol-anan, papanalipdan ni Jehova an iya katawohan.
“IGTUTDO HA AKON AN IMO DALAN, O JEHOVA”
15, 16. Paonan-o kita nagpapahimulos kon aton ginsusunod an instruksyon han Dios? Paghatag hin ehemplo.
15 Basi magpabilin nga maisugon, kinahanglan padayon nga matutdoan kita ha dalan han Dios. Iginpapakita ini han hangyo ni David: “Igtutdo ha akon an imo dalan, O Jehova; ngan itultol ako ha mahawan nga dalan, nga mahigawas han akon mga kaaway.” (Sal. 27:11) Basi masunod ini nga pag-ampo, kinahanglan mamati kita hin maopay ha mga instruksyon nga basado ha Biblia nga aton nakakarawat pinaagi han organisasyon ni Jehova ngan iaplikar dayon ito. Pananglitan, damu an nag-aplikar han maaramon nga sagdon nga pasimplihon an kinabuhi. Ginbayaran nira an ira mga utang ngan ginbaligya an mga butang nga diri nira kinahanglan. Salit han nagkaada krisis ha ekonomiya, diri duro an ira problema ha kwarta. Diri hira kinahanglan maniguro pagtrabaho basi magbinayad han mga butang nga diri man gud kinahanglanon, ngan napauswag nira an ira ministeryo. Maopay nga pakianhan han tagsa ha aton an aton kalugaringon, ‘Gin-aaplikar ko ba dayon an ngatanan nga akon nababasa ha Biblia ngan ha mga publikasyon han matinumanon ngan maaramon nga uripon bisan kon nagkikinahanglan ito hin pagsakripisyo?’—Mat. 24:45.
16 Kon nagpapatutdo kita kan Jehova ngan nagpapagiya ha iya ha dalan han pagkamatadong, waray hinungdan nga mahadlok kita. Han an usa nga regular payunir ha United States nag-aplay hin posisyon ha iya gintatrabahoan nga mabulig ha iya ngan ha iya pamilya nga makapadayon pagpayunir, ginsidngan hiya han iya superbisor nga diri niya makukuha ito nga posisyon kay waray hiya makaeskwela ha kolehiyo. Kon ha imo ini nahitabo, magbabasol ka ba nga nagpayunir ka imbes nga umiskwela ha kolehiyo? Paglabay hin duha ka semana napaiwas ha trabaho an superbisor, ngan ginpakianhan hiya han lain nga manidyer kon ano an iya mga tumong. Ginsaysay han brother nga hiya ngan an iya asawa bug-os-panahon nga mga ministro han mga Saksi ni Jehova ngan karuyag nira ipadayon ito. Antes pa niya maiyakan an iya sunod nga isisiring, an manidyer nagsiring: “Nasiring pa gud ako nga may iba ha imo! Han hirani na mamatay an akon tatay, duha han imo karelihiyon an nakadto ha balay ngan ginbabasahan hiya hin Biblia kada adlaw. Nagsaad ako ha akon kalugaringon nga kon magkaada ako higayon nga makabulig ha usa han mga Saksi ni Jehova, bubuhaton ko ito.” Pagkabuwas han aga, iginhatag ha brother an trabaho nga diri karuyag ihatag ha iya han napaiwas nga superbisor. Oo, kon gin-uuna naton an Ginhadian ha aton kinabuhi, tutumanon ni Jehova an iya pasarig nga diri kita makukulangan han aton materyal nga panginahanglan.—Mat. 6:33.
GINKIKINAHANGLAN AN PAGTOO NGAN PAGLAOM
17. Ano an mabulig ha aton nga magkaada kaisog ha pag-atubang han tidaraon?
17 Sunod, ginpabug-atan ni David an pagkaimportante han pagtoo ngan paglaom pinaagi ha pagsiring: “Nalilinop kunta ako, kon waray ako pagtoo nga kikitaon ko an kaopayan ni Jehova dida ha tuna han mga buhi.” (Sal. 27:13) Oo, ano daw la an aton kinabuhi kon waray kita hatagi han Dios hin paglaom ngan waray naton masabti an mga butang nga ginhisgotan ha Salmo 27? Salit, hinaot padayon nga mag-ampo kita kan Jehova nga hatagan kita hin kusog ngan buligan kita nga makatalwas ha Armagedon.—Basaha an Salmo 27:14.
[Mga Pakiana]
[Retrato ha pahina 23]
Hi David nagkaada kaisog pinaagi ha paghinumdom han mga hitabo diin ginluwas hiya ni Jehova
[Retrato ha pahina 25]
Ginhuhunahuna ba naton an krisis ha ekonomiya sugad nga higayon ha pagpauswag han aton ministeryo?
