Mag-alagad ha Dios nga Naghahatag hin Kagawasan

“Amo ini an gugma han Dios, nga pagtumanon ta an iya mga sugo; ngan an iya mga sugo diri magbug-at.”—1 JUAN 5:3.

MABABATON MO BA?

Paonan-o nangangalimbasog hi Satanas nga patoohon kita nga mabug-at an mga balaud han Dios?

Kay ano nga kinahanglan naton pilion hin maopay an aton mga kaupod?

Ano an mabulig ha aton nga magpabilin nga maunungon ha Dios nga naghahatag hin kagawasan?

1. Paonan-o ginagamit ni Jehova an iya kagawasan, ngan ano nga kagawasan an iya iginhatag kanda Adan ngan Eva?

 HI Jehova gud la an may bug-os nga kagawasan. Kondi diri gud niya ito ginagamit ha sayop nga paagi, ngan diri liwat niya ginkukontrol an ngatanan nga ginbubuhat han iya mga surugoon. Lugod, iya hira gintagan hin kagawasan ha pagdesisyon ngan ha pagbuhat han ngatanan nga ira husto nga hingyap. Pananglitan, usa la an igindiri han Dios kanda Adan ngan Eva—an pagkaon han bunga han “kahoy han kinaadman han kaopayan ngan han karaotan.” (Gen. 2:17) Daku gud an ira kagawasan samtang ira ginbubuhat an kaburut-on han ira Maglalarang!

2. Kay ano nga nawara han aton siyahan nga mga kag-anak an kagawasan nga iginhatag ha ira han Dios?

² Kay ano nga gintagan han Dios an aton siyahan nga mga kag-anak hin daku gud nga kagawasan? Kay ginlarang niya hira ha iya dagway ngan gintagan hira hin konsensya, salit naglaom hiya nga an ira gugma ha iya sugad nga ira Maglalarang magpapagios ha ira ha pagbuhat han husto. (Gen. 1:27; Roma 2:15) Makasurubo nga hira Adan ngan Eva diri mapasalamaton ha ira Maglalarang ngan ha kagawasan nga iya iginhatag ha ira. Lugod, ira ginpili an sayop nga kagawasan nga igintanyag ni Satanas, an pagdesisyon para ha ira kalugaringon kon ano an husto ngan sayop. Kondi imbes nga magkaada mas daku nga kagawasan, iginpauripon han aton siyahan nga mga kag-anak an ira kalugaringon ngan an ira magigin mga anak ha sala, nga nagresulta hin pag-antos ngan kamatayon.—Roma 5:12.

3, 4. Paonan-o nangangalimbasog hi Satanas ha paglimbong ha aton may kalabotan ha mga suruklan ni Jehova?

³ Kon naimpluwensyahan ni Satanas an duha nga hingpit nga tawo ngan an damu nga anghel nga diri magpasakop ha pagmando han Dios, mahimo liwat kita niya malimbongan. Waray gud magbag-o an mga paagi ni Satanas. Nangangalimbasog hiya paglimbong ha aton nga hunahunaon nga an mga suruklan han Dios istrikto hinduro ngan nakakawara han aton kalipay. (1 Juan 5:3) Mahimo kita magkaada hito nga panhunahuna kon  ito an panhunahuna han aton pirme nakakaupod. “An maraot nga mga kaupod nakaimpluwensya gud ha akon, labi na kay diri ko karuyag nga iba an akon opinyon ha akon mga igkasi-batan-on,” siring han usa nga 24-anyos nga sister nga nakabuhat hin seksuwal nga imoralidad. Bangin naeksperyensyahan mo liwat nga makusog gud an impluwensya han mga kaupod.

⁴ Makasurubo nga usahay an maraot nga impluwensya han mga kaupod mahimo liwat magtikang ha sulod han Kristiano nga kongregasyon. “May kilala ako nga mga batan-on nga nakikig-date ha mga diri-tumuroo,” siring han usa nga batan-on nga Saksi. “Pero ha kamaihaan, nasantop ko nga mentras mas nakikig-upod ako ha ira, mas nagigin pariho ako ha ira. Hinay-hinay nga nagluya an akon espirituwalidad. Diri na ako nalilipay ha espirituwal nga pagkaon ha mga katirok, ngan talagsa na gud la ako nasangyaw. Tungod hito nasantop ko nga kinahanglan ko na umundang ha pakig-upod ha ira, ngan ginbuhat ko ito!” Maaram ka ba nga daku gud an impluwensya ha imo han imo mga kaupod? Tagda an usa nga ehemplo ha Biblia nga makakabulig ha aton yana.—Roma 15:4.

IYA ‘GINKAWAT AN IRA KASINGKASING’

5, 6. Paonan-o ginlimbongan ni Absalon an mga tawo, ngan naglampos ba an iya plano?

⁵ Mababasa ha Biblia an damu nga ehemplo han nagin maraot nga impluwensya ha iba. Usa hito hi Absalon nga anak ni Hadi David. Gwapo hinduro hi Absalon. Kondi paglabay han panahon, pariho kan Satanas, iya gintugotan nga tumubo ha iya kasingkasing an hakugnon nga ambisyon. Karuyag niya agawon an pagkahadi han iya amay, bisan kon waray hiya katungod hito. a Basi mahimo ito, ginios hiya nga kunohay interesado gud ha kaopayan han iya mga igkasi-Israelita samtang tuso nga ginpapatoo hira nga an hadi diri interesado ha ira kaopayan. Oo, pariho han Yawa ha hardin han Eden, ginpatoo ni Absalon an mga tawo nga karuyag niya buligan hira ngan ha pariho nga panahon ginpakaraot an iya mismo amay.—2 Sam. 15:1-5.

⁶ Naglampos ba an tuso nga plano ni Absalon? Ha pipira nga paagi naglampos ito, kay an Biblia nasiring: “Nakawat ni Absalon an kasingkasing han mga tawo ha Israel.” (2 Sam. 15:6) Kondi ha kataposan an iya pagkamapahitas-on nagresulta han iya kapirdihan. Ngan makasurubo nga nagresulta liwat ito han iya kamatayon, pati han yinukot nga iya nalimbongan.—2 Sam. 18:7, 14-17.

7. Ano nga mga leksyon an aton hibabaroan ha asoy mahitungod kan Absalon? (Kitaa an piktyur ha pahina 14.)

⁷ Kay ano nga masayon gud la nalimbongan ni Absalon adto nga mga Israelita? Bangin tungod kay ginhingyap nira an mga butang nga iginsaad ni Absalon. O bangin nadára hira han iya kagwapo. Anoman an hinungdan, ini an sigurado: Diri hira maunungon kan Jehova ngan ha iya pinili nga hadi. Yana, padayon nga ginagamit ni Satanas an mga pariho kan Absalon ha iya pangalimbasog nga ‘kawaton an kasingkasing’ han mga surugoon ni Jehova. ‘Sobra kaistrikto an mga suruklan ni Jehova,’ bangin sumiring hira. ‘Kitaa adton diri nag-aalagad kan Jehova. Mas malipayon gud hira!’ Kon mabatian mo ini nga mga pulong, masasantop mo ba nga buwa ito ngan magpapabilin ka nga maunungon ha Dios? Kikilalahon mo ba nga an “hingpit nga balaud” ni Jehova gud la, an balaud han Kristo, an maggigiya ha imo ha tinuod nga kagawasan? (Jak. 1:25) Kon sugad, pabilhi ito nga balaud, ngan ayaw gud pagpasulay nga gamiton ha sayop nga paagi an imo kagawasan sugad nga Kristiano.—Basaha an 1 Pedro 2:16.

8. Ano an pipira nga ehemplo nga nagpapakita nga an diri pagsunod ha mga suruklan ni Jehova diri nagriresulta hin kalipay?

⁸ Ginpupuntirya ni Satanas labi na an mga batan-on. Usa nga brother nga sobra 30 anyos na yana an nagsumat han iya panhunahuna han tin-edyer pa hiya: “Ginhunahuna ko nga restriksyon an mga suruklan ni Jehova ha moral, diri proteksyon.” Tungod hito, nakabuhat hiya hin seksuwal nga imoralidad. Kondi waray ito makahatag ha iya hin kalipay. “Damu ka tuig nga nakukonsensya ako ngan nagbabasol gud,” siring niya. Ha paghinumdom han iya pagkatin-edyer, usa nga sister an nagsurat: “Katapos makabuhat hin imoralidad, nasusubo ka ngan naabat nga waray pulos. Bisan yana nga 19 ka  tuig na an naglabay, nahinunumdoman ko pa gihapon an maraot nga nahitabo.” Usa pa nga sister an nagsiring: “An paghunahuna nga an akon paggawi nakahatag hin duro nga kasákit ha akon mga hinigugma nagkaada maraot hinduro nga epekto ha akon hunahuna, espirituwalidad, ngan emosyon. Makasurubo gud an pagkinabuhi nga waray pag-uyon ni Jehova.” Diri karuyag ni Satanas nga hunahunaon mo an sugad hito nga mga resulta han sala.

9. (a) Ano nga mga pakiana an makakabulig ha aton nga usisahon an aton panhunahuna mahitungod kan Jehova ngan ha iya mga balaud ngan prinsipyo? (b) Kay ano nga importante nga kilalahon hin maopay an Dios?

⁹ Makasurubo nga damu nga batan-on nga aada ha kamatuoran—ngan bisan an mga adulto na—an kinahanglan anay mag-antos han magraot nga resulta han ira pagtalapas ha Dios antes mahibaro hin leksyon! (Gal. 6:7, 8) Salit pakianhi an imo kalugaringon: ‘Maaram ba ako han tuso nga mga paagi nga ginagamit ni Satanas ha paglimbong ha akon? Gintatagad ko ba hi Jehova sugad nga akon pinakaduok nga Sangkay nga pirme nagsusumat han kamatuoran ngan naruruyag paghatag han pinakamaopay ha akon? Kombinsido ba ako nga diri gud niya igdidiri an mga butang nga makakaopay ngan makakapalipay gud ha akon?’ (Basaha an Isaias 48:17, 18.) Basi kinasingkasing ka nga makabaton hin oo, diri igo an pagkaada hamabaw la nga kahibaro mahitungod kan Jehova. Kinahanglan kilalahon mo gud hiya ngan karawaton nga an mga balaud ngan prinsipyo ha Biblia nagpapakita nga nahigugma hiya ha imo ngan diri kay karuyag niya kuhaon an imo kagawasan.—Sal. 25:14.

PAG-AMPO NGA MAGKAADA HIN MAARAMON NGAN MASINUGTANON NGA KASINGKASING

10. Kay ano nga sadang kita mangalimbasog nga subaron an batan-on nga hi Hadi Salomon?

¹⁰ Han batan-on pa hi Salomon, mapainubsanon  hiya nga nag-ampo: “Ako usa la nga gutiay nga bata; diri ako maaram kon oonanhon paggowa o pagsulod.” Katapos nag-ampo hiya nga magkaada hin maaramon ngan masinugtanon nga kasingkasing. (1 Hadi 3:7-9, 12) Ginbaton ni Jehova iton sinsero nga hangyo, ngan bubuhaton liwat niya ito ha imo, batan-on ka man o edaran na. Syempre, diri milagroso nga ihahatag ha imo ni Jehova an pagsabot ngan kinaadman. Kondi bubuligan ka niya nga magin maaramon kon seryosohon mo an imo pag-aram han iya Pulong, ig-ampo nga magkaada ka han baraan nga espiritu, ngan bug-os nga pahimulsan an espirituwal nga mga tagana nga imo nakakarawat pinaagi han Kristiano nga kongregasyon. (Jak. 1:5) Oo, pinaagi hini, ginhihimo ni Jehova bisan an iya batan-on nga mga surugoon nga mas maaramon kay han ngatanan nga nagbabalewaray han iya mga sagdon, bisan pa han gintatawag nga ‘mga mag-aramon ngan masinabuton’ hini nga kalibotan.—Luk. 10:21; basaha an Salmo 119:98-100.

11-13. (a) Ano nga mapulsanon nga mga leksyon an aton hibabaroan ha Salmo 26:4, Salmo 1:1, ngan 1 Korinto 15:33? (b) Paonan-o mo iaaplikar ini nga mga prinsipyo ha Kasuratan?

¹¹ Ha pag-ilustrar han kapulsanan han pag-aram han Biblia ngan pagpamalandong ha aton nabasa basi makilala gud naton hin maopay hi Jehova, tagda an masunod nga mga teksto. An tagsa hito may importante nga prinsipyo may kalabotan ha pagpili hin mga kaupod: “Waray ako paglingkod upod han mga tawo nga mga buwaon; diri liwat ako maglalakat upod hiton mga tawo nga maglimbungon.” (Sal. 26:4) “Mahimayaon an tawo nga diri naglalakat han sagdon han mga magdaraot, ngan diri natindog ha dalan han mga magpakasasala, ngan diri nalingkod ha lingkoran han mga magyinubiton.” (Sal. 1:1) “An magraot nga mga kaupod nakakadunot ha mga mag-opay nga batasan.”—1 Kor. 15:33.

¹² Ano nga mapulsanon nga mga leksyon an aton hibabaroan hini nga mga teksto? (1) Karuyag ni Jehova nga pilion naton hin maopay an aton mga kaupod. Karuyag niya nga panalipdan kita ha moral ngan espirituwal. (2) An aton mga kaupod nakakaimpluwensya ha aton ha pagbuhat hin maopay o maraot; ito gud an kamatuoran. An paagi han pagkasurat hini nga mga teksto nagpapakita nga karuyag ni Jehova nga mabantad an aton kasingkasing. Paonan-o? Aton maoobserbaran nga waray bisan usa hini nga mga bersikulo an iginpahayag sugad nga surundon pinaagi ha pagsiring nga “kinahanglan diri ka . . . ” Lugod, iginsurat ini ha paagi nga nagsasaysay la hin kamatuoran. Sugad hin nasiring hi Jehova ha aton: ‘Ini an kamatuoran. Ano an imo bubuhaton? Ano an aada ha imo kasingkasing?’

¹³ Tungod kay inin tulo nga bersikulo iginsaysay sugad nga importante nga mga kamatuoran, diri ito nadadaan ngan aplikado ito ha iba-iba nga kahimtang. Ha pag-ilustrar, pakianhi an imo kalugaringon han sugad hini nga mga pakiana: Paonan-o ko malilikyan an pakig-upod ha mga tawo nga ‘malimbungon’? Ha ano nga mga kahimtang bangin makaupod ko hira? (Prob. 3:32; 6:12) Hin-o an ‘magraot’ nga karuyag ni Jehova nga likyan ko? (Sal. 111:10; 112:1; Prob. 1:7) Ano nga “mag-opay nga batasan” an madadaot kon pipilion ko nga makigsangkay ha magraot nga kaupod? An magraot ba nga kaupod aadto la ha gawas han organisasyon? (2 Ped. 2:1-3) Ano an imo baton hini nga mga pakiana?

14. Paonan-o niyo mapapauswag an iyo gab-i para ha Pagsingba han Pamilya?

¹⁴ Katapos mangatadongan basado hini nga mga teksto, kay ano nga diri usisahon an iba nga mga teksto ha Biblia nga nagsusumat han panhunahuna han Dios may kalabotan ha mga butang nga importante ha imo o ha imo pamilya? b Mga kag-anak, planoha nga hisgotan an sugad hini nga mga topiko ha iyo gab-i para ha Pagsingba han Pamilya. Samtang ginbubuhat niyo ito, hinumdumi nga an iyo tumong amo an pagbulig ha tagsa nga membro han pamilya nga mas masabtan nga an mga balaud ngan prinsipyo han Dios nagpapakita han iya daku nga gugma ha aton. (Sal. 119:72) Oo,  an sugad hito nga pag-aram sadang makabulig ha ngatanan nga membro han pamilya nga magin mas duok kan Jehova ngan ha usa kag usa.

15. Paonan-o mo masisiring nga nagkakaada ka hin maaramon ngan masinugtanon nga kasingkasing?

¹⁵ Paonan-o mo masisiring nga nagkakaada ka hin maaramon ngan masinugtanon nga kasingkasing? Usa nga paagi amo an pagtanding han imo panhunahuna ha panhunahuna han magtinumanon ha kadaan nga panahon, pariho kan Hadi David, nga nagsurat: “Nalilipay ako hin pagsugot han imo kaburut-on, Oh Dios nakon; ngan an imo balaud aadi ha sakob han akon kasingkasing.” (Sal. 40:8) Sugad man, an nagsurat han Salmo 119 nagsiring: “O nahigugma gud ako ha imo balaud! Amo ito an akon pamalandong ha bug-os nga adlaw.” (Sal. 119:97) Kinahanglan mangalimbasog ka basi magkaada hini nga klase hin gugma. Mapapauswag mo ini pinaagi han sinsero nga pag-aram han Biblia, pag-ampo, ngan pamalandong. Mapapauswag liwat ini kon makita mo ha imo kinabuhi nga an pagsunod ha mga suruklan han Dios nagriresulta hin damu nga bendisyon.—Sal. 34:8.

PAKIG-AWAY PARA HAN IMO KAGAWASAN SUGAD NGA KRISTIANO!

16. Ano an sadang naton hinumdoman kon karuyag naton magdaog ha aton pakig-away para ha tinuod nga kagawasan?

¹⁶ Ha bug-os nga kasaysayan, an mga nasud nakiggirra basi magkaada kagawasan. Salit labi na gud nga sadang kita magin andam ha pakig-away ha espirituwal para ha aton kagawasan sugad nga Kristiano! Hinumdumi nga an imo mga kaaway diri la hi Satanas, an kalibotan, ngan an nakakadaot nga disposisyon hito. Kinahanglan makig-away ka liwat ha imo pagkadiri-hingpit, pati na ha imo malimbungon nga kasingkasing. (Jer. 17:9; Efe. 2:3) Kondi ha bulig ni Jehova, mahimo ka magdaog ha imo pakig-away. Labot pa hito, an tagsa nga kadaogan, daku man o gutiay, magkakaada diri maminos ha duha nga maopay nga resulta. Siyahan, mapapalipay mo an kasingkasing ni Jehova. (Prob. 27:11) Ikaduha, ha kada panahon nga imo nasasantop nga an pagsunod ha “hingpit nga balaud” han kagawasan naghahatag ha imo hin kaopayan, mas nagigin determinado ka nga magpabilin ha ‘haligot nga dalan’ nga tipakadto ha kinabuhi nga waray kataposan. Ha tidaraon, mapapahimulsan mo an mas daku nga kagawasan nga iginsaad ni Jehova ha ngatanan nga matinumanon ha iya.—Jak. 1:25; Mat. 7:13, 14.

17. Kay ano nga diri kita sadang manluya kon makahimo kita hin sayop, ngan ano nga bulig an igintatagana ni Jehova?

¹⁷ Syempre, kita ngatanan usahay nakakahimo hin sayop. (Ekles. 7:20) Kon mahitabo ito, ayaw kahulop o pag-abat nga waray ka na pulos. Kon matumba ka, siring pa, buhát ngan padayon ha unhan—bisan kon mangahulogan ito hin pangaro hin bulig ha mga tigurang. Hi Jakobo nagsurat nga an ira “pag-ampo han pagtoo makakaluwas ha masakit, ngan an Ginoo magbabanhaw ha iya; ngan kon makasala hiya, pagpapasayloon hiya.” (Jak. 5:15) Oo, ayaw gud hingalimti nga an Dios tinuod nga maloloy-on ngan iginpahirani ka niya ha kongregasyon kay may nakita hiya nga maopay ha imo. (Basaha an Salmo 103:8, 9.) Salit, tubtob nga nag-aalagad ka kan Jehova hin bug-os-kasingkasing, diri ka gud niya papabay-an.—1 Kron. 28:9.

18. Paonan-o kita magios uyon ha pag-ampo ni Jesus ha Juan 17:15?

¹⁸ Samtang nag-aampo hi Jesus ha ultimo nga gab-i nga iya kaupod an iya 11 nga matinumanon nga apostol, iya ginsiring inin diri hingangalimtan nga mga pulong: “Imo hira pagtipigan gawason ha mga karat-an.” (Juan 17:15) Nababaraka hi Jesus diri la ha iya mga apostol kondi pati liwat ha ngatanan nga iya sumurunod. Salit makakasiguro kita nga babatunon ni Jehova an pag-ampo ni Jesus pinaagi ha pagpanalipod ha aton hinin makuri nga mga panahon. “Para han matadong; [hi Jehova] an taming . . . Hiya . . . magmamangno han dalan han iya mga baraan.” (Prob. 2:7, 8) Oo, diri pirme masayon an pagsunod ha mga ginkikinahanglan ni Jehova. Kondi an mga nasunod la kan Jehova an magkakaada kinabuhi nga waray kataposan ngan tinuod nga kagawasan. (Roma 8:21) Bangin diri sugad hito an panhunahuna han iba, kondi ayaw gud pagpalimbong ha ira!

[Mga footnote]

[Mga Pakiana]

[Mga retrato ha pahina 14]

Paonan-o naton makikilala ngan malilikyan an mga pariho kan Absalon yana?