Magpagiya kan Jehova Ngadto ha Tinuod nga Kagawasan
Magpagiya kan Jehova Ngadto ha Tinuod nga Kagawasan
‘Tan-awa an hingpit nga balaud, an balaud han kaluwasan [“kagawasan,” NW].’—JAK. 1:25.
MAISASAYSAY MO BA?
Ano nga balaud an naghahatag hin tinuod nga kagawasan, ngan hin-o an nagpapahimulos hito nga balaud?
Ano an paagi ha pagkaada tinuod nga kagawasan?
Ano nga kagawasan an mapapahimulsan han ngatanan nga padayon nga nasugot kan Jehova?
1, 2. (a) Ano an nahitatabo ha kagawasan han mga tawo, ngan kay ano? (b) Ano nga kagawasan an mapapahimulsan han mga surugoon ni Jehova ha tidaraon?
NAGKIKINABUHI kita ha panahon nga nagtitikaduro an kahakog, kamadarahog, ngan kawaray pagtahod ha balaud. (2 Tim. 3:1-5) Tungod hito, an mga gobyerno naghihimo hin dugang nga mga balaud, nagpaparig-on han pwersa han mga pulis, ngan nagbubutang hin mga surveillance camera. Ha iba nga nasud, an mga tawo nagbubutang ha ira mga balay hin mga alarm system, dugang nga mga kandado, ngan nagbubutang pa ngani hin live wire ha ira mga alad. Damu an nadiri paggawas ha gab-i ngan diri gintutugotan an ira mga anak nga mag-uyag ha gawas nga waray bantay—adlaw man o gab-i. Matin-aw nga nagtitikawara na an kagawasan han mga tawo, ngan posible nga magpapadayon ini nga kahimtang.
2 Ha hardin han Eden, hi Satanas nagsiring nga an paagi la ha pagkaada tinuod nga kagawasan amo an pagbulag kan Jehova. Kondi an mga nahitatabo tikang hadto nagpapamatuod nga buwa gud an iya ginsiring! Samtang mas ginbubuhat han mga tawo an ira karuyag imbes nga sundon an mga suruklan han Dios, mas nag-aantos an ngatanan nga katawohan. Kita nga mga surugoon ni Jehova apektado liwat hini nga kahimtang. Bisan pa hito, may paglaom kita nga ha tidaraon an katawohan diri na magigin uripon han sala ngan pagkamadinunuton ngan magpapahimulos na han gintatawag han Biblia nga “mahimayaon nga kagawasan han mga anak han Dyos.” (Roma 8:21, Maopay nga Sumat) Ha pagkamatuod, igin-aandam na ni Jehova yana an iya mga surugoon para hito nga kagawasan. Paonan-o niya ginbubuhat ito?
3. Ano nga balaud an iginhatag ni Jehova ha mga sumurunod ni Kristo, ngan ano nga mga pakiana an aton hihisgotan?
3 Basi iandam kita para ha kagawasan ha tidaraon, iginhatag ni Jehova an gintatawag ni Jakobo nga “hingpit nga balaud, an balaud han kaluwasan,” o kagawasan. (Basaha an Jakobo 1:25.) Ha iba nga bersyon han Biblia iginhubad ini nga “an balaud nga naghahatag ha aton hin kagawasan” (The New English Bible) ngan “an hingpit nga balaud han kagawasan” (The New American Bible). Syempre, kon gin-uunabi an balaud, kasagaran na nga nahuhunahuna han mga tawo an pagkaada mga restriksyon, diri an kagawasan. Kon sugad, ano an “hingpit nga balaud” han kagawasan? Ngan paonan-o ito nga balaud naghahatag ha aton hin kagawasan?
AN BALAUD NGA NAGHAHATAG HIN KAGAWASAN
4. Ano an “hingpit nga balaud” han kagawasan, ngan hin-o an nagpapahimulos hito?
4 An “hingpit nga balaud” han kagawasan diri an Mosaiko nga Balaud, kay iginpakita hito ha mga Israelita nga makasasala hira, ngan ito nga Balaud gintuman ni Kristo. (Mat. 5:17; Gal. 3:19) Kon sugad, ano nga balaud an iginpapasabot ni Jakobo? An iya karuyag sidngon amo an “balaud ni Kristo,” nga gintatawag liwat nga “Kasugoanan ha pagtoo.” (Gal. 6:2; Roma 3:27) Salit an “hingpit nga balaud” nag-uupod han ngatanan nga ginkikinahanglan ni Jehova ha aton. An dinihogan nga mga Kristiano ngan an ‘iba nga mga karnero’ nagpapahimulos hito.—Juan 10:16.
5. Kay ano nga diri nakakapabug-at an balaud nga naghahatag hin kagawasan?
5 Diri pariho han mga balaud ha damu nga nasud, an “hingpit nga balaud” diri komplikado o nakakapabug-at; lugod ginkukompwesto ito hin simple nga mga sugo ngan importante nga mga prinsipyo. (1 Juan 5:3) “An akon yugo masayon, ngan an akon pinas-an magaan,” siring ni Jesus. (Mat. 11:29, 30) Dugang pa, an “hingpit nga balaud” diri nagkikinahanglan hin hilaba nga listahan hin mga surundon, kay iginbasar ito ha gugma ngan igin-ukit ha hunahuna ngan kasingkasing, diri ha mga papan nga bato.—Basaha an Hebreo 8:6, 10.
KON PAONAN-O AN “HINGPIT NGA BALAUD” NAGHAHATAG HA ATON HIN KAGAWASAN
6, 7. Ano an aton masisiring ha mga suruklan ni Jehova, ngan kay ano nga naghahatag hin kagawasan an balaud han kagawasan?
6 An mga limitasyon nga iginhatag ni Jehova ha iya intelihente nga mga linarang para ha ira kapulsanan ngan proteksyon. Pananglitan, hunahunaa an balaud han grabidad. An mga tawo diri nagrireklamo nga ginpapakurian hira hito nga balaud. Lugod, nagpapasalamat hira hito, kay maaram hira nga para ito ha ira kaopayan. Ha pariho nga paagi, para ha aton kaopayan an mga suruklan ni Jehova, nga makikita ha “hingpit nga balaud” han Kristo.
7 An balaud han kagawasan diri la kay proteksyon ha aton; naghahatag liwat ito ha aton hin higayon nga buhaton an ngatanan naton nga husto nga hingyap nga diri nadadaot an aton kalugaringon o natatamakan an katungod ngan kagawasan han iba. Kon sugad, an paagi la nga magkaada tinuod nga kagawasan—mabuhat an aton ginhihingyap—amo an pagkaada husto nga mga hingyap, adton uyon ha personalidad ngan mga suruklan ni Jehova. Ha iba nga pagkayakan, kinahanglan mahibaro kita nga higugmaon an ginhihigugma ni Jehova ngan kangalasan an iya ginkakangalasan. An balaud han kagawasan nabulig ha aton nga buhaton ito.—Amos 5:15.
8, 9. Ano an mga kapulsanan han pagsunod ha balaud han kagawasan? Paghatag hin ehemplo.
8 Tungod kay diri kita hingpit, nakukurian gud kita pagpugong han aton sayop nga mga hingyap. Pero kon maunungon nga ginsusunod naton an balaud han kagawasan, bisan yana mahimo na kita magkaada kagawasan. Pananglitan, han hi Jay nagtikang pag-aram han Biblia, adik hiya ha sigarilyo. Han iya hinbaroan nga an iya bisyo diri nakakapalipay ha Dios, kinahanglan hiya magdesisyon. Padayon ba nga susundon niya an iya sayop nga hingyap o susundon niya hi Jehova? Maaramon nga ginpili niya nga mag-alagad ha Dios bisan kon nakurian gud hiya nga umundang pagsigarilyo. Ano an iya inabat han iya nalamposan an iya bisyo? “Inabat gud ako hin kagawasan ngan duro nga kalipay,” siring niya.
9 Hinbaroan ni Jay ha iya eksperyensya nga an kagawasan nga iginhahatag han kalibotan, nga nagtutugot ha mga tawo nga ‘maghunahuna ha unod,’ ha pagkamatuod nag-uuripon ha ira ha sala. Kondi an kagawasan nga iginhahatag ni Jehova, nga nangangahulogan han ‘paghunahuna han espiritu,’ naghahatag hin kagawasan ngan nagriresulta hin ‘kinabuhi ngan kamurayawan.’ (Roma 8:5, 6) Diin hi Jay nakakuha hin kusog basi malamposan an bisyo nga nag-uuripon ha iya? Diri adto iya kalugaringon nga kusog, kondi tikang ha Dios. “Regular nga nag-aram ako han Biblia, nag-ampo ha pangaro han baraan nga espiritu, ngan ginkarawat ko an mahigugmaon nga bulig han Kristiano nga kongregasyon,” siring niya. Ini liwat nga mga tagana an makakabulig ha aton ngatanan nga magkaada tinuod nga kagawasan. Usisahon naton kon paonan-o.
KITAA HIN MAOPAY AN PULONG HAN DIOS
10. Ano an karuyag sidngon han ‘pagtan-aw’ ha balaud han Dios?
10 An Jakobo 1:25 nasiring nga “an nagtan-aw ha hingpit nga balaud, an balaud han kaluwasan, ngan nagpapadayon hito, . . . mabubulahan ha iya buhat.” An Griego nga pulong nga iginhubad nga “nagtan-aw” nangangahulogan nga “dumuko basi kitaon hin maopay.” Nagkikinahanglan ini hin pangalimbasog. Oo, kon karuyag naton nga maimpluwensyahan han balaud han kagawasan an aton hunahuna ngan kasingkasing, kinahanglan maduruto ngan regular nga pag-adman naton an Biblia ngan pamalandungon hin maopay an aton ginbabasa.—1 Tim. 4:15.
11, 12. (a) Paonan-o ginpabug-atan ni Jesus an panginahanglan nga himoon an kamatuoran nga aton paagi han pagkinabuhi? (b) Ha ehemplo ha parapo, ano nga peligro an kinahanglan likyan labi na han mga batan-on?
11 Ha pariho nga panahon, kinahanglan ‘magpadayon’ kita o diri umundang ha pag-aplikar han Pulong han Dios. Kinahanglan himoon naton an kamatuoran nga aton paagi han pagkinabuhi. Puropariho hito an ginsiring ni Jesus ha pipira nga natoo ha iya: “Kon kamo magpabilin ha akon pulong, kamo an totoo gud nga akon mga tinon-an. Ngan kamo mahibabaro han kamatuoran, ngan an kamatuoran magluluwas ha iyo.” (Juan 8:31, 32) An usa nga reperensya nasiring nga dinhi an ‘paghibaro’ nangangahulogan liwat hin pag-apresyar tungod kay “an ‘nahibaroan’ mapulsanon o importante ha usa nga nahibaro.” Salit masisiring naton nga bug-os kita nga ‘nahibaro’ han kamatuoran kon ito an aton paagi han pagkinabuhi. Dida hito makakasiring gud kita nga an “pulong han Dios” “nagbubuhat” ha aton, ginbabag-o an aton personalidad basi mas masubad naton an aton Amay ha langit.—1 Tes. 2:13.
12 Pakianhi an imo kalugaringon, ‘Maaram gud ba ako han kamatuoran? Ginhihimo ko ba ito nga paagi han akon pagkinabuhi? O ginhihingyap ko la gihapon an pipira nga “kagawasan” han kalibotan? Usa nga sister nga ginpadaku hin Kristiano nga mga kag-anak an nahinunumdom han iya pagkabatan-on. Hiya nagsiring: “Kon nagdaku ka ha kamatuoran, aada pirme hi Jehova, siring pa. Kondi ha akon kahimtang, diri ko gud hiya tinuod nga kilala. Waray gud ako mahibaro nga kangalasan an iya ginkakangalasan. Diri gud ako natoo nga importante ha iya an akon ginbubuhat. Ngan waray gud ako mahibaro nga magpabulig ha iya kon may problema ako. Sinarig ako ha akon kalugaringon nga pagsabot, pero yana maaram na ako nga kalurongan adto kay waray ako hinbabaroan.” Maopay na la kay ha urhi nasantop hini nga sister nga sayop gud an iya panhunahuna, ngan naghimo hiya hin dagku nga pagbag-o. Nagin regular payunir pa ngani hiya.
AN BARAAN NGA ESPIRITU MAKAKABULIG HA IMO NGA MAGKAADA KAGAWASAN
13. Paonan-o an baraan nga espiritu han Dios nabulig ha aton nga magkaada kagawasan?
13 Ha 2 Korinto 3:17 (Maopay nga Sumat) aton mababasa: ‘Kon hain an espiritu han Ginoo, may-ada kagawasan.’ Paonan-o an baraan nga espiritu nabulig ha aton nga magkaada kagawasan? Nabulig ito ha aton nga magkaada mga kalidad sugad han “gugma, kalipay, pakigdait, pagkamailob, pagkamalolooyon, pagkamaopay, pagkamatinooron, pagkaaghop, paggahum ha kalugaringon.” (Gal. 5:22, 23) Kon waray ini nga mga kalidad, labi na an gugma, an mga tawo diri magkakaada tinuod nga kagawasan—nga amo gud an kahimtang ha kalibotan yana. Makapainteres nga katapos unabihon ni apostol Pablo an mga bahin han bunga han espiritu, hiya nagsiring liwat: “Kontra hini nga mga bagay waray balaud.” Ano an iya karuyag sidngon? An bunga han espiritu diri nalilimitahan han bisan ano nga balaud. Waray gud balaud nga makakapugong han pag-uswag hini nga mga kalidad. (Gal. 5:18) Kay kon may-ada man, ano an kapulsanan han sugad hito nga balaud? Kaburut-on ni Jehova nga kultibaron naton ini nga mga kalidad ha waray kataposan ngan ipakita ito nga waray limitasyon.
14. Ha ano nga mga paagi gin-uuripon han espiritu han kalibotan an mga tawo nga nagpapakontrol hito?
14 An mga tawo nga kontrolado han espiritu han kalibotan ngan nagsusunod ha ira makasasala nga mga hingyap bangin maghunahuna nga may kagawasan hira. (Basaha an 2 Pedro 2:18, 19.) Kondi diri hira maaram nga mga uripon ngay-an hira. Damu hinduro nga surundon ngan regulasyon an ginkikinahanglan basi makontrol an ira nakakadaot nga mga hingyap ngan paggawi. “An balaud waray pagbuhata tungod ha matadong, kondi tungod ha mga tampalasan ngan mga diri magsinugtanon,” siring ni Pablo. (1 Tim. 1:9, 10) Mga uripon liwat hira han sala, napapagios nga buhaton an “kaburut-on han unod,” nga usa nga waray kalooy nga agaron. (Efe. 2:1-3) Pariho hin mga insekto nga nasulod ha usa nga yahong nga may dugos basi matagbaw an ira karuyag kondi diri na nakakagawas, ginsusunod nira an ira sayop nga mga hingyap ngan nagigin uripon han sala.—Jak. 1:14, 15.
MAY KAGAWASAN HA SULOD HAN KRISTIANO NGA KONGREGASYON
15, 16. Ano nga mga kapulsanan an aton nakarawat tikang han nagin kaapi kita han Kristiano nga kongregasyon, ngan ano nga kagawasan an aton napapahimulsan?
15 Han nagin membro ka han Kristiano nga kongregasyon, waray ka mag-aplay basi magin membro hito. Lugod, nagin membro ka hito tungod kay iginpahirani ka ni Jehova ha kongregasyon. (Juan 6:44) Kay ano nga ginbuhat niya ito? Nakita ba niya nga matadong ka ngan may kahadlok ha Dios? “Diri man,” bangin sumiring ka. Kon sugad, ano an nakita han Dios? Nakita niya an usa nga kasingkasing nga karuyag sumunod ha iya balaud nga naghahatag hin kagawasan, usa nga kasingkasing nga masunod ha iya mahigugmaon nga paggiya. Ha sulod han kongregasyon, ginmamangnoan ni Jehova an imo kasingkasing pinaagi ha pagpakaon ha imo ha espirituwal, paghatag ha imo hin kagawasan tikang ha buwa nga mga katutdoan ngan mga patootoo, ngan pagtutdo ha imo kon paonan-o susubaron an personalidad ni Kristo. (Basaha an Efeso 4:22-24.) Sugad nga resulta, pribilehiyo mo nga magin kaapi han amo la nga katawohan ha kalibotan nga matatawag gud nga “mga tawo nga may kagawasan.”—Jak. 2:12.
16 Hunahunaa ini: Kon kaupod mo an mga nahigugma kan Jehova ha ira bug-os nga kasingkasing, nahahadlok ka ba? Kon nakikiistorya ka ha kabugtoan ha Kingdom Hall, ginkakaptan mo ba hin maopay an imo mga gamit basi diri mawara? Diri gud! Naabat ka nga talwas ngan may kagawasan. Sugad ba liwat hito an imo aabaton kon kaupod mo an iba nga grupo hin mga tawo ha iba nga kahimtang? Syempre diri! Kondi an kagawasan nga imo napapahimulsan yana kaupod han katawohan han Dios sampol pa la han kagawasan nga mahitatabo ha tidaraon.
‘AN MAHIMAYAON NGA KAGAWASAN HAN MGA ANAK HAN DIOS’
17. Paonan-o an ‘pagpadayag han mga anak han Dios’ mabulig ha mga tawo nga magkaada kagawasan?
17 Ha paghisgot han kagawasan nga ihahatag ni Jehova ha iya katawohan dinhi ha tuna, hi Pablo nagsurat: “An ngatanan nga mga binuhat naghuhulat upod in malaomon nga paghingyap nga igpapadayag han Dyos an iya mga anak.” Katapos nagsiring hiya: “Matatalwas an mga binuhat ngahaw tikang han ira pagkaoripon hin pagkadunot ngan makakaangbit han mahimayaon nga kagawasan han mga anak han Dyos.” (Roma 8:19-21, Maopay nga Sumat) An “mga binuhat” nagtutudlok ha katawohan nga may tunan-on nga paglaom, adton magpapahimulos ha ‘pagpadayag’ han dinihogan nga “mga anak han Dyos.” Ito nga ‘pagpadayag’ magtitikang kon ini nga “mga anak” nga ginbanhaw sugad nga mga espiritu ha langit mabulig kan Kristo ha pagbungkag han ngatanan nga maraot ngan ha pagluwas han daku nga panon ngadto ha bag-o nga sistema.—Pah. 7:9, 14.
18. Paonan-o mag-uuswag an kagawasan han masinugtanon nga katawohan, ngan ano nga kagawasan an ira mapapahimulsan ha kataposan?
18 Hito nga panahon an tinubos nga katawohan magpapahimulos hin naiiba gud nga kagawasan—an kagawasan tikang ha impluwensya ni Satanas ngan han mga demonyo. (Pah. 20:1-3) Daku gud ito nga katalwasan! Tikang hito nga panahon, gagamiton han 144,000 nga hadi ngan saserdote an halad lukat para ha kapulsanan han mga tawo tubtob nga an katawohan bug-os na nga magkaada kagawasan ha sala ngan pagkadiri-hingpit. (Pah. 5:9, 10) Katapos masarihan an ira pagtoo, an masinugtanon nga mga tawo magkakaada na han hingpit nga kagawasan nga amo an orihinal nga katuyoan ni Jehova para ha ira—‘an mahimayaon nga kagawasan han mga anak han Dios.’ Hunahunaa la ito! Diri ka na makukurian pagbuhat han husto ha paniplatan han Dios, kay hingpit na an imo lawas, kasingkasing, ngan hunahuna ngan bug-os mo na nga masusubad an mga kalidad han Dios.
19. Ano an kinahanglan nga padayon nga buhaton naton kon karuyag naton magkaada han ‘mahimayaon nga kagawasan han mga anak han Dios’?
19 Imo ba ginhihingyap ‘an mahimayaon nga kagawasan han mga anak han Dios’? Kon amo, hinaot an imo hunahuna ngan kasingkasing padayon nga magpagiya ha “hingpit nga balaud” han kagawasan. Oo, maduruto nga admi an Biblia. Himoa an kamatuoran nga paagi han imo pagkinabuhi. Pag-ampo ha pangaro han baraan nga espiritu. Bug-os nga magpahimulos ha Kristiano nga kongregasyon ngan ha espirituwal nga pagkaon nga igintatagana ni Jehova. Ayaw pagpalimbong kan Satanas ha pagkaada han panhunahuna nga istrikto hinduro an mga paagi han Dios, sugad han iya ginbuhat kan Eva. Oo, tuso gud an Yawa. Kondi sugad han aton hihisgotan ha sunod nga artikulo, posible para ha aton nga diri ‘malimbongan ni Satanas: kay maaram kita han iya mga paagi.’—2 Kor. 2:11.
[Mga Pakiana]
[Mga retrato ha pahina 9]
Ginhihingyap ko la ba gihapon an pipira nga “kagawasan” han kalibotan?
[Mga retrato ha pahina 9]
Ginhimo ko na ba an kamatuoran nga paagi han akon pagkinabuhi?
