Malipayon nga Nagsakripisyo Hira ha Pag-alagad—Ha Ecuador

HI Bruno, usa nga batan-on nga brother ha Italy, kinahanglan maghimo hin importante nga desisyon. Paggagradwar pa la niya ha hayskul ngan hiya an may pinakahitaas nga grado ha ira klase. Gin-aghat hiya han iya mga paryente ngan magturutdo nga mag-eskwela ha kolehiyo. Kondi pipira ka tuig antes hito, igindedikar na ni Bruno an iya kalugaringon kan Jehova ngan nagsaad nga unahon ha iya kinabuhi an kaburut-on han Dios. Ano an iya nagin desisyon? Hiya nagsiring: “Ha akon pag-ampo, nagsiring ako kan Jehova nga tutumanon ko an akon dedikasyon ngan uunahon hiya ha akon kinabuhi. Pero ha akon pag-ampo tangkod nga nagsiring liwat ako nga an akon karuyag, diri an makauuyam nga kinabuhi kondi an kinabuhi nga makalilipay ngan may iba-iba nga buruhaton ha pag-alagad ha iya.”

 Paglabay hin pipira ka tuig, binalhin hi Bruno ha Ecuador, South America. Hiya nagsiring: “Ginbaton ni Jehova an akon pag-ampo labaw pa han akon ginlalaoman.” Waray niya laumi nga pag-abot niya ha Ecuador, may makikilala hiya nga damu nga batan-on nga binalhin liwat didto basi dugangan an ira ginbubuhat ha pag-alagad kan Jehova.

MGA BATAN-ON NGA ‘NAGSASARI KAN JEHOVA’

Pariho han yinukot nga iba pa nga batan-on ha bug-os nga kalibotan, ginkarawat ni Bruno an imbitasyon ni Jehova: “Sarihi ako, . . . kon diri ko ba abrihan ngada ha iyo an mga tamboanan ha langit, ngan buboan kamo han bendisyon.” (Mal. 3:10) Tungod han gugma ha Dios, nagdesisyon hira nga ‘sarihan hi Jehova’ pinaagi han kinaburut-on nga paggamit han ira panahon, kusog, ngan kwarta basi mag-alagad ha iya ha nasud nga mas daku an panginahanglan hin mga magwarali han Ginhadian.

Waray pag-iha katapos nira umabot ha ira bag-o nga toka, nakita nira mismo nga “an babrion banos, kondi an magbabari talagsa.” (Mat. 9:37) Pananglitan, hi Jaqueline nga taga-Germany malipayon nga nagsurat ha sanga nga opisina ha Ecuador: “Sobra duha ka tuig pa la ako nga nag-aalagad ha Ecuador, ngan 13 na an akon Bible study, ngan 4 ha ira an regular nga natambong ha mga katirok. Makalilipay gud ito, diri ba?” Hi Chantal nga taga-Canada nagsiring: “Han 2008, binalhin ako ha usa nga lugar ha Ecuador nga ligid han dagat ngan usa la an kongregasyon. Yana tulo na an kongregasyon didto ngan sobra 30 an payunir. Waray gud  kapariho an kalipay ha pakakita hin damu hinduro nga bag-ohan nga nag-uuswag!” Nagsiring liwat hiya: “Hinin bag-o la, binalhin ako ha usa nga syudad nga mga 2,743 ka metro ha igbaw han Andes nga Kabukiran. Sobra 75,000 an populasyon hito pero usa la an kongregasyon. Mabungahon gud ito nga teritoryo! Nalilipay ako hinduro ha akon ministeryo.”

AN MGA KAKURIAN

Syempre, may mga kakurian liwat ha pag-alagad ha iba nga nasud. Ngani, an pipira hini nga mga batan-on inatubang hin mga ulang antes pa hira bumalhin. Hi Kayla nga taga-United States nagsiring: “Nakapaluya ha akon an negatibo nga reaksyon han kabugtoan didto ha amon, bisan kon maopay an ira intensyon. Diri nira masabtan kon kay ano nga karuyag ko magpayunir ha iba nga nasud. Salit may mga panahon nga naghunahuna ako, ‘Husto ba ini nga akon desisyon?’” Bisan pa hito, nagdesisyon hi Kayla nga bumalhin. Hiya nagsiring: “An damu nga pag-ampo kan Jehova ngan maiha nga pakiistorya ha hamtong nga kabugtoan nakabulig ha akon nga masabtan nga ginbibendisyonan ni Jehova an mga nagbubuhat han ira gimaopayi ha pag-alagad ha iya.”

Para ha damu ha ira, makuri an pag-aram hin iba nga yinaknan. Ini an nahinunumdoman ni Siobhan nga taga-Ireland: “Makuri para ha akon nga diri ko nasisiring an akon karuyag sidngon. Kinahanglan magin mapailubon ako, mauyatom ha pag-aram han yinaknan, ngan taw-an an akon kalugaringon kon nagsasayop ako.” Ini liwat an ginsiring ni Anna nga taga-Estonia: “Mas makuri gud an pag-aram hin Spanish kay ha pagpahiara ha mapaso nga klima, duro nga tapotapo, ngan kawaray hin mapaso nga pankarigo nga tubig. May mga panahon hadto nga karuyag ko na umundang. Kinahanglan mahibaro ako pagpokus ha akon pag-uswag, diri ha akon mga sayop.”

Usa pa nga kakurian nga ira gin-atubang amo an kamingaw. Hi Jonathan nga taga-United States nagsiring: “Waray pag-iha tikang han akon pag-abot, ginmingaw ako ha akon kasangkayan ngan pamilya. Pero nalamposan ko ito pinaagi han pagpokus ha akon personal nga pag-aram ha Biblia ngan ha ministeryo. Waray pag-iha, an akon makalilipay nga mga eksperyensya ha ministeryo ngan an akon bag-o nga kasangkayan ha kongregasyon nakabulig ha akon nga magin malipayon na liwat.”

Usa pa nga kakurian amo an kahimtang han urukyan. Posible nga diri na ito sugad han imo nahiaraan. Hi Beau nga taga-Canada nagsiring: “Ha nasud  nga imo gintikangan, ordinaryo la nga may koryente ngan tubig ha gripo. Kondi dinhi, diri pirme may-ada hito.” Sugad man, ha damu nga nasud diri kombinyente an transportasyon, ngan damu an pobre ngan diri maaram magbasa o magsurat. Hi Ines nga taga-Austria nakakailob ha sugad nga mga kahimtang pinaagi han pagpokus ha mag-opay nga kalidad han mga tawo. “Maabiabihon gud hira, malumo, mabinuligon, ngan mapainubsanon,” siring niya. “Labaw ha ngatanan, interesado hinduro hira nga mahibaro hin dugang pa mahitungod ha Dios.”

‘BENDISYON NGA WARAY IGO NGA SURUDLAN’

Bisan kon ini ngatanan nga batan-on nga nag-aalagad ha Ecuador may mga iginsakripisyo, ira napamatud-an nga hi Jehova nagtatagana hin “labaw gud nga kahuraan labaw pa ha ngatanan” nga ira ginlalaoman. (Efe. 3:20) Oo, para ha ira nakakarawat hira hin ‘bendisyon nga waray igo nga surudlan ha pagkarawat hini.’ (Mal. 3:10) Ini an ira inaabat mahitungod ha ira ministeryo:

Bruno: “Ha tinikangan han akon pag-alagad dinhi ha Ecuador, nakadto ako ha makaruruyag nga rehiyon han Amazon. Ha urhi, binulig ako ha proyekto ha pagpahaluag han sanga nga opisina ha Ecuador. Yana nag-aalagad ako ha Bethel. Han nakadto pa ako ha Italy, ginpili ko nga unahon hi Jehova, ngan gintutuman gud niya an akon ginhingyap nga kinabuhi nga makalilipay ngan may iba-iba nga buruhaton ha pag-alagad ha iya.”

Beau: “Nagin mas duok gud ako kan Jehova, kay ha Ecuador an akon ngatanan nga panahon nagagamit ko ha espirituwal nga mga buruhaton. Ngan nadugangan pa an bendisyon ha akon kay nakakabiyahe ako ha makaruruyag nga mga lugar, nga karuyag ko buhaton tikang pa hadto.”

Anna: “Hadto nahunahuna ko nga sugad nga solo nga sister, imposible ha akon nga magkinabuhi sugad hin misyonero. Pero yana maaram ako nga posible ito. Tungod han bendisyon ni Jehova, malipayon gud ako ha paghimo hin mga disipulo, pagtukod hin mga Kingdom Hall, ngan pagkaada bag-o nga mga sangkay.”

Elke: “Ha akon gintikangan nga nasud ha Austria, agsob ako mag-ampo kan Jehova nga unta magkaada ako bisan usa la nga Bible study. Dinhi, 15 an akon Bible study! Nalilipay gud ako nga makita an kalipay han akon mga Bible study nga nag-uuswag na.”

Joel: “Maopay gud nga eksperyensya an pagbalhin ha iba nga nasud basi mag-alagad kan Jehova. Nahibabaro ka nga mas sumarig gud ha iya, ngan makalilipay makita an iya bendisyon ha imo pangalimbasog! Han binalhin ako dinhi tikang ha United States, ha akon siyahan nga tuig an grupo diin ako nag-aalagad nagdamu tikang ha 6 ngadto ha 21 nga magwarali. An tinambong ha Memoryal inabot hin 110.”

KUMUSTA KA MAN?

Mga batan-on nga kabugtoan, igintutugot ba han iyo kahimtang nga mag-alagad ha nasud nga mas daku an panginahanglan hin mga magwarali han Ginhadian? Syempre, an paghimo hin sugad kadaku nga desisyon nagkikinahanglan hin maopay nga pagplano. Labaw ha ngatanan, ginkikinahanglan an marig-on nga gugma kan Jehova ngan ha igkasi-tawo. Kon may-ada kamo hito nga gugma ngan kwalipikado kamo, ig-ampo kan Jehova an pag-alagad ha iba nga nasud. Sugad man, iistorya ito nga iyo hingyap ha iyo mga kag-anak ngan ha mga tigurang ha iyo kongregasyon. Bangin makadesisyon kamo nga mahimo liwat kamo makigbahin hinin makalilipay ngan makapatagbaw nga paagi han pag-alagad kan Jehova.

[Blurb ha pahina 3]

“An damu nga pag-ampo kan Jehova ngan maiha nga pakiistorya ha hamtong nga kabugtoan nakabulig ha akon nga masabtan nga ginbibendisyonan ni Jehova an mga nagbubuhat han ira gimaopayi ha pag-alagad ha iya.”—Hi Kayla nga taga-United States

[Kahon/Retrato ha pahina 6]

Kon paonan-o mag-aandam ha pag-alagad ha iba nga nasud

• Magkaada regular nga personal nga pag-aram

• Repasoha an Agosto 2011 nga An Aton Ministeryo ha Ginhadian, pahina 4-6

• Pakiistorya ha iba nga nag-alagad na ha iba nga nasud

• Pag-research mahitungod han kultura ngan kasaysayan han nasud

• Tambong hin klase nga nagtututdo hin simple nga mga leksyon mahitungod han yinaknan

[Kahon/Retrato ha pahina 6]

Ginsusuportahan han pipira nga nag-aalagad ha iba nga nasud an ira kalugaringon pinaagi han . . .

• kwarta nga ira natirok ha pagtrabaho hin pipira ka bulan kada tuig ha ira nasud

• plete han ira balay o apartment

• kità han ira negosyo nga ira iginpadumara ha iba

• kità ha pagtrabaho ha Internet

[Mga retrato ha pahina 4, 5]

1 Hi Jaqueline nga taga-Germany

2 Hi Bruno nga taga-Italy

3 Hi Beau nga taga-Canada

4 Hi Siobhan nga taga-Ireland

5 Hi Joel nga taga-United States

6 Hi Jonathan nga taga-United States

7 Hi Anna nga taga-Estonia

8 Hi Elke nga taga-Austria

9 Hi Chantal nga taga-Canada

10 Hi Ines nga taga-Austria