“Natuman an Akon Ginhihingyap”

Regular payunir hi Emilia 15 ka tuig na an naglabay. Kondi kinahanglan umundang hiya pagpayunir. Hinin bag-o la, agsob niya hunahunaon iton makalilipay gud nga panahon ha iya kinabuhi, ngan karuyag niya bumalik pagpayunir.

Kondi daku nga panahon an ginagamit ni Emilia ha iya trabaho ngan tungod hito diri na hiya malipayon. Usa ka beses, nagsiring hiya ha atubangan han iya mga katrabaho: “Unta maibanan an kadamu han oras han akon pagtrabaho!” Hinbaroan ito han iya boss ngan ginpakianhan hiya kon tinuod ba ito. Nagsiring hi Emilia nga tinuod ito. Pero basi matuman an iya hingyap, kinahanglan ito aprobaran han usa nga direktor han kompanya tungod kay palisiya han kompanya nga an ngatanan nga empleyado magtrabaho hin bug-os-panahon. An aton bugto nag-andam ha pakigmiting ha direktor ngan nag-ampo nga magin kalmado hiya ngan maisugon.

Hito nga miting, matinalahuron kondi maisugon nga naghangyo hi Emilia nga ibanan an kadamu han oras han iya pagtrabaho. Gin-esplikar niya nga ha panahon nga waray hiya ha trabaho, ginagamit niya an iya oras ha pagbulig ha iba: “Usa ako han mga Saksi ni Jehova, ngan ginbubuligan ko an mga tawo nga mahibaro mahitungod ha Biblia. Hamubo na gud an moralidad han damu nga tawo yana. Kinahanglan nira hibaroan an klaro nga mga prinsipyo ngan suruklan, ngan mapulsanon gud ha ira an kinaadman tikang ha Biblia nga akon iginsusumat ha ira. Diri ko karuyag nga maapektohan an kalidad han akon trabaho dinhi tungod han akon mga buruhaton katapos han trabaho, pero karuyag ko magkaada dugang nga panahon ha pagbulig ha iba. Amo nga kinahanglan maibanan an kadamu han oras han akon pagtrabaho.”

Namati hin maopay an direktor ngan nagsiring nga hadto naghunahuna liwat hiya nga bumulig ha mga charity. Katapos nagsiring hiya: “Tungod han imo ginsiring nga mga rason, baga hin kinahanglan aprobaran ko an imo ginhahangyo. Pero maaram ka ba nga magutiay an imo sweldo?” Siring ni Emilia nga maaram hiya hito ngan kon kinahanglan, iya papasimplihon an iya pagkinabuhi. Nagsiring liwat hiya: “An akon pinakaimportante nga tumong amo an pagbuhat hin makakabulig gud ha mga tawo.” Ginsidngan hiya han direktor: “Bilib ako ha mga tawo nga kinaburut-on nga ginagamit an ira panahon ha pagbulig ha iba.”

Hi Emilia pa gud la an empleyado hito nga kompanya nga gin-aprobaran nga maibanan an kadamu han oras han pagtrabaho. Yana nagtatrabaho hiya hin upat la ka adlaw ha usa ka semana. Nahipausa gud hiya han gindugangan an iya sweldo, ngan pariho na ito han iya sweldo hadto! Hiya nagsiring: “Natuman an akon ginhihingyap, ngan makakabalik na ako ha pagregular payunir!”

Ginhunahuna mo na ba nga maghimo hin mga pagbag-o ha imo kinabuhi basi makagpayunir o makabalik pagpayunir?

[Blurb ha pahina 32]

Ginsidngan hiya han direktor: “Bilib ako ha mga tawo nga kinaburut-on nga ginagamit an ira panahon ha pagbulig ha iba”