“Ako Upod ha Iyo”
“Ako Upod ha Iyo”
“Damu an madalagan ngadto nganhi, ngan an hibaro magdudugang.”—DAN. 12:4.
ANO AN IMO BATON?
Ha moderno nga panahon, paonan-o naagian an tinuod nga kahibaro?
Paonan-o nagdamu an mga kinarawat han kamatuoran?
Ha ano nga mga paagi nagin hura an husto nga kahibaro?
1, 2. (a) Kay ano nga maaram kita nga hi Jesus kaupod han iya mga sakop yana ngan makakaupod nira ha tidaraon? (b) Sumala ha Daniel 12:4, ano an magigin resulta han pag-aram hin maopay han Kasuratan?
HUNAHUNAA nga aadto ka ha Paraiso. Kada aga nagmamata ka nga maopay an pag-abat ngan eksayted ha mga buruhaton hito nga adlaw. Waray ka inaabat nga kangutngot o kaul-ol. Waray na an anoman nga imo sakit hadto. Hingpit na an imo pagkita, pagpamati, pagbaho, pag-abat, ngan panrasa. Makusog ka, nalilipay ka ha imo ginbubuhat, damu an imo kasangkayan, ngan waray ka na nababarak-an. Ito an mga bendisyon nga imo mapapahimulsan ilarom han Ginhadian han Dios. Hi Kristo Jesus, an pinili nga Hadi, magbibendisyon ha iya mga sakop ngan magtututdo ha ira han kahibaro mahitungod kan Jehova.
2 Hito nga panahon, hi Jehova makakaupod han iya maunungon nga mga surugoon samtang nakikigbahin hira ha pagtutdo nga buruhaton ha bug-os nga kalibotan. Damu ka siglo na nga an Dios ngan an iya Anak kaupod han mga matinumanon. Antes hi Jesus bumalik ha langit, nagsaad hiya ha iya maunungon nga mga disipulo nga hiya makakaupod nira. (Basaha an Mateo 28:19, 20.) Basi maparig-on an aton pagtoo hini nga saad, aton usisahon an usa nga tagna nga iginsurat ni Daniel ha Babilonya sobra 2,500 ka tuig na an naglabay. Mahitungod han ‘panahon han kataposan,’ an aton panahon yana, hiya nagsurat: “Damu an madalagan ngadto nganhi, ngan an hibaro magdudugang.” Nagtutudlok ini han tinuod nga kahibaro mahitungod ha Dios. (Dan. 12:4) Kon sasabton ha simboliko nga paagi ngan uyon ha mga nahitatabo ha aton panahon, an Hebreo nga pulong nga iginhubad dinhi nga “madalagan ngadto nganhi” nagpapasabot hin pag-usisa hin maopay. Hura gud nga bendisyon an magigin resulta hito! Adton nag-aaram hin maopay han Kasuratan bibendisyonan hin tinuod, o husto, nga kahibaro ha Pulong han Dios. An tagna nag-unabi liwat nga damu an makarawat hini nga kahibaro. Dugang pa, ini nga kahibaro “magdudugang” o magigin hura. Ini nga mga kamatuoran hibabaroan han mga tawo ha bisan diin. Samtang gin-uusisa naton kon paonan-o natuman ini nga tagna, masasabtan naton nga hi Jesus kaupod han iya mga disipulo yana ngan hi Jehova may kapas gud ha pagtuman han ngatanan nga iya saad.
NAAGIAN HAN SINSERO NGA MGA KRISTIANO AN TINUOD NGA KAHIBARO
3. Ano an nahitabo ha tinuod nga kahibaro han namatay an mga apostol?
3 Han namatay an mga apostol, nagtikang an igintagna nga pag-apostata tikang ha tinuod nga Kristianidad ngan madagmit nga nagsarang sugad hin kalayo. (Buh. 20:28-30; 2 Tes. 2:1-3) Ha sulod hin damu ka siglo, diri la an mga diri pamilyar ha Biblia an waray magkaada tinuod nga kahibaro kondi pati liwat an nag-aangkon nga mga Kristiano. Bisan kon an mga lider han Kakristianohan nasiring nga natoo hira ha Kasuratan, nagtututdo hira hin mga buwa—“mga pagturon-an han mga yawa” nga nagpapasipara ha Dios. (1 Tim. 4:1) An katawohan ha kabug-osan diri maaram han kamatuoran mahitungod ha Dios. Upod han mga doktrina nga igintutdo han mga apostata amo an buwa nga katutdoan nga an Dios usa nga Trinidad, an kalag diri namamatay, ngan an iba nga kalag ginsasakit ha waray kataposan ha naglalaga nga impyerno.
4. Paonan-o an usa nga grupo han mga Kristiano han dekada han 1870 nagtikang pamiling han tinuod nga kahibaro?
4 Kondi han dekada han 1870, mga 40 ka tuig antes magtikang an “kataposan nga mga adlaw,” an usa nga gutiay nga grupo han sinsero nga mga Kristiano ha Pennsylvania, U.S.A., nagkatirok basi maduruto nga pag-adman an Biblia ngan pamilngon an tinuod nga kahibaro. (2 Tim. 3:1) Gintawag nira an ira kalugaringon nga mga Estudyante han Biblia. Diri hira an “mga makinaadmananon ngan masabuton” nga sumala kan Jesus diri makakaagi han tinuod nga kahibaro. (Mat. 11:25) Mapainubsanon hira nga mga tawo nga sinsero nga naruruyag pagbuhat han kaburut-on han Dios. Ira ginbasa, ginhisgotan, ngan ginpamalandong hin maopay an Kasuratan, ngan nag-ampo hira para han giya han Dios. Ira liwat gintanding an mga teksto ha Biblia ngan gin-usisa an mga sinurat han iba nga namiling liwat han kamatuoran. Ini nga mga Estudyante han Biblia hinay-hinay nga nakasabot han mga kamatuoran nga damu ka siglo nga waray masabti.
5. Ano an katuyoan han mga tract nga The Old Theology?
5 Bisan kon an mga Estudyante han Biblia nalipay hinduro ha ira mga hinbabaroan, waray hira magpahitaas tungod hito, ngan waray liwat nira angkona nga bag-o an ira nadiskobrehan. (1 Kor. 8:1) Lugod, nagpublikar hira han mga tract nga The Old Theology. Katuyoan hito nga buligan an mga magbarasa nga hibaroan an mga kamatuoran nga nakarekord ha Biblia. An siyahan hito nga mga tract nagtanyag hin “dugang nga barasahon nga makakabulig ha pag-aram han Biblia, basi maisalikway an ngatanan nga buwa nga tradisyon han mga tawo ngan bug-os nga maibalik an daan nga teolohiya han aton Ginoo ngan han mga apostol.”—The Old Theology, Num. 1, Abril 1889, p. 32.
6, 7. (a) Ano nga mga kamatuoran an aton nasabtan tikang han dekada han 1870? (b) Ano nga mga kamatuoran an nalipay ka gud nga imo nahibaroan?
6 Damu gud nga makaruruyag nga kamatuoran an hinbaroan na tikang hito nga panahon sobra 100 ka tuig na an naglabay! a Ini nga mga kamatuoran diri kay makauuyam ngan diri-praktikal nga mga butang nga pagdidebatihan han mga teologo. Makalilipay ini nga mga kamatuoran nga naghahatag hin katuyoan ha aton kinabuhi ngan nabulig ha aton nga magin malipayon ngan magkaada paglaom. Nabulig ito ha aton nga makilala hi Jehova—an iya mahigugmaon nga personalidad ngan an iya mga katuyoan. Iginpapatin-aw liwat hito kon hin-o hi Jesus, kay ano nga kinanhi hiya ha tuna ngan namatay, ngan ano an iya ginbubuhat yana. Inin birilhon nga mga kamatuoran nagsusumat kon kay ano nga gintutugotan han Dios an karaotan, kay ano nga namamatay kita, paonan-o kita mag-aampo, ngan paonan-o kita magigin tinuod nga malipayon.
7 Nasasabtan na naton yana an kahulogan han mga tagna nga nagpabilin nga “sinadhan” hin maiha nga panahon kondi natutuman na hinin panahon han kataposan. (Dan. 12:9) Upod hini an mga tagna nga mababasa ha iba-iba nga bahin han Biblia, labi na ha mga Ebanghelyo ngan ha libro han Pahayag. Ginbuligan pa ngani kita ni Jehova nga masabtan an mga hitabo nga diri nakikita han aton mga mata—an kahitrono ni Jesus sugad nga Hadi, an girra ha langit, ngan an paglaboga kan Satanas nganhi ha tuna. (Pah. 12:7-12) Ginbuligan liwat kita han Dios nga masabtan an kahulogan han mga butang nga aton nakikita—girra, linog, mga sakit, kakulang hin pagkaon, ngan mga tawo nga waray kahadlok ha Dios nga nagigin hinungdan nga mas makuri an pagkinabuhi hinin “magpakalilisang nga mga panahon.”—2 Tim. 3:1-5; Luk. 21:10, 11.
8. Hin-o an aton ginpapasidunggan tungod han mga butang nga aton nakita ngan nabatian?
8 Hi Jesus nagsiring ha iya mga disipulo: “Bulahan an mga mata, nga nakakakita han iyo pinanhikit-an. Kay ako nasiring ha iyo, nga damu an mga manaragna ngan mga kahadian in nagkakaruyag pagkita han iyo pinanhikit-an, ngan hira waray magpakakita; ngan pagpakabati han iyo pinanhibatian, ngan hira waray pagpakabati.” (Luk. 10:23, 24) Ito an aton inaabat yana. Ginpapasidunggan naton hi Jehova nga Dios kay ginbuligan kita niya nga makita ngan mabatian ito nga mga butang. Ngan mapasalamaton gud kita nga iya ginagamit an iya baraan nga espiritu basi giyahan kita “ngadto han ngatanan nga kamatuoran”! (Basaha an Juan 16:7, 13.) Hinaot pirme naton pabilhan an tinuod nga kahibaro ngan buligan an iba nga hibaroan ito!
DAMU AN KINARAWAT HAN TINUOD NGA KAHIBARO
9. Ano an iginpanawagan ha Abril 1881 nga gowa hini nga magasin?
9 Han Abril 1881, waray pa magduha ka tuig katapos ipublikar an siyahan nga gowa han Watch Tower, ini nga magasin nanawagan para hin 1,000 nga magsarangyaw. An artikulo nagsiring: “Para ha mga makakagahin hin katunga o sobra pa han ira panahon para ha buruhaton han Ginoo, karuyag namon isuhestyon . . . ini: Nga kumadto kamo ha dagku o gudti nga syudad, depende ha iyo abilidad, sugad nga Colporteur o Ebanghelista, pamilnga ha tagsa nga lugar an sinsero nga mga Kristiano, nga damu ha ira an may kadasig para ha Dios, pero diri uyon ha kahibaro; ipahibaro ha ira an hura nga grasya han Aton Amay, ngan an pagkamakaruruyag han Iya pulong.”
10. Ano an ginbuhat han damu nga tawo han ira nabasa an panawagan para hin 1,000 nga magsarangyaw?
10 Iginpakita hito nga panawagan nga nasantop han mga Estudyante han Biblia nga an pagsangyaw han maopay nga sumat usa nga importante nga buruhaton han tinuod nga mga Kristiano. Hito nga panahon, pipira pa la ka gatos an natambong ha mga katirok han mga Estudyante han Biblia, salit an ginios uyon ha panawagan diri sugad kadamu han ira ginlalaoman. Kondi damu han nakabasa hin tract o magasin an nakasantop nga ito an kamatuoran, ngan karuyag nira isumat ito ha iba. Pananglitan, han 1882 usa nga lalaki ha London, England, nga nakabasa han usa nga gowa han Watch Tower ngan usa nga bokleta nga iginpublikar han mga Estudyante han Biblia an nagsurat: “Alayon tutdui ako kon paonan-o magsasangyaw ngan kon ano an isasangyaw basi matuman an sagrado nga buruhaton nga iginpapabuhat han Dios.”
11, 12. (a) Ano an katuyoan han mga colporteur nga pariho liwat han aton katuyoan yana? (b) Paonan-o an mga colporteur nagporma hin “mga klase,” o kongregasyon?
11 Han 1885, mga 300 nga Estudyante han Biblia an colporteur. An katuyoan hiton bug-os-panahon nga mga ministro pariho liwat han aton katuyoan yana—buligan an mga tawo nga magin mga disipulo ni Jesu-Kristo. Kondi an paagi han ira pagsangyaw iba ha aton paagi. Yana, kasagaran na nga gintatag-usa-usa naton an pagdumara hin pag-aram ha Biblia. Katapos gin-iimbitar naton an Bible study nga tumambong ha mga katirok han kongregasyon. Kondi hadto, an mga colporteur nananaltag hin mga libro ngan gintitirok nira an mga interesado basi pag-adman an Biblia sugad nga grupo. Imbes nga dumarahan hin pag-aram an tagsa nga indibiduwal, nagporma hira hin “mga klase,” o kongregasyon.
12 Pananglitan, han 1907, usa nga grupo han mga colporteur an naglibot ha usa nga syudad basi pamilngon an mga may kopya han Millennial Dawn (gintawag liwat nga Studies in the Scriptures). An Watch Tower nagreport: “Ini [nga mga interesado] gin-imbitar ha gutiay nga katirok ha usa han ira mga balay. Ha bug-os nga adlaw han Domingo, an Colporteur nagpahayag ha ira mahitungod han katuyoan han Dios para ha katawohan, ngan pagkasunod nga Domingo, iya gin-aghat hira nga magkaada regular nga mga katirok.” Han 1911, ginbag-o han kabugtoan ini nga pamaagi. Singkwentay-otso nga brother an kinadto ha iba-iba nga lugar ha United States ngan Canada basi magpahayag ha publiko. Ginkuha nira an mga ngaran ngan adres han mga interesado nga tinambong ngan gin-organisa hira nga magkatirok ha pribado nga mga balay basi magporma hin bag-o nga “mga klase.” Han 1914, may 1,200 na nga kongregasyon han mga Estudyante han Biblia ha bug-os nga kalibotan.
13. Ano an imo nahipapausahan gud mahitungod ha kahaluag han naabot han tinuod nga kahibaro?
13 Yana, may-ada na mga 109,400 nga kongregasyon ha bug-os nga kalibotan ngan mga 895,800 nga payunir. Haros walo ka milyon an kinarawat han tinuod nga kahibaro ngan nag-aaplikar hito ha ira kinabuhi. (Basaha an Isaias 60:22.) b Urusahon gud ini, kay nagtagna hi Jesus nga an iya mga disipulo “pagdudumtan han ngatanan” tungod han iya ngaran. Nagsiring liwat hiya nga an iya mga sumurunod pagtitimarauton, piprisuhon, ngan papatayon pa ngani. (Luk. 21:12-17) Bisan pa han pagkontra ni Satanas, han iya mga demonyo, ngan han damu nga tawo, an katawohan ni Jehova malampuson gud ha pagtuman han sugo ha ira nga maghimo hin mga disipulo. Yana nagsasangyaw hira ha “bug-os nga kalibotan,” tikang ha gipapasoi ngadto ha gihahagkuti nga mga lugar, ha kabukiran, mga disyerto, mga syudad, ngan ha pinakainteryor nga mga lugar. (Mat. 24:14) Diri gud ini mahihimo kon waray an bulig han Dios.
AN TINUOD NGA KAHIBARO NAGIN HURA
14. Paonan-o an tinuod nga kahibaro nagin hura pinaagi han inimprinta nga mga publikasyon?
14 An tinuod nga kahibaro ‘nagdugang,’ o nagin hura, tungod kay damu an nagpapasamwak han maopay nga sumat. Nagin hura liwat ito pinaagi han inimprinta nga mga publikasyon. Han Hulyo 1879, an mga Estudyante han Biblia nagpublikar han siyahan nga gowa hini nga magasin, nga hito nga panahon gintatawag nga Zion’s Watch Tower and Herald of Christ’s Presence. Nagbayad hira ha usa nga kompanya basi mag-imprinta hin 6,000 nga kopya hito ha English nga yinaknan. An 27-anyos nga hi Charles Taze Russell an ginpili nga magin editor, ngan lima pa nga hamtong nga brother an regular nga nagsusurat hin mga artikulo hito nga magasin. Yana, an The Watchtower iginpupublikar na ha 195 nga yinaknan. Ini an magasin nga may pinakadaku nga sirkulasyon ha bug-os nga tuna, ngan 42,182,000 nga kopya an gin-iimprinta kada gowa. Sunod hito an Awake! nga may sirkulasyon nga 41,042,000 ha 84 nga yinaknan. Dugang pa, mga 100 ka milyon nga libro ngan Biblia an gin-iimprinta kada tuig.
15. Paonan-o ginsusuportahan an pag-imprinta han aton mga publikasyon?
15 Inin daku hinduro nga buruhaton ginsusuportahan pinaagi hin boluntaryo nga mga donasyon. (Basaha an Mateo 10:8.) Nahipapausa gud hito an mga aada ha industriya han pag-imprinta kay maaram hira nga mahal an mga makina nga ginagamit ha pag-imprinta, an papel, tinta, ngan iba pa nga materyales. Usa nga brother nga namamalit hin mga materyales para ha mga imprintahan ha Bethel an nagsiring: “An mga negosyante nga nabisita ha aton mga imprintahan nahipapausa nga an sugad ka-hi-tech nga pasilidad nga nag-iimprinta hin damu hinduro nga publikasyon ginsusuportahan hin boluntaryo nga mga donasyon. Nahipapausa liwat hira nga an mga nagtatrabaho ha Bethel mga batan-on pa ngan maglipayon.”
AN TUNA MAPUPUNO HAN KAHIBARO MAHITUNGOD HA DIOS
16. Ano an katuyoan han pagpasamwak han tinuod nga kahibaro?
16 May maopay nga katuyoan nga an tinuod nga kahibaro nagin hura. Kaburut-on han Dios nga “an ngatanan nga mga tawo maluwas, ngan nga makadangat ha pagkilala han kamatuoran.” (1 Tim. 2:3, 4) Karuyag ni Jehova nga an mga tawo mahibaro han kamatuoran basi makagsingba hira ha iya ha husto nga paagi ngan makakarawat han iya bendisyon. Pinaagi ha pagpasamwak han tinuod nga kahibaro, gintitirok ni Jehova an matinumanon nga nanhibilin han dinihogan nga mga Kristiano. Gintitirok liwat niya an daku nga panon tikang ha “tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan,” nga may paglaom nga mabuhi ha tuna ha waray kataposan.—Pah. 7:9.
17. Ano an ginpapamatud-an han pagdamu han tinuod nga mga magsiringba?
17 An pagdamu han tinuod nga mga magsiringba ha bug-os nga tuna hinin naglabay nga 130 ka tuig marig-on nga nagpapamatuod nga hi Jehova ngan hi Jesu-Kristo nga Iya pinili nga Hadi kaupod han Iya mga surugoon dinhi ha tuna pinaagi ha paggiya, pagpanalipod, pag-organisa, ngan pagtutdo ha ira. An ira pagdamu nagpapakita liwat nga sigurado nga matutuman an mga saad ni Jehova ha tidaraon. “An tuna mapupuno han hibaro ni Jehova, sugad nga an katubigan nagpupuno han dagat.” (Isa. 11:9) Makalilipay gud nga mga bendisyon an mapapahimulsan han katawohan hito nga panahon!
[Mga footnote]
a Magpapahimulos ka ha pagkita han mga DVD nga Jehovah’s Witnesses—Faith in Action, Part 1: Out of Darkness ngan Jehovah’s Witnesses—Faith in Action, Part 2: Let the Light Shine.
[Mga Pakiana]
[Retrato ha pahina 6]
An mga Estudyante han Biblia mapainubsanon ngan karuyag gud magbuhat han kaburut-on han Dios
[Retrato ha pahina 7]
Ginpapabilhan ni Jehova an imo pangalimbasog ha pagpasarang han tinuod nga kahibaro mahitungod ha Dios
