Gumawi Sugad nga mga Tuminungnong han Ginhadian!
Gumawi Sugad nga mga Tuminungnong han Ginhadian!
‘Manggawi kamo nga takos ha maopay nga sumat.’—FIL. 1:27.
ANO AN IMO BATON?
Hin-o an mahimo magin mga tuminungnong han Ginhadian?
Ano an kinahanglan naton buhaton may kalabotan han yinaknan, kasaysayan, ngan mga balaud han Ginhadian?
Paonan-o iginpapakita han mga tuminungnong han Ginhadian nga hinigugma nira an mga balaud han Dios?
1, 2. Kay ano nga an sagdon ni Pablo ha kongregasyon ha Filipos may espesyal nga kahulogan?
GIN-AGHAT ni apostol Pablo an kongregasyon ha Filipos nga ‘manggawi nga takos ha maopay nga sumat.’ (Basaha an Filipos 1:27.) An Griego nga pulong nga gin-gamit ni Pablo para ha “manggawi” mahimo liwat ighubad nga “gumawi sugad nga mga tuminungnong.” Ito nga mga pulong may espesyal nga kahulogan ha kongregasyon ha Filipos. Kay ano? Tungod kay an Filipos baga hin usa han mga syudad nga an mga umurukoy gintagan hin pribilehiyo nga magin mga tuminungnong han Roma. An mga may Romano nga pagkatuminungnong ha Filipos ngan ha bug-os nga Imperyo han Roma nagrarakudaku hito ngan nagpapahimulos hin espesyal nga proteksyon ilarom han balaud han Roma.
2 An mga membro han kongregasyon ha Filipos may mas maopay pa nga rason nga magrakudaku. Ginpahinumdoman hira ni Pablo nga sugad nga mga dinihogan nga Kristiano an ira pagkatuminungnong aadto “ha langit.” (Fil. 3:20) Mga tuminungnong hira diri han tawhanon la nga imperyo, kondi han Ginhadian han Dios. Salit nakapahimulos hira hin waray kapariho nga panalipod ngan mga benepisyo.—Efe. 2:19-22.
3. (a) Hin-o an may higayon nga magin tuminungnong han Ginhadian? (b) Ano an aton hihisgotan hini nga artikulo?
3 An sagdon ni Pablo nga “gumawi sugad nga mga tuminungnong” naaplikar siyahan ha mga magmamando ha langit kaupod ni Kristo. (Fil. 3:20) Kondi mahimo liwat ito iaplikar ha mga magigin sakop han Ginhadian han Dios dinhi ha tuna. Kay ano? Kay an ngatanan nga dedikado nga Kristiano nag-aalagad ha uusa la nga Hadi, hi Jehova, ngan kinahanglan magkinabuhi uyon ha pariho nga mga suruklan. (Efe. 4:4-6) Yana, an mga tawo nangangalimbasog gud nga magin tuminungnong han usa nga riko nga nasud. Labi na gud nga sadang naton pabilhan an higayon nga magin tuminungnong han Ginhadian! Basi mas maapresyar naton ito nga pribilehiyo, aton hisgotan an pipira nga kaparihoan han mga ginkikinahanglan basi magin tuminungnong han usa nga nasud ngan han mga ginkikinahanglan basi magin tuminungnong han Ginhadian han Dios. Katapos aton hihisgotan an tulo nga butang nga sadang naton buhaton basi matipigan an pagin tuminungnong han Ginhadian.
MGA GINKIKINAHANGLAN BASI MAGIN TUMINUNGNONG
4. Ano an putli nga yinaknan, ngan paonan-o kita “nagyayakan” hito?
4 Pag-aram han yinaknan. Ha pipira nga gobyerno han tawo, an naruruyag magin tuminungnong han ira nasud kinahanglan maaram magyakan han ira nangunguna nga yinaknan. Bisan kon an mga tawo naaprobaran na sugad nga tuminungnong, bangin damu pa ka tuig nga mangalimbasog hira basi makayakan hin maopay han bag-o nga yinaknan. Bangin mahibaro dayon hira han grammar kondi bangin ginkikinahanglan an mas daku nga panahon basi mahibaro han husto nga pagluwas han mga pulong. Ha pariho nga paagi, ginkikinahanglan han Ginhadian han Dios nga an mga tuminungnong hito mahibaro han gintatawag han Biblia nga “uray” o putli nga yinaknan. (Basaha an Sepania 3:9.) Ano ito nga yinaknan? Ito an kamatuoran mahitungod ha Dios ngan ha iya mga katuyoan nga aada ha Biblia. “Nagyayakan” kita han putli nga yinaknan kon nagawi kita uyon ha mga balaud ngan prinsipyo han Dios. An mga tuminungnong han Ginhadian han Dios bangin madagmit nga nahibaro han nangunguna nga mga katutdoan ha Biblia ngan nagpabawtismo. Kondi katapos han bawtismo, kinahanglan hira mangalimbasog nga mas mapauswag an “pagyakan” han putli nga yinaknan. Ha ano nga paagi? Kinahanglan padayon nga mangalimbasog an tagsa ha aton nga iaplikar an mga prinsipyo nga aton hinbabaroan ha Biblia.
5. Kay ano nga sadang kita mangalimbasog nga hibaroan an ngatanan nga puydi naton hibaroan mahitungod han kasaysayan han organisasyon ni Jehova?
5 Pag-aram han kasaysayan. An usa nga naruruyag magin tuminungnong han usa nga nasud bangin kinahanglan mahibaro han kasaysayan hito. Ha pariho nga paagi, an naruruyag magin tuminungnong han Ginhadian sadang mangalimbasog nga hibaroan an ngatanan nga puydi hibaroan mahitungod han Ginhadian han Dios. Tagda an susbaranan han mga anak ni Kore, nga nag-alagad ha kadaan nga Israel. Nalipay gud hira ha Jerusalem ngan ha lugar diin hira nagsisingba ngan ha pagsumat han kasaysayan han syudad, diri tungod kay makaruruyag ito, kondi tungod kay ito “an sawang [o bungto] han daku nga Hadi,” hi Jehova. Ito an sentro han putli nga pagsingba ngan dida hito igintututdo an Balaud ni Jehova. Ha mga sakop han “daku nga Hadi” iginpakita ni Jehova an iya mahigugmaon nga pagkabuotan. (Basaha an Salmo 48:1, 2, 9, 12, 13.) Pariho ha ira, ginhihingyap mo ba liwat nga pag-adman ngan isumat an kasaysayan han tunan-on nga bahin han organisasyon ni Jehova? Samtang nagtitikadamu an imo hinbabaroan mahitungod han organisasyon han Dios ngan kon paonan-o ginbubuligan ni Jehova an iya katawohan, mas magigin tinuod ha imo an Ginhadian han Dios. Magpaparig-on ini han imo hingyap nga isangyaw an maopay nga sumat han Ginhadian.—Jer. 9:24; Luk. 4:43.
6. Kay ano nga makatadunganon nga maglaom hi Jehova nga mahibaro ngan magsunod kita han mga balaud ngan prinsipyo han Ginhadian?
6 Hibaroi an mga balaud. Igin-oobligar han mga gobyerno han tawo nga an ira mga sakop mahibaro ngan magsunod han mga balaud han nasud. Salit makatadunganon la nga maglaom hi Jehova nga mahibaro kita ngan magsunod ha iya mga balaud ngan prinsipyo para ha ngatanan nga tuminungnong han Ginhadian. (Isa. 2:3; Juan 15:10; 1 Juan 5:3) An balaud han tawo diri hingpit ngan bangin diri makatadunganon. Kondi “an balaud ni Jehova hingpit.” (Sal. 19:7) Nalilipay ba kita ha balaud han Dios ngan nagbabasa han iya Pulong kada adlaw? (Sal. 1:1, 2) An paagi la nga mahibaroan naton an balaud han Dios amo an pag-aram hito. Waray iba nga makakahimo hito para ha aton.
AN MGA TUMINUNGNONG HAN GINHADIAN NAHIGUGMA HAN MGA BALAUD HAN DIOS
7. Ano nga mas hitaas nga suruklan an ginsusunod han mga tuminungnong han Ginhadian?
7 Basi magpabilin nga tuminungnong han Ginhadian, kinahanglan hibaroan naton an mga balaud han Dios ngan higugmaon ito. Damu nga tuminungnong han mga nasud an nasiring nga nauyon hira han mga balaud hito. Kondi kon an usa nga balaud diri kombinyente ha ira ngan waray nagkikita, diri nira ito ginsusunod. Kasagaran na nga karuyag la nira mapalipay an mga tawo. (Kol. 3:22) Mas hitaas an suruklan nga ginsusunod han mga tuminungnong han Ginhadian. Nalilipay kita pagsunod han mga balaud han Dios bisan kon waray tawo nga nagkikita ha aton. Kay ano? Tungod kay hinigugma naton hi Jehova, an naghimo hito nga mga balaud.—Isa. 33:22; basaha an Lukas 10:27.
8, 9. Paonan-o mo hibabaroan kon tinuod ba nga hinigugma mo an mga balaud han Dios?
8 Paonan-o mo hibabaroan kon tinuod ba nga hinigugma mo an mga balaud han Dios? Usisaha an imo reaksyon kon ginsasagdonan ka may kalabotan ha mga butang nga para ha imo ikaw an magdidesisyon, pananglitan mahitungod ha pamado ngan pamostura. Antes ka nagin tuminungnong han Ginhadian, bangin ha imo pamado waray ka labot ha sisidngon han iba, o bangin nagsusul-ot ka hin mga bado nga nakakapukaw hin imoral nga panhunahuna. Samtang naghihilarom an imo gugma ha Dios, nahibaro ka pagbado ha paagi nga nagpapasidungog ha iya. (1 Tim. 2:9, 10; 1 Ped. 3:3, 4) Bangin maghunahuna ka nga waray na problema an imo pamado. Kondi ano man kon sidngan ka hin tigurang nga an imo pamado nakakapakdol ha damu nga kabugtoan ha kongregasyon? Ano an imo reaksyon? Mangangatadongan ka ba, masisina, o ipapadayon mo la gihapon an imo karuyag? Usa han pinakaimportante nga balaud han Ginhadian han Dios nga sadang sundon han ngatanan nga tuminungnong amo an pagsubad kan Kristo. (1 Ped. 2:21) May kalabotan han susbaranan ni Jesus, hi apostol Pablo nagsurat: “An tagsa-tagsa ha aton maglipay ha iya amyaw tungod ha maopay, ngan karig-onan. Kay hi Kristo waray man liwat malipay ha iya kalugaringon.” (Roma 15:2, 3) Basi matipigan an kamurayawan han kongregasyon, an usa nga hamtong nga Kristiano kinahanglan pirme maglikay ha pagbuhat hin mga butang nga makakadaot ha konsensya han iba.—Roma 14:19-21.
9 Yana aton hisgotan an aton panhunahuna mahitungod ha sekso ngan pag-asawa. Adton diri pa mga tuminungnong han Ginhadian han Dios bangin maghunahuna nga diri sayop an homoseksuwalidad, pornograpiya, pag-adulteryo, o pagdiborsyo. Ginsalikway na han mga tuminungnong han Ginhadian an sugad hito nga sayop ngan makikalugaringon nga mga panhunahuna. Bisan kon damu nga Kristiano an imoral an pagkinabuhi hadto, yana ginhuhunahuna nira an sekso ngan pag-asawa sugad nga mga regalo han Dios. Hinigugma nira an mga balaud ni Jehova ngan maaram hira nga an nagtatalapas han mga balaud han Dios mahitungod han sekso ngan pag-asawa diri kwalipikado magin tuminungnong han Ginhadian. (1 Kor. 6:9-11) Kondi ginkikilala liwat nira nga an kasingkasing malimbungon. (Jer. 17:9) Salit ira gin-aapresyar an espisipiko nga mga pahamangno nga mabulig ha ira nga matipigan an hitaas nga mga suruklan ha moral.
GIN-AAPRESYAR HAN MGA TUMINUNGNONG HAN GINHADIAN AN MGA PAHAMANGNO
10, 11. Ano nga napapanahon nga mga pahamangno an iginhahatag han Ginhadian han Dios, ngan ano an imo inaabat ha sugad hito nga mga pahamangno?
10 An mga gobyerno han tawo bangin maghatag hin mga pahamangno mahitungod han pagkaon ngan medisina. Syempre, diri ngatanan nga pagkaon ngan medisina nakakadaot. Kondi kon an usa nga produkto mahimo makadaot, an gobyerno naghahatag hin pahamangno basi mapanalipdan an mga tuminungnong hito. Kon diri ito buhaton, may baratunon an gobyerno. Ha pariho nga paagi, an Ginhadian han Dios naghahatag hin napapanahon nga mga pahamangno mahitungod han espisipiko nga mga peligro ha moral ngan espirituwal. Pananglitan, an Internet mapulsanon ha komunikasyon, edukasyon, ngan kaliawan. An organisasyon han Dios nagamit han Internet ngan damu nga kaopayan an nahihimo tungod hito. Kondi, damu nga site an nakakadaot ha moral ngan espirituwal. An mga Web site nga nagpapakita hin pornograpiya nakakadaot gud han espirituwalidad han mga tuminungnong han Ginhadian. Damu ka tuig na nga an matinumanon nga uripon nga klase nagpapahamangno ha aton mahitungod hini. Mapasalamaton gud kita hini nga mga pahamangno!
11 Hinin bag-o la, usa pa nga klase hin web site an nagin popular gud, nga mapulsanon kon maghihirot ha paggamit hito. Kondi ini nga mga site nga kilala ha tawag nga social networking Web site mahimo gud liwat makadaot. Pinaagi hito, mahimo kita magkaada maraot nga mga kaupod. (1 Kor. 15:33) Salit diri urusahon nga an organisasyon han Dios naghatag hin timbang nga mga pahamangno may kalabotan ha paggamit hito. Nabasa mo ba an ngatanan nga bag-o la nga iginpublikar han matinumanon nga uripon mahitungod ha paggamit han social networking? Diri gud maaramon kon maggamit kita hini nga mga site nga waray pa naton mabasa ini nga mga pahamangno! a Sugad ito hin pagtumar hin maisog nga medisina nga diri ginbabasa an pahamangno ha surudlan hito.
12. Kay ano nga diri maaramon an pagbalewaray han mga pahamangno?
12 An mga nagbabalewaray han mga pahamangno nga iginhahatag han matinumanon nga uripon diri makakalikay han kadaot nga resulta hito ha ira kalugaringon ngan ha ira mga hinigugma. An iba naadik na ha pagkinita hin pornograpiya o nagbuhat hin imoralidad ngan naghuhunahuna nga diri nakikita ni Jehova an ira ginbubuhat. Diri gud maaramon an paghunahuna nga maitatago naton kan Jehova an aton ginbubuhat! (Prob. 15:3; basaha an Hebreo 4:13.) Karuyag han Dios nga buligan an sugad nga mga indibiduwal ngan ginpapagios niya an iya mga representante dinhi ha tuna basi buligan hira. (Gal. 6:1) Kondi, sugad la nga mahimo kanselahon han gobyerno han tawo an pagkatuminungnong han usa nga nakabuhat hin krimen, kakanselahon liwat ni Jehova an pagkatuminungnong han usa nga nagtatalapas han iya mga suruklan nga diri nagbabasol. b (1 Kor. 5:11-13) Kondi, maloloy-on hi Jehova. An mga nagbabasol ngan nagbabag-o han ira panggawi mahimo magkaada utro maopay nga relasyon ha iya ngan magpabilin nga tuminungnong han Ginhadian. (2 Kor. 2:5-8) Daku gud nga kadungganan para ha aton an pag-alagad ha sugad kamahigugmaon nga Hadi!
GINPAPABILHAN HAN MGA TUMINUNGNONG HAN GINHADIAN AN EDUKASYON
13. Paonan-o iginpapakita han mga tuminungnong han Ginhadian nga ginpapabilhan nira an edukasyon?
13 Damu nga gobyerno han tawo an nangangalimbasog pag-edukar ha ira mga tuminungnong. Nagtutukod hira hin mga eskwelahan nga nagtututdo ha pagbasa ngan pagsurat ngan hin mga abilidad ha pagtrabaho. Ginpapabilhan han mga tuminungnong han Ginhadian inin sekular nga mga eskwelahan ngan maduruto nga nag-aaram pagbasa, pagsurat, ngan pagsuporta han ira pinansyal nga panginahanglan. Pero mas ginpapabilhan nira an edukasyon nga ira nakakarawat sugad nga mga tuminungnong han Ginhadian han Dios. Pananglitan, an organisasyon han Dios nag-aaghat ha aton nga magbasa. Gindadasig an mga kag-anak nga magbasa ha ira mga anak. Kada bulan, an matinumanon nga uripon nagpupublikar hin damu ka pahina nga mga artikulo nga basado ha Biblia ha The Watchtower ngan Awake! Kon magbabasa ka hin duha ka pahina kada adlaw, mababasa mo ito ngatanan ha usa ka bulan. Hini nga paagi, padayon nga magpapahimulos ka ha edukasyon nga iginhahatag ni Jehova.
14. (a) Ano nga pagbansay an aton nakakarawat? (b) Ano nga mga suhestyon para ha Pagsingba han Pamilya an iyo na ginsunod?
14 Kada semana, an mga tuminungnong han Ginhadian ginbabansay ha mga katirok han kongregasyon. Pananglitan, sobra unom ka dekada na nga an Teokratiko nga Eskwelahan ha Ministeryo nabulig ha mga estudyante nga magin epektibo nga magturutdo han Pulong han Dios. Nakaenrol ka ba hini nga eskwelahan? Hinin bag-o la, igin-aghat han matinumanon nga uripon an paggahin hin gab-i para ha Pagsingba han Pamilya kada semana. Ini nga kahikayan nagpaparig-on han pamilya. Ginsusunod mo ba an mga suhestyon nga iginpublikar ha aton mga literatura? c
15. Ano an usa han aton pinakadaku nga pribilehiyo?
15 Damu nga tuminungnong han mga nasud an nangangampanya basi aghaton an iba nga suportahan an usa nga partido ha politika. Nagbabalay-balay pa ngani an iba ha pagbuhat hito. An mga tuminungnong han Ginhadian ha bug-os nga kalibotan nagpapakita han ira pagsuporta ha Ginhadian han Dios pinaagi han pagsangyaw ha kalsada ngan ha balay-balay. Ha pagkamatuod, sugad han gin-unabi han nahiuna nga artikulo, an The Watchtower, nga nagsasamwak han Ginhadian ni Jehova, amo na yana an barasahon nga may pinakadamu nga naipapanaltag ha bug-os nga kalibotan! Usa han aton pinakadaku nga pribilehiyo amo an pagsumat ha iba mahitungod han Ginhadian han Dios. Madasigon ka ba nga nakikigbahin ha pagsangyaw nga buruhaton?—Mat. 28:19, 20.
16. Paonan-o mo mapapamatud-an nga maopay ka nga tuminungnong han Ginhadian han Dios?
16 Diri na mag-iiha, an Ginhadian han Dios na la an gobyerno nga magmamando ha tuna. An mga balaud la hito an maggigiya ha katawohan. Hito nga panahon, magigin maopay ka ba nga tuminungnong han Ginhadian han Dios? Yana na an panahon nga imo pamatud-an nga magigin maopay ka nga tuminungnong hito. Ha ngatanan nga desisyon nga imo ginhihimo kada adlaw, buhata an ngatanan para ha himaya ni Jehova basi ipakita nga nagawi ka sugad nga maopay nga tuminungnong han Ginhadian han Dios.—1 Kor. 10:31.
[Mga footnote]
a Pananglitan, kitaa an Awake! Hulyo 2011, pahina 24-27; Agosto 2011, pahina 10-13; ngan Pebrero 2012, pahina 3-9.
b Kitaa an Marso 15, 2012 nga An Barantayan, pahina 30-31.
c Kitaa an Agosto 15, 2011 nga An Barantayan, pahina 6-7 ngan Enero 2011 nga An Aton Ministeryo ha Ginhadian, pahina 3-6.
[Mga Pakiana]
[Blurb ha pahina 14]
Ginsusunod mo ba an mga pahamangno nga basado ha Biblia may kalabotan ha Internet?
[Retrato ha pahina 12]
Pariho han mga anak ni Kore, nalilipay ka ba ha putli nga pagsingba ngan ha kasaysayan hito?
[Retrato ha pahina 15]
Daku an maibubulig han iyo gab-i para ha Pagsingba han Pamilya basi ikaw ngan an imo mga hinigugma magin maopay nga mga tuminungnong han Ginhadian
