Magin Marig-on Ngan Likayi an mga Lit-ag ni Satanas!

‘Atohi an mga limbong han Yawa.’—EFE. 6:11, MAOPAY NGA SUMAT.

ANO AN IMO BATON?

Paonan-o an usa nga surugoon ni Jehova makakalikay ha lit-ag nga materyalismo?

Ano an makakabulig ha inasaw-an nga mga Kristiano nga diri makabuhat hin pag-adulteryo?

Kay ano nga natoo ka nga mapulsanon an pagpabilin nga marig-on kontra ha materyalismo ngan seksuwal nga imoralidad?

1, 2. (a) Kay ano nga hi Satanas waray kalooy ha mga dinihogan ngan ha ‘iba nga mga karnero’? (b) Ano nga mga lit-ag ni Satanas an hihisgotan hini nga artikulo?

 HI Satanas nga Yawa waray kalooy ha mga tawo, labi na ha mga nag-aalagad kan Jehova. Ha pagkamatuod, nakikig-away hi Satanas ha nanhibilin nga mga dinihogan. (Pah. 12:17) Inin maunungon nga mga Kristiano an nangunguna yana ha pagsangyaw han Ginhadian ngan nagbubuhayhag nga hi Satanas an magmarando hini nga kalibotan. An Yawa napupungot liwat ha ‘iba nga mga karnero’ nga nasuporta ha mga dinihogan ngan may paglaom nga mabuhi ha waray kataposan—usa nga paglaom nga diri na mapapahimulsan ni Satanas. (Juan 10:16) Diri urusahon nga nasisina gud hiya! Ha langit man o ha tuna an aton paglaom, sigurado nga hi Satanas diri interesado ha aton kaopayan. Karuyag niya nga biktimahon kita.—1 Ped. 5:8.

² Basi mahimo ito, hi Satanas nagamit hin iba-iba nga lit-ag, o bitik. Tungod kay iya ‘ginbuta an hunahuna’ han mga diri-tumuroo, diri hira nakarawat han maopay nga sumat ngan diri nira nakikita an iya mga lit-ag. Kondi nabibitik liwat han Yawa an iba nga kinarawat han mensahe han Ginhadian. (2 Kor. 4:3, 4) Ginhisgotan ha nahiuna nga artikulo kon paonan-o naton malilikyan an tulo han mga lit-ag ni Satanas: (1) diri ginpupugngan nga pagyakan, (2) kahadlok ngan pagsulay han mga kaupod, ngan (3) sobra nga pag-abat hin pagkasalaan. Hisgotan naton yana kon paonan-o kita magigin marig-on ha pag-ato ha duha pa nga lit-ag o bitik ni Satanas—an materyalismo ngan an pagsulay nga mag-adulteryo.

MATERYALISMO—AN LIT-AG NGA NAKAKALUMOS

3, 4. Paonan-o an pangarit hini nga kalibotan mahimo magresulta ha materyalismo?

³ Ha usa han mga ilustrasyon ni Jesus, nag-unabi hiya hin gahi nga nahisabwag ha katunokan. Iya iginsaysay nga an usa ka tawo mahimo makabati han pulong, “kondi  tungod han pangarit ha kalibotan ngan ha limbong han mga manggad, nalumsan an pulong, ngan waray magmabungahon.” (Mat. 13:22) Oo, an materyalismo usa nga lit-ag nga ginagamit han aton kaaway nga hi Satanas.

⁴ May duha nga butang nga kon magkaupod, mahimo ‘makalumos han pulong.’ An usa amo an “pangarit ha kalibotan.” Hinin “magpakalilisang nga mga panahon,” damu an nakakapabaraka ha aton. (2 Tim. 3:1) Bangin makuri an pagkaada han aton mga ginkikinahanglan kay mahal hinduro an mga paraliton o tungod kay waray kita trabaho. Bangin mabaraka liwat kita ha tidaraon ngan maghunahuna, ‘Magkakaada daw la ako igo nga kita kon lagas na ako ngan diri na nakakatrabaho?’ Tungod hito nga kabaraka, an iba nangangalimbasog nga magriko kay naghuhunahuna hira nga an kwarta makakahatag hin kasigurohan.

5. Ha ano nga paagi mahimo makalimbong ha aton an “mga manggad”?

⁵ An usa pa nga gin-unabi ni Jesus amo an “limbong han mga manggad.” Kon updan hin kabaraka, mahimo ito makalumos han pulong. An Biblia nasiring nga “an kwarta usa nga arayopan.” (Ekles. 7:12) Kondi diri maaramon an pangalimbasog nga magriko. Damu an nakaobserbar nga samtang mas nangangalimbasog hira nga magriko, mas nalilit-agan hira han materyalismo. An iba nagin uripon pa ngani han ira karikohan.—Mat. 6:24.

6, 7. (a) Ano nga kahimtang ha imo gintatrabahoan an mahimo magin hinungdan nga maghingyap ka nga magriko? (b) Ano an sadang pamurubuuton han usa nga Kristiano kon ginpapaobertaym hiya?

⁶ Bangin diri naton maabat nga nagtitikang na ngay-an kita paghingyap nga magriko. Pananglitan, tagda ini nga kahimtang. Ginsidngan ka han imo boss: “May maopay ako nga sumat! An kompanya nakadaog hin daku nga kontrata. Karuyag sidngon, hinin masunod nga pipira ka bulan bangin kinahanglan mag-obertaym ka hin mas agsob. Pero ginsisiguro ko ha imo nga bawi gud ito kay daku an imo magigin sweldo.” Ano an imo magigin reaksyon? Syempre, daku nga responsabilidad an pagtagana han materyal nga panginahanglan han imo pamilya, pero diri la ito an imo responsabilidad. (1 Tim. 5:8) May iba pa nga sadang mo pamurubuuton. Ano kadaku nga panahon an imo gagamiton ha pag-obertaym? An imo ba trabaho makakaulang ha imo espirituwal nga mga buruhaton, pati na ha pagtambong ha mga katirok ngan ha iyo gab-i para ha Pagsingba han Pamilya?

⁷ Ha pagturotimbang han imo desisyon, ano an imo prayoridad—an daku nga kità ha imo pag-obertaym o an mahimo magin epekto hito ha imo espirituwalidad? An imo ba hingyap nga magkaada mas daku nga kità magigin hinungdan nga diri mo na unahon ha imo kinabuhi an Ginhadian? Nasasantop mo ba an magigin epekto ha imo han materyalismo kon imo papabay-an  an imo espirituwalidad ngan an espirituwalidad han imo pamilya? Kon ito an nahitatabo ha imo yana, paonan-o ka magigin marig-on basi diri malumsan han materyalismo?—Basaha an 1 Timoteo 6:9, 10.

8. Ano nga mga ehemplo ha Biblia an makakabulig ha aton nga usisahon an aton paagi han pagkinabuhi?

⁸ Basi diri malumsan han materyalismo, ha panapanahon usisaha an imo paagi han pagkinabuhi. Diri mo gud karuyag nga magin pariho kan Esaw nga waray magpabili han espirituwal nga mga butang! (Gen. 25:34; Heb. 12:16) Ngan diri ka liwat sadang magin pariho han riko nga lalaki nga gin-aghat nga ibaligya an iya mga panag-iya, ihatag an kwarta ha mga pobre, ngan sumunod kan Jesus. Imbes nga buhaton ito, ini nga lalaki “binulag nga masurub-on, kay damu an iya bahandi.” (Mat. 19:21, 22) Tungod kay nalit-agan han karikohan, nawara niya an daku nga pribilehiyo nga magin sumurunod han pinakabantogan nga tawo nga nabuhi! Pag-ikmat nga diri mawara an imo pribilehiyo sugad nga disipulo ni Jesu-Kristo.

9, 10. Uyon ha ginsisiring han Biblia, ano ha imo hunahuna an sadang naton magin pagtagad ha materyal nga mga butang?

⁹ Basi maatohan an sobra nga kabaraka ha materyal nga mga butang, sunda ini nga sagdon ni Jesus: “Diri kamo mangarit, nga masiring: Ano an aton kakaunon, o ano an aton iinumon, o ano an aton igpapanapton? Kay an mga Hentil nanmimiling han ngatanan hini nga mga butang; kay an iyo Amay nga langitnon, maaram nga kamo nagkikinahanglan hini ngatanan.”—Mat. 6:31, 32; Luk. 21:34, 35.

¹⁰ Basi diri malit-agan han “limbong han mga manggad,” pangalimbasog nga subaron an panhunahuna ni Agur, usa han mga nagsurat han Biblia. Hiya nagsiring: “Ayaw ako tugoti nga magin riko o pobre. Sanglit tagi la ako hin igo nga pagkaon nga akon kinahanglan.” (Prob. 30:8, Maopay nga Sumat) Matin-aw nga maaram hi Agur han kapulsanan han kwarta sugad man han malimbong nga gahum han karikohan. Kinahanglan masantop naton nga an mga kabaraka hini nga sistema ngan an nakakalimbong nga gahum han karikohan mahimo makadaot han aton espirituwalidad. An sobra nga kabaraka ha materyal nga mga butang mahimo makaubos han aton panahon ngan kusog ngan makawara han aton hingyap nga unahon ha aton kinabuhi an Ginhadian. Salit magin determinado kita nga diri magin biktima han lit-ag ni Satanas nga materyalismo!—Basaha an Hebreo 13:5.

PAG-ADULTERYO—DIRI ABAT NGA BUHO

11, 12. Paonan-o an usa nga Kristiano mahimo mabiktima han lit-ag nga pag-adulteryo ha iya gintatrabahoan?

¹¹ An mga parapanganop nga karuyag makadakop hin makusog nga hayop bangin magbuho ha dalan nga agsob agian hito. Basi diri maabat an buho, kasagaran na nga gintatabonan ito hin mga kagingking ngan manipis nga tuna. Puropariho hito an usa han pinakaepektibo nga mga pagsulay ni Satanas. Ito an sala nga imoralidad. (Prob. 22:14; 23:27) Damu nga Kristiano an nabiktima hito nga lit-ag kay gintugotan nira an ira kalugaringon nga mahingadto ha mga sitwasyon diin masayon gud la an pakabuhat hin imoralidad. An iba nga inasaw-an nga Kristiano nakakabuhat hin pag-adulteryo katapos magkaada romantiko nga relasyon ha diri nira asawa.

¹² Mahimo ka magkaada sayop nga romantiko nga relasyon ha usa nga imo katrabaho. Ha pagkamatuod, sobra katunga han mga babaye nga nag-adulteryo ngan mga 3 ha 4 nga lalaki nga nag-adulteryo an nagkaada relasyon ha iya katrabaho. Ginkikinahanglan ba ha imo trabaho nga makaupod an mga diri mo kapariho hin sekso? Kon amo, paonan-o ka nakikig-upod ha ira? May ginhihimo ka ba nga mga limitasyon basi diri kamo magkaada romantiko nga relasyon? Pananglitan, kon an usa nga sister agsob makiistorya ha iya katrabaho nga lalaki, bangin pagtikaiha magin duok na hira ngan magsumat na hiya hin pribado nga mga butang, pati na han mga problema ha iya pag-asawa. O an usa nga brother bangin makigsangkay ha iya katrabaho nga babaye. Bangin maghunahuna hiya:  “Importante ha iya an akon opinyon ngan namamati gud hiya kon nag-iistorya ako. Ngan iya ako gin-aapresyar. Unta sugad hini an pagtratar ha akon han akon asawa!” Nasasabtan mo ba kon kay ano nga an mga Kristiano nga aada ha sugad hito nga kahimtang namimeligro nga makabuhat hin pag-adulteryo?

13. Paonan-o an sayop nga romantiko nga relasyon mahimo mahitabo ha sulod han kongregasyon?

¹³ An sayop nga romantiko nga relasyon mahimo liwat mahitabo ha sulod han kongregasyon. Tagda ini nga ehemplo nga tinuod nga nahitabo. Hi Daniel ngan iya asawa nga hi Sarah a mga regular payunir. Siring ni Daniel nga usa liwat hiya nga “tigurang nga diri maaram bumaribad.” Malipayon nga ginkakarawat niya an tagsa nga toka nga iginhahatag ha iya. Hi Daniel nagkaada Bible study nga lima nga olitawo, ngan tulo ha ira an nabawtismohan. Inin bag-o nga nabawtismohan nga mga brother nagkinahanglan gud hin bulig. Kon damu an toka ni Daniel ha kongregasyon, kasagaran na nga hi Sarah an nabulig ha ira. Waray pag-iha sugad hini an pirme nahitatabo: An mga Bible study hadto ni Daniel nagkikinahanglan hin bulig, ngan hi Sarah an nabulig ha ira. Nagkikinahanglan hi Sarah hin atensyon, ngan ira ito iginhahatag ha iya. Ito nga kahimtang nagin peligroso nga lit-ag. Hi Daniel nagsiring: ‘Damu ka bulan nga gin-gamit han akon asawa an ngatanan niya nga kusog ha paghatag hin bulig, salit nagkinahanglan hiya hin espirituwal ngan emosyonal nga suporta. Durante hito nga panahon napapabay-an ko hiya. Maraot an nagin resulta hito. An akon asawa nakabuhat hin pag-adulteryo ha usa han akon mga Bible study hadto. Okupado gud ako ha akon mga toka ha kongregasyon salit waray ko mapanginano nga nagluya na an iya espirituwalidad.’ Paonan-o mo malilikyan an sugad hito nga trahedya?

14, 15. Ano an makakabulig ha inasaw-an nga mga Kristiano nga malikyan an pag-adulteryo?

¹⁴ Basi malikyan an pag-adulteryo, pamalandonga an kahulogan han pagin maunungon ha imo padis. Hi Jesus nagsiring: “An gintig-ob han Dios, diri pagbulagon han tawo.” (Mat. 19:6) Ayaw gud paghunahuna nga an imo mga pribilehiyo ha kongregasyon mas importante kay ha imo padis. Dugang pa, hinumdumi nga an agsob nga paggahin hin panahon ha diri importante nga mga buruhaton nga diri kaupod an imo padis mahimo magpasabot nga may problema an iyo pag-asawa ngan mahimo magresulta ha pagsulay ngan bangin ha pakabuhat hin seryoso nga sala.

¹⁵ Kondi kon usa ka nga tigurang, paonan-o mo mamangnoan an panon? Hi apostol Pedro nagsiring: “Pasabsaba niyo an panon han Dios nga aada ha iyo, pagbantayan niyo, diri nga sugad hin linugos, kondi ha iyo kalugaringon nga kaburut-on, sumala ha kaburut-on han Dios; diri tungod ha mahugaw nga salapi, kondi ha maandaman nga painoino.” (1 Ped. 5:2) Diri mo gud sadang pabay-an an mga membro han iyo kongregasyon. Kondi diri mo sadang tumanon an imo papel sugad nga paramangno tubtob ha punto nga napapabay-an mo na an imo papel sugad nga bana. Waray pulos ngan peligroso pa ngani nga ipokus an imo bug-os nga atensyon ha pagmangno han kongregasyon kon napapabay-an mo na an imo asawa. Hi Daniel nagsiring, ‘Diri ka gud sadang magin sobra kaokupado ha pagtuman han imo mga responsabilidad ha kongregasyon nga napapabay-an mo na an imo pamilya.’

16, 17. (a) Ano an puydi buhaton han inasaw-an nga mga Kristiano ha ira gintatrabahoan basi matin-aw nga ipakita nga diri gud nira karuyag makigrelasyon ha iba? (b) Paghatag hin ehemplo han iginpublikar nga artikulo nga makakabulig ha mga Kristiano nga malikyan an pag-adulteryo.

¹⁶ Damu nga maopay nga sagdon an iginhahatag han An Barantayan ngan Awake! basi buligan an inasaw-an nga mga Kristiano nga malikyan an pag-adulteryo. Pananglitan, ini an sagdon han Septyembre 15, 2006 nga An Barantayan: “Ha trabaho ngan ha bisan diin, paglikay ha mga sitwasyon nga bangin makaaghat hin duok nga relasyon. Pananglitan, an pagtrabaho hin dugang  nga mga oras kaupod han diri kapariho an sekso mahimo magresulta hin pagsulay. Sugad nga inasaw-an nga lalaki o babaye, sadang ipakita mo ha imo pakiistorya ngan ha imo paggawi nga diri mo gud karuyag makigrelasyon ha iba. Sugad nga may-ada diosnon nga debosyon, sigurado nga diri mo karuyag makadani hin atensyon pinaagi han pagpikat o pagin diri desente ha imo pamado ngan pag-ayos. . . . An pagbutang hin retrato han imo padis ngan mga anak ha lugar han trabaho magpapahinumdom ha imo ngan ha iba nga prayoridad mo an imo pamilya. Magin determinado nga diri makadani—o bisan magkonsinter—han pagsulay han iba.”

¹⁷ An artikulo nga may ulohan nga “Marital Fidelity—What Does It Really Mean?” ha Abril 2009 nga Awake! nagpahamangno kontra ha pagkaada seksuwal nga mga pantasya ha diri mo bana o asawa. Gin-unabi ha artikulo nga an pagkaada seksuwal nga mga pantasya makakadugang han posibilidad han pakabuhat hin pag-adulteryo. (Jak. 1:14, 15) Kon inasaw-an ka, maaramon gud nga ha panapanahon magkaupod nga repasuhon niyo nga mag-asawa ito nga impormasyon. Hi Jehova mismo an nagpatikang han kahikayan han pag-asawa, ngan sagrado ito. An paggahin hin panahon nga makiistorya ha imo padis mahitungod han iyo pag-asawa usa nga maopay nga paagi ha pagpakita nga iyo ginpapabilhan an sagrado nga mga butang.—Gen. 2:21-24.

18, 19. (a) Ano an magraot nga resulta han pag-adulteryo? (b) Ano an mga kapulsanan han pagin maunungon ha imo padis?

¹⁸ Kon nasusulay ka nga magkaada sayop nga romantiko nga relasyon, pamalandonga an nakakadaot nga mga resulta han pornikasyon ngan pag-adulteryo. (Prob. 7:22, 23; Gal. 6:7) An mga nagbubuhat hin imoralidad nakakapasubo kan Jehova, ha ira padis, ngan ha ira kalugaringon. (Basaha an Malakias 2:13, 14.) Ha luyo nga bahin, pamalandonga an kapulsanan nga nakakarawat han mga nagpapabilin nga limpyo ha moral. May paglaom hira nga mabuhi ha waray kataposan, ngan nakakapahimulos liwat hira han pinakamaopay nga klase han pagkinabuhi yana, upod na an pagkaada limpyo nga konsensya.—Basaha an Proberbios 3:1, 2.

¹⁹ An salmista nagkanta: “Daku an kamurayawan hadton mga nahigugma han [kanan Dios] balaud; ngan waray ha ira higayon ha hipakdol.” (Sal. 119:165) Salit higugmaa an kamatuoran, ngan ‘tan-awa hin maopay kon mationan-o iton imo panggawi, diri sugad ha mga diri maaram, kondi sugad ha mga maaram’ dinhi hinin maraot nga panahon. (Efe. 5:15, 16) An dalan nga aton gin-aagian ginbutangan ni Satanas hin damu nga lit-ag basi mabiktima an mga magsiringba han tinuod nga Dios. Kondi bug-os nga ginsangkapan kita ni Jehova basi kita mapanalipdan. Iginhatag niya an aton ginkikinahanglan basi makapabilin kita nga marig-on ngan “makapalong ha ngatanan nga mga pana nga naglalaga han maraot”!—Efe. 6:11, 16.

[Footnote]

[Mga Pakiana]

[Retrato ha pahina 26]

An materyalismo mahimo makadaot ha aton relasyon kan Jehova. Ayaw tuguti nga mahitabo ito ha imo

[Retrato ha pahina 29]

An pagpikat o pagkonsinter hito mahimo magresulta hin pakabuhat hin pag-adulteryo