Nahinunumdoman Mo Ba?

Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

An buhok ba ni Samson an naghatag ha iya hin kusog?

Diri an buhok mismo ni Samson an gintikangan han iya kusog. An iya buhok nagsimbolo han iya espesyal nga relasyon ha Dios sugad nga Nasareo. Naapektohan an iya relasyon ha Dios han ginpaarotan ni Delila an iya buhok.—4/15, pahina 9.

Pariho ha aton literal nga kasingkasing, ano an tulo nga butang nga mahimo magkaada maopay nga epekto ha aton simboliko nga kasingkasing?

(1) Masustansya nga pagkaon. Sugad la nga kinahanglan han aton literal nga kasingkasing an masustansya nga pagkaon, kinahanglan liwat naton an igo nga kadamu hin masustansya nga espirituwal nga pagkaon. (2) Ehersisyo. An madasigon nga pakigbahin ha ministeryo mabulig ha aton simboliko nga kasingkasing nga magpabilin nga mahimsog. (3) Mga kaupod. Maiibanan naton an istres pinaagi ha pakig-upod ha aton mga igkasi-tumuroo, nga nahigugma ha aton.—4/15, pahina 16.

Katapos magin diri maunungon an bana o asawa, paonan-o maibabalik han mag-asawa an ira pagsarig ha usa kag usa?

Sadang hira (1) magin tangkod ha usa kag usa; (2) magbinuligay; (3) magbag-o han daan nga mga kinaiya; ngan (4) mahibaro ha pagpasaylo ha pangalimbasog nga maibalik an maopay nga relasyon.—5/1-E, pahina 12-15.

Kay ano nga an nagpapahayag para ha patay diri sadang mag-aplikar han Salmo 116:15 ha namatay?

An teksto nasiring: “Minahal ha mga mata ni Jehova an kamatayon han iya mga baraan.” Nangangahulogan ito nga diri itutugot han Dios nga mamatay an ngatanan nga maunungon ha iya kay birilhon hira ha iya. Diri itutugot han Dios nga mapoo an iya katawohan dinhi ha tuna sugad nga grupo.—5/15, pahina 22.

Hin-o an mga colporteur?

Antes han 1931, “colporteur” an tawag ha tinatawag na yana nga mga payunir.—5/15, pahina 31.

Ano an pipira nga ebidensya nga an Biblia diri la libro nga sinurat hin mga tawo?

Mababasa ha Biblia an damu nga tagna nga natuman. Iginrekord dida hito an tinuod nga mga hitabo ha kasaysayan, diri mga susmatanon. Nauyon ito ha husto nga syensya, ngan nagkakauruyon an mga libro hito. Praktikal ito yana.—6/1-E, pahina 4-8.

Ano an nagkukompwesto “hini ngatanan nga ginhadian” nga gin-unabi ha Daniel 2:44?

Nagtutudlok ito ha mga ginhadian o mga gobyerno nga ginsisimbolohan han iba-iba nga bahin han metal nga ladawan nga iginsaysay ni Daniel.—6/15, pahina 17.

Kakan-o an Anglo-Amerikano nga Gahum ha Kalibotan nagin an ikapito nga gahum ha kalibotan nga igintagna ha Biblia?

Nahitabo ito han an Britanya ngan Estados Unidos ginios nga magkaupod ha makatirigamnan nga paagi han Girra ha Kalibotan I.—6/15, pahina 19.

Paonan-o ginpapasaylo ngan ginkakalimtan han Dios an mga sala han mga mabinasulon?

Hi Jehova nasiring mahitungod hadton iya inuuyonan: “An ira sala diri ko na dudumdumon.” (Jer. 31:34) Napapasaylo niya an mga sala pinaagi han lukat. Kon nagpapasaylo an Dios, ginkakalimtan niya an sala ha paagi nga diri na niya ito dudumdumon basi magpadapat utro hin sirot.—7/1, pahina 18.

Kay ano nga makakatoo kita ha mga milagro nga nakarekord ha Biblia?

Kasagaran na nga ginhihimo ito ha publiko, diri ha tago. Simple la ito ngan waray espesyal nga mga props. Ginhimo ito basi himayaon an Dios, diri an tawo. Damu hinduro kalain nga milagro an ginhimo, ngan an mga parakontra hito nga panahon waray rumiwa nga nahitabo ito. Ini an mga hinungdan nga sadang kita tumoo ha mga milagro nga nakarekord ha Biblia.—8/1-E, pahina 7-8.