Pag-ikmat ha mga Lit-ag han Yawa!

“Maluwas . . . ha lit-ag han Yawa.”—2 TIM. 2:26.

ANO AN IMO BATON?

Kon pirme ka naghuhunahuna hin diri maopay ha iba, ano an sadang mo buhaton?

Ha ehemplo ni Pilato ngan ni Pedro, ano nga leksyon an imo hibabaroan mahitungod ha diri pagpadaog ha kahadlok ngan pagsulay han mga kaupod?

Paonan-o mo malilikyan an sobra nga pag-abat hin pagkasalaan?

1, 2. Ano nga mga lit-ag han Yawa an aton hihisgotan hini nga artikulo?

 AN Yawa nangangalimbasog paglit-ag han mga surugoon ni Jehova. Pero diri hiya pirme pariho hin parapanganop nga ginpapatay an mga hayop nga iya nadadakop. Lugod, tumong han Yawa nga madakop nga buhi an iya biktima ngan pasundon ha iya karuyag.—Basaha an 2 Timoteo 2:24-26.

² Basi an biktima madakop nga buhi, an parapanganop bangin gumamit hin usa nga klase hin lit-ag. Bangin maghimo hiya hin paagi nga mapagawas an natago nga hayop basi iya madakop gamit an bitik. O bangin gumamit hiya hin nakatago nga lit-ag basi diri ito maabat han hayop. An Yawa nagamit liwat hin mga lit-ag basi mabitik an mga surugoon han Dios. Kon karuyag naton nga diri mabitik, kinahanglan magin alerto ngan mabinantayon kita ha mga tigaman nga nagpapahamangno ha aton han mga lit-ag o bitik ni Satanas. Hihisgotan hini nga artikulo kon paonan-o naton malilikyan an tulo nga lit-ag nga epektibo nga ginagamit han Yawa. Ini an (1) diri ginpupugngan nga pagyakan, (2) kahadlok ngan pagsulay han mga kaupod, ngan (3) sobra nga pag-abat hin pagkasalaan. Hihisgotan ha sunod nga artikulo an duha pa nga lit-ag o bitik nga ginagamit ni Satanas.

PARONGA AN SUGAD-KALAYO NGA DIRI GINPUPUGNGAN NGA PAGYAKAN

3, 4. Ano an mahimo magin resulta kon diri naton ginpupugngan an aton pagyakan? Paghatag hin ehemplo.

³ Basi gumawas an mga hayop ha ira gintatagoan, bangin suritan han parapanganop an usa nga bahin han kabanwaan basi dakpon an mga hayop samtang napalagiw. Ha simboliko nga paagi, karuyag han Yawa nga suritan an Kristiano nga kongregasyon. Kon maglalampos hiya, mapapagawas niya an mga membro tikang hiton talwas nga lugar basi iya madakop. Ha ano nga paagi bangin diri tinuyo nga mabuligan naton hiya ngan magin iya biktima?

⁴ Iginpariho han disipulo nga hi Jakobo an dila ha kalayo.  (Basaha an Jakobo 3:6-8.) Kon diri naton ginpupugngan an aton dila, makakagpatikang kita hin simboliko nga sunog ha kongregasyon. Paonan-o ini mahimo mahitabo? Tagda ini nga kahimtang: Ha usa nga katirok, iginpahibaro nga an usa nga sister regular payunir na. Katapos han katirok, nag-istorya an duha nga magwarali mahitungod hito. An usa nalipay ngan naglalaom nga magigin malampuson an bag-o nga payunir. An usa naman nagkwestyon han motibo han bag-o nga payunir ngan sugad hin nagsiring nga karuyag la han bag-o nga payunir nga magin prominente ha kongregasyon. Hin-o hinin duha nga magwarali an karuyag mo magin sangkay? Masayon gud hibaroan kon hin-o ha ira an makakagpatikang hin sunog ha kongregasyon pinaagi han iya pagyakan.

5. Basi maparong an sugad-kalayo nga diri ginpupugngan nga pagyakan, ano an sadang naton buhaton?

⁵ Paonan-o naton mapaparong an sugad-kalayo nga diri ginpupugngan nga pagyakan? Hi Jesus nagsiring: “Tikang ha kahuraan han kasingkasing iginyayakan han baba.” (Mat. 12:34) Salit an siyahan nga sadang naton buhaton amo an pag-usisa han aton kasingkasing. Ginlilikyan ba naton an diri maopay nga mga pagbati nga nakakaaghat ha aton nga magyakan hin nakakasakit mahitungod ha iba? Pananglitan, kon hinbaroan naton nga an usa nga brother nangangalimbasog pagkab-ot hin pribilehiyo, natoo ba kita nga maopay an iya motibo, o nagsususpetsa kita nga ginbubuhat niya ito para la ha iya kalugaringon nga kaopayan? Kon may tendensya kita nga magkaada sugad hito nga panhunahuna, maopay hinumdoman nga ginkwestyon han Yawa an motibo han matinumanon nga surugoon han Dios nga hi Job. (Job 1:9-11) Imbes nga magsuspetsa ha usa nga bugto, maopay nga usisahon naton kon kay ano nga sugad hito an aton panhunahuna ha iya. May-ada gud ba kita maopay nga hinungdan ha paghunahuna hin sugad hito? O naimpluwensyahan na an aton kasingkasing han pagin diri mahigugmaon nga kalyap gud hinin kataposan nga mga adlaw?—2 Tim. 3:1-4.

6, 7. (a) Ano an pipira nga hinungdan kon kay ano nga bangin nagyayakan kita hin maraot ha iba? (b) Ano an sadang naton buhaton kon ginpapakaraot kita?

⁶ Tagda an iba pa nga hinungdan kon kay ano nga bangin nagyayakan kita hin maraot mahitungod ha iba. Usa nga hinungdan bangin tungod kay karuyag naton nga mas mahatagan hin atensyon an aton mga nahimo. Pinaagi ha pagpakaraot ha iba, bangin nangangalimbasog kita nga ipakita nga mas maopay kita. O bangin naghihimo kita hin mga pasangil kay waray naton buhata an sadang naton buhaton. Pagpahitaas man, kaawa, o kawaray kompyansa an hinungdan, daku nga kadaot an magigin resulta hito.

⁷ Bangin naghuhunahuna kita nga makatadunganon la nga magyakan hin diri maopay mahitungod ha usa nga bugto. Bangin hiya liwat may ginyakan nga maraot mahitungod ha aton. Kon ito an kahimtang, an pagbulos diri amo an solusyon. An pagbuhat hito sugad hin pagdugang hin sungo ha kalayo ngan ito gud an karuyag han Yawa,  diri han Dios. (2 Tim. 2:26) Maopay nga subaron naton hi Jesus may kalabotan hini. Han ginpakaalohan hiya, “waray hiya bulos hin pagpakaalo.” Lugod, “igintubyan niya an iya kalugaringon ngadto ha naghuhukom hin matadong.” (1 Ped. 2:21-23) Nasarig hi Jesus nga susolusyonan ni Jehova an sitwasyon ha paagi nga Iya karuyag ngan kon san-o Niya karuyag. Sadang magin sugad liwat hito an aton pagsarig ha Dios. Kon nagyayakan kita hin makapadasig ha iba, nabulig kita nga matipigan an “gapos [o bugkos] han kamurayawan” ha aton kongregasyon.—Basaha an Efeso 4:1-3.

LIKAYI AN LIT-AG NGA KAHADLOK NGAN PAGSULAY HAN MGA KAUPOD

8, 9. Kay ano nga ginsentensyahan ni Pilato hi Jesus hin kamatayon?

⁸ An nabitik nga hayop waray na kagawasan pagkadto kon diin niya karuyag. Ha pariho nga paagi, an tawo nga nagpapadaog ha kahadlok ngan pagsulay han mga kaupod nawawarayan kontrol ha iya kinabuhi ha pipira nga paagi. (Basaha an Proberbios 29:25.) Aton hisgotan an ehemplo han duha nga lalaki nga nagpadaog ha pagsulay han mga kaupod ngan ha kahadlok ha tawo, ngan aton kitaon kon ano nga leksyon an aton hibabaroan ha ira eksperyensya.

⁹ An Romano nga Gobernador nga hi Ponsio Pilato maaram nga waray sala hi Jesus ngan posible nga diri niya karuyag magbuhat hin makakadaot kan Jesus. Ha pagkamatuod, hi Pilato nagsiring nga hi Jesus waray ginbuhat “nga bisan ano nga kasal-anan pagpatay ha iya.” Bisan pa hito, ginsentensyahan ni Pilato hi Jesus hin kamatayon. Kay ano? Kay nagpadaog hi Pilato ha pamirit han nasisina nga mga tawo. (Luk. 23:15, 21-25) “Kon imo ini buhian, diri ka sangkay ni Sesar,” siring han mga parakontra basi ipirit nga buhaton an ira karuyag. (Juan 19:12) Bangin nahadlok hi Pilato nga paiwason hiya ha iya posisyon—o bangin patayon pa ngani—kon dumapig hiya kan Jesus. Salit nagpadaog hiya nga buhaton an karuyag han Yawa.

10. Kay ano nga iginlirong ni Pedro hi Kristo?

¹⁰ Hi apostol Pedro usa han pinakaduok nga mga kaupod ni Jesus. Iginpasamwak niya nga hi Jesus an Mesias. (Mat. 16:16) Nagpabilin nga maunungon hi Pedro han ginbayaan hi Jesus han iba Niya nga mga disipulo han waray nira masabti an kahulogan han Iya ginsiring. (Juan 6:66-69) Ngan han gin-aaresto hi Jesus han iya mga kaaway, ginamit hi Pedro hin espada basi depensahan an iya Agaron. (Juan 18:10, 11) Kondi ha urhi nagpadaog hi Pedro ha kahadlok ngan iya pa ngani iginlirong nga nakilala hiya kan Jesu-Kristo. Ha sulod hin halipot nga panahon an apostol nabitik han lit-ag nga kahadlok ha tawo. Nawad-an hiya hin kaisog ha pagbuhat hin husto ngan waray magin maunungon kan Jesus.—Mat. 26:74, 75.

11. Ano nga mga pagsulay an bangin kinahanglan naton atohan?

¹¹ Sugad nga mga Kristiano, kinahanglan atohan naton an pagsulay nga magbuhat han mga butang nga nakakapasubo ha Dios. Bangin piriton kita han aton mga agaron o han iba nga magin diri tangkod o sulayon nga magbuhat hin seksuwal nga imoralidad. An mga estudyante bangin piriton han ira mga kaeskwela nga mangopya o magkaada kodego ha panahon han eksamin, magkita hin pornograpiya, magsigarilyo, magdroga, uminom hin sobra nga de-alkohol nga irimnon, o magbuhat hin seksuwal nga imoralidad. Kon sugad, ano an makakabulig ha aton nga malikyan an lit-ag nga kahadlok ha tawo ngan pagsulay nga magbuhat han nakakapasubo kan Jehova?

12. Kay ano nga hi Pilato ngan hi Pedro nadaog han kahadlok ngan pagsulay han mga kaupod?

¹² Usisahon naton kon kay ano nga hi Pilato ngan hi Pedro nadaog han kahadlok ngan pagsulay han mga kaupod. Gutiay la an hinbabaroan ni Pilato mahitungod kan Kristo. Bisan pa hito, maaram hiya nga waray sala hi Kristo ngan diri Hiya ordinaryo nga tawo. Kondi diri mapainubsanon hi Pilato ngan waray hiya gugma ha tinuod nga Dios. Salit masayon la hiya nga nabitik han Yawa. Hi Pedro nahigugma ha Dios ngan may husto nga kahibaro mahitungod ha Dios ngan kan Kristo Jesus. Kondi may mga panahon nga waray hiya magin mapainubsanon, nahadlok ha tawo, ngan nadaog han pagsulay. Antes dakpon hi Jesus,  hi Pedro naghambog: “Bisan an ngatanan may-ada katigayonan ha paghipakdol, hi ako diri.” (Mar. 14:29) Nagin mas andam unta hi Pedro pag-atubang han mga pagsari kon sinarig hiya ha Dios pariho han pagsarig han salmista nga nagkanta: “Hi Jehova aada mahitungod ha akon; diri ako mahahadlok: ano ba an mabubuhat han tawo ha akon?” (Sal. 118:6) Ha ultimo nga gab-i han kinabuhi ni Jesus ha tuna, iya igin-upod hi Pedro ngan an duha pa nga apostol ngadto ha hardin han Getsemani. Kondi, imbes nga magpabilin nga nagmamata, nahingaturog hi Pedro ngan an iya mga kaupod. Ginsangpit hira ni Jesus ngan ginsidngan: “Pag-agma, ngan pag-ampo, basi kamo diri mahisulod ha panulay.” (Mar. 14:38) Kondi nahingaturog na liwat hi Pedro ngan ha urhi nagpadaog ha pagsulay ngan kahadlok ha tawo.

13. Paonan-o naton maaatohan an pagsulay nga magbuhat hin sayop?

¹³ Ano nga mga leksyon an aton hibabaroan ha ehemplo ni Pilato ngan ni Pedro? Basi maglampos ha pag-ato ha pagsulay, ginkikinahanglan an husto nga kahibaro, pagkamapainubsanon, pagkarawat han aton mga limitasyon, gugma ha Dios, ngan kahadlok kan Jehova, diri ha mga tawo. Kon an aton pagtoo iginbasar ha husto nga kahibaro, maisugon nga isusumat naton an aton mga gintotoohan. Mabulig ini ha aton nga makaato ha pagsulay ngan diri magpadaog ha kahadlok ha tawo. Syempre, kinahanglan diri gud kita magkaada sobra nga kompyansa ha aton kalugaringon nga kusog. Lugod, kinahanglan magin mapainubsanon kita ngan kilalahon naton nga ginkikinahanglan naton an gahum han Dios basi makaato ha pagsulay. Sadang kita mag-ampo ha pangaro han espiritu ni Jehova. Ngan an aton gugma ha iya sadang magpagios ha aton nga sundon an iya mga suruklan ngan likyan an pagbuhat han mga butang nga magpapasipara ha iya ngaran. Dugang pa, kinahanglan mangandam kita ha pag-ato ha pagsulay antes pa ito mahitabo. Pananglitan, an abanse nga pagpangandam ngan pag-ampo makakabulig ha aton mga anak nga mahibaro han ira bubuhaton kon ginpipirit hira han ira igkasi-batan-on nga magbuhat hin sayop.—2 Kor. 13:7. a

LIKAYI AN LIT-AG NGA NAKAKARUGMOK—AN SOBRA NGA PAG-ABAT HIN PAGKASALAAN

14. Ano an karuyag ni Satanas nga hunahunaon naton mahitungod han aton mga nabuhat nga sala?

¹⁴ Usahay an usa nga lit-ag may mabug-at nga troso o bato nga ginbibitay ha dalan nga agsob agian han mga hayop. Kon an higot nga nakabalabag ha dalan nasasabod han diri mabinantayon nga hayop, nahuhulog an troso o bato, ngan nadadat-ogan an hayop. An sobra nga pag-abat hin pagkasalaan maipapariho ha mabug-at nga troso o bato nga nakakarugmok. Kon aton ginhuhunahuna an aton nabuhat nga sala, bangin umabat kita nga sugad hin nahirugmok na. (Basaha an Salmo 38:3-5, 8.) Karuyag ni Satanas nga hunahunaon naton nga hi Jehova diri malolooy ha aton ngan diri naton masusunod an Iya mga suruklan.

15, 16. Paonan-o mo malilikyan an lit-ag nga sobra nga pag-abat hin pagkasalaan?

¹⁵ Paonan-o mo malilikyan an lit-ag nga sobra nga pag-abat hin pagkasalaan? Kon nakabuhat ka hin daku nga sala, gios na yana basi maibalik an imo maopay nga relasyon kan Jehova. Pakiistorya ha mga tigurang ngan pagpabulig ha ira. (Jak. 5:14-16) Buhata an ngatanan ha pagtadong han imo nabuhat nga sala. (Buh. 26:20) Kon disiplinahon ka, ayaw panluya. An disiplina usa nga paagi nga iginpapakita ni Jehova nga hinigugma ka niya. (Heb. 12:6) Magin determinado nga diri na buhaton an mga butang nga nagin hinungdan nga nakabuhat ka hin sala, ngan buhata ito nga imo determinasyon. Katapos magbasol ngan magbag-o, magpakita hin pagtoo nga pinaagi han halad lukat ni Jesu-Kristo mapapasaylo gud an imo mga sala.—1 Juan 4:9, 14.

¹⁶ An iba padayon nga nakukonsensya ha ira nabuhat nga mga sala nga ginpasaylo na. Kon ito an imo inaabat, hinumdumi nga ginpasaylo ni Jehova hi Pedro ngan an iba nga apostol ha  ira pagbaya ha Iya hinigugma nga Anak nga hi Jesus ha panahon nga ginkikinahanglan gud niya hira. Ginpasaylo ni Jehova an lalaki nga ginpaiwas ha kongregasyon ha Korinto nga nakabuhat hin duro nga imoralidad kondi ha urhi nagbasol. (1 Kor. 5:1-5; 2 Kor. 2:6-8) Ha Biblia, mababasa naton an mahitungod han mga nakabuhat hin dagku nga sala nga nagbasol ngan ginpasaylo han Dios.—2 Kron. 33:2, 10-13; 1 Kor. 6:9-11.

17. Ano an mahihimo han lukat para ha imo?

¹⁷ Papasayloon ngan kakalimtan ni Jehova an imo nabuhat nga mga sala kon tinuod ka nga nagbabasol ngan natoo nga kakaloy-an ka niya. Ayaw gud paghunahuna nga an halad lukat ni Jesus diri igo basi mapasaylo an imo mga sala. Kon ito an imo huhunahunaon, mabibiktima ka han usa han mga lit-ag ni Satanas. Bisan kon ito an karuyag han Yawa nga imo toohan, an lukat igo na basi mapasaylo an ngatanan nga nakasala ngan nagbasol. (Prob. 24:16) An pagtoo ha lukat makakabulig nga mawara an imo sobra nga pag-abat hin pagkasalaan ngan makakahatag ha imo hin kusog basi mag-alagad ha Dios ha imo bug-os nga kasingkasing, hunahuna, ngan kalag.—Mat. 22:37.

MAARAM KITA HAN MGA LIT-AG NI SATANAS

18. Paonan-o naton malilikyan an mga lit-ag ni Satanas?

¹⁸ Diri importante kan Satanas kon ano nga lit-ag an makakabitik ha aton, basta madakop la kita niya. Tungod kay maaram kita han iya mga lit-ag, mahimo naton ito malikyan. (2 Kor. 2:10, 11) Diri kita malilimbongan han iya mga lit-ag o bitik kon mag-aampo kita ha pangaro hin kinaadman ha pag-atubang han mga pagsari. Hi Jakobo nagsurat: “Kon may-ada ha iyo an nakulang hin kaaram, mangaro hiya ha Dios, nga mahatagon ha ngatanan ngan diri mabadlungon; ngan ito ihatag ha iya.” (Jak. 1:5) Kinahanglan gumios kita uyon ha aton mga pag-ampo pinaagi han regular nga personal nga pag-aram ngan pag-aplikar han mga prinsipyo ha Biblia. An mga publikasyon nga igintatagana han matinumanon ngan maaramon nga uripon nagsusumat ha aton han mga lit-ag ni Satanas ngan nabulig ha aton nga malikyan ito.

19, 20. Kay ano nga sadang naton kangalasan an maraot?

¹⁹ An pag-ampo ngan pag-aram ha Biblia nabulig ha aton nga mas higugmaon an maopay. Kondi importante liwat nga mahibaro kita nga kangalasan an maraot. (Sal. 97:10) An pamalandong ha magraot nga resulta han hakugnon nga mga hingyap makakabulig ha aton nga likyan ito. (Jak. 1:14, 15) Kon mahibabaro kita nga kangalasan an maraot ngan higugmaon gud an maopay, an paon nga ginbubutang ni Satanas ha iya lit-ag diri makakadani ha aton; diri ito magigin makaruruyag ha aton.

²⁰ Mapasalamaton gud kita nga ginbubuligan kita han Dios basi diri mabitik han mga lit-ag ni Satanas! Ginagamit ni Jehova an iya espiritu, an iya Pulong, ngan an iya organisasyon basi luwason kita “ha usa nga maraot.” (Mat. 6:13, NW) Ha sunod nga artikulo aton hihisgotan kon paonan-o naton malilikyan an duha pa nga lit-ag nga epektibo nga ginagamit ni Satanas ha pagbitik ha mga surugoon han Dios.

[Footnote]

[Mga Pakiana]

[Retrato ha pahina 21]

An diri ginpupugngan nga pagyakan mahimo magin hinungdan han damu nga problema ha kongregasyon

[Retrato ha pahina 24]

Mahimo mo malamposan an sobra nga pag-abat hin pagkasalaan