“DIRI ko gud mahihimo an pagbalay-balay!” Sugad gud hito an gin-abat han damu nga bag-o nga Estudyante han Biblia mahitungod ha pagsangyaw ha mga diri kakilala! Kondi ini nga mga pulong ginsiring hin usa nga eksperyensyado ha pagpahayag ha publiko ngan pagtutdo han Biblia nga tinatawag nga pilgrim.

Damu han magbarasa han Zion’s Watch Tower nga binaya ha ira relihiyon an naghingyap nga makig-upod ha mga pariho ha ira nga nauuhaw ha mga kamatuoran ha Biblia. Ini nga magasin nag-aghat ha mga magbarasa nga pamilngon an iba nga may pariho nga pagtoo ngan regular nga magkatirok basi mag-aram han Biblia. Tikang han mga 1894, an Watch Tower Society nagpadara hin mga nagbibiyahe nga representante basi kadtoon an mga grupo nga naghangyo nga bisitahon hira. Inin eksperyensyado ngan maduruto nga kalalakin-an nga ha urhi gintawag nga mga pilgrim ginpili tungod han ira kaaghop, kahibaro ha Biblia, ngan maopay nga abilidad ha pagyakan ngan pagtutdo, ngan tungod han pagpakita hin marig-on nga pagtoo ha lukat. An pagbisita kasagaran na nga naabot hin usa o duha ka adlaw nga puno hin buruhaton. Damu nga Estudyante han Biblia an siyahan nga nakaupod ha ministeryo pinaagi ha panaltag hin mga handbill para ha pahayag publiko han usa nga pilgrim. Katapos han iya pahayag ha gab-i ha usa nga eskwelahan, hi Hugo Riemer nga ha urhi nagin membro han Nagmamando nga Lawas nagbaton hin damu nga pakiana mahitungod ha Biblia tubtob ha pasado alas-12 han gab-i. Ginkapoy hiya pero malipayon, ngan nagsiring nga “maopay” an katirok.

An The Watch Tower nagsiring nga an “nangunguna nga katuyoan” han pagbisita han mga pilgrim amo an pagparig-on han “panimalay han pagtoo” pinaagi han mga katirok ha balay han mga tumuroo. An mga Estudyante han Biblia tikang ha kahigrani nga lugar natambong ha mga pahayag ngan ha pakiana ngan baton nga mga sesyon. Katapos, panahon na nga ipakita an Kristiano nga pagkamaabiabihon. Han bata pa hi Maude Abbott, tinambong hiya hin pahayag ha aga, ngan katapos hito nagtirirok an ngatanan ha hilaba nga lamesa ha libong han balay. “Damu gud an marasa nga pagkaon—ham, fried chicken, damu nga klase hin tinapay, pie, ngan keyk! Nangaon an ngatanan tubtob han pagtakas, ngan han mga alas-2 han kulop nagkatirok na liwat kami para ha usa pa nga pahayag.” Kondi hiya nagsiring, “Hito nga panahon haros nanhihingaturog na an ngatanan.” An maiha na nga pilgrim nga hi Benjamin Barton makausa nagsiring, ‘Kon ginkaon ko an ngatanan nga marasa nga pagkaon nga iginserbi ha akon, waray na unta ako yana.’ Ha urhi, an usa nga surat tikang ha sentro nga opisina ha Brooklyn nagsagda ha maopay an intensyon nga mga sister nga mas maopay para ha ngatanan nga ig-andam ha pilgrim an “pan-adlaw-adlaw ngan simple nga putahe” ngan pabay-an hiya nga “makakaturog hin maopay.”

An mga pilgrim maopay gud magtutdo ngan gumamit hin mga tsart, mga butang, o bisan ano nga may-ada hira basi himoon nga makapainteres an tema nga ira igintututdo. An mga pahayag ni R. H. Barber “pirme makapainteres hinduro.” Hi W. J. Thorn sugad hin tatay nga nagyayakan “pariho hin patriarka ha kadaan nga panahon.” Usa ka adlaw samtang hi Shield Toutjian sakay hin Model A Ford, tigda hiya nga sininggit, “Undang anay!” Nagdagmit hiya paghaw-as, nanguha hin mga bukad ha kabanwaan, ngan nagtutdo ha iya mga kaupod hin leksyon mahitungod han mga linarang ni Jehova.

Damu an kakurian nga naeksperyensyahan han mga pilgrim, labi na an mga nagkakaedad na. Kondi para ha  iba ha ira, an pinakamakuri nga pagsari amo an pagbag-o han pokus han ira buruhaton. Ginlalaoman nga mangunguna na hira ha pagsangyaw ha balay-balay. An Marso 15, 1924 nga Watch Tower nagsiring nga “usa han nangunguna nga toka” han tinuod nga mga Kristiano amo “an pagsangyaw mahitungod han ginhadian. Tungod hini igintoka an mga pilgrim.”

An iba nga pilgrim matin-aw nga diniri hini nga pagbag-o, kay binaya hira ha ira toka ngan an iba nag-organisa pa ngani hin ira kalugaringon nga relihiyon. Iginsaysay ni Robie D. Adkins nga an usa nga pilgrim nga maopay hinduro magpahayag nagngurutob: “Maaram la ako magpahayag ha entablado. Diri ko gud mahihimo an pagbalay-balay!” Hi Brother Adkins nagsiring: “Sunod ko hiya nga nakita ha 1924 nga kombensyon ha Columbus, Ohio. Hiya an pinakamasurub-on pagkit-on nga tawo didto. Nag-uusahan hiya nga natindog ilarom han gutiay nga kahoy, masurub-on ha butnga han yinukot nga malipayon nga kabugtoan. Waray ko na gud hiya makita utro. Waray pag-iha binaya hiya ha organisasyon.” Ha luyo nga bahin, “damu nga malipayon nga kabugtoan an nagkakalabay nga may dara nga mga libro tipakadto ha ira mga awto,” matin-aw nga naruruyag gud pagsangyaw ha balay-balay.—Buh. 20:20, 21.

Bisan kon damu nga pilgrim an ginkukulba pariho han kabugtoan nga ira babansayon ha pagsangyaw ha balay-balay, madasigon gud hira nga nagsangyaw. Mahitungod han pagsangyaw ha balay-balay, an pilgrim nga hi Maxwell G. Friend (Freschel) nga nagyayakan hin German nagsurat, “Ini nga bahin han buruhaton han pilgrim nakakadugang ha mga bendisyon han pagbisita ha kabugtoan.” An pilgrim nga hi John A. Bohnet nagreport nga an kabugtoan ha kabug-osan malipayon nga inuyon ha pag-aghat nga magpokus ha pagsangyaw han Ginhadian. Siring niya nga kadam-an ha ira an “madasigon gud ha pakigbahin ha espirituwal nga girra.”

Ha paglabay han katuigan, an matinumanon nga mga brother nga nabisita ha mga kongregasyon maopay gud nga impluwensya ha kabugtoan. “Waray ruhaduha nga birilhon ngan mapulsanon an mga pilgrim. Naobserbaran ko ito tikang han bata pa ako,” siring ni Norman Larson nga maiha na nga Saksi. “Daku an ira nahimo basi mamolde ako ha husto nga paagi.” Tubtob yana, an sugad hito nga nagsasakripisyo ngan maunungon nga mga nagbibiyahe nga paramangno nabulig ha kabugtoan nga sumiring, “Mahihimo naton an pagbalay-balay!”

[Blurb ha pahina 32]

Makalilipay an adlaw han pag-abot han “pilgrim”!

[Retrato ha pahina 31]

Mga 170 nga lugar an nakalista nga bibisitahon ni Benjamin Barton han 1905

[Retrato ha pahina 32]

Hi Walter J. Thorn usa nga hinigugma nga pilgrim nga gintawag nga Pappy kay sugad hiya hin tatay

[Retrato ha pahina 32]

Hi J. A. Browne igintoka ha Jamaica sugad nga pilgrim han mga 1902 basi parig-unon ngan dasigon an 14 nga gudtiay nga grupo

[Retrato ha pahina 32]

An buruhaton han mga pilgrim nagparig-on han pagtoo ngan Kristiano nga pagkaurosa ngan nakabulig ha kabugtoan nga magin duok ha organisasyon