1. Ano an iginpapakiana han pipira nga matinumanon nga kabugtoan?

USA nga matinumanon nga sister nga nag-ilob hin damu nga kakurian ha sulod hin mga dekada an mapainubsanon nga nagpakiana, “Buhi pa ba ada ako pag-abot han kataposan?” Sugad liwat hito an iginpapakiana han iba nga maiha na nga nag-aalagad kan Jehova. Ginhihingyap gud naton nga umabot na an adlaw nga bag-uhon han Dios an ngatanan nga butang ngan wad-on an aton mga problema yana. (Pah. 21:5) Bisan kon damu an aton rason nga tumoo nga hirani na gud an kataposan han sistema ni Satanas, bangin makuri an paghulat hin mapailubon ha pag-abot hito.

2. Ano nga mga pakiana mahitungod han pagpailob an aton hihisgotan?

² Kondi, iginpapakita han Biblia nga kinahanglan magin mapailubon kita. Pariho han mga surugoon han Dios ha kadaan nga panahon, makakarawat naton an mga saad han Dios kon marig-on an aton pagtoo ngan mapailubon kita nga naghuhulat han panahon nga iya tutumanon ito nga mga saad. (Basaha an Hebreo 6:11, 12.) Hi Jehova mismo mapailubon. Puydi niya tapuson an karaotan bisan san-o, pero naghuhulat hiya han husto nga panahon. (Roma 9:20-24) Kay ano nga mapailubon gud hiya? Paonan-o ginsusubad ni Jesus an pagpailob han iya Amay ngan nagpapakita hin susbaranan ha aton? Ano an magigin kapulsanan ha aton kon magpailob kita pariho kan Jehova? An mga baton hini nga mga pakiana makakabulig ha aton nga magin mapailubon ngan marig-on an pagtoo, bisan kon para ha aton baga hin naglalangan hi Jehova.

3, 4. (a) Kay ano nga hi Jehova nagpapailob ha pagtuman han iya katuyoan para ha tuna? (b) Ano an ginbuhat ni Jehova han nagtalapas hira Adan ngan Eva?

³ Hi Jehova may maopay nga rason ha pagin mapailubon. Oo, hiya an may pinakahitaas nga awtoridad ha bug-os nga uniberso ha ngatanan nga panahon; kondi an pagrebelde  ha Eden nagbangon hin mga pakiana nga nahidadabi an ngatanan nga linarang. Nagpapailob hi Jehova kay maaram hiya nga nagkikinahanglan hin panahon basi bug-os nga mabaton ito nga mga pakiana. Tungod kay maaram gud hiya han mga buhat ngan panhunahuna han tagsa nga indibiduwal ha langit ngan ha tuna, sigurado nga ginbubuhat niya an pinakamaopay para ha aton.—Heb. 4:13.

⁴ Katuyoan ni Jehova nga an tuna mapuno han mga katulinan nira Adan ngan Eva. Han nalimbongan ni Satanas hi Eva ngan katapos nagtalapas liwat hi Adan, waray isalikway han Dios an iya katuyoan. Waray hiya mataranta, magpatigda-tigda pagdesisyon, o maghunahuna nga waray na paglaom an katawohan. Lugod, naghimo hiya hin paagi ha pagtuman han iya katuyoan para ha mga tawo ngan ha planeta nga Tuna. (Isa. 55:11) Basi matuman an katuyoan ni Jehova ngan mabindikar an iya pagkasoberano, nagpapakita hiya hin daku nga pagpugong ha kalugaringon ngan pagpailob. Naghuhulat pa ngani hiya hin yinukot nga katuigan basi matuman ha pinakamaopay nga paagi an pipira nga bahin han iya katuyoan.

5. Ano nga bendisyon an magigin resulta han pagpailob ni Jehova?

⁵ Usa pa nga rason nga hi Jehova mapailubon nga naghuhulat kay karuyag niya nga mas damu nga tawo an magkaada kinabuhi nga waray kataposan. Yana, nag-aandam hiya ha pagluwas han usa nga daku nga panon. (Pah. 7:9, 14; 14:6) Pinaagi han aton pagsangyaw, gin-aaghat ni Jehova an mga tawo nga mahibaro mahitungod han iya Ginhadian ngan han iya matadong nga mga suruklan. An mensahe han Ginhadian amo an pinakamaopay nga sumat para ha katawohan—oo, ‘maopay ito nga sumat.’ (Mat. 24:14) An tagsa nga tawo nga gin-iimbitar ni Jehova nagigin bahin han bug-os-kalibotan nga kongregasyon han tinuod nga kasangkayan nga nahigugma ha kon ano an husto. (Juan 6:44-47) Ginbubuligan hira han aton mahigugmaon nga Dios nga makarawat an iya pag-uyon. Tikang ha katawohan, nagpipili liwat hiya hin magigin mga membro han iya gobyerno ha langit. Kon aadto na hira ha langit, bubuligan nira an masinugtanon nga mga tawo nga magin hingpit ngan mabuhi ha waray kataposan. Matin-aw nga bisan kon mapailubon nga naghuhulat hi Jehova, may ginbubuhat hiya ha pagtuman han iya mga saad, para ha aton kaopayan.

6. (a) Ha ano nga paagi nagpailob hi Jehova ha panahon ni Noe? (b) Paonan-o nagpapailob hi Jehova yana?

⁶ Nagpapailob hi Jehova bisan pa han karaotan nga ginbubuhat basi insultuhon hiya. Pananglitan, tagda kon ano an iya ginbuhat ha karaotan antes han Baha. Hito nga panahon an tuna puno hin imoralidad ngan kamadarahog, ngan ‘nasubo an kasingkasing’ ni Jehova tungod han duro nga karaotan han tawo. (Gen. 6:2-8) Diri niya tutugotan nga magpadayon ito ha waray kataposan, salit nagdesisyon hiya nga magpahinabo hin baha basi bungkagon an magraot nga tawo. Samtang “naghinulat an Dios hin mapailubon ha mga adlaw ni Noe,” nag-andam Hiya pagluwas kan Noe ngan han iya pamilya. (1 Ped. 3:20) Ha husto nga panahon, ginsumatan ni Jehova hi Noe han Iya desisyon ngan ginsugo nga maghimo hin arka. (Gen. 6:14-22) Dugang pa, hi Noe “parawali ha katadongan” nga nagsusumat ha mga tawo mahitungod han tiarabot nga kabungkagan. (2 Ped. 2:5) Hi Jesus nagsiring nga an aton panahon pariho han panahon ni Noe. Nagdesisyon na hi Jehova kon san-o niya bubungkagon inin maraot nga sistema. Waray tawo nga maaram han “adlaw ngan oras” kon san-o ito maabot. (Mat. 24:36) Yana, ginsugo kita han Dios nga pahamangnoan an mga tawo ngan sumatan hira kon paonan-o maluluwas.

7. Mahinay ba hi Jehova ha pagtuman han iya mga saad? Isaysay.

⁷ Matin-aw nga an pagpailob ni Jehova diri nagpapasabot nga naghuhulat la hiya nga lumabay an panahon. Oo, diri gud naton sadang hunahunaon nga an iya pagpailob nagpapakita nga diri hiya nanginginano o nagtatagad ha aton! Kondi ha pagkamatuod, bangin makuri ito tipigan ha hunahuna samtang nagtitikalagas kita o nag-aantos dinhi hinin maraot nga sistema. Bangin manluya kita o umabat nga mahinay an Dios ha pagtuman han iya mga saad. (Heb. 10:36) Ayaw gud hingalimti  nga may maopay hiya nga mga rason ha pagin mapailubon ngan ginagamit niya an nabibilin nga panahon para ha kapulsanan han iya maunungon nga mga surugoon. (2 Ped. 2:3; 3:9) Tagda liwat kon paonan-o ginsubad ni Jesus an pagkamapailubon han iya Amay.

8. Ha ano nga mga kahimtang nagpailob hi Jesus?

⁸ Malipayon nga ginbubuhat ni Jesus an kaburut-on ni Jehova hin yinukot na nga katuigan. Han nagrebelde hi Satanas, nagdesisyon hi Jehova nga pakanhion ha tuna an iya bugtong nga Anak sugad nga Mesias. Hunahunaa kon ano an kahulogan hito para kan Jesus—mapailubon nga maghulat hin yinukot nga katuigan tubtob nga umabot ito nga panahon. (Basaha an Galasia 4:4.) Durante hito nga panahon, diri kay naghihinulat la hiya nga waray ginhihimo; lugod, okupado hiya ha buruhaton nga iginsugo han iya Amay. Ha urhi han kinanhi hiya ha tuna, maaram hiya nga papahinaboon ni Satanas an iya kamatayon, sugad han igintagna. (Gen. 3:15; Mat. 16:21) Mapailubon nga ginsunod niya an kaburut-on han Dios bisan kon nangahulogan ito hin pag-antos hin duro nga kasakit. Waray niya hunahunaa an iya kalugaringon. Mapainubsanon hiya ngan andam mag-antos bisan kon Anak hiya han Dios. Hingpit hiya nga susbaranan han pagkamaunungon ha Dios, ngan sadang naton hiya subaron.—Heb. 5:8, 9.

9, 10. (a) Ano an ginbubuhat ni Jesus samtang mapailubon nga naghuhulat han paggios ni Jehova? (b) Ano an sadang naton magin panhunahuna ha itinanda nga panahon ni Jehova?

⁹ Katapos mabanhaw hi Jesus, kinarawat hiya hin awtoridad ha langit ngan ha tuna. (Mat. 28:18) Ginagamit niya ito nga awtoridad basi tumanon an katuyoan ni Jehova sumala ha Iya itinanda nga panahon. Mapailubon nga naghulat hi Jesus ha too han Dios tubtob han 1914 han gintagan hiya han Dios hin awtoridad ha iya mga kaaway. (Sal. 110:1, 2; Heb. 10:12, 13) Diri na mag-iiha, bubungkagon niya an sistema ni Satanas. Samtang naghuhulat hi Jesus, mapailubon nga ginbubuligan niya an mga tawo ngan gintutugwayan ngadto ha “mga tubig han kinabuhi.”—Pah. 7:17.

¹⁰ Nasasabtan mo ba kon paonan-o mo masusubad an panhunahuna ni Jesus ha itinanda nga panahon ni Jehova? Sigurado nga karuyag gud ni Jesus buhaton an bisan ano nga iginpapabuhat han iya Amay, kondi andam hiya maghulat ha itinanda nga panahon han Dios. Samtang ginhuhulat naton an kataposan han maraot nga sistema ni Satanas, kita ngatanan kinahanglan magpailob. Kinahanglan maghulat kita ha Dios ngan diri umundang pag-alagad kon nanluluya kita. Ano an mahimo naton buhaton basi magkaada hin sugad hito nga pagpailob?

11. (a) Ha ano nga paagi may kalabotan an pagtoo ngan an pagpailob? (b) Kay ano nga daku gud an aton rason ha pagkaada marig-on nga pagtoo?

¹¹ Antes kumanhi hi Jesus ha tuna, an mga propeta ngan iba nga magtinumanon nga surugoon han Dios nagpakita hin susbaranan kon paonan-o an diri-hingpit nga mga tawo makakapabilin nga mapailubon. May direkta nga kalabotan an ira pagtoo ngan an ira pagpailob. (Basaha an Jakobo 5:10, 11.) Kon waray gud hira tumuod ha ginsiring ha ira ni Jehova—kon waray hira pagtoo—mapailubon ba hira nga maghuhulat han katumanan han iya mga saad? Ha panapanahon nakaeksperyensya hira hin makaharadlok o makuri nga mga kahimtang, ngan nailob nira ito kay natoo hira nga tutumanon han Dios an iya mga saad. (Heb. 11:13, 35-40) Mas daku gud an aton rason ha pagkaada marig-on nga pagtoo, kay hi Jesus nagin “maghiringpit han aton pagtoo.” (Heb. 12:2) Iya gintuman an damu nga tagna ngan iginpahayag an mga katuyoan han Dios ha paagi nga naghahatag ha aton hin marig-on nga mga hinungdan nga magkaada pagtoo.

12. Ano an mahimo naton buhaton basi maparig-on an aton pagtoo?

¹² Ano an mahimo naton buhaton basi maparig-on an aton pagtoo, nga tungod hito magigin mas mapailubon kita? Importante nga sundon  naton an mga sagdon han Dios. Pananglitan, hunahunaa kon kay ano nga sadang mo unahon an Ginhadian ha imo kinabuhi. Mahimo mo ba dugangan an imo pangalimbasog ha pag-aplikar han sagdon ha Mateo 6:33? Bangin mangahulogan ito hin paggahin hin dugang nga panahon ha ministeryo o paghimo hin mga pagbag-o basi mapasimple an imo pagkinabuhi. Ayaw hingalimti kon paonan-o ginbibendisyonan ni Jehova an imo mga pangalimbasog tubtob yana. Bangin ginbuligan ka niya nga magkaada bag-o nga Bible study o makarawat an “kamurayawan han Dios, nga labaw ha ngatanan nga hibabroan.” (Basaha an Filipos 4:7.) Kon nakasentro an imo atensyon ha mga kapulsanan nga imo nakakarawat ha pagsunod han mga instruksyon ni Jehova, masasantop mo nga maopay an pagin mapailubon.—Sal. 34:8.

13. Iilustrar kon paonan-o an pagparig-on han aton pagtoo makakabulig ha aton nga magin mas mapailubon.

¹³ Ini nga proseso pariho han ginhihimo kon nag-uuma. An parauma nagsasabwag, nagkukultibar, ngan nag-aani. Ha kada panahon nga damu an iya naaani, mas ganado hiya ha sunod nga pagtánom. Syempre, kinahanglan mapailubon nga maghulat hiya ha panahon han pag-ani, kondi diri ito makakapugong ha iya ha pagsabwag. Bangin mas haluag pa ngani an iya tamnan kay han siyahan. Nasarig hiya nga may-ada hiya aanihon. Ha pariho nga paagi, kon padayon nga nahibabaro kita han mga sagdon ni Jehova, nasunod hito, ngan nakakakarawat han mga kapulsanan, mas nasarig kita kan Jehova. Mas napaparig-on liwat an aton pagtoo, ngan mas nagigin masayon an paghulat han mga bendisyon nga maaram kita nga maabot.—Basaha an Jakobo 5:7, 8.

14, 15. Ano an sadang naton magin panhunahuna ha pag-antos han tawo?

¹⁴ Usa pa nga paagi basi magin mas mapailubon amo an paghunahuna kon ano an sadang naton magin pagtagad ha kalibotan ngan ha aton kahimtang. Pangalimbasugi nga subaron an panhunahuna ni Jehova mahitungod hito. Pananglitan, hunahunaa an iya inaabat ha pag-antos han tawo. Maiha na nga nasasákit hiya kon nag-aantos  an mga tawo, kondi waray ito makapaundang ha iya ha pagbuhat hin maopay. Iya ginsugo an iya bugtong nga Anak “ha pagbungkag ha mga buhat han yawa” ngan pagwara han ngatanan nga kadaot nga ginpahinabo ni Satanas ha mga tawo. (1 Juan 3:8) Ha pagkamatuod, an pag-antos temporaryo la, kondi an solusyon han Dios waray kataposan. Ha pariho nga paagi, imbes nga manluya an pagtoo tungod han karaotan han pagmando ni Satanas yana o mauyam paghinulat kon san-o ito matatapos, magkaada kita pagtoo ha mga butang nga diri nakikita nga magpapadayon ha waray kataposan. Hi Jehova may itinanda nga panahon ha pagtapos han karaotan, ngan bubuhaton niya ito ha husto nga panahon.—Isa. 46:13; Nah. 1:9.

¹⁵ Hinin makuri nga kataposan nga mga adlaw, bangin maeksperyensyahan naton an magkuri nga pagsari ha aton pagtoo. Imbes nga masina kon nagigin biktima kita han kamadarahog o kon nag-aantos an aton mga hinigugma, kinahanglan magin determinado kita nga bug-os nga sumarig kan Jehova. Diri kita hingpit, salit diri masayon an pagbuhat hito. Kondi hinumdumi an ginbuhat ni Jesus, nga aton mababasa ha Mateo 26:39.—Basaha.

16. Ano an sadang naton likyan samtang diri pa naabot an kataposan?

¹⁶ An tawo nga nagruruhaduha nga hirani na an kataposan mahimo magkaada sayop nga panhunahuna. Bangin maghunahuna hiya nga kinahanglan magkaada hiya kalugaringon nga mga plano engkaso diri matuman an mga saad ni Jehova. Bangin hunahunaon niya, ‘Huhulaton ko na la kon tutumanon gud ba ni Jehova an iya mga saad.’ Sugad nga resulta, bangin mangalimbasog hiya nga magin kilala hini nga kalibotan o maniguro nga magkaada damu nga kwarta imbes nga unahon an Ginhadian han Dios. O bangin magdesisyon hiya nga umiskwela ha unibersidad basi masiguro nga magigin komportable an iya kinabuhi yana. Kondi diri ba pagpakita gud ito hin kakulang hin pagtoo? Hinumdumi nga ginsagda kita ni Pablo nga subaron an mga matinumanon nga “tungod ha ira pagtoo ngan pag-ilob” nakakarawat han mga bendisyon nga iginsaad ha ira ni Jehova. (Heb. 6:12) Nagdesisyon na hi Jehova nga bungkagon inin maraot nga kalibotan, ngan diri hiya maglalangan. (Hab. 2:3) Samtang diri pa ito naabot, kinahanglan likyan naton nga himoon nga rutina la an pag-alagad kan Jehova. Lugod, kinahanglan magpabilin kita nga alerto ngan magin maduruto ha pagsangyaw han maopay nga sumat, nga magriresulta hin duro nga kalipay bisan yana.—Luk. 21:36.

17, 18. (a) Ano nga higayon an iginhahatag ha aton yana samtang mapailubon kita nga naghuhulat? (b) Ano nga mga bendisyon an aton makakarawat kon nagpapailob kita yana?

¹⁷ Nag-aalagad man kita ha Dios hin pipira pa la ka bulan o hin damu na ka tuig, karuyag naton mag-alagad ha iya ha waray kataposan. An pagpailob nabulig ha aton nga makapadayon tubtob ha kataposan hini nga sistema, anoman kaiha an aton paghulat. Gintatagan kita ni Jehova yana hin higayon nga pamatud-an nga bug-os an aton pagsarig ha iya mga desisyon, ngan kon kinahanglan, magin andam nga mag-antos hin karaotan tungod han iya ngaran. (1 Ped. 4:13, 14) Naghahatag liwat hiya hin pagbansay nga makakabulig ha aton nga makailob tubtob ha kataposan ngan maluwas.—1 Ped. 5:10.

¹⁸ Hi Jesus may-ada han ngatanan nga awtoridad ha langit ngan ha tuna, ngan waray makakaagaw ha imo tikang ha iya pagpanalipod, labot la kon ikaw mismo an bumulag ha iya. (Juan 10:28, 29) Diri kita kinahanglan mahadlok ha tidaraon o bisan ha kamatayon. An mga magpapailob tubtob ha kataposan maluluwas. Salit sadang naton siguruhon nga diri kita malimbongan han kalibotan ngan mapaundang ha pagsarig kan Jehova. Lugod, samtang nagpapailob an Dios, kinahanglan magin determinado kita nga parig-unon an aton pagtoo ngan gamiton hin maaramon an aton panahon.—Mat. 24:13; basaha an 2 Pedro 3:17, 18.