Teokratiko nga mga Eskwelahan—Pamatuod han Gugma ni Jehova
HI Jehova an aton Gihitaasi nga Instruktor. (Isa. 30:20) An iya gugma nagpapagios ha iya nga tutdoan ngan bansayon an iba. Pananglitan, tungod han iya daku nga gugma, iginpakita niya kan Jesus “an ngatanan nga bagay, nga iya ginhihimo.” (Juan 5:20) An iya gugma ha aton sugad nga iya mga Saksi nagpapagios ha iya nga hatagan kita “han dila nira nga gintutdoan,” samtang nangangalimbasog kita ha pagpasidungog ha iya ngan pagbulig ha iba.—Isa. 50:4.
Ha pagsubad han gugma nga iginpapakita ni Jehova, an Teaching Committee han Nagmamando nga Lawas nagamit hin napulo nga teokratiko nga eskwelahan basi bansayon an mga naruruyag ngan kwalipikado mag-enrol hini. Ginhuhunahuna mo ba ini nga mga eskwelahan sugad nga pamatuod han gugma ni Jehova?
Alayon basaha an mga impormasyon mahitungod han teokratiko nga mga eskwelahan yana ngan an mga komento han mga nakaeskwela na hito. Katapos pakianhi an imo kalugaringon: ‘Paonan-o ako makakapahimulos hini nga edukasyon tikang ha Dios?’
MAGPAHIMULOS HA TEOKRATIKO NGA PAGBANSAY
Sugad nga “Dios han paghigugma,” ginbabansay kita ni Jehova basi magin mas mapulsanon an aton kinabuhi, andam ha paglampos han mga problema, ngan malipayon gud ha aton ministeryo. (2 Kor. 13:11) Pariho han mga disipulo ha siyahan nga siglo, ginsasangkapan gud kita ha pagbulig ha iba basi ‘tutdoan hira han pagbantay han ngatanan nga mga bagay’ nga iginsugo ha aton.—Mat. 28:20.
Bangin diri kita makakaeskwela hini ngatanan nga eskwelahan, kondi mahimo kita magpahimulos ha usa o ha pipira hini. Ngan mahimo naton iaplikar an iginhahatag nga instruksyon nga basado ha Biblia. Mahimo liwat kita magin mas epektibo ha ministeryo pinaagi ha pakig-upod ha binansay hin maopay nga mga surugoon ni Jehova.
Pakianhi an imo kalugaringon, ‘Igintutugot ba han akon kahimtang nga himoon ko nga tumong nga magin kwalipikado ha pag-eskwela ha bisan hain hini nga mga eskwelahan?’
Para ha mga magsiringba ni Jehova, pribilehiyo nga makaeskwela ngan matutdoan hinin mapulsanon nga mga eskwelahan. Hinaot an pagbansay nga imo nakakarawat makabulig ha imo nga magin mas duok ha Dios ngan matuman an imo mga responsabilidad ha pag-alagad ha iya, labi na an apurado nga toka nga isangyaw an maopay nga sumat.
