1. Ano an ginsiring ni Jesus mahitungod han pagpanumpa, ngan kay ano?

AN TINUOD nga mga Kristiano kasagaran na nga diri kinahanglan manumpa. Tungod ini kay ginsusunod nira hi Jesus, nga nagsiring: “An imo pagyakan sugara hini: Oo, oo.” Karuyag sidngon ni Jesus nga sadang tumanon han usa an iya ginyakan. Antes hito, nagsiring hi Jesus: “Bisan ano nga paagi diri kamo manumpa.” Ginsiring niya ini ha pagkondenar han nabatasan han damu nga tawo ha ira adlaw-adlaw nga pakiistorya nga pauroutro nga manumpa bisan kon waray hira intensyon nga tumanon an ira ginyakan. An pagyakan hin “iba pa” o sobra pa ha Oo o Diri ha pagpahayag han ira intensyon mahimo magpakita nga diri gud hira matataporan, ngan iginpapakita hito nga naiimpluwensyahan hira han usa nga maraot.—Basaha an Mateo 5:33-37.

2. Isaysay kon kay ano nga diri pirme sayop an pagpanumpa.

² Karuyag sidngon ba ni Jesus nga an ngatanan nga pagpanumpa maraot? Diri man. Sugad han aton hinbaroan ha nahiuna nga artikulo, hi Jehova nga Dios ngan an iya matadong nga surugoon nga hi Abraham nanumpa mahitungod ha importante nga mga butang. Sugad man, igin-obligar han Balaud han Dios an panumpa ha pagsulbad han pipira nga problema. (Eks. 22:10, 11; Num. 5:21, 22) Salit an usa nga Kristiano bangin kinahanglan manumpa nga magsusumat han kamatuoran kon nagtitestigo ha korte. O ha talagsahon nga mga kahimtang, an usa nga Kristiano bangin maghunahuna nga kinahanglan hiya manumpa basi pasarigon an iba nga tutumanon niya an iya karuyag buhaton o basi makabulig ha pagsulbad han usa nga problema. Ha pagkamatuod, han hi Jesus ginpasumpa han hitaas nga saserdote, waray hiya rumiwa kondi nagsumat han kamatuoran ha Sanhedrin. (Mat. 26:63, 64) Kondi diri hiya kinahanglan manumpa ha bisan hin-o. Bisan pa hito, basi pabug-atan nga  matataporan an iya ginsisiring, agsob niya tikangan ito hini nga mga pulong: “Matuod, matuod nasiring ako ha iyo.” (Juan 1:51; 13:16, 20, 21, 38) Aton hisgotan kon ano pa an aton hibabaroan ha susbaranan ni Jesus, ni Pablo, ngan han iba pa nga ginhimo nga Oo an ira ginsiring nga Oo.

3. Ano an iginsaad ni Jesus ha Dios ha iya pag-ampo, ngan ano an reaksyon han iya Amay ha langit?

³ “Kitaa, iini ako . . . ha pagbuhat han imo kaburut-on, O Dios.” (Heb. 10:7) Pinaagi hinin sinsero nga mga pulong, iginpresenta ni Jesus ha Dios an iya kalugaringon ha pagbuhat han ngatanan nga igintagna mahitungod han iginsaad nga Binhi, pati na an ‘pagtultog han iya tikod’ ni Satanas. (Gen. 3:15) Waray iba nga tawo nga nagboluntaryo pagkarawat hin sugad kadaku nga responsabilidad. Tikang ha langit, iginpahayag ni Jehova an iya bug-os nga pagsarig ha iya Anak, bisan kon waray niya obligara hi Jesus nga manumpa nga tumanon an iya iginsaad.—Luk. 3:21, 22.

4. Ano an andam buhaton ni Jesus basi siguruhon nga magin Oo an iya ginsiring nga Oo?

⁴ Pirme ginbubuhat ni Jesus an iya ginsasangyaw pinaagi ha paghimo nga Oo han iya ginsiring nga Oo. Waray gud niya tuguti nga may makawara han iya pokus ha iginpapabuhat ha iya han iya Amay, nga isangyaw an maopay nga sumat han Ginhadian han Dios ngan himoon nga mga disipulo an ngatanan nga iginpahirani ha iya han Dios. (Juan 6:44) Ginpapamatud-an han Biblia nga gintuman ni Jesus an iya saad ha pagbuhat han kaburut-on han Dios pinaagi ha pagsiring: “Bisan ano kadamu an mga saad han Dios, ha iya [Jesus] amo an oo.” (2 Kor. 1:20) Oo, hi Jesus an gimaopayi nga susbaranan ha pagtuman han iya iginsaad ha iya Amay. Sunod, hisgotan naton an usa nga nagbuhat han iya gimaopayi ha pagsubad kan Jesus.

5. Ano nga susbaranan an iginpakita ha aton ni Pablo?

⁵ “Ano an akon bubuhaton, Ginoo?” (Buh. 22:10) Ini an sinsero nga baton ni Pablo—nga hito nga panahon kilala nga Saulo—ha ginhimaya nga Ginoo nga hi Jesus, nga nagpakita ha iya ha bisyon basi paundangon hiya ha pagtimaraot ha mga disipulo ni Kristo. Sugad nga resulta hini, hi Saulo mapainubsanon nga nagbasol han iya ginbuhat, nagpabawtismo, ngan ginkarawat an espesyal nga toka nga iginhatag ha iya nga magsangyaw ha mga nasud mahitungod kan Jesus. Tikang hito nga panahon, padayon nga gintawag ni Pablo hi Jesus nga iya “Ginoo” ngan sinugot ha Iya tubtob nga natapos an iya kinabuhi dinhi ha tuna. (Buh. 22:6-16; 2 Kor. 4:5; 2 Tim. 4:8) Hi Pablo diri pariho han iba nga ginsidngan ni Jesus: “Ano an iyo pagtawaga ha akon: Ginoo, Ginoo; ngan waray niyo bubuhata an akon isinisiring?” (Luk. 6:46) Oo, naglalaom hi Jesus nga an ngatanan nga natawag ha iya nga ira Ginoo magbubuhat han ira ginyayakan, pariho han ginbuhat ni apostol Pablo.

6, 7. (a) Kay ano nga ginbag-o ni Pablo an iya plano nga bisitahon utro an Korinto, ngan kay ano nga sayop an mga nag-akusar nga diri hiya masasarigan? (b) Paonan-o naton sadang tagdon an mga pinili nga manguna ha aton?

 ⁶ Madasigon nga iginpasamwak ni Pablo an mensahe han Ginhadian ha bug-os nga Asia Minor ngan ha Europa, nag-iestablisar hin damu nga kongregasyon ngan ginbibisita utro ito. Usahay kinahanglan hiya manumpa nga tinuod an iya iginsurat. (Gal. 1:20) Han an iba ha Korinto nag-akusar nga diri hiya masasarigan, nagsurat hiya ha pagdepensa ha iya kalugaringon: ‘Sugad nga an Dios matinumanon, an amon mga pulong ha iyo diri an oo nga diri [ngay-an].’ (2 Kor. 1:18) Han iginsurat ini ni Pablo, binaya na hiya ha Efeso ngan nagbiyahe ngadto ha Masedonia antes kumadto ha Korinto. Ha siyahan, plano niya nga bisitahon utro an Korinto antes kumadto ha Masedonia. (2 Kor. 1:15, 16) Kondi pariho ha mga nagbibiyahe nga paramangno yana, usahay kinahanglan bag-uhon an ruta han pagbisita ha mga kongregasyon. Ito nga mga pagbag-o diri ginhihimo tungod han diri-importante ngan personal nga mga hinungdan kondi tungod han diri-ginlalaoman ngan importante nga mga hitabo. Ha kahimtang ni Pablo, para ha kaopayan han kongregasyon ha Korinto an hinungdan nga waray la anay hiya kumadto. Kay ano?

⁷ Katapos himoon ni Pablo an iya siyahan nga plano, nakaabot ha iya an nakakapabaraka nga sumat nga ginkukonsinter ha kongregasyon ha Korinto an pagkabahin-bahin ngan imoralidad. (1 Kor. 1:11; 5:1) Basi tadungon ito, nagsurat hiya hin marig-on nga sagdon ha iya siyahan nga surat ha mga taga-Korinto. Katapos, imbes nga dumiretso ha Korinto tikang ha Efeso, nagdesisyon hiya nga tagan hin panahon an kabugtoan nga iaplikar an iya sagdon basi pag-abot niya, magin mas makapadasig an iya pagbisita. Basi pasarigon hira nga ini an tinuod nga hinungdan nga nagbag-o an iya plano, ha iya ikaduha nga surat hiya nagsiring: “Tinatawag ko an Dios nga masaksi ha akon kalag, nga basi magpasaylo ako ha iyo, waray ako kumanhi ha Korinto.” (2 Kor. 1:23) Hinaot diri gud kita magin pariho han mga nag-akusar kan Pablo; lugod, ipakita naton an aton hilarom nga pagtahod ha mga pinili nga manguna ha aton. Ha pagkamatuod, sadang naton subaron hi Pablo, sugad la nga iya ginsubad hi Kristo.—1 Kor. 11:1; Heb. 13:7.

8. Ano nga susbaranan an iginpakita ni Rebeka ha aton?

⁸ “Ako maupod.” (Gen. 24:58) Ini an baton ni Rebeka han ginpakianhan hiya han iya nanay ngan bugto kon karuyag ba niya bumaya ha ira balay hito mismo nga adlaw ngan magbiyahe hin sobra 800 ka kilometro kaupod hin tawo nga diri niya kilala basi magin asawa han anak ni Abraham nga hi Isaak. (Gen. 24:50-58) Gintuman ni Rebeka an iya ginyakan, ngan nagin maunungon hiya nga asawa kan Isaak ngan matinumanon nga magsiringba han Dios. Ha nahibibilin nga bahin han iya kinabuhi, nag-ukoy hiya ha mga tolda sugad nga dumuruong ha Tuna nga Iginsaad. Ginbalosan an iya pagkamatinumanon kay nagin usa hiya han mga kaapoy-apoyan han iginsaad nga Binhi, hi Jesu-Kristo.—Heb. 11:9, 13.

9. Paonan-o gintuman ni Rut an iya ginyakan?

⁹ “Ayaw gad, kondi kami mabalik upod ha imo ngadto ha imo katawohan.” (Rut 1:10) Ini an ginsiniring han Moabitanhon nga mga balo nga hira Rut ngan Orpa ha ira balo nga ugangan nga hi Noemi, nga tipauli ha Betlehem tikang ha Moab. Ha kataposan, tungod han pag-inaghat ni Noemi, binalik hi Orpa ha iya tuna nga natawohan. Kondi gintuman ni Rut an iya ginyakan. (Basaha an Rut 1:16, 17.) Maunungon hiya kan Noemi ngan waray bumulag ha iya, bisan kon nangahulogan ito nga diri na niya makikita utro an iya pamilya ngan babayaan niya an buwa nga relihiyon han Moab. Nagin maunungon hiya nga magsiringba ni Jehova ngan ginbalosan hiya. Usa hiya han lima la nga babaye nga gin-unabi ni Mateo ha listahan han mga kaapoy-apoyan han Kristo.—Mat. 1:1, 3, 5, 6, 16.

10. Kay ano nga hi Isaias maopay nga susbaranan ha aton?

¹⁰ “Iini ako; pakadtoa ako.” (Isa. 6:8) Antes ini iyakan ni Isaias, nakakita hiya hin mahimayaon  nga bisyon mahitungod kan Jehova nga nalingkod ha Iya trono ha igbaw han templo ha Israel. Samtang ginkikinita niya ito, nakabati hiya nga nagsiring hi Jehova: ‘Hin-o an akon pakakadtoon, ngan hin-o an makadto para ha amon?’ Usa ini nga imbitasyon nga magin tagapagyakan ni Jehova basi isumat an Iya mensahe ha Iya matinalapason nga katawohan. Gintuman ni Isaias an iya ginyakan—ginhimo niya nga Oo an iya ginsiring nga Oo. Sobra 46 ka tuig nga matinumanon nga nag-alagad hiya sugad nga propeta, nagpapasamwak hin marig-on nga mga mensahe han paghukom ngan hin makalilipay nga mga saad mahitungod han pagpahiuli han tinuod nga pagsingba.

11. (a) Kay ano nga importante hinduro an pagtuman han aton ginyayakan? (b) Ano an nagpapahamangno nga mga ehemplo han pipira nga waray magtuman han ira ginyakan?

¹¹ Kay ano nga iginpasurat ni Jehova ha iya Pulong ini nga mga ehemplo? Ngan kay ano nga importante gud nga himoon naton nga Oo an aton ginsiring nga Oo? An Biblia matin-aw nga nagpapahamangno nga an usa nga “magburungkag ha mga ginkausahan” kaupod hadton “takos ha kamatayon.” (Roma 1:31, 32) An Paraon han Ehipto, an hadi han Juda nga hi Sedekia, ngan hira Ananias ngan Sapira an pipira han magraot nga ehemplo nga gin-unabi ha Biblia nga an ira Oo waray nira himoa nga Oo. Maraot an nagin resulta hito ha ira, ngan mga ehemplo hira nga nagpapahamangno ha aton.—Eks. 9:27, 28, 34, 35; Esek. 17:13-15, 19, 20; Buh. 5:1-10.

12. Ano an mabulig ha aton nga tumanon an aton ginyakan?

¹² Tungod kay nagkikinabuhi kita “ha kataposan nga mga adlaw,” napapalibotan kita hin mga tawo nga “diri maunungon” ngan “may mga dagway ha pagtahod ha Dios, kondi ginwara nira an iya gahum.” (2 Tim. 3:1-5; NW) Tubtob ha aton mahihimo, kinahanglan likyan naton an pakig-upod ha sugad hito nga mga tawo. Lugod, kinahanglan regular nga makig-upod kita ha mga nangangalimbasog pirme nga himoon nga Oo an ira ginsiring nga Oo.—Heb. 10:24, 25.

13. Ano an pinakaimportante nga Oo nga ginsisiring han usa nga sumurunod ni Jesu-Kristo?

¹³ An pinakaimportante nga saad nga mahihimo han usa ka tawo amo an iya pagdedikar ha Dios. Ha tulo nga kahimtang, an mga naruruyag magsalikway han ira kalugaringon ngan magin disipulo ni Jesus may higayon nga magsiring hin Oo ha mga pakiana mahitungod han ira intensyon. (Mat. 16:24) Kon an usa nga naruruyag magin diri-bawtismado nga magwarali gin-iinterbyu hin duha nga tigurang, ginpapakianhan hiya: “Karuyag mo gud ba magin usa han mga Saksi ni Jehova?” Ha urhi, kon hiya dugang nga nag-uswag ha espirituwal ngan naruruyag magpabawtismo, kakaistoryahon hiya han mga tigurang ngan papakianhan, “Ginhimo mo na ba an imo dedikasyon ngadto kan Jehova pinaagi han pag-ampo?” Ha kataposan, ha adlaw han bawtismo, an tagsa nga kandidato ginpapakianhan, “Pinaagi han halad ni Jesu-Kristo, nagbasol ka na ba han imo mga sala ngan nagdedikar na han imo kalugaringon  ngadto kan Jehova ha pagbuhat han iya kaburut-on?” Salit ha atubangan han ngatanan nga presente ha bawtismo, ini nga mga bag-ohan nasiring hin Oo mahitungod han ira saad nga mag-alagad ha Dios ha waray kataposan.

14. Ano nga pag-usisa ha kalugaringon an kinahanglan naton buhaton ha panapanahon?

¹⁴ Bag-o ka man nga bawtismado o damu ka tuig na nga nag-aalagad ha Dios, kinahanglan usisahon mo an imo kalugaringon ha panapanahon ngan igpakiana ini: ‘Ginsusubad ko ba hi Jesu-Kristo pinaagi han padayon nga pagtuman han akon pinakaimportante nga Oo? Padayon ko ba nga ginsusunod hi Jesus pinaagi han paghimo nga prayoridad han buruhaton nga pagsangyaw ngan panhimo hin disipulo?—Basaha an 2 Korinto 13:5.

15. Ha ano nga mga bahin han aton kinabuhi importante nga an aton Oo himoon naton nga Oo?

¹⁵ An pagtuman han aton saad han nagdedikar kita ha Dios nangangahulogan nga kinahanglan tumanon liwat naton an iba pa nga importante nga butang. Pananglitan: Inasaw-an ka ba? Padayon nga tumana an imo importante nga iginpanumpa nga higugmaon ngan paurahon an imo bana o asawa. Nagpirma ka ba hin kontrata ha negosyo o aplikasyon para ha teokratiko nga mga pribilehiyo? Tumana an imo kontrata ngan an imo saad. Nag-oo ka ba ha imbitasyon han usa nga pobre nga kumaon ha ira? Ayaw ito pagkanselaha kon may imbitasyon ha imo nga baga hin mas maopay. O may nasangyawan ka ba nga imo ginsaaran nga babalikon basi padayon nga mabuligan hiya ha espirituwal? Tumana gud an imo saad, ngan bibendisyonan ni Jehova an imo ministeryo.—Basaha an Lukas 16:10.

16. Kon waray naton matuman an aton saad, ano an sadang naton buhaton?

¹⁶ An Biblia nasiring nga sugad nga diri-hingpit nga mga tawo, “ha damu nga mga butang kita ngatanan nanhipakdol,” labi na ha aton pagyakan. (Jak. 3:2) Ano an sadang naton buhaton kon nasantop naton nga waray naton matuman an aton ginyakan? Ha Balaud han Dios ha Israel, may maloloy-on nga kahikayan para ha usa nga nakasala hin pagyakan nga diri naghuhunahuna. (Leb. 5:4-7, 11) May-ada liwat mahigugmaon nga kahikayan para ha mga Kristiano nga nakakabuhat hin sugad hito nga sala. Kon isusumat naton kan Jehova ito nga sala, kakalooyan kita niya ngan papasayloon pinaagi ha aton Hitaas nga Saserdote, hi Jesu-Kristo. (1 Juan 2:1, 2) Kondi basi padayon nga uyonan han Dios, kinahanglan ipakita naton nga mabinasulon gud kita. Pananglitan, kinahanglan diri naton batasanon an diri pagtuman han aton mga saad, ngan kinahanglan buhaton naton an ngatanan ha pagsulbad han bisan ano nga problema nga resulta han diri naton pagtuman han aton saad. (Prob. 6:2, 3) Syempre, mas maopay gud nga maghunahuna anay hin maopay antes maghimo hin mga saad nga diri naton matutuman.—Basaha an Eklesiastes 5:2.

17, 18. Ano an makalilipay gud nga tidaraon han ngatanan nga nangangalimbasog nga himoon nga Oo an ira ginsiring nga Oo?

¹⁷ Makalilipay gud an tidaraon han ngatanan nga magsiringba ni Jehova nga padayon nga nangangalimbasog nga himoon nga Oo an ira ginsiring nga Oo! Para ha 144,000 nga dinihogan, mangangahulogan ito hin imortal nga kinabuhi ha langit, diin makakaupod nira hi Jesus ha iya Ginhadian “ngan maghahadi hira upod niya hin usa ka yukot ka tuig.” (Pah. 20:6) Para ha minilyon nga iba pa, mangangahulogan ito hin pagpahimulos han pagmando ni Kristo ha Ginhadian ha usa nga paraiso nga tuna. Didto bubuligan hira nga magin hingpit an lawas ngan hunahuna.—Pah. 21:3-5.

¹⁸ Kon magpapabilin kita nga matinumanon ha ultimo nga pagsari ha kataposan han Usa ka Yukot ka Tuig nga Pagmando ni Jesus, waray na gud kita magigin hinungdan nga ruhaduhaan an ginsisiring han bisan hin-o. (Pah. 20:7-10) An ngatanan nga Oo mangangahulogan nga Oo, ngan an ngatanan nga Diri, Diri. An ngatanan nga nabubuhi hito nga panahon hingpit nga magsusubad ha aton mahigugmaon nga langitnon nga Amay, hi Jehova, an “Dios han kamatuoran.”—Sal. 31:5.