HAN Pebrero hito nga tuig, 122 nga payunir an nagkaabot ha South Lansing, New York, basi umiskwela ha ika-17 nga klase han Gilead. Upod han mga naglalaom nga magin misyonero hira Lowell Turner, William (Bill) Kasten, Richard Kelsey, ngan Ramon Templeton. Waray pag-iha hira Lowell ngan Bill nga pariho taga-Michigan, hi Richard nga taga-Iowa, ngan hi Ramon nga taga-California, nagin duok nga magsarangkay.

Paglabay hin mga lima ka bulan, eksayted gud an ngatanan han iginpahibaro nga maabot hi Brother Nathan Knorr tikang ha world headquarters basi magpahayag ha mga estudyante. Gin-unabi na hinin upat nga brother nga kon mahihimo, karuyag nira mag-alagad nga magkaurupod ha usa nga nasud. Hibabaroan na ba nira kon diin hira nga nasud itutoka sugad nga misyonero? Oo!

Dinugang kaeksayted an ngatanan han nagpahayag hi Brother Knorr ha bug-os nga klase ngan iginpahibaro an mga nasud diin hira itutoka. Siyahan nga gintawag ha entablado inin upat nga ginkukulba nga batan-on nga brother. Nawara an ira kulba han ira hinbaroan nga magkakaurupod hira! Kondi diin hira itutoka? Nanhipausa an ira mga kaklase ngan nagpinakpak han iginpahibaro nga ha Germany an ira toka.

An mga Saksi ni Jehova ha bisan diin bilib gud ha pagkamatinumanon nga iginpakita han mga Saksi ha Germany tikang han 1933 padayon durante han pagmando ni Hitler. Damu nga estudyante an nahinunumdom nga nag-andam hira hin ipapadara nga mga bado ngan CARE (Cooperative for American Remittances to Europe) nga mga package para ha kabugtoan ha Europe katapos han Girra ha Kalibotan II. An katawohan han Dios ha Germany susbaranan han marig-on nga pagtoo, determinasyon, kaisog, ngan pagsarig kan Jehova. Nahinunumdom hi Lowell nga nahunahuna niya, ‘Yana personal nga makikilala na namon inin hinigugma nga kabugtoan.’ Diri urusahon nga eksayted hinduro hira ngatanan salit karuyag nira tumawag hito nga gab-i!

Han Hulyo 27, 1951, an barko nga Homeland linarga tikang ha pantalan ha East River ha New York, ngan an upat nga magsarangkay magbibiyahe hin 11 ka adlaw tipakadto ha Germany. Gintutdoan na hira hin pipira nga sentence ha German nga yinaknan ni Brother Albert Schroeder, usa han ira mga instruktor ha Gilead ngan ha urhi nagin membro han Nagmamando nga  Lawas. Yana nga may mga igkasi-pasahero hira nga German, bangin mas damu an ira hibabaroan. Kondi iba-iba nga klase hin German an ginyayakan han mga pasahero. Mawurok gud ito!

Ha aga han Martes, Agosto 7, katapos mag-ilob hin kalipong ngan kahingasuka tungod han biyahe, inabot hira ha Hamburg, Germany. Ha bisan diin nakita nira an kadaot nga resulta han girra nga natapos unom ka tuig pa la an naglabay. Nasubo hira han ira nakita, ngan nagbiyahe hira hin bug-os nga gab-i sakay hin tren tipakadto ha Wiesbaden diin nahimumutang an sanga nga opisina hito nga panahon.

Temprano ha aga han Mierkoles, iginkita nira an siyahan nga Saksi nga ira nakilala ha Germany, hi Hans, nga an ngaran komon gud ha Germany! Tikang ha estasyon han tren, gindul-ong hira ni Hans ha Bethel ngan ginbilin ha usa nga edaran nga sister nga may pagkaistrikta ngan diri maaram magyakan hin English. Kondi, matin-aw nga naghunahuna ini nga sister nga kon dadakuon niya an iya tingog masasabtan nira an iya ginyayakan. Kondi bisan kon nagtitikadaku an iya tingog, mas waray lugod hira magkasinabot. Ha kataposan inabot hi Brother Erich Frost, an branch servant, ngan makisangkayon nga ginkaistorya hira ha English nga yinaknan. Nagin mas maopay an kahimtang.

Ha ikatarapos han Agosto, inin upat nga brother tinambong ha ira siyahan nga kombensyon ha German nga yinaknan, an “Clean Worship” nga Asembleya ha Frankfurt am Main. An pinakadamu nga tinambong inabot hin 47,432 ngan 2,373 an nabawtismohan, ngan tungod hito nadugangan an kadasig ngan hingyap hini nga mga misyonero nga magsangyaw. Kondi paglabay hin pipira ka adlaw nagsiring hi Brother Knorr nga magpapabilin hira ha Bethel ngan didto itutoka nga magtrabaho.

Karuyag gud ni Ramon magmisyonero, salit makausa ginpalabay niya an higayon nga magin Bethelite ha United States. Hira Richard ngan Bill waray gud liwat maghunahuna nga magin Bethelite. Kondi an kalipay nga ira inabat ha ira toka nakakombinse gud ha ira nga hi Jehova pirme maaram kon ano an gimaopayi. Salit mas maaramon gud nga sundon an iya paggiya imbes nga an kalugaringon nga mga hingyap! An nahibabaro hini nga leksyon magigin malipayon ha pag-alagad kan Jehova bisan diin ngan bisan ano nga toka an ihatag ha iya.

Damu nga membro han pamilya han Bethel ha Germany an nalipay nga may mga kaupod hira nga Amerikano kay naglalaom hira nga makakagpraktis na hira pag-English. Kondi usa ka adlaw ha dining room, tigda nga nawara ito nga ira ginlalaoman. An madasigon magyakan nga hi Brother Frost may ginhisgotan ha German nga yinaknan nga baga hin seryoso nga butang. Kadam-an ha pamilya an waray gud uroaringasa ngan nakatutok la ha ira mga pinggan. Bisan kon waray nasasabtan inin upat nga bag-o nga nagkaabot nga brother, hinay-hinay nga ira nasantop nga mahitungod ito ha ira. Salit han nagsiring hi Brother Frost ha daku nga tingog,“VERBOTEN!” (“Diri Puydi!”) ngan gin-utro ito ha mas daku nga tingog basi pabug-atan, nabaraka hira. Ano daw la an ira nahimo nga sugad man hito an iya reaksyon?

Natapos an pangaon, ngan an ngatanan nagdagmit pagbalik ha ira mga kwarto. Ha urhi, usa nga brother an nagsiring: “Basi mabuligan niyo kami, kinahanglan mahibaro kamo pagyakan hin German. Ito an hinungdan nga nagsiring hi Brother Frost nga tubtob nga diri pa kamo maaram magyakan hin German, VERBOTEN an pakiistorya ha iyo hin English.”

Ginsunod dayon ito han pamilya han Bethel. Nakabulig ito hini nga mga bag-ohan nga mahibaro pagyakan hin German ngan nagtutdo liwat ha ira nga an sagdon tikang ha mahigugmaon nga bugto kasagaran na nga para ha aton kaopayan, bisan kon ha tinikangan makuri ito sundon. Iginpakita han sagdon ni Brother Frost nga interesado hiya ha kaopayan han organisasyon ni Jehova ngan hinigugma niya an kabugtoan. * Diri urusahon nga inin upat nga brother nahibaro nga higugmaon hiya!

Mahimo kita mahibaro hin importante nga mga leksyon ha aton kasangkayan nga may kahadlok ha Dios, nga mabulig liwat ha aton nga magin mas maopay nga sangkay ni Jehova. Damu nga leksyon an hinbaroan hinin upat nga brother tikang ha matinumanon nga German nga kabugtoan—damu gud hira kon ngangaranan hin usa-usa—kondi nahibaro liwat hira hin leksyon ha usa kag usa. Hi Richard nagsiring: “Hi Lowell may gutiay nga hinbabaroan ha German ngan madagmit hiya mahibaro, pero kami nga tulo nakukurian hito. Tungod kay hiya an magurang ha amon nga upat, hiya dayon an amon ginhahangyo nga manguna ngan gindadaop kon may problema kami mahitungod ha yinaknan.” Hi Ramon nagsiring: “Nalipay gud ako han gintanyagan kami han usa nga Swiss nga bugto nga umukoy ha iya balay ha Switzerland para ha amon siyahan nga bakasyon katapos hin usa ka tuig ha Germany! Duha ka  semana nga kami la ngan diri makukurian pagyakan hin German! Kondi waray ko mahunahuna an bubuhaton ni Lowell. Nag-insister hiya nga basahon ngan hisgotan namon an inadlaw nga teksto kada aga ha German! Bisan kon waray ako malipay, waray magbag-o an iya hunahuna. Kondi nahibaro kami hin importante nga leksyon. Sunda an mga nangunguna nga naghuhunahuna han imo kaopayan, bisan kon usahay diri ka nauyon. Ini nga disposisyon nagin mapulsanon ha amon ha paglabay han mga tuig ngan tungod hito nagin mas masayon ha amon nga magpasakop ha paggiya han organisasyon ni Jehova.”

Inin upat nga magsarangkay nahibaro liwat pag-apresyar han mag-opay nga kalidad han kada tagsa ha ira, sugad han ginsisiring ha Filipos 2:3: “Ha pagpaubos ha hunahuna an tagsa-tagsa mag-isip han iba nga maoroopay pa ha iya ngahaw.” Salit kasagaran na nga ginhahangyo nira hi Bill nga buhaton an mga butang nga maaram hira nga mabubuhat niya hin mas maopay kay ha ira. “Kon may importante gud o diri masayon nga kinahanglan himoon basi sulbaron an makuri nga mga sitwasyon,” nahinumdom hi Lowell, “hi Bill an amon gindadaop. May abilidad hiya ha pagsulbad han diri mag-opay nga kahimtang ha paagi nga nauyon kami ngatanan nga ito an sadang buhaton kondi kulang kami hin kaisog o abilidad ha pagbuhat hito.”

Hira nga upat usa-usa nga nagdesisyon nga mag-asawa. An pundasyon han ira pagkamagsarangkay amo an gugma kan Jehova ngan ha bug-os-panahon nga pag-alagad, salit determinado hira nga mamiling hin maarasawa nga andam unahon hi Jehova. An bug-os-panahon nga pag-alagad nagtutdo ha ira nga an paghatag mas makapatagbaw kay han pagkarawat ngan kinahanglan unahon an Ginhadian kay han personal nga mga karuyag. Salit nagpili hira hin sister nga kinaburut-on nga nag-aalagad na hin bug-os-panahon. Nagresulta ito hin upat nga marig-on ngan malipayon nga pag-asawa.

Basi magpadayon an pagkamagsangkay o pag-asawa, kinahanglan upod hi Jehova ha relasyon. (Ekles. 4:12) Bisan kon ha urhi hi Bill ngan hi Ramon namatyan hin asawa, naeksperyensyahan nira an kalipay ngan suporta nga naihahatag han maunungon nga asawa. Padayon nga nakakarawat nira Lowell ngan Richard ini nga suporta, ngan hi Bill nga nag-asawa utro, maaramon nga nagpili hin asawa basi makapadayon hiya ha bug-os-panahon nga pag-alagad.

Ha urhi, tungod han ira mga toka, inin upat nga magsarangkay nahingadto ha iba-iba nga lugar—ha Germany, Austria, Luxembourg, Canada, ngan ha United States. Tungod hito, bisan kon karuyag nira magkaurupod pirme sugad han hadto, diri na nira ito nahihimo. Kondi bisan kon nagkaburublag hira, pirme hira may komunikasyon; nalilipay hira ha mga bendisyon nga nakakarawat han kada tagsa ngan nagtatangis ha kabidoan han kada tagsa. (Roma 12:15) An sugad hito nga kasangkayan sadang pabilhan ngan diri gud sadang igbalewaray. Birilhon hira nga mga regalo tikang kan Jehova. (Prob. 17:17) Ha kalibotan yana, talagsahon gud an tinuod nga mga sangkay! Kondi an tagsa nga tinuod nga Kristiano mahimo magkaada damu nga tinuod nga kasangkayan. Sugad nga mga Saksi ni Jehova, kasangkayan naton an aton mga igkasi-tumuroo ha bug-os nga kalibotan,  ngan labaw ha ngatanan, sangkay naton hi Jehova nga Dios ngan hi Jesu-Kristo.

Pariho ha aton ngatanan, inin upat nga magsarangkay nagkaada liwat mga problema—an kasákit han kamatyi hin asawa, istres tungod han grabe nga sakit, kabaraka ha pagmangno ha lagas na nga mga kag-anak, kakurian ha pagpadaku hin anak samtang nag-aalagad hin bug-os-panahon, kakulba kon nakakakarawat hin bag-o nga toka, ngan yana an nagtitikadamu nga problema nga resulta han kalagas. Kondi tungod han ira mga eksperyensya hinbaroan nira nga an kasangkayan—hirani man o hirayo—nabulig ha mga nahigugma kan Jehova nga malamposan an tagsa nga problema.

Maopay gud nga hira Lowell, Ramon, Bill, ngan Richard nagdedikar han ira kalugaringon kan Jehova ha edad nga 18, 12, 11, ngan 10, ngan ha butnga han edad nga 17 ngan 21 hira ngatanan sinulod ha bug-os-panahon nga pag-alagad. Ginsunod nira an igin-aghat ha ira han Eklesiastes 12:1: “Hinumdumi yana an imo Magburuhat ha mga adlaw han imo pagkabatan-on.”

Kon usa ka nga batan-on nga brother, karawata an imbitasyon ni Jehova nga sumulod ha bug-os-panahon nga pag-alagad kon igintutugot han imo kahimtang. Pinaagi han iya diri-matupngan nga pagkabuotan, mahimo mo liwat maeksperyensyahan an kalipay nga inabat hinin upat nga magsarangkay—ha pag-alagad sugad nga paramangno han sirkito, distrito, o sona; ha pag-alagad ha Bethel, pati na an pagin membro han Branch Committee; ha pagtutdo ha Kingdom Ministry School ngan Pioneer Service School; ngan ha pagpahayag ha dagku ngan gudtiay nga kombensyon. Malipayon gud inin upat nga magsarangkay ha paghibaro nga napuplo ka yukot an nagpahimulos ha ira buruhaton! Nagin posible ini ngatanan tungod kay han mga batan-on pa hira, ira ginkarawat an mahigugmaon nga imbitasyon ni Jehova nga mag-alagad ha iya hin bug-os-kalag.—Kol. 3:23.

Yana, hira Lowell, Richard, ngan Ramon magkaurupod na liwat ha sanga nga opisina ha Germany nga aadto na yana ha Selters. Makasurubo nga hi Bill namatay han 2010 samtang espesyal payunir ha United States. An haros 60 ka tuig nga duok gud nga pagkamagsarangkay nautod tungod han kamatayon! Kondi diri gud nahingangalimtan han aton Dios nga Jehova an iya kasangkayan. Makakasiguro kita nga ha pagmando han iya Ginhadian, ibabalik niya an ngatanan nga Kristiano nga pagkamagsarangkay nga temporaryo nga nautod tungod han kamatayon.

Han hirani na mamatay hi Bill, nagsurat hiya: “Ha 60 ka tuig naton nga pagkamagsarangkay, waray ako nahinunumdoman nga nagkaproblema kita sugad nga magsarangkay. Tikang pa hadto ginpapabilhan ko gud an aton pagkamagsarangkay.” Ngan an iya tulo nga sangkay nga naglalaom nga magpapadayon an ira pagkamagsarangkay ha bag-o nga kalibotan, madagmit nga dinugtong, “Ngan nagtikang pa la kita.”