1, 2. Ano nga mga problema an naieksperyensyahan han damu nga tawo, kondi ano an karuyag han mga surugoon han Dios?

NAGKIKINABUHI kita ha panahon nga damu an problema. Sunod-sunod nga kalamidad an nahitatabo ha tuna. Nag-aantos gud an katawohan tungod han mga linog, tsunami, sunog, baha, pagbuto hin bulkan, buhawi, ngan bagyo. Dugang pa, an mga problema ha pamilya ngan personal nga mga problema nagigin hinungdan han kahadlok ngan kasubo. Tinuod gud nga an “panahon ngan higayon,” o diri ginlalaoman nga mga hitabo, mahimo mahitabo ha aton ngatanan.—Ekles. 9:11.

² An katawohan han Dios padayon nga nag-aalagad ha iya hin malipayon ha sugad hito nga magkuri nga kahimtang. Bisan pa hito, karuyag naton magin andam ha pag-atubang ha bisan ano nga kakurian nga bangin umabot ha aton samtang nagtitikahirani an kataposan hini nga sistema. Paonan-o naton maaatubang ini nga mga problema ngan diri magpadaog hito? Ano an mabulig ha aton nga magin maisugon ha pag-atubang ha mga problema yana?

3. Sumala ha Roma 15:4, ano an makakaliaw ha aton kon may-ada kita magkuri nga problema?

³ Bisan kon mas damu nga tawo an apektado han mga kakurian yana labaw kay ha kan-o pa man, an katawohan maiha na nga nakakaeksperyensya hin mga problema. Hisgotan naton kon ano an aton hibabaroan tikang ha pipira nga surugoon han Dios ha naglabay nga nagpakita hin kaisog ha magkuri nga sitwasyon.—Roma 15:4.

4. Ano nga mga problema an naeksperyensyahan ni David, ngan ano an nakabulig ha iya?

⁴ Tagda hi David. Upod han mga problema nga iya naeksperyensyahan amo an kapungot ni Hadi Saul, pagbihaga han iya mga asawa, pagtraydor han pipira nga iya kapamilya ngan kasangkayan, ngan duro nga kasákit ha emosyon. (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Iginpapakita  han Biblia nga nag-antos gud hi David tungod hito nga mga problema. Kondi waray magluya an iya espirituwalidad. Nagsiring hiya nga may bug-os nga pagtoo: “Hi Jehova amo an kabaskogan han akon kinabuhi; hin-o ba an akon kahahadlokan?”—Sal. 27:1; basaha an Salmo 27:5, 10.

5. Ano an nakabulig kanda Abraham ngan Sara nga maatubang an makuri nga kinabuhi?

⁵ Hira Abraham ngan Sara nag-ukoy ha mga tolda ha kadak-an han ira kinabuhi. Mga dumuruong hira ha mga lugar nga diri pamilyar ha ira. Diri pirme masayon an ira kinabuhi. Kondi maisugon nga gin-atubang nira an mga problema sugad han kagutom ngan mga peligro tikang ha nakapalibot nga mga nasud. (Gen. 12:10; 14:14-16) Paonan-o nira ito nahimo? An Pulong han Dios nagsusumat ha aton nga hi Abraham ‘naghihinulat han bungto nga may patukoranan, nga an magturukod ngan magburuhat amo an Dios.’ (Heb. 11:8-10) Hira Abraham ngan Sara pirme nakapokus ha mga saad han Dios, ngan waray nira tuguti an mga butang ha kalibotan nga magpaluya ha ira.

6. Paonan-o naton masusubad hi Job?

⁶ Hi Job nag-antos hin duro nga kakurian. Hunahunaa an iya inabat han an ngatanan nga nahitatabo ha iya kinabuhi baga hin puro problema na la. (Job 3:3, 11) Ngan dinuroy pa gud kay diri niya bug-os nga nasasabtan kon kay ano nga ito ngatanan nahitabo ha iya. Bisan pa hito, waray gud hiya manluya. Gintipigan niya an iya integridad ngan pagtoo ha Dios. (Basaha an Job 27:5, 6.) Maopay gud hiya nga susbaranan nga sadang naton subaron!

7. Ano an naeksperyensyahan ni Pablo samtang nag-aalagad hiya ha Dios, kondi ano an nakahatag ha iya hin kaisog nga magpadayon ha pag-alagad?

⁷ Tagda liwat an ehemplo ni apostol Pablo. Naeksperyensyahan niya an ‘mga kakurian ha bungto, ha kamingawan, ngan ha dagat.’ Nag-unabi hiya mahitungod han ‘kagutom ngan kauhaw, kahagkot ngan pagin hubo.’ Nag-unabi liwat hiya nga ‘usa ka adlaw ngan usa ka gab-i nga nakadto hiya ha kahiladman,’ posible tungod han kalunod han barko nga iya ginsakyan. (2 Kor. 11:23-27) Bisan pa hito ngatanan, tagda an iya disposisyon ha iya ginsiring katapos nga hapit na hiya mamatay tungod ha pag-alagad ha Dios: “Basi nga diri kami magsarig ha amon la ngahaw nga kalugaringon, kondi ha Dios nga nagbanhaw ha mga minatay: nga hiya an nagluwas ha amon tikang ha daku gud nga kamatayon, ngan magluluwas pa hiya.” (2 Kor. 1:8-10) Diri damu nga tawo an nagkaada magkuri nga eksperyensya nga pariho kadamu han nahitabo kan Pablo. Bisan pa hito, damu ha aton an usahay naabat hin pariho han gin-abat ni Pablo, ngan nakakaliaw ha aton an iya pagin maisugon.

8. Paonan-o kita mahimo maapektohan han mga problema yana? Paghatag hin ehemplo.

⁸ An kalibotan yana puno hin kalamidad, kakurian, ngan iba pa nga problema, ngan damu an naabat nga diri na nira ito maiilob. Bisan an pipira nga Kristiano naabat liwat hin sugad hito. Hi Lani * nga malipayon nga nag-aalagad hin bug-os-panahon upod an iya bana ha Australia, nagsiring nga han hinbaroan niya nga may kanser hiya ha suso, natigdaan gud hiya ngan nanluya. Hiya nagsiring, “An mga pamaagi han pagtambal nakapaluya gud ha akon, ngan inabat ako nga waray na ako pulos.” Labot pa hito, kinahanglan mangnoan niya an iya bana nga gin-operahan ha butagtok. Kon mahitabo ito ha aton, ano an mahimo naton buhaton?

9, 10. (a) Ano an kinahanglan diri naton tugotan nga buhaton ni Satanas? (b) Paonan-o naton maiilob an “damu nga mga kakurian” nga gin-unabi ha Buhat 14:22?

⁹ Sadang naton hinumdoman nga karuyag gamiton ni Satanas an aton mga problema basi paluyahon an aton pagtoo ngan wad-on an aton kalipay. Kondi kinahanglan diri naton hiya tugotan nga buhaton ito. An Proberbios 24:10 nasiring: “Kon ikaw mahiraptay ha adlaw ha kakurian. An imo kusog gutiay.” An pagpamalandong ha mga ehemplo ha Biblia, sugad han mga ginhisgotan na, mabulig ha aton nga magkaada kaisog ha pag-atubang ha mga problema.

¹⁰ Maopay liwat hinumdoman nga may panahon  ha aton kinabuhi nga makakaeksperyensya kita hin mga problema. (2 Tim. 3:12) An Buhat 14:22 nasiring: “Kinahanglan ta an pag-agi hin damu nga mga kakurian, ha pagsulod ha ginhadian han Dios.” Imbes nga mahulop, kay ano nga diri hunahunaon nga mga higayon ito ha pagpakita hin kaisog nga iginbasar ha imo pagtoo nga an Dios may kapas ha pagbulig ha imo?

11. Ano an mahimo naton buhaton basi diri kita madaog han mga problema?

¹¹ Kinahanglan isentro naton an aton hunahuna ha positibo nga mga butang. An Pulong han Dios nasiring: “An malipayon nga kasingkasing nakakahimo han nawong nga malipayon; kondi pinaagi han kamabidoon han kasingkasing an espiritu nabubungkag.” (Prob. 15:13) Maiha na nga maaram an mga doktor nga an positibo nga panhunahuna nakakabulig ha may sakit nga mag-opáy. Damu nga pasyente nga ginpatumar hin sugar pills an nag-opay an pag-abat tungod la kay naghuhunahuna hira nga makakabulig ito ha ira. Gintatawag ito nga placebo effect. An kabaliktaran hito amo an nocebo effect, diin dinugang an sakit han mga pasyente tungod la kay ginsidngan hira nga makakadaot an ira gintutumar nga tambal. Kon pirme naton huhunahunaon an mga kahimtang nga diri man naton mababag-o, manluluya kita. Ha kabaliktaran, diri kita gintatagan ni Jehova hin “sugar pills.” Lugod, bisan ha panahon han kalamidad tinuod nga nabulig hiya ha aton pinaagi han pagdasig tikang ha iya Pulong, suporta han kabugtoan, ngan kusog nga iginhahatag pinaagi han baraan nga espiritu. An pirme paghunahuna hini makakapalipay ha aton. Imbes nga paghinunahunaon an negatibo nga mga panhitabo, buhata an imo mahihimo nga mailob an tagsa nga problema ngan isentro an imo hunahuna ha positibo nga bahin han imo kinabuhi.—Prob. 17:22.

12, 13. (a) Ano an nakabulig ha mga surugoon han Dios nga mailob an mga epekto han mga kalamidad? Paghatag hin ehemplo. (b) Paonan-o an mga kalamidad makakabulig ha aton nga masantop kon ano an pinakaimportante ha kinabuhi?

¹² Hinin naglabay pa la nga mga tuig, nagkaada grabe nga mga kalamidad ha pipira nga nasud. Damu nga kabugtoan hini nga mga nasud an nagpakita hin makatirigamnan nga karig-on, bisan kon diri ito masayon para ha ira. Temprano han 2010 nagkaada makusog nga linog ngan tsunami ha Chile. Damu nga kabugtoan an nawad-an hin balay ngan mga panag-iya, ngan an iba nawad-an hin pakabuhi. Bisan pa hito, padayon nga aktibo hira ha pag-alagad kan Jehova. Hi Samuel, nga nawad-an hin balay, nagsiring: “Bisan durante hinin makuri gud nga kahimtang, kami han akon asawa waray gud umundang pagtambong ha mga katirok ngan pagsangyaw. Natoo ako nga ini nga mga rutina nakabulig ha amon nga diri mawad-an hin paglaom.” Hira ngan an damu iba pa nga kabugtoan waray manluya tungod han trahedya ngan nagpadayon ha pag-alagad kan Jehova.

¹³ Ha Pilipinas, han Septyembre 2009 sobra 80 porsyento han Manila an ginbaha tungod han duro nga pag-inuran. Usa nga riko nga lalaki nga nawad-an hin damu nga panag-iya an nagsiring: “An baha waray ginpili; an mga riko ngan pobre pariho nagkuri ngan nag-antos.” Nagpapahinumdom ini ha aton han maaramon nga sagdon ni Jesus: “Magtirok kamo hin bahandi ha langit, nga didto waray bukbok bisan taay nga magpapapas, ngan an mga kawatan diri makakabungkag bisan pangawat.” (Mat. 6:20) An materyal nga mga butang madagmit gud la mawara, salit an paghimo hito nga prayoridad agsob nga nagriresulta hin kapakyasan. Mas maaramon gud nga isentro an aton kinabuhi ha aton relasyon kan Jehova, nga diri mawawara anoman an mahitabo ha aton palibot!—Basaha an Hebreo 13:5, 6.

14. Ano an aton mga hinungdan ha pagpakita hin kaisog?

¹⁴ Hi Jesus nagsiring nga durante han iya presensya magkakaada mga problema, kondi nagsiring hiya: “Ayaw kamo kalisang.” (Luk. 21:9) Tungod kay hiya an aton Hadi, ngan tungod kay ginbubuligan kita ni Jehova, an Maglalarang han uniberso, damu gud an aton hinungdan nga magin maisugon. Gindasig ni Pablo hi Timoteo  pinaagi ha pagsiring: “An Dios waray paghatag ha aton han espiritu han kahadlok; kondi han gahum, ngan han gugma ngan ha kaligdongan.”—2 Tim. 1:7.

15. Ano an ginsiring han pipira nga surugoon han Dios mahitungod han ira pagsarig ha iya? Paonan-o kita magkakaada hin sugad hito nga kaisog?

¹⁵ An Biblia nagsusumat ha aton han ginsiring han pipira nga surugoon han Dios mahitungod han ira pagsarig ha iya. Hi David nagsiring: “Hi Jehova amo an akon kusog ngan an akon taming; an akon kasingkasing nagsarig ha iya, ngan ako nabuligan: salit an akon kasingkasing nagmamalipay hin daku.” (Sal. 28:7) Iginpahayag ni Pablo an iya marig-on nga pagsarig pinaagi ha pagsiring: “Hini ngatanan nga mga bagay labi pa kita han mga magdadaog tungod hadton nahigugma ha aton.” (Roma 8:37) Sugad man, han hirani na hi Jesus arestuhon ngan patayon, iginpakita niya nga marig-on an iya relasyon ha Dios pinaagi ha pagsiring: “Diri ako nag-uusahan, kay an Amay upod ha akon.” (Juan 16:32) Ano an iginpapakita hini nga mga ginsiring han mga surugoon han Dios? An tagsa ha ira nagpakita hin bug-os nga pagsarig kan Jehova. Kon mahibaro kita pagsarig ha Dios ha pariho hito nga paagi, magkakaada kita han kaisog nga aton ginkikinahanglan ha pag-atubang han bisan ano nga problema yana.—Basaha an Salmo 46:1-3.

16. Kay ano nga importante nga pag-adman naton an Pulong han Dios?

¹⁶ An Kristiano nga kaisog diri nagpapasabot hin pagsarig ha kalugaringon. Lugod, resulta ito han aton pakakilala ha Dios ngan pagsarig ha iya. Mahihimo naton ito pinaagi ha pag-aram han iya Pulong, an Biblia. Usa nga sister nga may depresyon an nagsumat kon ano an nakakabulig ha iya, “Pauroutro nga ginbabasa ko an mga teksto nga nakakaliaw gud ha akon.” Ginsusunod ba naton an instruksyon nga magkaada regular nga pagsingba han pamilya? An pagbuhat hini mabulig ha aton nga magkaada pariho nga disposisyon ha salmista nga nagsiring: “Nahigugma gud ako ha imo balaud! Amo ito an akon pamalandong ha bug-os nga adlaw.”—Sal. 119:97.

17. (a) Ano nga tagana an makakabulig ha aton nga magpabilin nga maisugon? (b) Paghatag hin ehemplo kon paonan-o ka nabuligan han usa nga istorya han kinabuhi nga mababasa ha aton mga publikasyon.

¹⁷ May-ada liwat kita mga publikasyon nga basado ha Biblia diin mababasa naton an mga impormasyon nga nagpaparig-on han aton pagsarig kan Jehova. Damu nga kabugtoan an nabuligan gud han mga istorya han kinabuhi nga mababasa ha aton mga magasin. Usa nga sister ha Asia nga may bipolar mood disorder an nalipay han nabasa niya an istorya han kinabuhi han usa nga brother nga misyonero hadto nga malampuson nga nakailob han sugad hito nga sakit. An sister nagsiring, “Nakabulig ito ha akon nga masabtan an akon sakit ngan naghatag ha akon hin paglaom.”

18. Kay ano nga sadang naton pahimulosan an tagana nga pag-ampo?

¹⁸ An pag-ampo makakabulig ha aton ha ngatanan nga klase hin sitwasyon. Ginpabug-atan ni apostol Pablo an pagkaimportante hini nga tagana  han hiya nagsiring: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Fil. 4:6, 7) Ginpapahimulosan gud ba naton ini nga tagana nga makakabulig ha aton nga magkaada kusog ha pag-atubang han mga problema? Hi Alex, usa nga brother ha Britain nga maiha na nga may depresyon, nagsiring: “An pakiistorya kan Jehova ha pag-ampo ngan pagpamati ha iya pinaagi ha pagbasa han iya Pulong daku gud nga bulig ha akon.”

19. Ano an sadang naton magin panhunahuna ha aton pagtambong ha mga katirok?

¹⁹ An usa pa nga importante nga tagana ha pagbulig ha aton amo an pakig-upod ha kabugtoan ha mga katirok. Usa nga salmista an nagsurat han iya inaabat mahitungod ha templo ni Jehova: “Duro na gud an akon pag-ikaradto, nahihidlaw ako han mga ruwang mo.” (Sal. 84:2, Maopay nga Sumat) Ito ba liwat an aton inaabat? Hi Lani nga gin-unabi na nagsumat han iya panhunahuna mahitungod han pakig-upod ha kabugtoan: “An pagtambong ha mga katirok diri opsyonal. Maaram ako nga kinahanglan ako tumambong kon karuyag ko nga buligan ako ni Jehova nga makailob.”

20. Paonan-o mabulig ha aton an pagsangyaw?

²⁰ Nagkakaada liwat kita kaisog pinaagi han pagpabilin nga aktibo ha pagsangyaw han Ginhadian. (1 Tim. 4:16) Usa nga sister ha Australia nga nagkaada damu nga problema an nagsiring: “Nadiri unta ako pagsangyaw, pero usa nga tigurang an nag-imbitar ha akon nga umupod ha iya. Inupod ako. Sigurado nga nabulig hi Jehova, kay ha kada panahon nga nakikigbahin ako ha ministeryo, malipayon gud ako.” (Prob. 16:20) Damu an nakaeksperyensya nga an pagbulig ha iba nga magkaada pagtoo kan Jehova nagparig-on liwat han ira pagtoo. Ha pagbuhat hito, nahingangalimtan nira an ira problema ngan padayon nga ginhuhunahuna an mas importante nga mga butang.—Fil. 1:10, 11.

21. Ano an iginpapasarig ha aton may kalabotan ha mga kakurian nga aton naieksperyensyahan?

²¹ Damu gud an igintatagana ni Jehova basi buligan kita nga magin maisugon ha pag-atubang ha mga problema yana. Kon aton papahimulsan ini ngatanan nga tagana ngan papamalandungon ngan susubaron an mga susbaranan han maisugon nga mga surugoon han Dios, makakasiguro kita nga magigin malampuson kita ha pag-atubang ha mga kakurian. Bisan kon damu pa nga problema an bangin maeksperyensyahan naton samtang nagtitikahirani an kataposan hini nga sistema, mahimo naton abaton an gin-abat ni Pablo, nga nagsiring: “Ginpulindag kami, kondi waray magkahihibang. . . . Waray kami panluya.” (2 Kor. 4:9, 16) Ha bulig ni Jehova, mahimo kita magin maisugon ha pag-atubang ha mga problema yana.—Basaha an 2 Korinto 4:17, 18.