“PARA ha ano ito?” nagpakiana hi George Naish nga gintutudlok an nakatambak nga 18-metros nga mga troso ha bodega ha Saskatoon, Saskatchewan, ha Canada. Ginsidngan hiya nga ito nga mga troso gin-gamit hadto ha pagtukod hin mga signal tower durante han Girra ha Kalibotan I. “Nahunahuna ko nga puydi namon ito gamiton ha pagtukod hin mga radio tower,” siring ni Brother Naish ha urhi, “ngan dida nagtikang an ideya ha pagkaada estasyon han radyo para ha pagsangyaw.” Paglabay hin usa la ka tuig—han 1924—nagtikang pagbrodkast an CHUC. Usa ito han siyahan nga mga estasyon han radyo ha Canada nga nagbubrodkast hin mga topiko mahitungod ha relihiyon.

An Canada haros pariho kadaku han Europe, salit maopay ito sangyawan pinaagi hin radyo. “Tungod han amon mga pagbrodkast ha radyo, damu nga tawo nga diri namon nakakaistorya hin personal an nakabati han mensahe han kamatuoran,” siring ni Florence Johnson, nga nagtrabaho ha estasyon ha Saskatoon. “Ngan tungod kay hito nga panahon bag-o pa la naimbento an radyo, an mga tawo naruruyag gud pagpamati han bisan ano nga ginbubrodkast.” Han 1926, an mga Estudyante han Biblia (an tawag hadto ha mga Saksi ni Jehova) may kalugaringon na nga mga estasyon han radyo ha upat nga syudad ha Canada. *

Ano an imo mababatian kon mamati ka ha usa hito nga mga pagbrodkast? An mga parakanta ha kongregasyon hito nga lugar kasagaran na nga nagkakanta nga ginduduyogan hin mga paratokar hin instrumento ngan hin gudtiay nga orkestra pa ngani. Syempre, an mga brother nagpapahayag liwat hin mga sermon ngan naghihisgot mahitungod ha Biblia. Hi Amy Jones, nga nakigbahin hito nga mga paghisgot, nagsiring, “Samtang nagsasangyaw, nagpapakilala ako ngan an tagbalay usahay nasiring, ‘Ah, oo, nabatian ko ikaw ha radyo.’”

Ha Halifax, Nova Scotia, iginpresenta han mga Estudyante han Biblia an ira programa ha radyo ha naiiba nga paagi. Naghihisgot hira hin usa nga topiko ngan gin-aaghat an mga mamarati nga tumawag ha estasyon ngan magpakiana mahitungod ha Biblia samtang nagpapadayon an programa. “Naruyagan gud han mga tawo ini nga klase hin programa,” nagsurat an usa nga  bugto. “Diri namon mabaton an ngatanan nga tawag kay damu ito hinduro.”

Pariho kan apostol Pablo, an mga Estudyante han Biblia nakakarawat hin iba-iba nga reaksyon ha ira mensahe. (Buh. 17:1-5) Naruyagan ito han iba nga mamarati. Pananglitan, han hi Hector Marshall nakabati ha radyo han gin-unabi han mga Estudyante han Biblia an Studies in the Scriptures, nag-order hiya hin unom nga tomo. “Kahuna ko nga ito nga mga libro makakabulig ha akon nga magtutdo ha Sunday school,” nagsurat hiya ha urhi. Kondi katapos niya basahon an Tomo I, nagdesisyon hiya nga bumaya ha iya relihiyon. Nagin madasigon hiya nga ebanghelisador ngan matinumanon nga nag-alagad kan Jehova tubtob han iya kamatay han 1998. Ha este han Nova Scotia, kinabuwasan katapos ibrodkast an pahayag nga “An Ginhadian, an Paglaom han Kalibotan,” hi Colonel J. A. MacDonald nagsiring ha usa nga bugto didto: “Kakulop an mga taga-Cape Breton Island nakabati han pinakamaopay nga mensahe nga nabatian dinhi hini nga bahin han kalibotan.”

Ha luyo nga bahin, nasina an mga klero. An pipira nga Katoliko ha Halifax nagtarhog nga pabuthon an estasyon nga nagbubrodkast han mga programa han mga Estudyante han Biblia. Tungod han pagsulsol han mga lider han relihiyon, han 1928 tigda nga iginpahibaro han gobyerno nga diri na tutugotan an paglukat hin bag-o nga mga lisensya para ha mga estasyon han radyo nga gintatag-iya han mga Estudyante han Biblia. Tungod hito, an kabugtoan nanhatag han inimprinta nga mensahe nga Who Owns the Air? sugad nga pagprotesta hiton diri makatadunganon nga buhat. Bisan pa hito, an mga opisyal han gobyerno waray tumugot ha mga Estudyante han Biblia nga maglukat hin bag-o nga mga lisensya ha pagbrodkast.

Nakapaluya ba ini ha gutiay nga grupo han mga surugoon ni Jehova ha Canada? “Ha siyahan, baga hin daku ito nga kadaogan han kaaway,” siring ni Isabel Wainwright. “Kondi maaram ako nga puydi ito pugngan ni Jehova kon uyon ito ha iya katuyoan. Salit sigurado nga nangahulogan ito nga kinahanglan maghimo kami hin iba ngan mas maopay gud nga paagi ha pagsangyaw han maopay nga sumat han Ginhadian.” Imbes nga magsangyaw pinaagi la han radyo, an mga Estudyante han Biblia ha Canada nagtikang pagpokus ha pagbisita ha mga tawo ha ira balay. Kondi ha panahon nga radyo an gin-gamit ha pagsangyaw, daku gud an naibulig hito ha pagbrodkast han ‘pinakamaopay nga mensahe nga nabatian.’—Tikang ha aton daan nga mga koleksyon ha Canada.