TUIG adto han 49 C.E. Hira Pedro, Jakobo, ngan Juan—nga sugad hin “mga harigi”—may igintoka kan apostol Pablo ngan ha iya igkasi-magburuhat nga hi Bernabe. Kinahanglan hinumdoman nira pirme an pobre nga mga Kristiano samtang nagsasangyaw ha mga nasud. (Gal. 2:9, 10) Paonan-o nira gintuman ito nga responsabilidad?

Iginpapakita ha mga surat ni Pablo nga gintagan gud niya ito hin atensyon. Pananglitan, ha mga Kristiano ha Korinto, hiya nagsurat: “Nahitutungod ha amot tungod ha mga baraan, sugad han akon iginsugo ha mga singbahan didto ha Galasia, pagbuhaton man niyo. Ha siyahan nga adlaw han semana an tagsa-tagsa ha iyo bumahin ha iya nakita, sugad ha iya kinarawat, basi nga an amot diri pangaroon kon ako kumanhi na. Ngan kon ako umabot na, bisan kon hin-o an iyo pagpilion, akon hira susugoon nga may surat ha pagdara ha iyo mga limos ngadto ha Jerusalem.”—1 Kor. 16:1-3.

Ha ikaduha nga giniyahan nga surat ni Pablo ha mga taga-Korinto, gin-unabi niya utro an katuyoan han pangulekta. Basi “iton iyo kahuraan amo niyan nga takna iton makakaayaw hiton ira kakulangan.”—2 Kor. 8:12-15.

Han nagsurat hi Pablo ha mga Kristiano ha Roma han mga 56 C.E., haros kompleto na an pangulekta. Hiya nagsiring: “Makadto ako ha Jerusalem, ha pagtabang ha mga baraan. Kay an Masedonia ngan Akaya naghunahuna hin maopay, pag-amot ha mga kablas nga mga baraan nga aadto ha Jerusalem.” (Roma 15:25, 26) Waray pag-iha katapos hito, gintuman ni Pablo an iya toka, kay han binalik hiya ha Jerusalem ngan gin-aresto didto, nagsiring hiya ha Romano nga gobernador nga hi Felix: “Ako inabot pagdara hin mga ililimos ngan mga halad ngadto ha akon nasud.”—Buh. 24:17.

Matin-aw ha ginsiring ni Pablo ha mga taga-Masedonia an disposisyon nga iginpakita han mga Kristiano ha siyahan nga siglo. Hiya nagsiring nga “naghangyo ngan nanginyupo gud hira ha amon nga makaamot hira hin pagtabang.” Gin-aghat ni Pablo an mga taga-Korinto nga subaron ito nga ehemplo. Hiya nagsiring: “An tagsa-tagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” Ano an nagpagios ha mga kongregasyon nga ipakita an sugad hito nga pagkamahinatagon? Ginbuhat nira ito diri la basi ‘mapun-an an mga kakulangan han mga baraan, kondi mahura man tungod ha damu nga pagpasalamat ha Dios.’ (2 Kor. 8:4; 9:7, 12; Maopay nga Sumat) Hinaot ito liwat an mga hinungdan han aton pagin mahinatagon. Sigurado nga bibendisyonan ni Jehova iton maopay ngan mahinatagon nga disposisyon—ngan an iya bendisyon nakakahimo gud nga bahandianon.—Prob. 10:22.

Pariho ha panahon ni apostol Pablo, damu yana an ‘naggagahin hin kwarta’ ngan iginhuhulog ito ha kahon para han donasyon nga minarkahan hin “Worldwide Work.” (1 Kor. 16:2) Kada bulan, ini nga mga donasyon iginpapadara han mga kongregasyon ha opisina han mga Saksi ni Jehova ha ira nasud. Puydi ka liwat magpadara hin donasyon direkta ha sanga nga opisina han mga Saksi ni Jehova ha iyo nasud. Basi hibaroan kon kan kanay ito igngangaran, alayon pakigkomunikar ha sanga nga opisina ha iyo nasud. An mga adres han sanga nga opisina makikita ha www.pr418.com. Ini an mga klase han donasyon nga mahimo mo direkta nga ipadara:

DIREKTA NGA MGA DONASYON

• Kwarta, alahas, o iba pa nga birilhon nga butang.
• Paglakip hin surat nga nagsasaysay nga ito nga kwarta o mga butang direkta nga iginhahatag sugad nga donasyon.

CONDITIONAL DONATION ARRANGEMENT

• Donasyon nga kwarta nga may kondisyon nga mahimo ito ibalik kon kinahanglanon han naghatag.
• Paglakip hin surat nga nagsasaysay nga ito nga donasyon may mga kondisyon.

CHARITABLE PLANNING

Dugang pa ha mga regalo nga kwarta ngan birilhon nga butang, may iba pa nga paagi han paghatag basi magamit ha buruhaton han Ginhadian ha bug-os nga kalibotan. Gin-uunabi ini ha sunod nga mga parapo. Anoman nga paagi an imo karuyag gamiton, alayon pakigkomunikar anay ha sanga nga opisina ha iyo nasud basi hibaroan kon hain nga mga paagi an may-ada ha iyo nasud. Tungod kay iba-iba an ginkikinahanglan han balaud ngan an balaud ha buhis, importante nga kumonsulta anay ha kwalipikado nga mga tax adviser ngan abogado antes magpili han pinakamaopay nga paagi han paghatag hin donasyon.

Insurance: Usa nga donasyon diin espisipiko nga gin-uunabi nga an sanga nga opisina han mga Saksi ni Jehova ha iyo nasud an beneficiary han palisiya han life insurance o han retirement/pension plan.

Deposito ha Bangko: Mga deposito ha bangko, sertipiko han deposito, o deposito ha pagretiro nga naka-trust o ihahatag ha sanga nga opisina han mga Saksi ni Jehova ha iyo nasud uyon ha mga kahikayan han bangko kon mamatay na an tag-iya.

Stock Ngan Bond: Mga stock ngan bond nga igindudonar ha sanga nga opisina han mga Saksi ni Jehova ha iyo nasud sugad nga direkta nga regalo o pinaagi han Transfer on Death agreement.

Tuna Ngan Balay: Maibabaligya nga tuna ngan balay nga igindudonar ha sanga nga opisina han mga Saksi ni Jehova ha iyo nasud pinaagi han direkta nga pagregalo hito, o kon residensya ito, pinaagi han paghimo hin kasuratan nga an tag-iya mahimo magpadayon pag-ukoy dida samtang buhi hiya.

Gift Annuity: Kwarta o mga deposito nga igindudonar ha sanga nga opisina han mga Saksi ni Jehova ha iyo nasud nga may kasabotan nga an naghatag, o an usa nga iya ginpili, makarawat hin espisipiko nga kantidad kada tuig samtang buhi hiya. An income tax han naghatag maiibanan ha tuig nga nagtikang an gift annuity.

Testamento Ngan Trust: An panag-iya o kwarta mahimo ihatag ha sanga nga opisina han mga Saksi ni Jehova ha iyo nasud pinaagi han legal nga testamento o pinaagi han espisipiko nga pag-unabi nga ito an beneficiary han usa nga trust agreement. Ini nga kahikayan mahimo makahatag hin mga bentaha may kalabotan ha baraydan ha buhis.

Sugad han iginpapasabot han termino nga “charitable planning,” ini nga mga klase hin donasyon kasagaran nga nagkikinahanglan hin pagplano. Basi mabuligan an mga naruruyag sumuporta ha bug-os-kalibotan nga buruhaton han mga Saksi ni Jehova pinaagi han usa nga klase han charitable planning, igin-andam an brosyur nga Charitable Planning to Benefit Kingdom Service Worldwide ha English ngan Spanish. Iginsasaysay hito an iba-iba nga paagi han paghatag hin mga donasyon yana o ha urhi, pananglitan pinaagi ha paghatag sugad nga panurundon kon mamatay an nagdonar. An impormasyon hini nga brosyur bangin diri ngatanan aplikado ha imo kahimtang tungod han mga balaud ha buhis o iba pa nga balaud ha iyo nasud. Salit, katapos mabasa an brosyur, sadang ka makiistorya ha imo mga abogado o tax adviser. Pinaagi ha paggamit hini nga mga pamaagi ha paghatag hin donasyon, damu an nakabulig ha pagsuporta ha aton relihiyoso nga mga buruhaton ngan pagbulig ha iba ha bug-os nga kalibotan, ngan daku an naiiban ha ira baraydan ha buhis. Kon may-ada ha iyo nasud hini nga brosyur, mahimo ka magkaada hito pinaagi ha paghangyo hin kopya ha sekretaryo han iyo kongregasyon.

Para ha dugang nga impormasyon, mahimo ka tumawag o magsurat ha Charitable Planning Office ha adres nga aada ha ubos, o makigkomunikar ha sanga nga opisina ha iyo nasud.