Usa nga mapulsanon nga bulig basi makailob amo an pagliaw nga nakakarawat naton tikang ha aton pamilya, kasangkayan, ngan mga igkasi-tumuroo.

An mapinairon ngan mahigugmaon nga mga pulong han usa nga sangkay sugad hin nakakarelaks nga haplas nga nakakaopay ngan nakakarepresko ha aton. (Prob. 16:24; 18:24; 25:11) Kondi an tinuod nga mga Kristiano diri la interesado nga makakarawat hin pagliaw. Nangangalimbasog hira nga liawon o ‘lipayon an ngatanan nga aada ha bisan ano nga kagol-anan, pinaagi han paglipay nga iginlipay ha ira han Dios.’ (2 Kor. 1:4; Luk. 6:31) Naeksperyensyahan ini ni Antonio, usa nga paramangno han distrito ha Mexico.

Han nahibaroan nga hi Antonio may-ada lymphoma, usa nga klase hin kanser ha dugo, nanluya hiya tungod han duro nga kasubo. Bisan pa hito, nangalimbasog hiya nga kontrolon an iya negatibo nga mga pagbati. Paonan-o? Nangalimbasog hiya nga hinumdoman an mga Kingdom song ngan kantahon ito basi iya mabatian ngan mapamalandong an mga pulong hito. Nakaliaw gud liwat ha iya an pag-ampo ha daku nga tingog ngan pagbasa han Biblia.

Kondi yana nasiring hi Antonio nga an usa han pinakadaku nga mga bulig ha iya nagtikang ha iya mga igkasi-tumuroo. Hiya nagsiring: “Kon sobra nga nababaraka kami nga mag-asawa, ginhahangyo namon an usa namon nga paryente nga tigurang ha kongregasyon nga bisitahon kami ngan mag-ampo upod ha amon. Nakakaliaw ngan nakakapakalma ini ha amon. Ha pagkamatuod,” siring niya, “tungod han suporta han amon pamilya ngan han kabugtoan, waray la pag-iha, nalamposan namon an negatibo nga mga pagbati.” Mapasalamaton gud hiya nga may-ada hiya mahigugmaon ngan mapinairon nga kasangkayan!

Usa pa nga bulig ha panahon han kakurian amo an iginsaad nga baraan nga espiritu. Hi apostol Pedro nagsiring nga an baraan nga espiritu han Dios usa nga “hatag,” o regalo. (Buh. 2:38) Napamatud-an ito han gindihogan an damu nga indibiduwal han Pentekostes 33 C.E. Bisan kon an mga dinihogan an gintutudlok dinhi ni Pedro, an baraan nga espiritu usa nga regalo nga puydi makarawat naton ngatanan. Ini nga regalo diri nauubos, salit kay ano nga diri pirme mangaro hito?—Isa. 40:28-31.

Hi apostol Pablo nag-ilob hin damu nga kakurian, ngan may mga panahon nga hapit pa ngani hiya mamatay. (2 Kor. 1:8-10) Kondi hi Pablo diri sobra nga nababaraka nga mamatay. Naliaw hiya ha paghibaro nga ginbubuligan hiya han Dios. Hiya nagsurat: “Darayawon an Dios ngan an Amay han aton Ginoo Jesu-Kristo, an Amay han ngatanan nga pagkalooy ngan Dios han ngatanan nga paglipay; nga hiya an naglilipay ha aton ha ngatanan nga aton mga kagol-anan.” (2 Kor. 1:3, 4) Hi Pablo waray magpadaog ha iya mga problema. Lugod, an mga pagsari nga iya gin-ilob nakabulig ha iya nga magkaada empatiya, salit mas nasangkapan hiya nga liawon an iba ha panahon nga ginkikinahanglan nira ito.

Han nag-opay hi Antonio ha iya sakit, nakabalik hiya ha pagin nagbibiyahe nga paramangno. Hadto pa pirme na hiya nagpapakita hin interes ha kabugtoan, pero hini nga higayon mas nangalimbasog hira nga mag-asawa nga bisitahon ngan dasigon an mga may sakit. Pananglitan, katapos bisitahon an usa nga brother nga may grabe nga sakit, iya hinbaroan nga ini nga brother nadiri pagtambong ha mga katirok. “Diri ito tungod kay diri niya hinigugma hi Jehova o an kabugtoan,” siring ni Antonio, “kondi an iya sakit duro nga nakaapekto han iya emosyon tubtob nga inabat hiya nga waray hiya pulos.”

Usa nga ginhimo ni Antonio basi dasigon ito nga brother amo an paghangyo ha iya nga manguna ha pag-ampo ha ira pagturotarampo hinin bag-o la. Bisan kon inabat han brother nga diri niya ito mahihimo, sinugot hiya nga mag-ampo. Hi Antonio nagsiring: “Maopay gud an iya pag-ampo, ngan katapos, sugad hin iba na hiya nga tawo. Inabat na liwat hiya nga may pulos hiya.”

Oo, kita ngatanan nakaeksperyensya hin iba-iba nga pag-antos. Kondi sugad han ginsiring ni Pablo, nasasangkapan kita hini nga liawon an iba ha panahon nga ginkikinahanglan nira ito. Salit magin mahunahunaon kita ha pag-antos han aton mga igkasi-Kristiano ngan subaron an aton Dios nga hi Jehova pinaagi han pagliaw ha iba.