1, 2. Ano nga tagna mahitungod han kataposan nga mga adlaw an sigurado nga nakapainteres ha mga disipulo ni Jesus, ngan kay ano?

GINSIDNGAN pa la ni Jesus an iya mga disipulo nga bubungkagon an templo. Nakapabaraka ito kanda Pedro, Santiago, Juan, ngan Andres. (Mar. 13:1-4) Salit han hira na la an kaupod ni Jesus, nagpakiana hira ha iya: “Sumati kami, San-o ini mahitatabo, ngan ano an magigin tigaman han imo presensya ngan han ikatarapos hini nga sistema?” (Mat. 24:1-3) Ginsumatan hira ni Jesus mahitungod han mga hitabo, o kahimtang, nga diri la magriresulta hin dagku nga pagbag-o kondi magigin tigaman liwat han kataposan nga mga adlaw han maraot nga sistema ni Satanas. Usa nga panhitabo an sigurado nga nakapainteres ha mga disipulo. Katapos unabihon an makasurubo nga mga kahimtang sugad han girra, gutom, ngan pagtikadamu han karaotan, hi Jesus nagtagna nga may maopay nga panhitabo nga magigin tigaman liwat han kataposan nga mga adlaw. Hiya nagsiring: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.”—Mat. 24:7-14.

² An mga disipulo nagsasangyaw na han maopay nga sumat han Ginhadian kaupod ni Jesus. (Luc. 8:1; 9:1, 2) Bangin nahinumdoman nira nga hiya nagsiring: “Ha pagkamatuod, damu an aranihon, kondi gutiay an mag-arani. Salit pakimalooy kamo ha Agaron nga magpadara hin mga mag-arani ha iya aranihon.” (Luc. 10:2) Kondi paonan-o hira magsasangyaw “ha bug-os nga inuukyan nga tuna” ngan ‘magpapamatuod ha ngatanan nga nasud’? Diin tikang an mga magbubuhat hito? Kon makikita la unta nira an tidaraon samtang nalingkod kaupod ni Jesus hito nga adlaw! Sigurado nga mahipapausa hira ha pakakita han katumanan han mga pulong nga aton nababasa yana ha Mateo 24:14.

3. Paonan-o natutuman yana an Lucas 21:34, ngan ano an sadang naton ipakiana ha aton kalugaringon?

 ³ Nagkikinabuhi kita ha panahon nga natutuman an tagna ni Jesus. Minilyon an nagbuburublig basi maisangyaw an maopay nga sumat han Ginhadian ha bug-os nga kalibotan. (Isa. 60:22) Kondi iginpakita ni Jesus nga an iba makukurian pagpabilin nga nakapokus ha pagsangyaw nga buruhaton hinin kataposan nga mga adlaw. Magigin okupado gud hira ha iba nga butang ngan ‘mabubug-atan.’ (Basaha an Lucas 21:34.) Nakikita liwat naton an katumanan hito nga mga pulong. An iba han katawohan han Dios diri na nakapokus ha pagsangyaw. Bangin makita ini ha ira mga desisyon may kalabotan ha trabaho, hitaas nga edukasyon, ngan pagkaada materyal nga mga panag-iya, sugad man ha kadamu han panahon nga ira igin-gagahin ha isport ngan kaliawan. An iba nanluluya tungod han mga problema ngan kabaraka ha adlaw-adlaw nga pagkinabuhi. Pakianhi an imo kalugaringon: ‘Kumusta man ako? Ano an iginpapakita han akon mga desisyon mahitungod han akon prayoridad ha kinabuhi?’

4. (a) Ano an igin-ampo ni Pablo para ha mga Kristiano ha Filipos, ngan kay ano? (b) Ano an aton hihisgotan hini ngan ha sunod nga artikulo, ngan ano an katuyoan hini nga mga artikulo?

⁴ An mga Kristiano ha siyahan nga siglo kinahanglan mangalimbasog nga pirme himoon nga prayoridad an pag-alagad ha Dios. Nasantop ni apostol Pablo nga kinahanglan ig-ampo niya nga an mga taga-Filipos ‘magsiguro han mas importante nga mga butang.’ (Basaha an Filipos 1:9-11.) Pariho kan apostol Pablo, kadam-an nga Kristiano hito nga panahon an nagpapakita hin dugang nga kaisog ha pagsangyaw han pulong han Dios hin waray kahadlok. (Fil. 1:12-14) Ha pariho nga paagi, kadam-an ha aton yana an maisugon nga nagsasangyaw han Pulong han Dios. Bisan pa hito, an paghisgot ba han nahihimo yana han organisasyon ni Jehova makakabulig ha aton nga mas magpokus pa gud ha importante hinduro nga pagsangyaw nga buruhaton? Oo! Hini nga artikulo, aton hisgotan an kahikayan nga ginhimo ni Jehova basi matuman an Mateo 24:14. Ha ano nakapokus an iya organisasyon, ngan paonan-o an paghibaro hini makakapagios ha aton ngan ha aton pamilya? Ha sunod nga artikulo, aton hihisgotan kon ano an makakabulig ha aton nga makailob ngan sumunod ha pagpanguna han organisasyon ni Jehova.

5, 6. (a) Kay ano nga hi Jehova naghatag hin mga bisyon mahitungod han langitnon nga bahin han iya organisasyon? (b) Ano an nakita ni Esekiel ha bisyon?

⁵ Damu nga butang an waray ipasurat ni Jehova ha iya Pulong. Pananglitan, waray hiya maghatag hin mga detalye kon paonan-o nagana an utok o kon paonan-o nagios an uniberso, bisan kon makapainteres gud unta an sugad nga impormasyon! Lugod, igintagana ni Jehova an impormasyon nga aton ginkikinahanglan basi masabtan an iya mga katuyoan ngan magkinabuhi uyon hito. (2 Tim. 3:16, 17) Salit makapainteres gud nga an Biblia naghahatag ha aton hin ideya mahitungod han langitnon nga bahin han organisasyon ni Jehova! Nalilipay gud kita pagbasa han mga paghulagway han kahikayan ni Jehova ha langit nga iginsurat nira Isaias, Esekiel, ngan Daniel ngan ha asoy ni Juan ha Pahayag. (Isa. 6:1-4; Esek. 1:4-14, 22-24; Dan. 7:9-14; Pah. 4:1-11) Sugad hin may ginpali hi Jehova nga kurtina basi aton makita an pipira nga nahitatabo ha langit. Kay ano nga iginsumat niya ini nga impormasyon?

⁶ Karuyag ni Jehova nga diri gud naton hingalimtan nga bahin kita han usa nga organisasyon ha bug-os nga uniberso. Mas damu pa gud an nahitatabo ha pagsuporta han mga katuyoan ni Jehova kay han aton nakikita. Pananglitan, nakita ni Esekiel an langitnon nga bahin han organisasyon ni Jehova nga iginhuhulagway sugad nga  daku hinduro nga karomata ha langit. Ini nga karomata malaksi hinduro ngan puydi tigda nga magbag-o hin direksyon. (Esek. 1:15-21) Ha kada pagtuyok han mga kaliding hito, hirayo gud an naaabot hito. Nakita liwat ni Esekiel ha bisyon an nasakay hito nga karomata. Hiya nagsiring: “Ako nakakita hin sugad hin nag-iinggat nga puthaw, sugad pagkit-on hin kalayo ha sulod hini ha palibot . . . Ini an hitsura han kapariho han himaya ni Jehova.” (Esek. 1:25-28) Sigurado nga nahipausa gud hi Esekiel hini nga bisyon! Nakita niya nga bug-os nga kontrolado ni Jehova an iya organisasyon ngan ginigiyahan ito pinaagi han iya baraan nga espiritu. Urusahon gud ito nga paghulagway han paggios han langitnon nga bahin han organisasyon ni Jehova!

7. Paonan-o an bisyon nga iginpakita kan Daniel nagpapasarig ha aton?

⁷ Hi Daniel liwat nakakita hin bisyon nga nagpapasarig ha aton. Gintugotan hiya nga makita hi Jehova nga ginhulagway sugad nga ‘tigurang ha mga adlaw’ nga nalingkod ha usa nga naglalaga nga trono nga may mga kaliding. (Dan. 7:9) Karuyag ni Jehova nga makita ni Daniel nga an Iya organisasyon nagios ha pagtuman han Iya katuyoan. Nakakita liwat hi Daniel hin “usa nga pariho han anak han tawo,” hi Jesus, nga ginhatagan hin awtoridad nga manguna ha tunan-on nga bahin han organisasyon ni Jehova. An hingpit nga pagmando ni Kristo diri kay pipira la ka tuig. Lugod, usa ito nga “kagamhanan nga waray kataposan, nga diri mawawara, ngan an iya ginhadian adto nga diri magugunaw.” (Dan. 7:13, 14) Napapagios kita nga sumarig kan Jehova ngan kilalahon an iya ginbubuhat. Gintagan niya hin ‘kagamhanan ngan himaya ngan ginhadian’ an iya masasarigan nga Anak nga hi Jesus. Hi Jehova natapod ha iya Anak. Salit makakasarig liwat kita ha pagpanguna ni Jesus.

8. Ano an epekto kan Esekiel ngan kan Isaias han mga bisyon tikang kan Jehova, ngan ano an sadang magin epekto hito ha aton?

 ⁸ Ano an sadang magin epekto ha aton hini nga mga bisyon mahitungod han langitnon nga bahin han organisasyon ni Jehova? Pariho kan Esekiel, sigurado nga nahipapausa gud kita ha mga ginbubuhat ni Jehova ngan naaaghat kita nga magpaubos. (Esek. 1:28) An pamalandong mahitungod han organisasyon ni Jehova makakapagios ha aton pariho kan Isaias. Han nagkaada higayon nga maisumat niya ha iba an ginbubuhat ni Jehova, waray hiya magruhaduha pagsalingabot hito. (Basaha an Isaias 6:5, 8.) Nasarig hi Isaias nga ha bulig ni Jehova malalamposan niya an bisan ano nga ulang. Pariho kan Isaias, napapagios kita nga suportahan an organisasyon ni Jehova pinaagi ha pagbuhat hin dugang pa ha pag-alagad ha Dios. Makapadasig gud hunahunaon ito nga organisasyon nga padayon nga nagios ngan nakapokus gud ha pagtuman han mga katuyoan ni Jehova!

9, 10. Kay ano nga ginkikinahanglan an tunan-on nga bahin han organisasyon ni Jehova?

⁹ Pinaagi han iya Anak, nag-establisar hi Jehova hin tunan-on nga bahin han iya organisasyon nga nagios uyon ha langitnon nga bahin hito. Kay ano nga ginkikinahanglan ito ha pagtuman han buruhaton nga gin-unabi ha Mateo 24:14? Tagda an tulo nga hinungdan.

¹⁰ Siyahan, hi Jesus nagsiring nga tungod han pagsangyaw nga buruhaton an iya mga disipulo makakaabot “ha pinakahirayo nga lugar ha tuna.” (Buh. 1:8) Ikaduha, kinahanglan magkaada mga kahikayan ha pagtagana hin espirituwal nga pagkaon ngan ha pagmangno han mga nakikigbahin hini nga buruhaton. (Juan 21:15-17) Ikatulo, kinahanglan maghimo hin mga kahikayan basi an mga nagsasangyaw han maopay nga sumat magkatirok ha pagsingba kan Jehova ngan matutdoan kon paonan-o magsasangyaw. (Heb. 10:24, 25) Ini nga mga tumong diri basta na la makakab-ot. Basi magin malampuson an mga sumurunod ni Kristo, kinahanglan organisahon hin maopay an buruhaton.

11. Paonan-o naton maipapakita an aton suporta ha mga kahikayan han organisasyon ni Jehova?

¹¹ Paonan-o naton maipapakita an aton suporta ha mga kahikayan han organisasyon ni Jehova? Usa nga importante nga paagi amo an pirme pagsarig ha mga gintaporan ni Jehova ngan ni Jesus nga manguna ha aton ha pagsangyaw nga buruhaton. Damu an buruhaton ha kalibotan yana nga mahimo unta makakuha han atensyon han mga nangunguna ha aton. Kondi, ha ano pirme nakapokus an tunan-on nga bahin han organisasyon ni Jehova?

12, 13. Paonan-o gintutuman han mga tigurang an ira responsabilidad, ngan kay ano nga makapadasig ito ha imo?

¹² An eksperyensyado nga mga tigurang ha bug-os nga kalibotan gintagan hin responsabilidad nga mag-organisa ngan manguna ha pagsangyaw han Ginhadian ha lugar diin hira nag-aalagad. Kon naghihimo hin mga desisyon ini nga kabugtoan, namimiling hira hin instruksyon ha Pulong han Dios, ginhihimo ito nga ‘lawag ha ira mga tiil ngan suga ha ira agian,’ ngan sinsero hira nga nag-aampo para han giya ni Jehova.—Sal. 119:105; Mat. 7:7, 8.

¹³ Pariho han mga tigurang han siyahan nga siglo, an mga tigurang nga nag-oorganisa han pagsangyaw nga buruhaton yana nakapokus ha “pagtutdo han pulong han Dios.” (Buh. 6:4) Nalilipay gud hira ha pag-uswag han pagsangyaw han maopay nga sumat ha ira lugar ngan ha bug-os nga kalibotan. (Buh. 21:19, 20) Diri hira naghihimo hin damu hinduro nga surundon ngan patakaran. Lugod, ira ginsusunod an Kasuratan ngan an paggiya han baraan nga espiritu han Dios kon naghihimo hira han ginkikinahanglan nga mga kahikayan nga makakabulig  ha pag-uswag han pagsangyaw nga buruhaton. (Basaha an Buhat 15:28.) Hito nga paagi, ini nga mga tigurang nagpapakita hin maopay nga susbaranan ha ngatanan nga kabugtoan ha mga kongregasyon.—Efe. 4:11, 12.

14, 15. (a) Ano nga mga kahikayan an ginhihimo basi suportahan an pagsangyaw nga buruhaton ha bug-os nga tuna? (b) Ano an imo inaabat mahitungod han pribilehiyo ha pagsuporta han buruhaton nga pagsangyaw han Ginhadian?

¹⁴ Damu han aton kabugtoan an nagtatrabaho kada adlaw ha pag-andam han espirituwal nga pagkaon para ha aton mga publikasyon, katirok, ngan kombensyon. Yinukot nga boluntaryo an maduruto nga naghuhubad hini nga espirituwal nga pagkaon ngadto ha mga 600 nga yinaknan basi damu gud an mahibaro han “gamhanan nga mga buhat han Dios” ha ira kalugaringon nga yinaknan. (Buh. 2:7-11) An batan-on nga mga brother ngan sister nagtatrabaho ha paghimo han aton mga literatura ha malaksi hinduro nga mga imprintahan ngan binding machine. Katapos, ini nga mga literatura iginpapadara ha mga kongregasyon bisan ha pinakahirayo nga mga bahin han tuna.

¹⁵ Damu nga kahikayan an ginhihimo basi makapokus kita ha pagsangyaw han maopay nga sumat upod han aton kongregasyon. Pananglitan, yinukot an nagbuboluntaryo ha pagtukod hin mga Kingdom Hall ngan Assembly Hall, pagbulig ha mga naapektohan han natural nga mga kalamidad o naatubang hin medikal nga emergency, pag-organisa han aton mga asembleya ngan kombensyon, ngan pagtutdo ha teokratiko nga mga eskwelahan. Ano an katuyoan hini ngatanan? Basi suportahan an pagsangyaw han maopay nga sumat, parig-unon an espirituwalidad han mga nagsasangyaw, ngan buligan an mas damu pa nga tawo nga magin mga magsiringba ni Jehova. An tunan-on ba nga bahin han organisasyon ni Jehova pirme nakapokus ha mas importante nga mga butang? Oo!

16. Ano an maopay himoon nga proyekto ha pag-aram han Biblia para ha imo o ha imo pamilya?

¹⁶ Ha panapanahon ba ginpapamalandong naton an ginbubuhat han organisasyon ni Jehova? Ginpili han iba nga iapi ha ira pagsingba han pamilya o personal nga pag-aram an pagsaliksik ngan pamalandong mahitungod hito. An mga bisyon nga iginhatag kanda Isaias, Esekiel, Daniel, ngan Juan makaruruyag gud pag-adman. An libro nga Jehovah’s Witnesses—Proclaimers of God’s Kingdom ngan iba pa nga mga publikasyon o DVD nagtututdo liwat ha aton hin makapainteres nga mga butang mahitungod han organisasyon han Dios.

17, 18. (a) Paonan-o ka nagpahimulos hini nga artikulo? (b) Ano an sadang naton ipakiana ha aton kalugaringon?

¹⁷ Maopay nga pamalandungon naton an ginbubuhat ni Jehova pinaagi han iya organisasyon. Ha pagsubad hinin makaruruyag nga organisasyon, hinaot magin determinado kita nga magpabilin nga nakapokus ha mas importante nga mga butang. An pagbuhat hito magpaparig-on ha aton nga magin determinado pariho kan Pablo, nga nagsurat: “Tungod kay may-ada kami hini nga sagrado nga buruhaton uyon ha kalooy nga iginpakita ha amon, diri kami naundang.” (2 Cor. 4:1) Iya liwat gin-aghat an iya mga igkasi-magburuhat: “Ayaw kita pag-undang ha pagbuhat han maopay, kay pag-abot han panahon mag-aani kita kon diri kita manluya.”—Gal. 6:9.

¹⁸ May mga pagbag-o ba nga kinahanglan himoon naton sugad nga mga indibiduwal o sugad nga pamilya basi masiguro an mas importante nga mga butang ha aton adlaw-adlaw nga pagkinabuhi? Puydi ba naton pasimplihon an aton kinabuhi basi mas damu an aton mahihimo ha pagsangyaw nga buruhaton? Ha sunod nga artikulo, aton hihisgotan an lima nga butang nga mabulig ha aton nga sumunod ha pagpanguna han organisasyon ni Jehova.