HAN igin-anak ko hi Gary han 1958, inabat ko nga baga hin may problema ha iya. Kondi inabot hin napulo ka bulan antes hibaroan han mga doktor an iya sakit, ngan lima pa ka tuig antes ito nasiguro han mga espesyalista ha London. Nasubo gud ako han an akon anak nga babaye nga hi Louise nga manghod ni Gary hin siyam ka tuig, may mga sintomas nga mas grabe pa han kan Gary.

“An imo mga anak may LMBB syndrome, * ngan makasurubo nga waray ito tambal,” maloloy-on nga nagsiring ha akon an mga doktor. Hito nga panahon gutiay gud la an hinbabaroan mahitungod hini nga talagsahon nga depekto ha genes. An komon nga sintomas hito nag-uupod hin kaharap nga nagriresulta hin kabuta, sobra nga katambok, sobra nga mga tudlo ha kamot ngan/o ha tiil, mahinay nga kaporma han mga bahin han lawas, kawaray koordinasyon, diabetes, osteoarthritis, ngan mga problema ha kidney. Salit magigin makuri gud an pagmangno ha akon mga anak. Ha usa nga bag-o la nga surbey, ginbanabana nga usa ha kada 125,000 nga tawo ha Britain an may-ada hini nga sakit, pero mas damu pa an bangin may-ada hito nga diri sugad kagrabe.

Waray pag-iha katapos ko mag-asawa, may nakaistorya ako nga usa han mga Saksi ni Jehova, ngan nasantop ko dayon nga igintututdo nira an kamatuoran. Kondi an akon bana diri gud interesado. Tungod han iya trabaho pirme kami nabalhin salit diri ako nakakatambong ha mga katirok. Bisan pa hito, padayon ako nga nagbabasa han Biblia ngan nag-aampo kan Jehova. Naliaw gud ako han nabasa ko nga ‘hi Jehova amo liwat an hitaas nga kuta nga arayopan han mga tinalumpigos, an hitaas nga kuta ha mga oras han kakurian’ ngan diri gud niya ‘isisikway an nakikigkita ha iya.’—Sal. 9:9, 10.

Hi Gary diri nakakakita hin maopay, salit han sais anyos hiya ginpaeskwela hiya ha usa nga boarding school ha sur nga baybayon han England para ha espesyal nga edukasyon. Pirme hiya natawag ha akon kon may nababarak-an hiya, ngan ha amon pag-istorya ha telepono nabuligan ko hiya nga masabtan an importante nga mga prinsipyo ha Biblia. Pipira ka tuig katapos ko ig-anak hi Louise, nagkaada ako sakit nga multiple sclerosis ngan fibromyalgia. Inuli hi Gary tikang ha pag-eskwela han 16 anyos hiya. Kondi nagtitikaharap na hiya, ngan han 1975 buta na gud hiya. Han 1977 ginbayaan kami han akon bana.

Waray pag-iha katapos nga inuli hi Gary, nakigbahin kami ha mga buruhaton han usa nga mahigugmaon nga kongregasyon, ngan nabawtismohan ako han 1974. Mapasalamaton gud ako han ginbuligan hi Gary han usa nga tigurang nga malamposan an pisikal nga mga pagbag-o nga iya naeksperyensyahan han tin-edyer hiya. An iba nga mga Saksi binulig ha akon ha mga buruhaton ha balay, ngan ha urhi lima ha ira an ginsweldohan han social welfare ha amon lugar basi mag-ataman ha amon. Daku gud ito nga bendisyon!

Hi Gary padayon nga nag-uswag hin maopay ha kamatuoran ngan nabawtismohan hiya han 1982. Karuyag gud niya mag-auxiliary payunir. Salit nagdesisyon ako nga updan hiya ngan padayon nga ginbuhat namon ito hin pipira ka tuig. Nalipay gud an akon anak han an amon paramangno han sirkito nagpakiana ha iya, “Gary, kay ano nga diri ka magregular  payunir?” Ito gud an pag-aghat nga kinahanglan ni Gary, ngan han 1990 gin-aprobahan hiya.

Duha ka beses nga gin-operahan hi Gary basi liwanan an iya pig-i, an siyahan han 1999 ngan an ikaduha han 2008, kondi mas grabe pa hito an sakit ni Louise. Natawo hiya nga buta, ngan han nakita ko nga sobra an iya tudlo ha usa nga tiil, nasantop ko nga may-ada liwat hiya LMBB syndrome. Waray pag-iha, han nagpakonsulta hiya ha doktor hinbaroan nga may seryoso liwat nga depekto an damu han iya mga organo. Ha paglabay han mga tuig, nagkaada hiya delikado nga mga operasyon, upod na hito an lima nga operasyon ha iya mga kidney. May-ada liwat hiya diabetes pariho kan Gary.

Tungod kay maaram hi Louise han magigin problema kon kinahanglan hiya operahan, nakikiistorya hiya ha mga doktor nga mag-oopera ha iya, ha mga anesthesiologist, ngan ha administrasyon han hospital antes hiya operahan basi isaysay kon kay ano nga diri hiya nagpapaabuno hin dugo. Sugad nga resulta, may maopay hiya nga relasyon ha ngatanan nga nagmamangno hin maopay ha iya mga problema ha lawas.

Damu an amon ginbubuhat ha balay para ha pagsingba kan Jehova. Han waray pa mga moderno nga elektroniko nga garamiton, damu ka oras nga ginbabasahan ko hira Gary ngan Louise. Yana tungod han mga CD, DVD, ngan mga nakarekord nga publikasyon ha www.pr418.com kami nga tulo nagpapahimulos han sinemana nga eskedyol han pag-aram han Biblia ha iba-iba nga oras, ngan nakakakomento kami ha mga katirok.

Usahay ginmimemorya ni Gary an iya mga komento, ngan kon may bahin hiya ha Teokratiko nga Eskwelahan ha Ministeryo iginpapahayag niya ito ha iya kalugaringon nga mga pulong. Han 1995 ginpili hiya nga ministeryal nga surugoon ngan pirme damu an iya buruhaton ha Kingdom Hall, gin-aabiabi an kabugtoan ngan nabulig ha sound system.

Gin-uupdan hi Gary han kabugtoan ha ministeryo, kasagaran ginduduso hiya sakay hin wheelchair tungod han iya artritis. Usa nga bugto an binulig ha iya pagdumara hin Bible study ha interesado nga lalaki. Gindasig liwat ni Gary an usa nga bugto nga 25 ka tuig na nga diri aktibo. Ito nga duha nga iya nabuligan natambong na yana ha mga katirok.

Han noybe anyos hi Louise, nahibaro hiya paggansilyo tikang ha iya Lola, ngan ako upod han usa nga nag-aataman ha amon nagtutdo ha iya pagborda. Tungod kay nalilipay gud hiya hito, naggagansilyo hiya hin mga taklap nga iba-iba an kolor para ha mga bata ngan ha mga edaran nga membro han kongregasyon. Naghihimo liwat hiya hin mga kard gamit an gudtiay nga iginpapadukot nga mga piktyur. An mga kard ginpapabilhan gud han mga nakakarawat hito. Han bag-o la nga tin-edyer hi Louise nahibaro hiya hin touch-typing. Yana, ha bulig han nagyayakan nga kompyuter regular nga nag-i-e-mail hiya ha iya kasangkayan. Nabawtismohan hi Louise han 17 anyos hiya. Ha mga espesyal nga kampanya han pagsangyaw, nalilipay kami nga duha pag-auxiliary payunir. Pariho kan Gary, hi Louise nagmimemorya hin mga teksto basi ipahayag an iya pagtoo ha mga saad han Dios nga kalibotan diin “an mga mata han buta pangangabrihon” ngan “an umurukoy diri masiring: Ako masakit.”—Isa. 33:24; 35:5.

Mapasalamaton gud kami ha birilhon nga mga kamatuoran ha giniyahan nga Pulong ni Jehova! Nagpapasalamat gud liwat kami ha mahigugmaon nga bulig han amon kongregasyon, kay kon waray ito diri gud namon mahihimo an kadam-an han amon buruhaton. Ngan labaw ha ngatanan, tungod han bulig ni Jehova may tinuod nga katuyoan an amon kinabuhi.